Suluet 43

Luŋasirik ti Yosepa a yitö Ejipeto yu ko Benyamina i pirit na geleŋ

1A dyaŋ gwe a duma i lujur. 2A ko gwe sona nagon se aje tutuggö nyesu ’bolot lo jon se kaŋo i jur lo Ejipeto yu kulu nu, a monye lose kulyani ko se adi, Iti ta Köti i gworo kiŋdyö na yi kinyo lo ’dit. 3A Yuda kulyani ko lepeŋ adi, Lu ŋuto a kukuju yi go adi, Ta mo ti meddya komor nio kwöŋ, ama tuŋ ko luŋaser losu gwon ko ta. 4Ko do a sonyoddu luŋaser likaŋ koyi, a yi de iti i gwörökiŋdyö na do na kinyo; 5ama ko do ti ’bön sonyoddu lepeŋ, a yi de tine tu nyu, kogwon lu ŋuto a kulya koyi adi, Ta mo ti meddya komor nio kwöŋ ama tuŋ ko luŋaser losu gwon ko ta. 6A Yisaraele pipije adi. Nyö ta konakiŋdya nan arabat sona? Nyö ta tukökiŋdyö lu ŋuto adi ta gwon ko lele luŋaser? 7A se waddi adi, Lu ŋuto a pipija yi ’bura i kulya kaŋ se ko i kulya ti Ŋutu kaŋ adi, Munyi nyuŋ gwon kata le? Ta ko lele luŋaser le? A yi waddi lepeŋ gwoso i piyesi kanyit; yi bubulö deŋdya ada adi nye mo kulya adi, Joŋdi ta luŋaser losu ni? 8A Yuda kulyani ko Yisaraele monye lonyit adi, Sonyoddi lo ŋuro ko nan i pirit na geleŋ, a yi de ŋine ŋien a iti tu, anyen yi ko do se ko lupudiet kaŋ böŋö ruru a tine twatwa.

9Nan mo lo gwo ’dan i kulya kanyit; a do mo pipije lepeŋ köyö i könin. Ko nan ködyö a ko nyökökin do lepeŋ a tiŋdi lepeŋ konut i komor, a ti ŋina toron ködyö gwe köyö loki ŋupi ŋupi.

10Koyi ködyö a ko karakin, yi ködyö aje tu ko aje yitwe daŋ tomurek.

11A Yisaraele monye lose kulyani ko se adi, Ko ködyö agu gwon sona, nyenagon koŋdi ta sona: nyunyumuŋdye ta ludweki logon a ti lo jur ko tiŋdi ta se kasu i jurakan, ko baraki ta ŋilu ŋuto a ’dokesi, kweja adi, meme na ’dit nagon a wini, ko siwatat a na ’dit, ko memelon na mon ’bura, ko mur, ko konyen ti kumurö, se ko konyen ti sakeda. 12’Dumakiŋdye ta gurut daŋin murek kasu i könisi; nyökörö ta gurut nagon gwon kasu i kutusen ti jurakan kune, kode ŋona köju a böŋörikin. 13Köti ’dumuŋdye ta luŋösur, ŋiörö ta, yitöni ta ko lu ŋuto yu. 14Ti Ŋun Kabulönit lo ŋo liŋ tiŋdi lu ŋuto i won konyen ko ta, anyen nye böŋö yukukin ta lu luŋaser losu se ko Benyamina. Nyena ko nan tu ’bakala ko ŋwajik kwe a ti nan tu ’bakalani tu ’bakala. 15A kilo Ŋutu ’dumuŋdye kunu ’dokesi, a se joŋgi gurut daŋin murek kase i könisi se ko Benyamina; a se ŋine ŋien tu Ejipeto, a gwo ’de gwo ’dan ko Yosepa i komor.

16A Yosepa ko meddi Benyamina ko lepeŋat, a nye kulyani ko duma lo kadi nanyit lo adi, Joŋe kilo Ŋutu kadi, ko ’duŋökiŋdye se lokore, ko teteŋdi teteŋdya; kogwon kilo ŋiitu de nyesu ko nan i tuparan kiden. 17A lu ŋuto koŋdi gwoso na sarakiŋdye Yosepa na, a joŋgi kilo nutu ko Yosepa kadi. 18A kilo Ŋutu kujönöni kujönö kogwon se a joŋa ko Yosepa kadi, a se kulyani adi, Yi a jwe lukata ni kogwon kulya ti gurut nagon a nyököki kayaŋ i jurakan a kokwe kune, anyen nye ködyö ’durukin kayaŋ loki i morga na yi a ’dupi se ko kaineki kaŋ kune. 19A se miju ko duma lo kadi na Yosepa nyona, a tujamaki ko lepeŋ i kötumit na kadi,

20kulya adi, Pon duma likaŋ, yi ’diri a po ni a kokwe i gwöruŋdyö na kinyo;

21a na ’durökiŋdye yi i pirit dotoet nu, a yi ŋaji jurakan kaŋ kulo, mete, a gurut ti Ŋutu liŋ geleŋ geleŋ gwe i kutusen ti jurakan kase, kweja adi ŋina temet na gurut kaŋ; nyena yi aje barun se kayaŋ i könisi, 22a yi aje joŋdya kunie gurut Köti kayaŋ i könisi anyen ko gwöröri kinyo. Yi ti den ko ŋa lo tiŋdu gurut kaŋ kayaŋ i jurakan. 23A lu ŋuto suŋge lepeŋat adi, Ti töilyet kasu gwe madaŋ, an ta ko kujönö ta; Ŋun losu logon a Ŋun lo munyi a tiŋdu ta tukwörien kasu i jurakan; nan a wu gurut kasu. A kirut nye yukuŋdye Simeona a joŋdi kaŋo kase ni.

24A ŋilo ŋuto joŋgi kilo Ŋutu ko Yosepa kadi, a tiŋdi se pioŋ, a se lalaji mokosi kase; a nye tiŋdi kaineki kase kune i nyesu, 25a se tetenakiŋdye kunu ’dokesi ajo i po na Yosepa i tuparan kiden, kogwon se a yiŋ adi se ködyö nyesu kinyo nyu.

26A na poŋdi Yosepa mede nu, a se joŋgi ’dokesi nagon se a jon kune i kadi lukata ko lepeŋ yu, a se rosokakine kak kanyit i komor. 27A nye pipije lepeŋat ko se a lo ’but, ko Köti pija adi, Munyi a lo ’but lu modoŋ lo jamakin ta nan kulya kanyit lu? Nye nyuŋ gwon jörun le? 28a se waddi adi, Kölipönit ilot baba likaŋ lu a lo ’but, nye nyuŋ gwon jörun. A se dulakiŋdye komorsikan kase kak a twöji lepeŋ. 29A nye boŋgi boŋga a meddi luŋaser lonyit Benyamina ŋuro lo ŋote nanyit, a pipije adi, Ŋilo a luŋaser losu lo ’dutet logon ta a jamakin nan kulya kanyit lo le? A nye kulyani adi, Ti Ŋun gwe ko ’busan ko do ŋuro lio! 30A Yosepa nyoŋgi nyoŋga kogwon töili lonyit gwon ko pusök yöŋö luŋaser lonyit, a nye ga ’yi pirit gwiet. A nye lupöni i toŋkwet a gwine gwien nyu. 31A nye lalaji komor nanyit a lupene kaŋo, a suŋge töili lonyit, a kulyani adi, Joŋdi ta kinyo. 32A kölipönök jakiŋdye nye kinyo ka ’de, a jakiŋdye luŋasirik kulo ka ’de, a jakiŋdye Ŋutu ti Ejipeto logon yeŋ nyesu ko lepeŋ kulo kinyo lose ka ’de, kogwon Ŋutu ti Ejipeto ti bulö nyesu ko Ŋutu ti Ebere i pirit na geleŋ, kogwon Ŋutu ti Ejipeto maman ŋo gwoso ŋina. 33a luŋasirik kulo tosi ’dakine kanyit i komor, kayu gwoso i tukayu nanyit, ko lo ’dutet i ’dutet; a se totoboŋe ko ’börik ko söŋu. 34A Yosepa kökorakiŋdye se kinyo logon kanyit i komor lo, ama a lepeŋ korakiŋdye Benyamina ko wöli daŋin mukanat lwölwöŋ na kulye luŋasirik kulo. Nyena a se möji möju a lyöŋi lyöŋön ko lepeŋ i pirit na geleŋ.

Currently Selected:

Suluet 43: BBE

Highlight

Copy