Yoane 7

Luŋasirik ti Yesu a ko yuŋ lepeŋ

1A i mukök na kine ŋo a Yesu wöröni Galilaya kata, a nye tine wörö Yudaya kata kogwon Yudayaki ga ’yu tatuja lepeŋ. 2#Lew 23.34; Nyö 16.13A Yudayaki gwe nyona ko koŋdya na rorwe lo Murugujin. 3Nyena a luŋasirik kanyit kulo kulyani ko lepeŋ adi, Wuddye wuddya i na pirit ko iti Yudaya, anyen ŋutu kulök kajujumuk kulo böŋö memet kitajin nagon do kökon kine. 4Ŋuto logon ’de ’dekan kulya kanyit i dena lo, lepeŋ ti koŋdya ŋo a Iwon. Nyena ko do koŋdya ŋo gwoso kine, kweki mugun i ŋutu ti na kak. 5Kogwon ma ’di luŋasirik ti Yesu a ko yuŋ lepeŋ. 6A Yesu kulyani ko se adi, Diŋit nio a ko nyuŋ po, ama diŋit nasu ŋupi kata. 7ŋutu ti kak ni ti bulö maŋdu ta, ama lepeŋat maman nan, kogwon nan tökoŋu adi konesi kase a narok. 8Ta ko ’borik iti ta i rorwe. Nan ti tu i ŋilo rorwe kogwon diŋit nio a ko nyuŋ po. 9A nagon nye aje takiŋdya lepeŋat kine kulya nu, a nye karaki Galilaya.

Yesu a todiŋdyö i rorwe lo Murugujin

10A i mukök nagon luŋasirik kanyit aje tu i rorwe nu, a Yesu koti iŋge tu a ko metaji ama ’da ’danaji. 11A Yudayaki gwe i ga ’yu na lepeŋ i rorwe, a se pije adi, Lepeŋ liya? 12A morja duma gwe kata ko lodir lo ŋutu kiden i kulya ti lepeŋ. Kulye kulya adi, Lepeŋ a ŋuto lo ’but, a kulye kulyani adi, ’Bayin, (lepeŋ totogiŋa ŋutu. 13Ama a lele ŋuto tine jambu köke i kulya ti lepeŋ, kogwon lepeŋat kukujönö Yudayaki.

14A nagon ŋutu nyuŋ koŋdya rorwe nu, a Yesu iti i Kadi na Ŋun, a poki i todiŋdyö. 15a Yudayaki söŋi soŋu parik, a pije adi, Lo ŋuto deŋdya kulya jore ada a ko todinö na? 16A Yesu waddi lepeŋat adi, Ŋo na todin nan kune ti gwon a kulya kwe, ama a ti lepeŋ lo sunyuŋdyö nan lo. 17Ko lele ŋuto ’de ’dekan koŋdya ’dekesi ti lepeŋ lo sunyuŋdyo nan lo, lepeŋ mo kukurun kode ŋo na todin nan kune po ko Ŋun yu, kode nan jambu ŋo kwe. 18Ŋuto lo jambu ŋo kanyit ti mugun lo ga ’yu bu ’ya mugun; ama ko ŋuto ga ’yu bu ’ya lepeŋ lo sunyuŋdyö nan lo ŋilo ŋuto a lo to ’diri, a lepeŋ gwe ’bayin a ’burönit.

19Mose a ko tin ta saresi le? Ama lele losu ’bayin logon a ’dep Saresi. Nyo ta ga ’yu tatuja nan? 20a lodir lo ŋutu waddi adi, Do ko mulokötyo loron! Ŋo lo ga ’yu tatuja do? 21A Yesu waddi se adi, Kita geleŋ kata nagon nan a kon i Sabata a ta liŋ gwe i soŋu. 22#Lew 12.3; Sul 17.10Mose lo tiŋdu ta i tawero, (ti gwon adi po ko Mose, ama po ko merenyejin); nyena a ta taweŋi ŋutu i Sabata. 23#Yoa 5.9a ko ŋuto a tawero i Sabata anyen Saret lo Mose böŋö gwon ti ’beleŋo, a nyo nagon ta woran ko nan kogwon nan a toke ’ya ŋuto i Sabata anyen mugun nanyit liŋ gwon ’bura? 24An ta ko ’duŋgo ta gwoso na meddi ta na, ama ’duŋge ta gwogwo.

ŋutu pipija adi Yesu ŋona a Masia

25A kulye ŋutu ti Yerusalema pije adi, Lo ŋona ti gwon a ŋuto logon lepeŋat ga ’yu tatuja lo le? 26Meddi ta, lepeŋ jambu köke a se gwe a ko jambu nene ŋo ko lepeŋ. Ŋutu temejik ’diri ŋona a den adi ŋilo a Masia le? 27Yi deden ko lo ŋuto po ya, ama ko Masia popo, lele ŋuto mo ti den ko lepeŋ po ya. 28A na todiŋdye Yesu i Kadi na Ŋun nu, a nye laije adi, Ta deden nan, ta köti deden ko nan po ya. Ama nan a ko po ko kulya kwe ti mugun, ama lepeŋ lo sunyuŋdyö nan lo a ’diri, a ta tine den lepeŋ. 29Ama nan deden lepeŋ kogwon nan po ko lepeŋ yu, a nye iŋge sunyun nan.

30Nyena a se ga ’yi morga lepeŋ, ama a lele ŋuto gwe a ko sukiŋdyö könin i morga na lepeŋ, kogwon diŋit nanyit nyuŋ a ko po. 31A ŋutu jore i kiden na lodir yubbe lepeŋ; a se pije adi, Ko Masia mo a po, nye ŋona mo kökon kweyesi jore lwölwöŋ kweyesi na kon ŋilo ŋuto kune le?

ŋutu temejik a soŋdu ŋutu i morga na Yesu

32A Parusijin iŋge yiŋ lodir lo ŋutu i morga na lepeŋ, a kiŋanejin temejik se ko Parusijin soŋdi kölipönök i morga na lepeŋ. 33a Yesu kulyani adi, Nan yöŋgi diŋit a na ’dit i si ’da ko ta, a kirut nan mo yitöni ko lepeŋ lo sunyuŋdyö nan lo yu. 34Ta mo gaga nan, ama a ta mo tine ryö nan, kogwon pirit na gwoŋdi nan kata nu ta ti bulö ’dur kata. 35A Yudayaki pije ’borik adi, Lo ŋuto ’dek tu da anyen yi gwon ti ryö lepeŋ na? Lepeŋ ŋona ’dek tu i Yudayaki logon a rekin i kiden na Giriki kulo le, a todiŋdye ŋutu ti Giriki? 36Lo kulyaet a nyo logon lepeŋ kulyari adi, Ta mo gaga nan ama a ta mo tine ryö nan? Koti adi, Pirit na gwoŋdi nan kata nu ta ti bulo ’dur kata. Kine kweja nyo?

Karya ti pioŋ toruesi

37 # Lew 23.36 A i lor ’dutet lo rorwe logon a lor duma lo, a Yesu gwo ’de ki a laije adi, Ko ŋuto logon a moka kure, ti lepeŋ poŋdi köyö ni i möju. 38#Ejk 47.1; Jak 14.8Kulya ti ŋun na wurö kune tuggö adi, Karya ti pioŋ toruesi mo ’do ’dokon ko ŋuto logon a yubbö nan lo i pele. 39Lepeŋ jambu kine kulya i kulya ti Mulökötyo logon ŋutu lo yubbö lepeŋ kilo mo wuwu, kogwon Mulokötyo nyuŋ a ko tiki ŋutu, kogwon Yesu nyuŋ a ko bula.

ŋutu a koŋa kogwon kulya ti Yesu

40A kulye ŋutu ko yiŋge kine kulya, a se kulyani adi, Lo ’diri a ŋilu nebi.

41A kulye kulyani adi, Lepeŋ a Masia; ama a kulye kulyani adi, Masia po kaŋo Galilaya le? 42#2 Sam 7.12; Mik 5.2Kulya ti Ŋun na wurö kune tuggö adi Masia pukun i kötumit na Dawidi, ko i Beteleme i köji na gwoŋdi Dawidi köju kata nu. Ti gwon sona le? 43Nyena a lodir lo ŋutu iŋge koŋa kogwon kulya ti lepeŋ. 44a kulye kase ’deke morga lepeŋ, ama a lele lose gwe a ko sukin könin i morga na lepeŋ.Temejik ti Yudayaki a ko yubbö

45A kölipönök yitöni ko köanejin temejik se ko Parusijin yu, a se pije lepeŋat adi, Nyo ta ti jon lepeŋ? 46a kölipönök kulo waddi adi, Ŋuto ’bayin kwoŋ lo jambu gwoso ŋilo ŋuto.

47A Parusijin pije se adi, Ta köti a totogira? 48Kulye temejik kode kulye Parusijin ŋona a yubbö lepeŋ? 49Ama lo lodir lo nutu logon a ko den Saresi ti Mose kulo aje senya. 50#Yoa 3.1, 2a lele lose logon a Nikodemo, logon köju a tu ko Yesu yu lo, pije se adi, 51Saresi kao ŋona a rukökin yi i ’duŋgö na putet lo lele ŋuto a kokwe nagon a ko nyuŋ yiŋ, anyen denuŋdya kaŋo ko lepeŋ a koŋdya nyo le? 52A se pije lepeŋ adi, Do köti po Galilaya le? 53Galuŋdye kaŋo i kulya ti Ŋun na wurö kune, a do mo meddi adi, nebi ’bayin lo pukun Galilaya.

Currently Selected:

Yoane 7: BBE

Highlight

Copy