Suluet 50

1A Yosepa ’duruki ko monyeloki, a gwine gwien kanyit loki, a ’biuŋdye lepeŋ. 2A Yosepa saŋi kölipönök kanyit logon a bodwat kulo i tokworoggu na öpu na monye. A boŋwat kulo tokworoggi öpu na Yisaraele na, 3a joŋgi perok merya Iŋwan i tokworoggu na lepeŋ kogwon perok tokworokesi a temaki sona. A Ŋutu ti Ejipeto gwine lepeŋ ko perok merya buryo.

4A nagon perok logon Ŋutu gwien lepeŋ kulo aje jo nu, a Yosepa kulyani ko mede na Paro adi, Ko ta a met adi kulya kwe a na ’but kasu i komor, böŋö jamaki ta Paro adi, 5#Sul 47.29-31Baba a tomilyeji nan adi, Nan lo gwe nyona ko twan; a do mo nukaki nan i dili na ’bokakin nan mugun i jur lo Kanana nu. Nyenagon böŋö ti nan iti i nugga na baba, a nan mo yitwene yitwe.

6A Paro waddi adi, A na ’but, iti i nugga na munyi gwoso na tomilyeji nye do nu. 7A Yosepa iti i nugga na monye; a kakitak liŋ ti Paro logon a temejik ti mede nanyit kulo moraddi ko nye, se ko temejik liŋ ti jur lo Ejipeto, 8ko Ŋutu lio ti mede na Yosepa, ko luŋasirik kanyit, ko Ŋutu ti mede na monye; ama tuŋ ŋwajik kase se ko teŋon kase ti yidin ko ti kisuk a kölöki i jur lo Gosene. 9A arabiajin lo jijikö se ko kajoŋak ti kusanjin moraddi ko lepeŋ, a kulu Ŋutu gwe jore parik. 10A se ’dure Alada i nu pele na Yardene, nagon a pirit gwutet na ’bolot, a se gwine gwien nyu parik ko delya a duma lulujö; a Yosepa koŋdi delya na monye lonyit ko perok buryo. 11A Ŋutu ti ŋilu jur logon a Ŋutu ti Kanana, ko meddi delya na kona i pirit gwutet na ’bolot Atada yu nu, a se kulyani adi, Na ’diri a delya duma na Ŋutu ti Ejipeto. Nyena a nu pirit luŋuni a Abele-misirayim; ŋina pirit gwon i nu pele na Yardene. 12A ŋwajik ti Yakobo konakiŋdye lepeŋ gwoso na saŋi nye se nu; 13#Kon 7.16kogwon ŋwajik kanyit a ’dokoddu nye tojo ko jur lo Kanana, a nuŋge lepeŋ i kuggi i kak na Makpela na gwon i swot lo ’yure lo Mamure. Abarayama a gwörun ŋina kuggi mora ko ŋina kak i könin lo Epurön lo kötumit na Ket anyen gwon a pirit nuket nagon a lomore nase.

14A i mukök na nuŋge nye monye nu, a Yosepa yitöni Ejipeto ko luŋasirik kanyit, se ko Ŋutu liŋ logon a tu ko lepeŋ i nugga na monye lonyit kulo.

Yosepa a sugga luŋasirik kanyit

15A luŋasirik ti Yosepa ko meddi adi monye aje twan, a se tokulyaki ko ’börik adi, Yosepa ŋona mo maman yi kode ada, a ropakiŋdye yi i ŋo narok liŋ na konakin yi lepeŋ kunu. 16A se sunyukiŋdye Yosepa kutuk adi, Munyi a saŋu a kokwe na twan nanyit adi,

17Ta mo jambu sona ko Yosepa adi, Böŋö pitöki lyaŋesi ti luŋösurök ko toron nase, kogwon se aje konakiŋdya do arabat. Ama soŋinana, böŋö pitöki yi kölipönök ti Ŋun lo munyi i lyapesi kao. A Yosepa gwine gwien na jambi se ko lepeŋ nu. 18A luŋasirik kanyit koti poŋdi po a rosokakine kak kanyit i komor, a kulyani adi, Yi kulo gwe a kölipönök kulök. 19A Yosepa kulyani adi, Ko kujönö ta, nan ŋona a ruddya pirit na Ŋun le? 20Ama ko gwe gwoso ta, ta a yeyeju konakiŋdya nan arabat; ama Ŋun a yeyeju ŋo na ’but, anyen lwöggu Ŋutu jore anyen se ködyö yeŋon gwon jörun gwoso na gwoŋdi se i lo lor na. 21Nyenagon soŋinana ko kujönö ta; nan mo tunyeju ta se ko ŋwajik kasu. A nye suŋge se a töilyet kase yuke yukan.

Twan na Yosepa

22A Yosepa gwolore Ejipeto, lepeŋ se ko Ŋutu ti mede na monye; a nye gwolore kiŋajin mia geleŋ ko puök.

23A Yosepa iŋge met ŋwajik ti Epuraima ti nyakwari tomusala; a Köti ŋwajik ti Makir ŋuro lo Manase ta’dukine ko Yosepa i puŋdyat. 24a Yosepa kulyani ko luŋasirik adi, Nan lo gwe nyona ko twan, ama Ŋun ’diri mo ti jaran po i parakiŋdya na ta, a mo joŋgi ta kaŋo i lo jur tojo ko jur logon nye a milyekin tiŋdu Abarayama, ko Yisaka, se ko Yakobo lu. 25#Yuö 13.19; Yos 24.32; Eb 11.22a Yosepa tomilyeji ŋwajik ti Yisaraele adi, Ŋun ’diri mo ti jaran po i parakiŋdya na ta, a ta mo baraddi kuyu kwe kaŋo ni.

26Nyena a Yosepa twane twan i diŋit nagon nye gwe ko kiŋajin mia geleŋ ko puök nu; a se tokworoggi öpu nanyit, a tikine i saŋduk nuket Ejipeto yu.

Currently Selected:

Suluet 50: BBE

Highlight

Copy