Suluet 39

Kulya ti Yosepa ko nakwan na Potipar

1A Yosepa joŋani Ejipeto, a Potipar logon kitakiŋdya Paro ko a duma lo katiyuk kanyit lo gwörundye lepeŋ ko Ŋutu ti Yisamaele i könisi, logon a joŋga lepeŋ nyu kulo ŋilo Potipar a Ejipetotyo. 2#Kon 7.9A MATAT gwe ko Yosepa, a ŋo kanyit liŋ iti ’bura; a nye gwe ko duma lonyit midi logon a Ejipetotyo lo. 3A duma lonyit meddi adi MATAT gwon ko lepeŋ, a MATAT tiŋdi ŋo liŋ na kökon nye kine i tu ’bura kanyit i könin. 4A Yosepa ryeji ’busan kanyit i komor, a kitakiŋdye lepeŋ, a duma lonyit tiŋdi lepeŋ a kametanit lo mede nanyit, a nye tiŋdi ŋo liŋ na gwon kanyit kune ko lepeŋ i könin. 5A ko gwe sona, suluja i diŋit na tiki ’e lepeŋ a kametanit lo mede nanyit nu, ko lo ŋo liŋ na gwon kanyit kune, a MATAT ’boroji mede na Ejipetotyo lo kogwon kulya ti Yosepa; a MATAT ’boroji ŋo liŋ na gwon ko lepeŋ kine, i mede ko i melesen. 6A nye kölökiŋdye ŋo liŋ na gwon kanyit kune ko Yosepa i könin; a nye Potipar tine den nene ŋo amatuŋ deŋdya kinyo logon nye nyönyö lo.

Nyena a Yosepa kwelenye kwelen i mugun ko i meta. 7A ko gwe sona i mukök na kine kulya, a nakwan na duma lonyit sekiŋdye konyen ko Yosepa, a kulyani adi, Dotoni ko nan. 8Ama a nye renyani renya, a kulyani ko nakwan na duma lonyit adi, Mete, duma lio ti den ŋo ti mede nagon a tiki köyö i könin kune, iŋkoi, nye a tikin ŋo kanyit liŋ köyö i könin. 9Nye ti gwon a duma i na mede lwölwöŋ nan; Köti a nye gwe a ko tiŋikin nan nene ŋo, ama tuŋ tiŋikiŋdyö nan do geleŋ kogwon do a nakwan nanyit; nyenagon nan bubulö koŋdya ŋina toron duma ada i toroŋdya na Ŋun? 10Nyena ma ’di nagon nye a jajamaju ko Yosepa perok liŋ nu, a Yosepa tine yiŋ lepeŋ anyen doto ko lepeŋ, kode anyen si ’da ko lepeŋ i pirit na geleŋ. 11A i lele lor, a Yosepa luŋöni kadi i koŋdya na kita nanyit, a lele lo Ŋutu ti mede gwe ’bayin lukata, 12a nu ŋuto morgi lepeŋ i boŋgo kulya adi, Dotoni ko nan. Ama a Yosepa kölökiŋdye boŋgo nanyit na ko nu ŋuto i könin, a wöku kaŋo kadi kata. 13A nu ŋuto ko meddi adi lepeŋ a kölökin boŋgo kanyit i könin a wöki kaŋo, 14a nye luŋgi Ŋutu ti mede nanyit kulo, a tukökiŋdye se adi, Meddi ta, lalet lio a joŋdya Eberetyo kayaŋ kiden i kwekweni koyi; lepeŋ a lupe köyö ni anyen ko doto ko nan, a nan luluje lulujö parik; 15a na yiŋge nye nan i lulujö nu, a nye kölökiŋdye boŋgo nanyit na köyö ni, a wöki kaŋo kadi kata. 16A nye ’de ’yi boŋgo na lepeŋ na kanyit nyona tojo ko duma lo Yosepa a po mede. 17A nye nyönyökökiŋdye lepeŋ kine kulya adi, Ŋilo ’dupiet Eberetyo logon do a jon kayaŋ ni lo a lupe köyö ni i kwekweni ko nan; 18ama a nagon nan poki i lulujö nu, a nye kölökiŋdye boŋgo nanyit na köyö ni a wöki kaŋo kadi kata.

19A na yiŋge duma lo Yosepa kulyaesi ti narakwan nanyit na jambi nye ko lepeŋ adi, ’Dupiet ilot a konakin nan sona nu, a nye wore woran a tömönik. 20A ŋilo duma morgi Yosepa a tiŋdi lepeŋ i kadi rereket i nu pirit na rere-karikin Ŋutu ti mor nu, a nye gwe yu i kadi rereket. 21#Kon 7.9Ama a MATAT gwe ko Yosepa, a kwekiŋdye lepeŋ ’busan na nyaŋu nanyit, a tiŋdi duma lo kadi rereket lo i nyaŋu na lepeŋ. 22A katiyunit lo kadi rereket lo tiŋdi Ŋutu liŋ lo rereka nyu kulo ko Yosepa i könin; a ŋo liŋ nagon kokonatu nyu kune a Yosepa lo gwe a kakonanit lose; 23a katiyunit lo kadi rereket lo tine yeye nene ŋo na gwon ko Yosepa i könin kogwon MATAT gwon ko lepeŋ; a MATAT tiŋdi ŋo liŋ na kökon nye kine i tu ’bura.

Currently Selected:

Suluet 39: BBE

Highlight

Copy