Yoane 6

Yesu a tunyeju nutu alipan mukanat

(Köti Matayo 14.13-21; Marako 6.30-44; Luka 9.10-17)

1A i mukok na ŋina, a Yesu laŋgi i nu pele na tor na Galilaya. (Tor na Galilaya luŋu a Tor na Tiberia.)

2A ŋutu Jore parik kepoddi lepeŋ kogwon se aje met kweyesi nagon lepeŋ kokonakin ŋutu logon a gigilotu kunu.

3A Yesu kijiki i mere, a si ’dani nyu se ko ŋutu kanyit kajujumuk i pirit na geleŋ. 4A rorwe lo Yudayaki logon a Pasaka gwe nyona. 5A Yesu ko boŋgi, a nye meddi ŋutu jore parik i po kanyit ni, a nye pije Pilipo adi, Yi de gworundyo ambatajin ya anyen kulo ŋutu nyonyo? 6Lepeŋ jambu kine kulya moru Pilipo; kogwon lepeŋ ko mugun nanyit deden ko nye kodyo koŋdya nyo.

7A Pilipo waddi lepeŋ adi, Gurut alipan murek ti jukin gwöruŋdyö ambatajin nagon temakiŋdya i ŋutu anyen se wuju a na ’dit na ’dit. 8A lele lo ŋutu kanyit kajujumuk logon a Andarea luŋaser Simona Petero, tukokiŋdye lepeŋ adi,

9Lele ŋuro lo ni logon ko ambatajin mukanat ti ’bolot saora se ko somot murek; ama kine koŋdya nyo i ŋutu jore gwoso kilo? 10A Yesu kulyani adi, Tosi ’dane ta ŋutu kak. Nu pirit a doru, nyena a ŋutu lyan si ’dakine kak; a se gwe gwoso alipan mukanat. 11A Yesu ’dumuŋdye ambatajin kune, a tiŋdi Ŋun tinate, a kökorakiŋdye i ŋutu lo si ’da kak kulo, a nye koti koŋdi sona ko somot murek kune. A se liŋ iŋge nyesu gwoso nagon se ’de ’dekan. 12A nagon se aje yimönö nu, a nye takiŋdye ŋutu kanyit kajujumuk kulo adi, ’Du ’dume ta pitönö nagon a ko nyei kine, an nene böŋö likin. 13Nyena a se poki i ’du’dumba, a iŋge totojore kupöjin puök wot murek ko pitönö ti ambatajin mukanat ti ’bolot saora nagon a ko nyei kune. 14A na meddi ŋutu kweyet nagon Yesu aje kon nu, a se kulyani adi, Lo ’diri a nebi logon adi popo i kak ni lo.Kiko lo gwon Yerusalema lukata

15A Yesu ko dene adi lepeŋat ’dek po i ripakiŋdya na nye a mor nu, a nye kö ’yi se a iti i mere koti nye geleŋ.

Woro na Yesu i tor loki

(Koti Matayo 14.22-33; Marako 6.45-52)

16A nagon sömukö aje po nu, a ŋutu kanyit kajujumuk kulo lulurara i tor,

17a kiyaddi i ki ’bo kata, a yitöni i nu pele na tor tu Kaperanauma. A kak gwe a mudwe nagon Yesu a ko nyuŋ po kase ni nu; 18a kobuŋöt duma wuŋge wuggö a tor ya ’yi ya ’yu. 19A nagon se aje kamaddu mailijin musala kode iŋwan nu, a se metuŋdye Yesu wori ’e i pioŋ loki, po nyona ko ki ’bo; a se kujönoni kujönö. 20Ama a nye kulyani ko lepeŋat adi, Ko kujönö ta, ŋo lo a nan.

21A se ’deke wuyuŋdya lepeŋ i ki ’bo kata, ama ’de ’de a ki ’bo ’dure i pirit nagon se tu kata nu.

ŋutu a galaddu Yesu

22A kotumalu lodir lo ŋutu gwogwo’dine i nu pele na tör. Se koju a met ki ’bo geleŋ tuŋ, a Yesu gwe a ko kiyaddu i ki ’bo kata anyen tu ko ŋutu kanyit kajujumuk kulo i pirit na geleŋ, ama ŋutu kanyit kajujumuk kulo aje tu ka ’de.

23Nyenagon a ki ’bojin lo po Tiberia kulo ’dure i pirit nagon MATAT aje tiŋdu Ŋun tinate a ŋutu iŋge nyesu ambatajin kata nu. 24A lodir lo ŋutu ko meddi adi Yesu gwe ’bayin yu ma ’di ŋutu kanyit kajujumuk, a se ko ’börik kije i ki ’bojin kata a iti Kaperanauma galaddu Yesu.

Yesu logon a ambata toruet

25A se ko ryeji lepeŋ i nu pele na tör, a se pije lepeŋ adi, Katodinönit, do po ni nanu? 26A Yesu waddi se adi, ’Diri ’diri nan takiŋdya ta adi, ta ga ’yu nan ti gwon kogwon ta a meddya kweyesi, ama kogwon ta aje nyesu ambatajin a yimönö. 27Ko kita ta kinyo lo ’ba ’baka, ama kitani ta kinyo lo yeyeŋon logon a kinyo lo ru na yeŋ nyin. Ŋilo kinyo nan Ŋuro lo ŋuto mo titikin ta; kogwon Ŋun Baba a nya ’doddu nan ko kweyet adi nan a lonyit. 28Nyena a se pije lepeŋ adi, Yi ködyö koŋdya nyo anyen koŋdya kitajin ti Ŋun? 29A Yesu waddi se adi, Na a kita na Ŋun, adi ta kodyö yuyuŋ ŋuto logon Ŋun a sunyun lo. 30A kirut se pije lepeŋ adi, Do koŋdya nan kweyet anyen yi böŋö memet ko anyen yubbö do? Do koŋdya nan kita?

31 # Yuö 16.4, 15; Sau 78.24 Merenyejin kaŋ a nyesu mana i yöbu, gwoso na wuröri adi, Nye aje tikin lepeŋat ambata na po ki anyen nyönyö.

32A Yesu kulyani ko lepeŋat adi, ’Diri ’diri nan takiŋdya ta adi, Mose ’bayin lo tiŋdu ta ambata na po ki, ama Baba lo tiŋdu ta ambata nagon po ki a na to ’diri.

33Kogwon nye logon po kak ki yu lo a tiŋdi ŋutu ti na kak ru lo, nye a ambata nagon Ŋun lo tiŋdu.

34A se mo ’yi lepeŋ adi, Pon duma likaŋ, tiki yi ŋina ambata diŋitan liŋ.

35A Yesu waddi lepeŋat adi, Nan logon a ambata toruet; ŋuto logon a po köyö ni lo mo ti magora kwöŋ, köti ŋuto logon a yubbö nan lo mo ti moka kure kwöŋ. 36Ama nan aje takin ta adi ta aje met nan ama a kölumbö a ta tine yubbö. 37Ŋutu liŋ logon Baba titin nan kilo mo popo köyö ni, nyena ŋuto logon a po köyö ni lo nan mo ti rikörö kwöŋ, 38kogwon nan aje po kak ki yu i koŋdya na ’dekesi ti lepeŋ lo sunyuŋdyö nan lo, ama ti gwon i koŋdya na ’dekesi kwe. 39Lepeŋ lo sunyuŋdyö nan lo ’de ’dekan adi, ti nan ködyö gwe ti tolikin lele geleŋ lo ŋutu liŋ logon nye aje tikin nan kilo, ama ti nan ködyö toŋiji se ki i twan i lor lo ’dutet.

40Kogwon Baba ’de ’dekan adi, ti ŋutu liŋ logon memet nan Ŋuro ko a yuŋ nan kilo ködyö wuji ru na yeŋ nyin; a nan mo toŋiji se ki i twan i lor lo ’dutet.

41A Yudayaki poki i wiwinya ko ’börik i kulya ti lepeŋ, kogwon lepeŋ a kulya adi nye a ambata na po kak ki yu. 42A se totopine adi, Lo a Yesu ŋuro lo Yosepa, logon monye se ko ŋote yi deden lo, ’bayin sona le? Nyo nye kulya soŋinana adi, Nan a po kak ki yu.

43A Yesu waddi lepeŋat adi, Kölöki ta wiwinya ko ’börik. 44Lele ŋuto ’bayin logon bubulö po köyö ni, ake ko Ŋun Monye lo sunyuŋdyö nan lo a pikun lepeŋ; a nan mo toŋiji lepeŋ ki i twan i lor lo ’dutet. 45#Yis 54.13Nebijin köju a wuŋö adi, Ŋun mo totodin se liŋ. ŋutu liŋ lo yiŋga Ŋun Monye a jujumuŋdye ko lepeŋ kilo popo köyö ni. 46Ti gwon adi lele ŋuto aje met Ŋun Monye ake nye lo po ko Ŋun yu lo aje met Ŋun Monye.

47’Diri ’diri nan takiŋdya ta adi, ŋuto lo yubbo lo gwon ko ru na yeŋ nyin.

48Nan a ambata toruet. 49Merenyejin kasu köju a nyesu mana i yöbu, a se iŋge twatwa. 50Ama ambata nagon po kak ki yu na gwon sona adi, ŋuto bubulö nyesu a tine twan. 51Nan a ambata na gwon jörun na po kak ki yu. Ko lele ŋuto a nyesu na ambata a nye mo gwe jörun ŋupi; a ŋina ambata nagon nan mo titin lepeŋ na a mugun nio, nagon nan a tikin anyen ŋutu ti kak böŋö gwon jörun.

52Nyenagon a Yudayaki woŋe ko ’börik pipija adi, Lo ŋuto bubulö tiŋdu yi i nyesu na mugun nanyit ada? 53a Yesu waddi lepeŋat adi, ’Diri ’diri nan takiŋdya ta adi, ko ta ti nyesu mugun nio na Ŋuro lo ŋuto a tine möju rima kwe, a ta mo tine gwon ko ru kasu i mugunya. 54Ŋuto lo nyesu mugun nio a möji rima kwe lo, lepeŋ gwon ko ru na yeŋ nyin, a nan mo toŋi lepeŋ ki i twan i lor lo ’dutet. 55Kogwon mugun nio a kinyo lo to ’diri, a rima kwe gwe a ŋo na mamata ti to ’diri. 56Ŋuto lo nyesu mugun nio a moji rima kwe lo, lepeŋ gwogwolor koyo i mugun, a nan gwolore ko lepeŋ mugun. 57Nyena gwoso nagon Ŋun Monye lo gwogwolor lo aje sunyun nan, a nan gwolore kogwon lepeŋ, köti gwon sona adi ŋuto lo nyesu nan lo mo gwogwolor kogwon nan. 58Na a ambata na po kak ki yu; nye ti gwon gwoso ambata nagon merenyejin kasu köju a nyö a twatwane twatwa nu, ama kulya kanyit gwon sona adi, ŋuto lo nyesu ŋina ambata lo mo gwogwolor ŋupi. 59Yesu a jambu kine kulya na todiŋdye nye i kadi momoret Kaperanauma nu.

Kulyaesi ti ru na yeŋ nyin

60A ŋutu kanyit kajujumuk jore ko yiŋge kine kulya, a se kulyani adi, Kilo kulyaesi a iŋgo, a yi koti yiŋe kine kulya a ti nyo? 61A Yesu iŋge den kanyit i töili adi ŋutu kanyit kajujumuk wiwinya i kine kulya, a nye pije se adi, Kine kulya köpuggö ta le? 62a kirut mo gwe ada ko ta a met nan Ŋuro lo ŋuto i tu ki i pirit na gwoŋdi nan a kokwe nu? 63Mulökötyo titiŋdu ru, a mugun tine koŋdya nene ŋo. Kulyaesi logon nan aje jamakin ta kilo a ti mulokotyo a toruje torujo. 64Ama kulye kasu kata logon a ko yubbo. Kogwon Yesu aje den i suluet ko ko ŋa logon ti yubbö, koti ko ŋa lo tiŋdu lepeŋ i tatua.

65A nye kulyani adi, Ŋina a kwe nagon nan kulyari ko ta adi ŋuto ’bayin logon bubulö po köyö ni ake ko Ŋun Monye a rukokin lepeŋ.

66A i ŋina a ŋutu kanyit kajujumuk jore kukutöro bot, a tine moraddu ko lepeŋ koti. 67a Yesu pije ŋutu kajujumuk puök wot murek kulo adi, Ta köti ’de ’dekan kö ’yu nan le? 68#Mat 16.16; Mar 8.29; Luk 9.20a Simona Petero waddi lepeŋ adi, MATAT, yi tu i lon ŋuto? Kulyaesi ti ru na yeŋ nyin gwon konut. 69Yi aje yubbö ko aje kurun adi do a Loke lo Ŋun. 70a Yesu pije se adi, Nan köju a ko wuluŋdyö ta puök wot murek le? Ama a lele losu gwe a satani. 71A nye jambi sona i kulya ti Yuda ŋuro lo Simona Isikariota, kogwon nye lepeŋ lo tiŋdu Yesu i tatua ma ’di nye a lele lo ŋutu kajujumuk puök wot murek kulo.

Currently Selected:

Yoane 6: BBE

Highlight

Copy