Konesi 7
7
Kulya na jam Setepano
1A koane duma pije Setepano adi, Kine kulya ’diri gwon sona le?
2 #
Sul 12.1
A nye waddi adi, Ta luŋasirik ko ta kobaba, yiŋge ta nan. Ŋun lo minyo köju a pukökin ko merenye likaŋ Abarayama na gwoŋdi nye Mesopotamia, i ŋerot nagon nye a ko nyuŋ tu i si ’da Aran nu. 3A nye takiŋdye lepeŋ adi, Ŋiörö kaŋo i jur ilot ko i karu kulök tojo i jur logon nan mo kwekwekin do lu. 4#Sul 11.31; Sul 12.4Nyena a nye kölökiŋdye jur lo ŋutu ti Kaledea a iti i si ’da Aran. A i mukök nagon monye aje twan nu, a Ŋun joŋdi Abarayama i lo jur logon ta soŋinana si ’da kata lo; 5#Sul 12.7; 13.15; 15.18; 17.8nyena a nye gwe a ko tikin lepeŋ lele swöt a lomore lonyit, ’bayin ma ’di a na ’dit nagon ŋuto tanyakiŋdye moköt nyin, ama nye a milyekin tiŋdu lepeŋ lo jur anyen gwon a lonyit se ko nyakwariat kanyit lo po kanyit i mukök kulo, ma ’di nagon nye ’bak ŋuro i nu diŋit.
6 #
Sul 15.13, 14 Kune a kulya nagon Ŋun a takin lepeŋ adi, Nyakwariat kulök mo si ’da a Lwaka i jur logon a leŋe lose lu, a ŋutu ti ŋilo jur mo tokitaji lepeŋat a ’dupi, a konakiŋdye lepeŋat arabat kipajin miajin iŋwan. 7#Yuö 3.12A Ŋun köti kulyani adi, Nan mo ’du ’dupökin putet i jur logon se mo kita kata a ’dupi lu, a i mukök a se mo poŋdi kaŋo i ŋilu jur a mo kitakiŋdye nan i na pirit. 8#Sul 17.10-14; Sul 21.2-4; Sul 25.26; Sul 29.31—35.18A kirut Ŋun tiŋdi Abarayama tomoret nagon kweyet nanyit a tawero na, a Abarayama yupundye Yisaka, a taweŋi nye i lor tobudök lonyit; a Yisaka yupundye Yakobo, a Yakobo yupundye merenyejin kaŋ puök wot murek kulo.
9 #
Sul 37.11;
Sul 37.28;
Sul 39.2, 21 A merenyejin kaŋ yule yulön ko Yosepa, a se tugwöŋi lepeŋ anyen jopa Ejipeto a ’dupiet; ama a Ŋun gwe ko lepeŋ, 10#Sul 41.39-41a lwöggi lepeŋ i sasanyesi kanyit liŋ, a tiŋdi Paro mor lo Ejipeto i nyaŋu na lepeŋ kogwon nye a lokoŋ. A Paro tiŋdi lepeŋ a mödir lo Ejipeto ko a duma lo mede nanyit ’bukuluŋ.
11 #
Sul 42.1, 2 A kirut dyap lo ’duki i jur lo Ejipeto ko lo Kanana ’bukuluŋ, a ŋutu iŋge dara parik, a merenyejin kaŋ tine ryo kinyo. 12A Yakobo ko yiŋge adi ’bolot kata Ejipeto, a lepeŋ soŋdi merenyejin kaŋ nyu. Ŋina a daŋ togeleŋ. 13#Sul 45.1; Sul 45.16A i tu nase daŋ tomurek, a Yosepa kwekiŋdye mugun i dena ko luŋasirik, a Paro iŋge den kotumit nase Yosepa. 14#Sul 45.9, 10, 17, 18; Sul 46.27A Yosepa soŋdi se i luŋgu na Yakobo monye lose ko mede nase liŋ anyen po Ejipeto. Lepeŋat liŋ a ŋutu merya buryo wot mukanat.
15 #
Sul 46.1-7;
Sul 49.33
A kirut Yakobo iti i jur lo Ejipeto; a lepeŋ se ko merenyejin kaŋ twatwaki nyu, 16#Sul 23.3-16; 33.19; 50.7-13; Yos 24.32a öpuö kase iŋge nyököji Sekeme, a nukani i gulom nagon Abarayama koju a gwörun ko pödö ko ŋwajik ti Amor i konisi Sekeme yu nu.
17 #
Yuö 1.7, 8 A nagon diŋit nagon Ŋun a milyekin Abatayama gwe nyona nu, a ŋutu kaŋ iŋge ŋoi jore Ejipeto yu, 18tojo ko lele mor a pukun i tumatyan ko Ejipeto ŋilo mor a ko den Yosepa.
19 #
Yuö 1.10, 11;
Yuö 1.22
A lepeŋ iŋge mumulugga ŋutu kaŋ a iŋge konakin merenyejin kaŋ arabat, a ri ’dikiŋdye se i gubaddu na luŋudiet kase mu ’diŋ anyen twatwa. 20#Yuö 2.2A i ŋinu diŋit a Mose iŋge yuŋwe a ŋuro logon kwekwelen ko nyanyara ko ŋun. Lepeŋ a wowoa ko monye midi yapala musala, 21#Yuö 2.3-10a na gubajine nye mu ’diŋ nu, a ŋuro na Paro ’dumuŋdye lepeŋ, a wowoji lepeŋ gwoso ŋuro lonyit.
22A Mose iŋge todiniki koŋon liŋ na ŋutu ti Ejipeto, a nye gwe ko riŋit i kulyaesi kanyit ko i konesi kanyit.
23 #
Yuö 2.11-15
A nagon Mose gwe ko kiŋajin gwoso merya iŋwan nu, a lepeŋ yeyeji ’yö ’yu luŋasirik kanyit logon a ŋutu ti Yisaraele kulo. 24a lepeŋ iŋge meddya lele lose i konaki arabat, a nye iti i juŋdyo na lepeŋ, a tatuje ŋilo Ejipetotyo ropakiŋdya ŋuto lo sasanya lo.
25Lepeŋ yeyeju adi luŋasirik ŋona a kurun adi Ŋun gwon i lwöggu na se kogwon könin lonyit, ama a se gwe a ko kurun. 26Ko ’bure nanyit a nye ’bunyö kiŋdye ŋutu murek ti Yisaraele momorö, a nye yöŋöni tomor a lepeŋat, a nye suŋge adi, Yakulo, ta a luŋasirik, ko nyo nagon ta konakiŋdya ’börik arabat sona? 27a kölumbö lele lo konakiŋdya marate lonyit arabat lo, dukaddi lepeŋ kaŋo a pije lepeŋ adi, ŋa lo tiŋdu do a kasaranit ko a ka ’duponit lo kulya kaŋ? 28Do yöŋö tatuja nan gwoso na tatuje do Ejipetotyo kaje nu le? 29#Yuö 18.3, 4A na yiŋge Mose kulo kulyaesi nu, a nye wöki i jur lo Midiyan a si ’dani nyu, a lepeŋ iŋge yupuŋdyö ŋwajik murek nyu.
30 #
Yuö 3.1-10
A ko kipajin merya iŋwan aje lwöŋgu, a malaikatat puköki ko lepeŋ i yöbu na mere Sinai, i rudu lo tutule.
31A na meddi Mose nu, a lepeŋ iŋge soŋu, a mijörö nyona i meddya, a nye yiŋge gworo lo Matat kulya adi,
32Nan a Ŋun lo merenyejin kulök, nan a Ŋun lo Abarayama, ko a Ŋun lo Yisaka, ko a Ŋun lo Yakobo. A Mose boŋdi böŋdu, a kujönöni kujönö meddya. 33a Matat takiŋdye lepeŋ adi, Rusu kamuka kulök kaŋo, kogwon pirit na gwo ’di ’e do ŋina a kak nake na rurwan. 34Nan ’diri aje met sasanya na ŋutu kwe Ejipeto yu, a nan iŋge yiŋ ’du ’duesi kase, a nan aje po kak ni i lwöggu na se, nyena po, a nan de soŋdi do Ejipeto yu.
35 #
Yuö 2.14
Ŋilo Mose a nye logon ŋutu ti Yisaraele aje renyari lo adi, Ŋa lo tiŋdu do a kasaranit ko a ka ’duŋönit lo kulya kaŋ? Ŋun a yökijö lepeŋ a kasaranit ko a kalwokönit, ko paret na malaikatat logon a pukökin kanyit i rudu lo tutule lo. 36#Yuö 7.3; Yuö 14.21; Ken 14.33a ŋilo Mose nyömoddi ŋutu kaŋ kaŋo i Ejipeto, a koŋdi sörösi ko kweyesi i Ejipeto ko i Tör Nator se ko i yobu ko kipajin merya iŋwan. 37#Nyö 18.15, 18Ŋilo a Mose logon a takiŋdya ŋutu ti Yisaraele adi, Ŋun mo totopukökin ta lele nebi gwoso na topuköki ’e nan i kiden na kötumit nasu nu. 38#Yuö 19.1—20.17; Nyö 5.1-33Lepeŋ a nye lo gwon i pirit na geleŋ ko ŋutu lo momora i yöbu, ko malaikatat lo jambu ko nye i mere Sinai lo, mora ko merenyejin kaŋ; a lepeŋ iŋge wuju kulyaesi lo yeyeŋon ti Ŋun, anyen nyönyökökin yi.
39Ama a merenyejin kaŋ koju tine ’bon twoju lepeŋ, a iŋge dukara lepeŋ a swot, a lepeŋat yeyeji kase i toilyet adi bia se kodyo gwon Ejipeto yu,
40 #
Yuö 32.1
a se takiŋdye Arona adi, Tetenaki yi ŋunyen logon nyombu yi. Kogwon Ŋilo Mose lo Joŋdya yi kaŋo i jur lo Ejipeto lo yi ti den ko nyo nagon a pokin ko lepeŋ. 41#Yuö 32.2-6A lepeŋat teteŋdi nene ŋo gwoso tagwok i kilu perok, a wukiŋdye ŋina nyomue rubaŋga, a se lyöŋi lyöŋön ko Ŋo na teten se na.
42 #
Amo 5.25-27
Ama a Ŋun lopukuŋdye kaŋo kase, a tiŋdi se i kitakiŋdya na kaset ti ki, gwoso na wurorikin i buk na nebijin nu adi,
Ta kotumit na Yisaraele, ta ŋona a ’duŋökiŋdyö nan toro ’bo a wukiŋdye a rubaŋgajin i yöbu yu kiŋajin merya iŋwan le?
43A ta koju yeyeggi kemia na Molok,
se ko kaserokoti logon a ŋun Repan, lepeŋat a nyomuejin logon ta a tetenanyen kwakwaddu se.Nyena nan mo jojoŋ ta pajo i lu swot lo Babela.
44 #
Yuö 25.9, 40 Merenyejin kaŋ koju gwon ko kemia i yobu yu nagon tokororikin adi Ŋun gwon ko se. Ŋina kemia koju a tetena gwoso nagon Ŋun a sarakiŋdya Mose i teteŋdya, gwoso i miret nagon nye a met nu. 45#Yos 3.14-17a merenyejin kaŋ logon a nyakwariat kase logon koju gwon ko Yosua i pirit na geleŋ kulo yeyekaddi ŋina kemia, i diŋit na morgi se jur logon Ŋun a riköro gweyajin ti ŋutu kaŋo kase i komor lu. A ŋina kemia iŋge si ’da nyu tojo ko perok ti Dawidi. 46#2 Sam 7.1-16; 1 Dek 17.1-14A Dawidi iŋge ryeju ’busan ko Ŋun i komor, a pije lepeŋ anyen nye tetenakiŋdya nye ŋun lo Yakobo pirit si ’daet. 47#1 Mor 6.1-38; 2 Dek 3.1-17Kolumbo a Solomona lo ’dukokiŋdye lepeŋ kadi. 48Ama Katoŋanit lo ki liŋ ti si ’da i kadijik nagon ŋutu lo ’duggo kune, gwoso na kulyari nebi nu adi, Matat lo kulya sona adi,
49 #
Yis 66.1, 2 ’Diko a si ’daet nio, a kak gwe a tokit nio na mokosi,
a kadi gwe a nyo nagon ta ’dukökin nan? iŋkoi, pirit a nyo nagon nan yukan kata?
50Konisi kwe ŋona ’bayin lo gweja kine ŋo liŋ le?
51 #
Yis 63.10
Nyena ta ŋutu logon ko muruto a nawo ’duŋak, logon toilyet se ko swo kasu gwon gwoso ti ŋutu logon ti yubbö ŋun, ta ŋupi renya Mulökötyo Loke. Ta kelaji ko merenyejin kasu.
52Lele lo nebijin ŋona kata logon merenyejin kasu koju a ko sasan le? Lepeŋat a tatuja ŋutu logon tuggo adi ŋilo Lorigwo mo popo, logon ta soŋinana aje tiŋdu lepeŋ ko merok i konisi, a tatuje lepeŋ. 53Ta a utu logon a wiriju Saresi ti Ŋun ko malaikajin i konisi, a ta kolumbo tine ’debba se.
Setepano a gugubatu ko ŋurupö
54A na yiŋge se kine kulya nu, a toilyet kase iŋge mien parik, a se pije kala kogwon lepeŋ. 55Ama a Setepano iŋge jore ko Mulokotyo Loke, a diŋe ki go, a meddi minyo lo Ŋun se ko Yesu gwogwo ’dan i konin lutaten lo Ŋun. 56A lepeŋ kulyani adi, Mete ta, nan a meddya ki a ŋai, a Ŋuro lo ŋuto gwo ’de i konin lutaten lo Ŋun. 57A se kolumbo worie wogon ko gworolo lobot, a ’dije swo kase, a se liŋ woki kanyit yu, 58a lepeŋat gubaddi nye kaŋo köji kata, a gugubuje nye ko ŋurupo. A ŋutu lo tökoŋu kulya ti lepeŋ kulo peddi boŋgwat kase ko lele titinti i komor karin kanyit a Saula anyen memet. 59a nagon se gwon i gugubuja na Setepano nu, a nye kwakwaddi adi, Matat Yesu, wuji kodudwo nio. 60A nye ’dorone kak ko kuŋwat, a kulyajine ki ko gworo lobot adi, Matat, ko tikin lepeŋat ŋina toron. A na kulyari nye sona nu, a nye twane twan.
Currently Selected:
Konesi 7: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
