Suluet 37

Yosepa ko luŋasirik kanyit

1A Yakobo gwolore i lu jur lo si ’dari monye kata köju a leŋetyo lu logon a jur lo Kanana. 2A na gwe a nyönyökit na kulya ti ŋwajik ti Yakobo.

Yosepa gwon ko kiŋajin puök wot buryo, a lepeŋ gwe i yuggu na yidin ko luŋasirik kanyit i pirit na geleŋ; a ŋilo titinti gwe i pirit na geleŋ ko ŋwajik ti Bila ko ti Jilepa nagon a kölipönök wate ti monye lonyit kune; a Yosepa yekakiŋdye monye kulya narok ti luŋasirik. 3Ama a Yisaraele nyaŋi Yosepa lwölwöŋ ŋwajik kanyit liŋ, kogwon lepeŋ a ŋuro lonyit lo tomo doŋan; a nye ripakiŋdye lepeŋ jölöbiya. 4A luŋasirik ko meddi adi monye nyanyar lepeŋ lwölwöŋ se liŋ, a se maŋdi lepeŋ, a se tine bulö jambu ’bura ko lepeŋ.

5A Yosepa rudweni rudwe, a nye nyönyökökiŋdye luŋasirik kanyit kulo, a se ’yaladdi ŋerot i maŋdu na lepeŋ.

6A nye kulyani ko se adi, Yiŋge ta nan böŋö i ŋina rudwe na rudweri nan na:

7adi, yi gwon i totoroja na kusik ti ’bolot i melesen, a kwe nio na ’bolot na gwo ’de gwogwo; a kusik kasu ti ’bolot kune poŋdi i lopakiŋdya na kwe nio na ’bolot na kiden, a dulakine kak köyö i kwe na ’bolot na. 8A luŋasirik kulo ŋeddi lepeŋ adi, Do ’diri tutumatyan koyi le? Do ’diri molu lo saŋu yi gwak? A se ’yaladdi ŋerot i maŋdu na lepeŋ i kulya ti rudweesi kanyit ko i kulyaesi kanyit. 9A nye rudweni nene rudwe, a nye Köti nyönyökökiŋdye luŋasirik kanyit kulo adi, Mete ta, nan Köti a rudwe nene rudweet adi, kö kolor kö yapa kö kaser puök wot geleŋ a dulaki kak köyö i komöŋ. 10A na nyönyökökiŋdye nye mönye kö luŋasirik kine kulya nu, a monye ririŋge lepeŋ pija adi, Ŋina rudweet a nyo na rudweri do ŋina? Yi ko ŋuti ko luŋösurök ’diri ŋona mo popo i dulakiŋdya na ’börik kak konut i komor le? 11#Kon 7.9A luŋasirik kanyit yinöri yinöri lepeŋ, ama a monye ’delakiŋdye kine kulya kanyit i töili.

Yosepa a tugwörö a joŋani Ejipeto yu

12A luŋasirik ti Yosepa ŋulo iti i yuggu na yidin ti monye lose kune Sekeme yu. 13A Yisaraele pipije Yosepa adi, Luŋösurök a meyaddu yidin Sekeme, ti gwon sona le? Po, nan de soson do ko lepeŋat yu. A Yosepa ruŋge lepeŋ adi, lye, nan malo. 14A Yisaraele kulyani adi, Iti i meddya na luŋösurök kö lepeŋat a lo ’but nyu se kö yidin liŋ; kö ti do jaki nan lore. A nye sonyoddi lepeŋ kaŋo i pirit na ’dir na Keberon, a nye iti tu a ’dure Sekeme. 15A lele ŋuto rume ko lepeŋ na wirte nye mu ’dio nu, a lu ŋuto pipije lepeŋ adi, Do ga ’yu nyo? 16A nye waddi adi, Nan ga ’yu luŋasirik kwe. Taki nan böŋö ko se kulu yuyukuju ya. 17A lu ŋuto tukökiŋdye lepeŋ adi, Se aje ŋiörö ni; kogwon nan a yio se i kulya adi, Yi a tu ta Dotan. A Yosepa kepoddi luŋasirik kanyit kulo a ryeji se Dotan yu. 18A se ko metuŋdye lepeŋ nyuŋ pajo nagon nye a ko nyuŋ morakiŋdya kase kata nu, a se teteŋdi kiko mwönyit anyen tatuja lepeŋ. 19A se tokulyaki kö ’börik adi, Mete ta, mönye rudweesi lo nye lo poŋdi lu. 20Po ta, ti yi tatuje ta lepeŋ a gubakiŋdye öpu nanyit i nene dili; a yi mö kulyani adi gworoŋ lo koja lepeŋ, a yi mö meddi kö rudweesi kanyit mö pukun a nyö.

21Ama a Rubena kö yiŋge, a nye ’deke lwö kuŋdyö lepeŋ kase i könisi adi, Ti yi gwe ti jöŋ ru nanyit kaŋo. 22A Rubena kulyani kö se adi, Ko ’bukökin ta yi rima, ama gubaki ta lepeŋ i ŋina dili na gwon ni i yöbu na, ama an ta ko ’bulukiŋdyö ta könisi kasu ko lepeŋ loki. Rubena kulya sona anyen nye lwökuŋdyö lepeŋ kase i könisi, anyen I nye nyököddu lepeŋ ko monye yu. 23A ko gwe sona na ’durökiŋdye Yösepa kö luŋasirik kanyit yu nu, a se rusuŋdye boŋgo nanyit na kaŋo, kweja adi ŋina a jölöbiya na gwon kanyit i mugun na; 24A se morgi lepeŋ, a gubakiŋdye lepeŋ i dili. A nu dili gwe kana ’bak pioŋ.

25A se si ’dakine kak i nyesu na kinyo; a se ’bi ’yi konyen kase ki a metuŋdye teŋ na Ŋutu ti Yisamaele lo po Gilada I kulu, ko kamilojin kase nagon ’dukun dyö memelön na mon ’bura, ko memelon nagon a winikö, ko mur; kilo ŋo ’doköji Ejipeto. 26A Yuda pipije luŋasirik adi, ’Bulit a nyo koyi a tatuja luŋaser likaŋ a ’de ’yi rima kanyit? 27Po ta, ti yi tugwöröki ta lepeŋ i Ŋutu ti Yisamaele, ko ti yi gwe ti ’bulukin dyö könisi kaŋ kö lepeŋ loki kogwon nye a luŋaser likaŋ, Köti yi a mugun geleŋ. A luŋasirik kanyit kulo yiŋge lepeŋ. 28#Kon 7.9A Ŋutu ti Midiyan logon a kadöyök lo gwöruŋdye; a se pikuŋdye Yösepa a mökundye lepeŋ kaŋo i dili, a tugwörökiŋdye Yösepa i Ŋutu ti Yisamaele kö pödöjin merya murek; a se joŋgi Yösepa Ejipetö yu.

29A na yitöri Rubena i dili a kö meddi adi Yosepa gwe ’bayin i dili nu, a nye kekereŋdi boŋgwat kanyit kune. 30A nye yitöni kö luŋasirik kanyit yu, a nye kulyani adi, A dyoŋ! Lo ŋurö gwe ’bayin. A nan mo iti da? 31A se ’dumuŋdye boŋgo na Yosepa na, a se ’duŋge lopijot, a jurutökiŋdye boŋgo na i rima; 32A se soŋdi jölöbiya na a joŋgi ko monye yu kulya adi, Yi a ryö na boŋgo; gwulu ’ye ko nye a boŋgo na ŋuro ilot kode a leŋe. 33a nye iŋge gwulu, a kulyani adi, Na a boŋgo na ŋuro lio; wöidiö, gworoŋ aje koja lepeŋ; Yosepa ’diri aje nyei asut! 34A Yakobo kekereŋdi boŋgo nanyit, a torakiŋdye boŋgo tereket kanyit i mukök, a gwine gwien ŋuro lonyit perok jore. 35a ŋwajik kanyit liŋ lulyan ko nawate ŋiki i sugga na lepeŋ; ama a nye renyani renya suka, kulya adi, ’Bayin, nan mo tu kak i pirit na mulökö ko ŋuro lio yu gwigwiörö. A monye gwine lepeŋ sona. 36a kudyakan Ŋutu ti Midiyan kulo aje tugwör lepeŋ Ejipeto yu, tugwöröki Potipar logon kitakiŋdya Paro ko a duma lo katiyuk kanyit lo.

Currently Selected:

Suluet 37: BBE

Highlight

Copy