Yoane 21

Yesu a pukökin i kajujumuk kanyit buryo

1A i mukök na ŋina a Yesu köti kwekiŋdye mugun i ŋutu kanyit kajujumuk i tör na Tiberia; lepeŋ a kwekiŋdya mugun sona. 2a Simona Petero, ko Toma lo luŋu a Kurudwötti, ko Nataniele lo po Kana yu i jur lo Galilaya, ko ŋwajik ti Jebedayo, se ko kulye ŋutu kajujumuk murek ti Yesu liŋ gwe i pirit na geleŋ. 3#Luk 5.5A Simona Petero kulyani ko lepeŋat adi, Nan lo tu i logga na somot. A lepeŋat waddi lepeŋ adi, Ti yi moraddi ko do. A se iti tu a kiyaddi i ki ’bo kata, ama i ŋilu tukwaje ’bukuluŋ a se gwe a ko morga nene ŋo. 4A ko kak aje waran, a Yesu gwe nyu gwogwo ’dan i kijit, ama a ŋutu kajujumuk kulo gwe a ko gwulu adi ŋilo a Yesu. 5A Yesu luŋgi lepeŋat adi, Ŋwajik, ta ŋona a morga nene ŋo le? A se waddi lepeŋ adi, Yi a ko morga nene ŋo kwöŋ. 6#Luk 5.6A nye takiŋdye se adi, Gubara ta ku ’yi i swöt lutaten lo ki ’bo, ta de ryöryö. Nyena a se gubaddi gubaddu, mete, soŋinana a se tine bulö piköddu ku ’yi i ki ’bo kata, kogwon somot jore parik. 7a ŋuto kajujumunit logon Yesu nyanyar lo tukökiŋdye Petero adi, Aso ŋilu a MATAT! A Simona Petero ko yiŋge adi ŋilu a MATAT, a nye jupukiŋdye boŋgo nanyit na kido na kogwon nye gwon a limu kana, a nye labara i tor; 8a kulye kulo ŋutu kajujumuk lo ’dure i kijit kase i ki ’bo, pikuŋdyö ku ’yi a jore ko somot, kogwon lepeŋat ’bayin pajo ko kijit, ama gwon gwoso lasesi mia geleŋ.

9A nagon se aje po kaŋo nu, a se meddi kimaŋ na kuk, a somot ko ambatajin iŋge peta nyin. 10A kirut Yesu takiŋdye lepeŋat adi, Joŋdi ta kulye somot logon ta soŋinana aje momokun kilo. 11Nyena a Simona Petero kiyaddi i ki ’bo kata a pikuŋdye ku ’yi i kijit, a jore ko somot dumalak mia geleŋ ko merya mukanat wot musala. Ma ’di ködyo se jore sona, a ku ’yi gwe a ko giŋdya. 12A Yesu luŋgi lepeŋat adi, Po ta, ko nyesi ta. A lelelo ŋutu kajujumuk gwe ’bayin logon a purutat i pija na lepeŋ adi, Do a ŋa? kogwon se a den adi lepeŋ a MATAT.

13A Yesu poŋdi po, a ’dumuŋdye ambatajin, a tiŋdi lepeŋat, a nye köti koŋdi sona ko somot kune. 14Ŋina a daŋ tomusala nagon Yesu aje kwekiŋdya mugun i ŋutu kajujumuk i mukök nagon nye aje ŋien i twan nu.

Tunyöni yidin kwe

15A nagon se aje nyesu nu, a Yesu pije Simona Petero adi, Simona ŋuro lo Yöaŋe, do nyanyar nan Iwolwöŋ kilo? A nye ruŋge adi, lye MATAT, do a den adi nan nyanyar do. A Yesu takiŋdye lepeŋ adi. A ti do tunyoni yisi kwe. 16A Yesu koti pije lepeŋ daŋ tomurek adi, Simona ŋuro lo Yoane, do nyanyar nan? A nye ruŋge adi, lye MATAT, do a den adi nan nyanyar do. A Yesu takiŋdye lepeŋ adi, A ti do yuggi yidin kwe. 17a Yesu köti pije lepeŋ daŋ tomusala adi, Simona ŋuro lo Yöaŋe, do nyanyar nan? A Petero gwe ko delya kogwon Yesu a pija nye daŋ tomusala adi, Do nyanyar nan? A nye waddi lepeŋ adi, MATAT, do deden ŋo liŋ; do a den adi nan nyanyar do. A Yesu takiŋdye lepeŋ adi, A ti do tunyöni yidin kwe. 18’Diri ’diri nan takiŋdya do adi, Na gwoŋdi do a titinti na, do yeŋ toŋa mukök ko kamba a wöröjine i piritön nagon do ’de ’dekan tu kata; ama ko do gwe a modoŋ, a do mo rije könisi a lele ŋuto mo lo toŋi do, a mo joŋgi do i pirit nagon do ködyö ti ’bön tu kata nu. 19Lepeŋ jambu kine kulya, kwekiŋdya ko Petero mo twan ada anyen bu ’ya Ŋun. A nagon Yesu aje jambu sona nu, a nye takiŋdye Petero adi, Kipuŋdye nan.

Kajujumunit logon Yesu nyanyar lo

20 # Yoa 13.25 A Petero woriŋöni wöriŋö, a meddi lele kajujumunit logon Yesu nyanyar lo kikiŋuŋdyo. (Nye ŋilo ŋuto logon tökökiŋdyö mugun nanyit ko Yesu i kido i diŋit na nyesu, a pije adi, MATAT, ŋa lo tiŋdu do i tatua?) 21a Petero ko meddi lepeŋ, a nye pije Yesu adi, MATAT, kulya ti ŋilo ŋuto mo gwon ada? 22A Yesu waddi pija lepeŋ adi, Ko nan ködyö ’de ’dekan ti nye möŋdi möŋdu tojo nan a po, a kulya kunök gwe a nyo kata? Kölumbö kipuŋdye nan. 23a ŋilo lore reara i luŋasirik lo yubbö kulo adi ŋilo ŋuto kajujumunit ti twan. Ama Yesu a ko kulya ko Petero adi ŋilo kajujumunit ti twan, ama adi, Ko nan ’de ’dekan ti nye möŋdi mordu tojo nan a po, a kulya kunok gwe a nyo kata?

24Ŋilo a ŋuto kajujumunit logon aje tokoŋu kine kulya, a iŋge wuŋo se, a yi deŋdi adi kulya na tokor lepeŋ kune a gwak.

25Nyena kunie ŋo jore kata koti nagon Yesu aje kon. Ko se liŋ geleŋ geleŋ kodyö a wurö, nan yeyeju adi kak na a na ’dit ti jukin wuju bukön nagon ködyo wuwurö kune.

Currently Selected:

Yoane 21: BBE

Highlight

Copy