Suluet 12

Ŋun a luŋgu Abarama

1 # Kon 7.2, 3; Eb 11.8 A MATAT kulyani ko Abarama adi, Ŋiörö kapo i jur losu, ko i karu kasu ko kase munyi mede, tojo i jur logon nan mo kwekwekin do lu. 2A nan mo tuŋduŋdye kaŋo konut jur duma, a nan mo ’boroji do, a töduma ’yi karin kunök, anyen do mo gwon a ’boriet. 3#Gal 3.8 A nan mo ’boroji Ŋutu logon ’boroja do kilo, a nan mo lömbi nye logon lömbu do lo; a kötumitön liŋ ti kak mo mo ’yi nan i ’boroja na se gwoso na ’boroji nan do na.

4Nyena a Abarama ŋine ŋien, gwoso nagon MATAT aje kulyari ko lepeŋ nu; a Loto koti moraddi ko lepeŋ. A Abarama gwe ko kiŋajin merya buryo wot mukanat na ŋiöddi nye kaŋo Karan nu. 5A Abarama ’dumuŋdye Sarai nakwan nanyit, ko Loto ŋuro lo luŋaser lonyit, ko toro ’bo liŋ nagon se a tutun kunu, se ko Ŋutu logon se a ryö Karan yu kulu; a se ŋiörö tojo i jur lo Kanana. A se ko ’dure i jur lo Kanana, 6a Abarama lwöŋöddi ŋilu jur, a iti tojo i pirit na gwon Sekeme yu, tojo i ködini logon a ri lo gwon More yu lu. A i ŋinu diŋit a Ŋutu ti Kanana gwe i ŋilu jur. 7#Kon 7.5; Gal 3.16a MATAT puköki ko Abarama, a kulyani adi, Nan titin nyakwariat kulök lo jur. A Abarama dipakiŋdye MATAT ’yuret na rubaŋgajin nyu, ŋilo a MATAT logon a pukökin ko lepeŋ lo. 8A nye ŋine ŋien nyu tojo i mere i swöt lo ’yure lo Betele, a nye ’beggi kemia nanyit nyu, a Betele gwe i swöt lo tokotyaŋ, a Ai gwe i swot lo ’yure. A nye dipakiŋdye MATAT nene ’yuret na rubaŋgajin nyu, a nye luŋgi karin ti MATAT. 9A Abarama Köti jölöjine ŋerot tojo i swöt lo Loki.

Abarama i jur lo Ejipeto

10A kak gwe a dyaŋ, a Abarama iti tojo Ejipeto, anyen tu mönuŋdyö nyu, kogwon kak gwe a dyaŋ parik. 11A nagon nye gwe nyona ko lupö Ejipeto nu, a nye kulyani ko nakwan nanyit Sarai adi, Mete, nan a den adi do a ŋuto nakwekwelen i meta;

12a mo gwe sona, ko Ŋutu ti Ejipeto mo a meddya do, a se mo kulyani adi, Ŋina a nakwan nanyit; nyena a se mo tatuje nan, ama a se mo kölökiŋdye do jörun. 13#Sul 20.2; 26.7Böŋö kulyani adi do a kiaser nio, anyen kulya kwe böŋö wörö ’bura kogwon kulya kunök, ko anyen se böŋö kölökiŋdyö nan i gwon jörun kogwon kulya kunök.

14A na ’durökiŋdye Abarama Ejipeto nu, a Ŋutu ti Ejipeto meddi adi ŋina nakwan kwekwelen parik. 15A Ŋutu ti Paro logon a kimak kulo ko meddi lepeŋ, a se pupurakiŋdye Paro kulya kanyit, a nu nakwan joŋani ko Paro mede. 16A Paro koŋdi Abarama ’bura kogwon kulya ti ŋina nakwan; a Abarama gwe ko yidin, ko dwönin, ko kaineki mönikön, ko ’dupi lyan ko nawate, ko kaineki nawate se ko kamilojin.

17A MATAT riŋge Paro ko mede nanyit ko twanajin iŋgo kogwon kulya ti Sarai nakwan na Abarama. 18A Paro luŋgi Abarama a pipije lepeŋ adi, Na ŋo a nyo nagon do a konakin nan na? Nyö nagon do ti takin nan adi nye a nakwan inot? 19Ko nyo nagon do a kulya adi nye a kiösur a nan joŋgi lepeŋ a nakwan nio? Nyenagon soŋinana mana nakwan inot, joŋgi lepeŋ ko morgi kiko ilot. 20a Paro saŋi Ŋutu kanyit i kulya ti Abarama; a se nyömöddi lepeŋ a kölöddi lepeŋ i tu mora ko nakwan nanyit se ko ŋo liŋ lo gwon ko lepeŋ kulu.

Currently Selected:

Suluet 12: BBE

Highlight

Copy