Konesi 1
1
1 #
Luk 1.1-4
Pon Teopilo, i buk na kokwe nan a wuŋo kulya liŋ nagon Yesu a kon ko a todin kune, suluja i suluet
2tojo ko lor lo ’depaji ’e nye ki lu, i mukok nagon nye aje tiŋdu luyökie lo wulun nye kulo saresi i riŋit na Mulokotyo Loke. 3Lepeŋ a kwekiŋdya se mugun nanyit i mukok na twan nanyit ko kweyesi jore adi nye gwon jörun. Nye a pukokin ko lepepat ko perok merya iŋwan, a nye iŋge jamakin se kulya ti Tumatyan na Ŋun. 4#Luk 24.49A nagon nye gwon ko se i pirit na geleŋ nu, a nye saŋi lepepat adi, Ko kolokin ta Yerusalema, ama riŋdi ta ŋo nagon Baba a rukokin tiŋdu ta na, nagon ta a yiŋun kulya kanyit köyö na. 5#Mat 3.11; Mar 1.8; Luk 3.16; Yoa 1.33Yoane koju batiddya ŋutu ko pioŋ, ama i perok ku ’dik ta mo batisa ko Mulökötyo Loke.
Yesu a ’depaji ki
6A nagon luyökie aje momora i pirit na geleŋ ko Yesu nu, a se pije lepeŋ adi, MATAT, do mo nyonyökokin Yisaraele tumatyan bot i na diŋit le?
7A Yesu waddi lepeŋat adi, ’Bayin a kulya kasu i deŋdya na perok kode diŋitan, kogwon kine kulya a ti Baba, lepeŋ aje wuluŋdyo se. 8#Mat 28.19; Mar 16.15; Luk 24.47, 48Ama ta mo wuju riŋit ko Mulökötyo Loke a pokin kasu loki; a ta mo tukokiŋdye ŋutu kulya kwe Yerusalema kata, ko i Yudaya ’bukuluŋ, ko i Samaria, tojo ko ’dutesi ti kak.
9 #
Mar 16.19; Luk 24.50, 51 A i mukok nagon nye aje jambu kine kulya nu, a lepeŋ ’depajine ki na meddi se nu, a ’diko muŋge lepeŋ kase i konyen. 10A nagon se nyuŋ diŋa ki i diŋit na tiri nye nu, mete, a ŋutu murek gwo ’de kase i merete a jupu boŋgwat nakwe. 11A pije se adi, Ta ŋutu ti Galilaya, nyo nagon ta gwo ’dan ŋini diŋa ki? ŋilo Yesu logon a ’depaji ki kasu kiden lo mo yiyitwe jojo gwoso na metaddi ta lepeŋ i tu nanyit ki nu.
ŋuto lo ruddya pirit na Yuda
12A kirut lepeŋat kö ’yi mere lo Jeitun, a yitwene Yerusalema. Ŋina kwake a naŋutut, gwoso nagon a ruköki ŋutu i woro i lor lo Sabata.
13 #
Mat 10.2-4; Mar 3.16-19; Luk 6.14-16 A na lupöri se köji kata nu, a se luponi i kadi nagon a koŋilore, nagon Petero moruŋdyo kata, ko Yoane, ko Yakobo, ko Aŋöarea, ko Pilipo, ko Toma, ko Bartolomayo, ko Matayo, ko Yakobo ŋuro lo Alapayo, ko Simona Kawelonit, se ko Yuda ŋuro lo Yakobo. 14A lepeŋat liŋ momori i pirit na geleŋ anyen kwakwaddu perok liŋ, mora ko ŋutu wate, ko Maria ŋote Yesu, se ko luŋasirik ti Yesu.
15A i kilu perok, a luŋasirik lo yubbo momori momora gwoso ŋutu mia geleŋ ko merya murek, a Petero ŋine ki i jambu adi, 16Luŋasirik kwe, Kulya ti ŋun na wuro nagon Mulokotyo Loke köju a kulyari ko Dawidi i kutuk kune, agu ködyö kokona i kulya ti Yuda logon a nyomoddu ŋutu i morga na Yesu lo. 17Yuda köju a lele likaŋ, a iŋge wulöki i parundya na kita nagon yi kita nye na. 18#Mat 27.3-8(Ŋilu ŋuto a gwöruŋdyö melesen ko gurut nagon a ropaki nye i kita nanyit naron kune; a lepeŋ iŋge ’doro kak ko pele, a pu ’döni pu ’dö, a monyet kanyit liŋ iŋge ’bukuŋdyo kaŋo. 19A ŋutu liŋ lo si ’da Yerusalema kulo iŋge den kine kulya, nyena a se gweŋ ŋinu melesen ko kutuk nase adi, Akeledama, nagon nyönyökö adi, Melesen na Rima.)
20 #
Sau 69.25;
Sau 109.8
Kogwon a wuro i Buk na Saumajin adi, Ti mede nanyit gwe a murwö, ko ti lele ŋuto gwe ti si ’da kata. Köti a wurö adi, Ti lele ŋuto ruddye kita nanyit. 21#Mat 3.16; Mar 1.9; Luk 3.21; Mar 16.19; Luk 24.51Nyenagon ti lele ŋuto morakiŋdye kayaŋ. Lepeŋ ködyö gwon a tele lo kilo ŋutu logon yi köju wörö i pirit na geleŋ i diŋit na wöröri MATAT Yesu koyi i pirit na geleŋ nu, 22suluja i diŋit nagon Yoane batiddya ŋutu tojo ko lor lo ’depaji ’e Yesu ki kayaŋ kiden lu. Ŋilo ŋuto lo wulwe lo ködyö mora koyi anyen tuggö adi yi a met Yesu i ŋien i twan.
23A se tiŋdi kulye ŋutu murek kase nerot. Karin kase a ko Yosepa lo luŋu a Barsaba, lo luŋu koti a Yusito lo, se ko Matia. 24a se kwakwaddi adi, Pon MATAT, do deden toilyet ti ŋutu liŋ, kweki yi lon lo kilo ŋutu murek do a wulun, 25anyen ruddya na kita koanyen gwon a luyökie i pirit na Yuda. Ŋilo a Yuda logon a ’doro a iti kanyit i pirit lo. 26A lepeŋat gumbe guralan a ti kilo ŋutu murek, a gura ’duki ko Matia; a lepeŋ morakine i luyökie puök wot geleŋ kulo.
Currently Selected:
Konesi 1: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
