Suluet 42

Luŋasirik ti Yosepa a tu Ejipeto i dööddu na ’bolot

1A Yakobo ko dene adi ’bölötkata Ejipeto yu, a lepeŋ pipije ŋwajik kanyit kulo adi, Nyö ta totoboŋ ko ’börik? 2#Kon 7.12Mete ta, nan a yiŋ adi ’bolot kata Ejipeto yu; iti ta nyu i gwörökiŋdyö na yi na ’bolot, anyen yi böŋö gwon jörun a tine twatwa. 3A luŋasirik puök ti Yosepa kulo iti Ejipeto i gwöruŋdyö na ’bolot. 4Ama a Yakobo tine sonyoddu Benyamina luŋaser lo Yosepa lo ko luŋasirik kanyit i pirit na geleŋ, kulya adi, An nene ŋo naron ŋona ko ’dukin ko lepeŋ.

5Nyena a ŋwajik ti Yisaraele moruŋdye ko Ŋutu lo po i gworo na ’bolot kulo, kogwon jur lo Kanana a dyaŋ. 6A Yosepa gwe a mödir lo lu jur; a nye lo tugwörökiŋdye Ŋutu liŋ ti lu jur. A luŋasirik ti Yosepa poŋdi po a rosokakine kak rupu kanyit i komor. 7A Yosepa meddi luŋasirik kanyit a gwulu’ye se, ama a nye konakiŋdye lepeŋat gwoso nye a lepetyo, a jambi ko se a kaŋa. A nye pipije se adi, Ta po ya? A se waddi adi, Yi po i jur lo Kanana yu i gwöruŋdyö na kinyo. 8A Yosepa iŋge gwulu luŋasirik kanyit sona, ama a se gwe a ko gwulu lepeŋ. 9#Sul 37.5-10A Yosepa yiyiuŋdye rudweesi nagon nye a rudweri r kulya kase kunu; a kulyani ko se adi, Ta a kawirak, ta a po ni i wiŋa na tomunyan na lo jur. 10A se kulyani ko lepeŋ adi, Pon duma likaŋ, yi ’bayin a kawirak, ama yi kölipönök kulök a po ni i gwöruŋdyö na kinyo. 11Yi liŋ a ŋwajik ti ŋuto geleŋ, yi a Ŋutu ti to ’diri, yi kölipönök kulök ti gwon a kawirak.

12A nye kulyani ko se adi, ’Bayin, ama ta a po i wiŋa na tomunyan na lo jur.

13A se kulyani adi, Yi kölipönök kulök a luŋasirik puök wot murek, yi a ŋwajik ti ŋuto geleŋ i jur lo Kanana; luŋaser likaŋ lo ’dutet lu gwon ko monye likaŋ i lo lor, a lele likaŋ gwe ’bayin. 14Ama a Yosepa kulyani ko se adi, ’Bayin sona, ta a kawirak gwoso na kulyari nan dika nu. 15Nan de tetem ta sona adi, ko luŋaser losu lo ’dutet lu ködyö a ko ’dur ni, ’diri ’diri gwoso na gwoŋdi Paro na, ta mo ti ŋiörö kaŋo i na pirit. 16Sonyoddi ta lele losu ko ti nye joŋdi ŋilu luŋaser losu, a ta leru mönuŋdyö i kadi rereket, anyen kulya na jam ta kune ködyö tetema kode ta a Ŋutu ti to ’diri. A ko ta a ’burönök, ’diri ’diri gwoso na gwoŋdi Paro na, ta ’diri a kawirak. 17A nye tiŋdi se liŋ i pirit na geleŋ i kadi rereket perok musala.

18A i mukök na perok musala a Yosepa kulyani ko se adi, Koŋdi ta sona a ta de gwe jörun, kogwon nan kukuk Ŋun: 19ko ta gwon a Ŋutu ti to ’diri, a ti lele lo luŋösurök mönuŋdye i kadi rereket kasu i pirit, ama ti kulye kilo ’dokoddi ’bolot kogwon midijik kasu a magor, 20ama jakiŋdye ta nan luŋaser losu lo ’dutet lu; nyena a kulya esi kasu mo temani tema kode se a gwak, a ta mo tine tatua. A se koŋdi sona.

21A se tokulyaki ko ’börik adi, Yi ’diri a lorok i kulya ti luŋaser likaŋ, kogwon yi köju a met soko ’bo nanyit na töili na mamaŋdi lepeŋ koyi nu a yi tine ’bön yiŋga; nyenagon ko na kwe ŋina soko ’bo aje pokin kayaŋ loki.

22 # Sul 37.21, 22 A Rubena waddi lepeŋat adi, Nan a ko jambu ko ta le adi, Ko koŋdya ta lo ŋuro arabat? Ama a ta tine ’bön yiŋga. Nyenagon mete ta, rima kanyit ’de ’dekarikin kayaŋ i kusik. 23a se tine den adi Yosepa a kurun kulya na jam se kune, kogwon kapu ŋutunit lo kulya kata kase kiden. 24a nye wöriŋöjine bot a gwine gwien; a nye yitwene kase ni Köti a jambi ko se. A nye ’dumuŋdye Simeona kase kiden a rereggi lepeŋ kase i komor.

Luŋasirik ti Yosepa a yitö Kanana

25A Yosepa saŋi adi ti jurakan kase kulo tojorene tojore ko ’bolot, adi ti gurut kase geleŋ geleŋ nyökökine kase i jurakan, Köti adi ti lepeŋat tikine kinyo lo kiko. A kine go iŋge konaki se. 26A se sopakiŋdye ’bolot kase i kaineki, a ŋiörö ŋiörö. 27A lele lose ko gaji jurak lonyit i tiŋdu na kaine i nyesu i pirit dotoet, a meddi gurut kanyit gwe i kutuk na jurak lonyit. 28A nye kulyani ko luŋasirik adi, Gurut kwe kune a nyököki nan; mete ta, se makune köyö i jurak! A töilyet kase iŋge lwö ’yu, a se totoboŋe ko ’börik böböŋdu, totopi adi, Na go a nyo nagon Ŋun a konakin yi na?

29A se ko ’dure ko Yakobo monye lose yu i jur lo Kanana, a nyönyökö kiŋdye lepeŋ go liŋ nagon a pokin kase kune, a kulyani adi, 30Lu ŋuto logon a duma lo lu jur a jambu koyi a kaŋa, yeyeju adi yi tu nyu i wiŋa na ŋilu jur.

31A yi kulyani ko lepeŋ adi, Yi a Ŋutu ti to ’diri, yi ti gwon a kawirak; 32yi a luŋasirik puök wot murek, ŋwajik ti monye likaŋ; lele geleŋ ’bayin, a twan, luŋaser likaŋ lo ’dutet lu gwon ko monye likaŋ i lo lor i jur lo Kanana.

33A lu ŋuto logon a duma lo lu jur lu kulyani koyi adi, Nan mo denuŋdya kasu sona ko ta a Ŋutu ti to ’diri: kölöki ta lele lo luŋasirik kasu köyö ni, ko joŋgi ta ’bolot kogwon midijik kasu a magor, ko morgi ta kiko losu.

34Taki ta nan luŋaser losu lo ’dutet lu; nyenagon a nan mo kuruŋdye adi ta ti gwon a kawirak ama a Ŋutu ti to ’diri, nyena a nan mo yukukiŋdye ta luŋaser losu a ta mo dödöji i lo jur.

35A ko gwe sona na ’bukuŋdye se ’bolot kaŋo i jurakan kase nu, mete, a toresi ti gurut ti Ŋutu liŋ geleŋ geleŋ gwe i jurakan kase; a na meddi lepeŋat se ko monye lose toresi ti gurut kase nu, a se kujönöni kujönö.

36a Yakobo monye lose kulyani ko se adi, Ta a tu ’baka ’yu nan ko gwajik kwe, Yosepa gwe ’bayin, Simeona Köti gwe ’bayin, soŋinana ta yöŋöni jogga Benyamina; kine delyaesi liŋ aje pokin köyö loki.

37A Rubena jambi ko monye adi, Ko nan ködyö a ko nyökun lepeŋ konut ni, a ti do tatuje ŋwajik kwe murek; böŋö tiŋdi lepeŋ köyö i könin, a nan mo nyökuŋdye lepeŋ konut ni.

38A nye renyani adi, Ŋuro lio ti tu ko ta, kogwon luŋaser lonyit aje twan, a nye lo kölökine geleŋ. Ko nene ŋo naron a mok lepeŋ i kiko lo tiri ta lu, a ta mo joŋgi kupir kwe lokwe kak i pirit na mulökö dedelyaji.

Currently Selected:

Suluet 42: BBE

Highlight

Copy