Suluet 41
41
Yosepa a tökoŋu rudweet na Paro
1A ko gwe sona i mukök na kiŋajin murek, a Paro rudwenirudwe adi nye ge gwo ’dan nyona ko kijit na Supiri, 2mete, a kisuk buryo nakwekwelen ko a napir puku kaŋo i Supiri kata, a se nyesi nyesu i döru logon a lotole. 3Mete, a kisuk buryo puku kaŋo i Supiri kata kase i mukök a narok ko a nasok parik, a gwo ’de gwo ’dan nyona ko kunie kune kisuk nyona ko kijit na Supiri. 4A kunie kisuk narok ko a nasok parik kune nyesi nyesu kunie kisuk nakwekwelen ko a napir kune. A Paro purwene purwe. 5A nye Köti dotoni doto, a rudweni rudwe daŋ tomurek; mete, a kusik buryo ti ’bolot ’duruŋdye ki i winyanti geleŋ, a ruja ko a na ’but. 6Mete, a kusik buryo ti ’bolot ’duruŋdye ki kase i mukök, a muni a körö ko köbuŋöt lo ’yure. 7A kusik nagon a muni kune wi ’ye kusik buryo ti ’bolot na ruja ko a na ’but kune. A Paro purwene purwe, a iŋge den adi nye a rudwe.
8 #
Dan 2.2
A ko gwe sona i ko ’bure, a lepeŋ delyani delya i töili, a nye soŋdi Ŋutu i luŋgu na ’bunuk liŋ se ko Ŋutu lokoŋ liŋ ti Ejipeto; a Paro nyönyökö kiŋdye se rudweet nanyit, ama a lele ŋuto gwe ’bayin logon bubulö tokurukiŋdyö Paro kine rudweesi.
9Nyena a duma lo katumatak kulyani ko Paro adi, Nan a yiyiuŋdyö törönjin kwe i lo lor. 10Do Parö köŋju a woran kö kölipönök kulök, a tiŋdi nan se kö duma lo kaderak ti ambatajin i rereka i kadi na duma lo katiyuk; 11A yi murek liŋ rudweni rudwe i tukwaje geleŋ, ŋadi gwon ko rudweet nanyit ko tokoret nanyit. 12A lele titinti Eberetyo gwe nyu koyi, logon a ’dupiet lo duma lo katiyuk; a yi nyönyökökiŋdye lepeŋ rudweesi kaŋ kune, a nye tokurukiŋdye yi se ŋadi geleŋ ko tokoret na rudweet nanyit. 13A kulya na tokurukin nye yi kune iŋge kona; a nan nyökökine bot köyö i kita, a duma lo kaderak ti ambatajin lo iŋge liliki ki i tolo.
14Nyena a Paro soŋdi Ŋutu i luŋgu na Yosepa, a se joŋdi lepeŋ ’de ’de kaŋo i dili; a nye ’bariŋdi mugun, a leuddye boŋgwat kanyit kune, a lupöni ko Paro i komor. 15A Paro kulyani ko Yosepa adi, Nan a rudwe rudweesi, a lele ŋuto gwe ’bayin lo bubulö tokurukiŋdyö nan se; nan a yiŋ kulya kunök adi ko do a nyönyököki rudweet do bubulö tökoŋu ŋina rudweet. 16A Yosepa waddi Paro adi, ’Bayin a nan lo ruggö, ama Ŋun de lo rukökiŋdyö do Paro ruket na ’but. 17A Paro kulyani ko Yosepa adi, Mete, nan a rudwe adi nan gwo ’dan nyona ko kijit na Supiri; 18a nan meddi kisuk buryo na puku kaŋo i Supiri kata a napir ko a nakwekwelen, a se nyesi nyesu i döru lotole kata;
19a nan meddi kisuk kunie buryo puku kaŋo kase i mukök a nagitokok, ko a narok, ko a nasok parik; nan ’beron a ko met kisuk gwoso kine kwöŋ i jur lo Ejipetö. 20A kisuk nasök parik kö a narok kune nyesi nyesu kisuk buryo ti kokwe napir kune. 21Ama a na nyesi se lepeŋat nu, a lele ŋuto gwe ’bayin lögön ködyö deden adi se aje nyesu lepeŋat, kogwon se nyuŋ gwon a narok gwoso i suluet. Nyena a nan purwene purwe. 22a nan Köti rudweni rudwe adi kusik buryo ti ’bolot a ’duröddu ki i winyanti geleŋ nagon a ruja ko a na ’but; 23a kusik buryo nagon a muni ’duruŋdye ki kase i mukök a lilik, ko a muni, ko a körö ko köbuŋöt lo ’yure, 24a kusik ti ’bolot nagon a muni kune wi ’ye kusik buryo na ’but ti ’bolot kune. A nan nyönyö kökiŋdye ’bunuk kine kulya, ama a lele ŋuto gwe ’bayin logon bubulö tokurukiŋdyö nan kine rudweesi.
25A Yosepa kulyani ko Paro adi, Rudweesi kunök ti Paro kine a ŋo geleŋ; Ŋun aje kwekiŋdya do Paro ko nye gwe nyona ko koŋdya nyo. 26Kisuk na ’but buryo kune a kiŋajin buryo, a kusik na ’but buryo ti ’bolot kune gwe a kiŋajin buryo; rudweesi kune gwon a ŋo na geleŋ. 27Kisuk buryo nasok parik ko a narok nagon a pukun kase i mukök kune a kiŋajin buryo, a kusik buryo ti ’bolot nagon gwon kana nagon a körö ko köbuŋöt lo ’yure kune Köti gwe a kiŋajin buryo ti dyaŋ. 28Ŋun aje kwekiŋdya do Paro ŋo nagon nye gwe nyona ko koŋdya kune, gwoso na jamakiŋdye nan do na. 29Kiŋajin buryo ti rit kilo popo i jur lo Ejipeto liŋ, 30ama kiŋajin buryo ti dyaŋ mo pupukun kase i muicök; a Ŋutu mo böŋöri böŋöri rit i jur lo Ejipeto; a dyaŋ mo köŋi jur ’bukuluŋ, 31a Ŋutu mo tine yeye diŋit na rit kogwon kulya ti dyaŋ lo popo i mukök, kogwon lu dyaŋ mo gwon a loron parik. 32Ŋina rudwe inot daŋin murek na kweja adi Ŋun aje togwi ’dikiŋdya kine kulya go a mo nyoŋgi koŋdya se. 33Nyenagon soŋinana pon Paro, ti do galuŋdye ŋuto lotolok ko a lokoŋ, a tiŋdi lepeŋ a duma lo jur lo Ejipeto. 34Ti do koŋdi sona; ti do wuluŋdye Ŋutu logon meddya kitajin i jur, anyen tiŋdu Ŋutu i gwegwelundya na swöt geleŋ lo mukanat na kinyojin i jur lo Ejipeto i kiŋajin buryo ti rit kulo.
35Ti se tutunuŋdye kinyojin liŋ ti kilo kiŋajin lo ’but lo popo, ko ti se ’delakiŋdye ’bolot ko Paro i gugwö a ti köjinö, ko ti lepeŋat tini ti kilo kinyojin ’bura. 36A kilo kinyojin mo ’delani a ti jur kogwon kulya ti kilo kiŋajin buryo ti dyaŋ logon mo ’dukin i jur lo Ejipeto kulo; an Ŋutu ti jur twatwa ko dyaŋ.
Paro a tiŋdu Yosepa i gwon a kasaranit lo jur
37A Paro se ko kakitak kanyit liŋ mete kine kulya a na ’but. 38A Paro pipije kakitak kanyit adi, Yi bubulö ryeju lele ŋuto gwoso lo logon Mulökötyo lo Ŋun gwon ko lepeŋ i mugun le?
39Nyena a Paro kulyani ko Yosepa adi, Kogwon Ŋun a kwekiŋdya do kine kulya liŋ, kweja adi lele ŋuto ’bayin logon a lotolok ko a lokoŋ gwoso do.
40 #
Kon 7.10
Ti do gwe a duma lo mede nio, a Ŋutu kwe liŋ mo koŋdi gwoso na kulyari do na. Ama i kulya ti si ’daet nio na tumatyan ka ’de nan lo gwon a duma ilot. 41A Paro kulyani ko Yosepa adi, Nan a tin do a duma lo jur liŋ lo Ejipeto. 42#Dan 5.29A Paro rusuŋdye katimanti joket kaŋo kanyit i morinet, a rusukiŋdye ko Yosepa i morinet, a tojubbi lepeŋ ko boŋgwat nagon tetena ko waratat na ’but naparere, a lilikiŋdye nyorite lo dakaŋ kanyit i murut;
43a tiŋdi lepeŋ i tuwöröji kanyit i arabia lonyit lo jijikö logon a tomurek lo; a Ŋutu laije kanyit i komor adi, Rugwu ŋöni ta kak! A Paro tiŋdi lepeŋ i gwon a duma lo jur lo Ejipeto liŋ sona, 44a kulyani ko lepeŋ adi, Nan logon a Paro. Lele ŋuto ti bulö koŋdya nene ŋo kode tanyakiŋdya moköt i jur lo Ejipeto liŋ ko do a ko ruk. 45a Paro gwije Yosepa a Sapenat-paneak; a nye tiŋdi lepeŋ Aseneta a narakwan nanyit. Aseneta a ŋuro na Potipera koane lo On. A Yosepa wöröddi jur lo Ejipeto liŋ.
46A Yosepa gwe ko kiŋajin merya musala na lupökine nye i kita na Paro mor lo Ejipeto nu. A Yosepa iti kaŋo ko Paro i komor, a wöröddi i jur lo Ejipeto liŋ. 47A i kiŋajin buryo ti rit kulu, a kak rade radan kinyojin jore parik, 48a Yosepa tutunuŋdye kinyojin liŋ ti kiŋajin buryo ti rit i jur lo Ejipeto, a nye ’delakiŋdye kinyojin jore parik i köjinö lukata; kweja adi nye a ’de ’ya i kine köjinö kinyojin lo kuru kase i turön kulo. 49A Yosepa ’delakiŋdye ’bolot jore parik gwoso sese na tör na ’balaŋ, tojo nye a kö ’yu temba, kogwon ti bulö tema.
50A kokwe nagon kiŋa lo dyaŋ a ko nyuŋ po nu, a Yosepa yuŋwekine ŋwajik murek. Aseneta ŋuro na Potipera koane lo On na yuŋwekiŋdyö lepeŋ kilo ŋwajik. 51a Yosepa gwije kayu lo a Manase, #41.51 Manase Karin ti Manase kweja adi Tuböŋöju kulya adi, Ŋun a tuböŋöju nan i dara nio liŋ ko a tiŋdu nan i böŋöri na mede na baba liŋ. 52A nye gwije loponi a Epuraima, #41.52 Epuraima Karin ti Epuraima kweja adi Raradan kulya adi, Ŋun a tiŋdu nan ŋwajik i jur logon nan ŋoŋga kata lo.
53A kiŋajin buryo ti rit lo gwon i jur lo Ejipeto kulu ’duddye ’duddyö; 54#Kon 7.11 a kiriajin buryo ti dyaŋ suluje suluja gwoso na kulyari Yosepa nu. A jurön liri gwe ko dyaŋ; ama kinyo kata i jur liŋ lo Ejipeto. 55#Yoa 2.5 a na magorani Ŋutu ti jur lo Ejipeto liŋ nu, a se gwiuŋdye kinyo ko Paro; a Paro kulyani ko Ŋutu liŋ ti Ejipeto adi, Iti ta ko Yosepa yu; koŋdi ta kulya na kulyari lepeŋ ko ta kine. 56A nagon jur liŋ lo Ejipeto gwe ko dyaŋ nu, a Yosepa paji kadijik ’delesi liŋ a tugwörökiŋdye ’bolot i Ŋutu ti Ejipeto; kogwon dyaŋ gwe a duma i jur lo Ejipeto. 57a Ŋutu liŋ ti kak wöröni Ejipeto ko Yosepa ni i döju na ’bolot, kogwon dyaŋ gwe a duma parik i kak ’bukuluŋ.
Currently Selected:
Suluet 41: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.