Yoane 20

Yesu a ŋien i twan

(Matayo 28.1-10; Marako 16.1-8; Luka 24.1-12)

1A i lor lo Sabata lo Yudayaki i kotumalu nanyit nagon kak a ko nyuŋ waran nu, a Maria na po Magadala dikara i gulöm a meddi adi ŋurupit aje gwuluŋöji kaŋo i kutuk na gulöm.

2Nyena a nye wöki wökön, a iti ko Simona Petero se ko lele ŋuto kajuju munit yu logon Yesu nyanyar lo, a takiŋdye lepeŋat adi, Se aje ’dumara MATAT kaŋo i gulöm. Yi ti den ko se a ’delakin lepeŋ da. 3Nyena a Petero se ko lele ŋuto kajujumunit lo ŋine ŋien, a iti i gulöm. 4A lepeŋat murek wöki wökön i pirit na geleŋ; ama a lele ŋuto kajujumunit lo iŋge rwösökin Petero bot, a ’dure i gulöm a kokwe.

5A nye dulakine kak a ku ’di ’ye lukata, a nye meddi boŋgwat i gwon kak; ama a nye gwe a ko lupö lukata. 6A kirut Simona Petero lo ’dure kipuŋdyö lepeŋ, a nye lupöni i gulom; a nye meddi boŋgwat i gwon kak sonu, 7a boŋgo na ’dit nagon gwon ko lepeŋ i kwe na tine gwon ko kunie kune boŋgwat i pirit na geleŋ, ama a ŋudula a gwe ka ’de.

8A kirut lele ŋuto kajujumunit lo logon aje ’dur i gulom a kokwe lo köti luponi lukata, a nye iŋge met a yubbe yubbö.

9A se nyuŋ gwe a ko kurun kulya ti Ŋun na wurö nagon kulya adi nye mo agu ŋiŋien i twan. 10Nyena a kilo ŋutu kajujumuk yitöni kase i midijik.

Yesu a pukökin ko Maria na po Magadala

(Köti Matayo 28.9-10; Marako 16.9-11)

11Maria nyuŋ gwo ’dan i gulöm kaŋo gwigwien. A nye ko gwine, a nye dulakine kak i ku ’di ’yö na gulöm, 12a nye meddi malaikajin murek nyu, a jupu boŋgwat nakwe, si ’da i pirit nagon öpu na Yesu dika gwon kata na, lele si ’da i kwe ko lele i mokosi. 13A se pije lepeŋ adi, Do ŋina ŋuto, do gwi nyo? A nye waddi lepeŋat adi, Nan gwi kogwon se a ’dumara MATAT liŋ kaŋo i gulöm, a nan tine den ko se a ’delakin lepeŋ da. 14A nagon nye aje kulya sona nu, a nye löpuköni löpukö, a meddi Yesu gwogwo ’dan nyu, am ’a a nye gwe a ko gwulu adi a Yesu. 15A Yesu pije lepeŋ adi, Do ŋina ŋuto, do gwi nyo? Do ga ’yu ŋa? A nye yeyeji adi kode ŋona lepeŋ a kametanit lo melesen, nyena a nye pije lepeŋ adi, Duma liŋ, ko ŋona do lo ’dumaddu lepeŋ; tuköki nan pirit nagon do aje ’delakiŋdye lepeŋ kata nu, anyen nan tu jojoŋ lepeŋ. 16A Yesu luŋgi lepeŋ adi, Maria! A nye wöriŋöni wöriŋö a kulyani ko lepeŋ i kutuk na Ebere adi, Raboni! (Raboni nyönyökö adi, Katodinönit liŋ.) 17A Yesu kulyani ko lepeŋ adi, Ko mok nan, kogwon nan nyuŋ a ko tu ki ko Baba yu; ama iti ko luŋasirik kwe yu, ko tuköki se adi, Nan lo iti ki ko Baba yu logon a Munyi. Nan lo iti ko Ŋun liŋ yu logon a Ŋun losu. 18Nyena a Maria na po Magadala iti ko kajujumuk kulo yu a takiŋdye se adi, Nan aje met MATAT; a Maria köti nyönyökökiŋdye se kulya na takin Yesu nye kune.

Yesu a pukökin i ŋutu kanyit kajujumuk

(Köti Matayo 28.16-20; Marako 16.14-20; Luka 24.36-49)

19A gwe i sömukö i ŋilu lor logon a lor lo Sabata lo Yudayaki i kotumalu nanyit, a ŋutu kajujumuk kulo iŋge momorja i pirit na geleŋ, a kötumitön iŋge kiki ŋutu kogwon se kukujönö Yudayaki, a Yesu lo ’dure a gwo ’de kase kiden, a rome ko se adi, Ti taliŋ gwe ko ta. 20a nagon nye aje roman sona nu, a nye kwekiŋdye lepeŋat könisi kanyit se ko merete lonyit. Nyena a ŋutu kajujumuk kulo ko meddi MATAT, a se lyöŋi lyöŋön parik. 21A Yesu köti rome ko se adi, Ti taliŋ gwe ko ta. Nan soson ta gwoso nagon Baba aje sunyuŋdyö nan na. 22a nye ko kulyani sona, a nye yukakiŋdye se adi, Wuji ta Mulökötyo Loke. 23#Mat 16.19; 18.18Ko ta pipitökin toronjin ti lele ŋuto a se köti pitökine pitöki; a ko ta a mok toronjin ti lele ŋuto a se köti mokani moka.

Toma a ko yuŋ

24A Toma lo luŋu a Kurudwötti, logon a lele lo kajujumuk puök wot murek lo, gwe ’bayin kase kata na poŋdi Yesu nu. 25Nyena a kulye kulo ŋutu kajujumuk tukökiŋdye lepeŋ adi, Yi aje met MATAT. A Toma kulyani ko lepeŋat adi, Ko nan a ko met reto ti musumar kanyit i könisi, ko nan a ko sukin morinet liŋ i dilyö ti musumar, a ko nan a ko sukin könin liŋ kanyit i merete, a nan tine yuŋ.

26A i mukök na perok budök a ŋutu ti Yesu kajujumuk kulo köti momorakiŋdye kadi, a Toma gwe ko lepeŋat i pirit na geleŋ. A kötumitön iŋge kiki nutu, ama a Yesu lo ’dure, a gwo ’de kase kiden, a rome ko se adi, Ti taliŋ gwe ko ta. 27a kirut a nye kulyani ko Toma adi, Riyu morinet ilot ni ko meddi könisi kwe; riyu könin ilot ko suki köyö i merete. An do ko gwon a kadyadyalanit ama yupe yuŋ. 28A Toma waddi lepeŋ adi. A, pon MATAT liŋ, Ŋun liŋ! 29A Yesu kulyani ko lepeŋ adi, Do ŋona yubbö kogwon do aje met nan? ŋutu logon a ko met nan ama aje yuŋ kilo a kalyöŋök.

Kwe nagon ŋina buk a wurö

30Yesu aje koŋdya kunie kweyesi jore ko kajujumuk kanyit i komor nagon a ko wuröki i na buk; 31ama kine kulya a wurö anyen ta böŋo yuyubbö adi Yesu a Masia Ŋuro lo Ŋun, koti anyen na yubbe ta na a ta gwe jörun i karin kanyit.

Currently Selected:

Yoane 20: BBE

Highlight

Copy