Suluet 38

Kulya ti Yuda ko Tamara

1A ko gwe sona i nu diŋit, a Yuda wuddye wuddya ko luŋa sirik kiden, a lulurara kak ko lele ŋuto lo Adulam yu karin kanyit a Kira. 2A Yuda ko meddi ŋuro na lele ŋuto lo Kanana karin kanyit a Sua; a nye yembi lepeŋ a dotoni ko lepeŋ. 3A nu ŋuro piŋge pigga a yuŋuŋdye ŋuro lulalet, a nye gwije lepeŋ a Er. 4A nye Köti piŋge pigga a yuŋuŋdye uro lulalet, a gwije lepeŋ a Onan. 5Köti i nene daŋ a nye yuŋuŋdye ŋuro lulalet, a gwije lepeŋ a Sela. A nye gwe Kejiba na yuŋuŋdye nye lepeŋ nu. 6a Yuda toyemakiŋdye Er ŋuro lonyit kayu nakwan, karin kanyit a Tamara. 7A Er kayu lo Yuda gwe a loron ko MATAT i komor; a MATAT tatuje lepeŋ. 8A Yuda kulyani ko Onan adi, Lupöni ko nakwan na luŋösur yu, ko konakiŋdye lepeŋ gwoso nagon luŋaser lo lalet kokoŋdi na, anyen do pipilukiŋdya luŋösur ŋwajik. 9Ama a Onan iŋge kurun adi kilo ŋwajik mo ti gwon a kanyit, a ko gwe sona ko lepeŋ aje lupö ko nakwan na luŋaser yu, a ’bukökiŋdye pioŋ yuŋweesi kune kak anyen nye gwon ti yuŋwekiŋdyö luŋaser lonyit ŋwajik. 10A ŋo na kon nye na gwe a naron ko MATAT i komor, a nye Köti iŋge tatu lepeŋ. 11A Yuda kulyani ko Tamara nakwan na ŋuro lonyit adi, Mönuŋdye a karu ’be ko munyi midi tojo ko diŋit nagon ŋuro lio Sela aje ’duŋö a duma. Lepeŋ kulya sona kogwon nye kukujönö adi an Sela twan gwoso luŋasirik kanyit kulo. Nyena a Tamara iti tu a si ’dani ko monye i ’baŋ.

12A ko diŋit aje lwoŋgu, a ŋuro na Sua nagon a nakwan na Yuda twane twan; nyena a nagon Yuda aje suka nu, alepeŋ ko ju lonyit Kira ŋuto lo Adulam iti tojo Timinat i Ŋutu kanyit ka ’barinuk ti kupir ti köbilu. 13A na tuköki ’e Tamara adi, Ŋogwo ilot lu tu Timinat i ’bariŋdu na kupir ti köbilu kanyit nu,

14a nye rusuŋdye boŋgwat terekesi kune kaŋo, a nye kalapakiŋdye boŋgo kanyit i mugun a muŋge komor nanyit, a si ’dakine i keret na kiko lo tu Enayim ko lo tu Timinat; kogwon nye aje met adi Sela aje golon, a nye gwe a ko tiki lepeŋ anyen nye gwon a nakwan nanyit.

15A Yuda ko meddi lepeŋ, a nye yeyeji adi lepeŋ a kawute, kogwon lepeŋ a muggö komor nanyit. 16A nye girara ko lepeŋ yu i merete lo kiko, a nye kulyani ko lepeŋ adi, Böŋö ti nan lupöni konut ŋini. Lepeŋ kulya sona kogwon nye a ko den adi lepeŋ a nakwan na ŋuro lonyit. A ŋina nakwan pipije adi, Do de tiŋdu nan nyo anyen do ködyö lupe köyö ni? 17A nye waddi adi, Nan mo susunyukin do kilolor meetyo lo ’dumwe i teŋ na yidin. A nu ŋuto Köti pipije adi, Do ŋona bubulö tiŋdu nan ŋo togwoet tojo ko do a sunyun lepeŋ? 18A Yuda waddi pija adi, Ŋo togwoet a nyo nagon nan tikin do? A nu nakwan waddi adi, Tiki nan katimanti inot, ko kamba inot, se ko ture lo gwon konut i könin lo. A lu ŋuto tiŋdi lepeŋ kine ŋo, a nye lupöni ko lepeŋ yu, a nu ŋuto ryeji pele ko lepeŋ. 19A nu ŋuto ŋine ŋien a iti tu, a lakuŋdye boŋgo na kalapakin nye na kaŋo, a jupukiŋdye boŋgwat kanyit terekesi kune.

20A na soŋdi Yuda kilolor meetyo ko ju lonyit ŋuto lo Adulam i könin anyen tu dakuŋdya po nagon a kölöki ko nu ŋuto i könin kune nu, a nye gwe a ko ryö nu ŋuto.

21Nyena a nye pipije Ŋutu lyan ti nu pirit adi, Niya kawute nagon sisi ’datu i merete lo kiko lo tu Enayim na? A se waddi adi, Nene kawute ’bayin ni. 22a lepeŋ yitöni bot ko Yuda yu, a kulyani adi, Nan a ko ryö lepeŋ, Köti Ŋutu ti ŋinu pirit kulya adi nene kalupe ’bayin nyu. 23A Yuda kulyani adi, Ti lepeŋ ’debbi kunu tito a kanyit an yi ko wuju yu na kwe; nan a son lo kilolor meetyo, ama do a ko ryö lepeŋ.

24A ko gwe sona i mukök na yapala musala, a Yuda tukökine adi, Tamara nakwan na ŋuro ilot aje koŋdya lulupötu, nye Köti aje ryeju pele i kulya ti lulupötu. A Yuda kulyani adi, Joŋe ta lepeŋ kaŋo, ko ti nye ’yurani ’yura ko kimaŋ. 25A ŋina ŋuto ko jweni kaŋo, a soŋdi kutuk ko ŋogwo lonyit yu adi, Ŋuto logon kune tito a kanyit lo nye lo topigga nan. A nye Köti kulyani adi, Böŋö titimbe na katimanti, ko na ka mba, ko lo ture ko se a ti ŋa. 26A Yuda ŋge ruk adi kine ŋo a kanyit, a kulyani adi, Nye a na rigwo totoŋun nan, kogwon nan a ko tiŋdu lepeŋ ko ŋuro lio Sela anyen gwon a nakwan. A Yuda gwe a ko dotori lepeŋ Köti kwöŋ.

27A ko gwe sona i diŋit nagon nye tata ’duri nu, mete, a kurudwöt gwe kanyit i pele. 28A ŋagon nye nyuŋ ŋoŋoŋga i ta ’duuŋdyö nu, a lele lupudi suuŋdye könin; a kata ’duanit morgi könin lonyit a torakiŋdye pata nator kanyit i könin kulya adi, Lo logon a kayu. 29A ko gwe sona, na nyököddi lupudi könin lonyit nu, mete, a luŋaser lonyit lo yuŋweni; a kata ’duanit na kulyani adi, Do a gwukiŋdyö mugun kijit gwoso ŋina! Nyena a lu lupudi gwiyöni a Perese. #38.29 Perese Karin ti Perese kweja adi Ne a gwukiŋdyo mugun kijit 30a i mukök a luŋaser lonyit lo yuŋweni logon a toraki pata nator kanyit i könin lo, a lepeŋ gwiyöni a Jerak.

Currently Selected:

Suluet 38: BBE

Highlight

Copy