Luka 3

Yoane Kabatisanit a tokujo Loŋe Lo ’but

(Köti Matayo 3.1-12; Marako 1.1-8; Yoane 1.19-28)

1Nyena i kiŋa topuök wot mukanat lo gwoŋdi Kaisar Tiberio i tumatyan lu, a Pontio Pilato gwe a modir lo Yudaya, a Erode gwe a kasaranit lo Galilaya, a luŋaser lonyit Pilipo gwe a kasaranit lo jur lo iturea ko lo Tarakoniti, a Lusania gwe a kasaranit lo Abilene, 2a Ana se ko Kayapa gwe a koanejin temejik. A i ŋinu diŋit a kulyaet lo Ŋun poki ko Yoane ŋuro lo Takaria i yöbu yu. 3A nye worojine i juron liŋ lo diŋö ko kare Yardene, totokuöddu adi ti ŋutu ködyö löpuŋge töilyet ko ti batisani batisa anyen toronjin kase pipitöki,

4 # Yis 40.3-5 gwoso na wuröri kulyaesi ti nebi Yisaya i buk nu adi, Gworo lo lele ŋuto wowoŋon i yöbu adi,

Yayaraki ta kiko lo MATAT jojo, rine ta gwokiot kanyit gwogwo.

5Luruki liŋ mo yiyikö jojo, merya liŋ ko lurwat liŋ mo tuturökak;

a kikolin lukwölöŋök motetenakine gwogwo,

a kikolin lorayokok mo tetenani a loliliŋok;

6a ŋutu liŋ mo meddi Ŋun i lwöggu na ŋutu.

7 # Mat 12.34; 23.33 A Yoane pije lodir lo ŋutu lo po i batisa kanyit ni kulo adi, Ta torela ti munuö, ŋa lo tokujöŋdu ta i woran na popo nu anyen ta rwörwöddu le?

8 # Yoa 8.33 Koŋdi ta ŋo nagon kwekiŋdya adi ta ’diri aje lopuggö töilyet. An ta ko suluja ta kulya ko ’börik adi, Abarayama a merenye likaŋ. Nan takiŋdya ta adi Ŋun bubulö pipiluŋdya nyakwariat ti Abarayama ma ’di i kilo ŋurupö. 9#Mat 7.19Ma ’di soŋinana tulu a tetenaki ajo anyen tokori kaden i kokori. Kaden liŋ logon ti radan ludweki lo ’but toko kak a gubani i kimaŋ.

10A ŋutu kulo pije lepeŋ adi, A kirut yi mo koŋdi nyo? 11A nye waddi lepeŋat adi, Ko ŋuto gwon ko jölöbiyajin murek, ti nye tiki nene i ŋuto logon ’bak nanyit; ti ŋuto lo gwon ko kinyo lo ti koŋdi sona köti. 12#Luk 7.29Köti a kulye kapepenak ti usur iŋge po i batisa, a se pije lepeŋ adi, Katodinönit, yi ködyö koŋdya nyo? 13A nye waddi lepeŋat adi, An ta ko luŋgu ta gurut jore lwöŋgu nagon a saraki. 14A kamörök köti pije lepeŋ adi, Yi köti ködyö koŋdya nyo? A nye waddi lepeŋat adi, An ta ko riŋuŋdya ta gurut ti lele ŋuto ko riŋit kode ko ’burönö; ama yimönöni ta ko gurut na ropaki ta.

15A ŋutu kulo gwe ko yenet parik, a pije ’börik kase i töilyet adi kode ŋona Yoane a Masia, kode a leŋe. 16A Yoane nyobbi se liŋ adi, Nan lo batiddya ta ko pioŋ, ama lele logon riŋit nanyit a duma lwölwöŋ nio lo ŋilo popo; nan ti jukin laggu patala ti kamuka kanyit. Lepeŋ mo batiddya ta ko Mulökötyo Loke ko kimaŋ. 17A nye gwe ko köbi setet kanyit i könin, anyen seddya ’bolot liŋ lo gwon kanyit i pirit gwutet na ’bolot, a yuŋdye ’bolot kanyit i gugu; ama a nye mo ’yuŋe pudi ko kimaŋ nagon ti bulo peŋa.

18Nyena a Yoane iŋge tokukin ŋutu Loŋe Lo ’but ko kulye saresi jore gwoso kulo. 19#Mat 14.3, 4; Mar 6.17, 18Ama a nye yuyuŋge Erode kasaranit i kulya ti Erodia nakwan na luŋaser Erode, ko konesi narok liŋ nagon lepeŋ aje kon kune. 20Nyena a Erode ’ya ’yi kulya narok a kinikiŋdye Yoane i kadi rereket.

Batisa na Yesu

(Köti Matayo 3.13-17; Marako 1.9-11)

21A nagon ŋutu liŋ aje batisa nu, a Yesu köti lo batisani, a gwe i kwakwaddu, a ki ŋaji ŋaju, 22#Sul 22.2; Sau 2.7; Yis 42.1; Mat 3.17; Mar 1.11; Luk 9.35a Mulökötyo Loke poŋdi kak kanyit loki a gwe ko mugun gwoso gure. A gworo lo kuu ki yu adi, Do a pilili liŋ lo ŋuro lo nyanyara, nan a lyöŋön ko do parik.

Kenet na kotumit nase Yesu

(Koti Matayo 1.1-17)

23A Yesu gwe ko kiŋajin gwoso merya musala na suluje nye kita nanyit nu. A ŋutu yeyeji adi lepeŋ a ŋuro lo Yosepa, ŋuro lo Eli, 24ŋuro lo MATAT a, ŋuro lo Lewi, ŋuro lo Meleki, ŋuro lo Yanai, ŋuro lo Yosepa, 25ŋuro lo Matatia, ŋuro lo Amosa, ŋuro lo Naum, ŋuro lo Eseli, ŋuro lo Nagai, 26ŋuro lo Mata, ŋuro lo Matatia, ŋuro lo Semein, ŋuro lo Yoseke, ŋuro lo Yoda, 27ŋuro lo Yöanan, ŋuro lo Resa, ŋuro lo Jerubabela, ŋuro lo Salatiele, ŋuro lo Neri,

28ŋuro lo Meleki, ŋuro lo Adi, ŋuro lo Losam, ŋuro lo Elemadam,

29ŋuro lo Emuro lo Yosua, ŋuro lo Eliejer, ŋuro lo Yorim, ŋuro lo MATAT a ŋuro lo Lewi,

30ŋuro lo Simeona, ŋuro lo Yuda, ŋuro lo Yosepa, ŋuro lo Yonam, ŋuro lo Eliakim, 31ŋuro lo Melea, ŋuro lo Mena, ŋuro lo MATAT a, ŋuro lo Natana, ŋuro lo Dawidi, 32ŋuro lo Yisai, ŋuro lo Obede, ŋuro lo Boaja, ŋuro lo Salamona, ŋuro lo Nasona, 33ŋuro lo Amina-daba, ŋuro lo Adimin, ŋuro lo Ami, ŋuro lo Keseron, ŋuro lo Perese, ŋuro lo Yuda, 34ŋuro lo Yakobo, ŋuro lo Yisaka, ŋuro lo Abarayama, ŋuro lo Terak, ŋuro lo Nakor, 35ŋuro lo Seruga, ŋuro lo Reu, ŋuro lo Pelege, ŋuro lo Eber, ŋuro lo Sela, 36ŋuro lo Kenan, ŋuro lo Arepakesada, ŋuro lo Seme, ŋuro lo Noa, ŋuro lo Lamek, 37ŋuro lo Metusela, ŋuro lo Enoka, ŋuro lo Yarede, ŋuro lo Malalele, ŋuro lo Kenan, 38ŋuro lo Enosa, ŋuro lo Sete, ŋuro lo Adama, ŋuro lo Ŋun.

Currently Selected:

Luka 3: BBE

Highlight

Copy