Luka 5

Yesu a luŋgu ŋutu kanyit kajujumuk ti kokwe

(Köti Matayo 4.18-22; Marako 1.16-20)

1 # Mat 13.1, 2; Mar 3.9, 10; 4.1 A gwe sona, na gwo ’di ’e Yesu nyona ko tör na Genesareta#5.1Genesaretakweja adi a kunie karin ti tor na Galilaya nu, a ŋutu jore ri ’diaddi ’borik ko lepeŋ yu i yiŋga na kulyaet lo Ŋun. 2a nye meddi ki ’bojin murek i kijit, a kalokak ti somot aje kiyaddu kaŋo, a gwe i lalaju na ku ’yilan kase. 3A nye kiyaddi i lele lo kilo ki ’bojin kata logon a lo Simona, a nye pije lepeŋ anyen dukaddu ki ’bo i pioŋ kata madaŋ, a Yesu si ’dani i ki ’bo kata a todiŋdye ŋutu kulo. 4A nagon nye aje jo jambu nu, a nye takiŋdye Simona adi, Kamara ki ’bo i pirit nagulu a kirut gubaddi ta ku ’yilan kasu i pioŋ i munyuŋdya na somot. 5#Yoa 21.3A Simona waddi adi, Katodinönit, yi a kita i tukwaje liŋ a yi gwe a ko morga nene ŋo, ama kogwon do aje kulya, nan de gugubara ku ’yilan. 6#Yoa 21.6A nagon se aje koŋdya sona nu, a se iŋge munyun somot jore parik, a ku ’yilan kase suluje giginyija, 7a se kwetuŋdye ŋutu logon ŋaŋu kita ko se lo gwon i lele lo kilo ki ’bojin kulo anyen po i parakiŋdya na se. A se poŋdi po a iŋge tojoreju kilo ki ’bojin murek ko somot, nyena a se suluje ’dirön. 8A na meddi Simona Petero kine ŋo i pokin sona nu, a nye ’dorone kak ko Yesu i kuŋwat, a kulyani adi, ŋiörö kaŋo köyö pon MATAT, kogwon nan a ŋuto loron.

9Kogwon lepeŋ se ko ŋutu liŋ lo gwon ko nye kulo a soŋu kogwon somot logon lepeŋat aje munyun kulo. 10Nyena a Yakobo se ko Yoane ŋwajik ti Jebedayo, logon ŋaŋu kita ko Simona i pirit na geleŋ kulo koti iŋge söŋu. A Yesu kulyani ko Simona adi, An do ko kujöno, suluja soŋinana tojo ko ŋerot do mo jikuŋdyö ŋutu köyö ni gwoso ŋuto logon jikuŋdyö somot ko ku ’yi.

11A se kamuŋdye ki ’bojin i kijit a se kölökiŋdye ŋo liŋ, a se kepoddi lepeŋ.

Yesu a toke ’ya ŋuto lo rimajin

(Köti Matayo 8.1-4; Marako 1.40-45)

12A gwe sona na gwoŋdi Yesu i nene köji nu, a lele ŋuto gwe nyu logon a moka parik ko rimajin; a na meddi ŋilo ŋuto Yesu nu, a nye rugwuŋökine kak ko komor nanyit a mamaŋdi lepeŋ adi, Pon MATAT, ko do nyanyar do bubulö toke ’ya nan. 13a Yesu riöddi könin lonyit, a taŋdi lepeŋ, a kulyani adi, Iŋkoi, nan nyanyar toke ’ya do; kele kelan. ’De ’de a rimajin kö ’yi lepeŋ. 14#Lew 14.1-32A nye kukuji lepeŋ adi, An do ko takin lele ŋuto kine kulya; ama iti. kweki mugun ko koane, ko wukiŋdye rubaŋga a tokelet ilot gwoso na sarakiŋdye Mose nu, anyen ŋutu deden adi do aje tokela. 15Ama a lore lo Yesu reara reara bia parik; a ’ŋutu jore parik momoruŋdye i yiŋga ko i tokela na twana kase. 16Ama nye yeŋ kö ’yu ŋutu a iti i kwakwaddu i yöbu nagon ŋutu ’bayin kata.

Yesu a toke ’ya ŋuto lo bata logon mugun a twan

(Köti Matayo 9.1-8; Marako 2.1-12)

17A gwe sona i lele lor nagon Yesu gwon i todiŋdyö nu, a Parusijin se ko katodinök ti Saresi ti Mose logon po i turön liŋ ti Galilaya, ko ti Yudaya, ko lo po Yerusalema kulo gwe nyu i si ’da. A riŋit na MATAT gwe ko lepeŋ anyen toke ’yi ŋutu. 18Nyena a kulye ŋutu lo poŋdi ’dukuŋdyö ŋuto i dotoet loki. ŋilo ŋuto a bata mugun a twan. A se möŋi joŋga lepeŋ kadi lukata anyen topirikin ko Yesu i komor, 19ama a se tine ryö kiko logon se joŋgi lepeŋ lukata, kogwon ŋutu jore parik. Nyena a se kirut ’dokoddi lepeŋ ki i lo ’dek lo kadi, a se köluŋdye ŋuto lo kak kanyit i dotoet i kiden na teŋula, anyen yepuŋdya kak ko ŋutu kiden ko Yesu i komor. 20a na meddi Yesu yupet nase nu, a nye kulyani adi, Do ŋilo ŋuto, toronjin kunök aje pitöki. 21a katodinök ti Saresi se ko Parusijin poki i pipija kase i töilyet adi, ŋilo ŋuto a ŋa lo lauŋdya ŋuri? ŋa logon bubulo pitökiŋdyö toronjin? ’Bayin a Ŋun ka ’de logon a kapitönit le? 22a Yesu iŋge den adi se gwon i pipija kase i töilyet, a pije se adi, Ko nyo ta pipija kasu i töilyet? 23Nan nagon pölilyö, i takiŋdya adi, Toronjin kunök a pitöki, kode i kulya adi, ŋine ki ko wöröni wörö? 24Ama nan de kwekwekin ta adi nan ŋuro lo ŋuto gwon ko riŋit i kak ni i pitökiŋdyö na toronjin. Nyena a nye wöripuŋdye i jambu ko ŋuto logon a bata lo adi, Nan takiŋdya do adi, Ŋine ki, ’dumuŋdye dotoet inot, ko iti mede. 25’De ’de a nye ŋine ki kase i komor, a ’dumuŋdye dotoet nagon nye a topiriki kata na, a nye iti mede pupuraddu Ŋun. 26a ŋutu liŋ iŋge söŋu parik, a pupurje Ŋun; a se kujönöni kujönö, a kulyani adi, Yi aje meddya ŋo sörösi i lo lor.

Yesu a luŋgu Lewi

(Köti Matayo 9.9-13; Marako 2.13-17)

27A i mukök na ŋina a Yesu iti kaŋo, a nye meddi kapepenanit lo usur, karin kanyit a Lewi, sisi ’da i pirit ropet na usur, a nye takiŋdye lepeŋ adi, Kipundye nan. 28a nye ŋine ki, a kölökiŋdye ŋo liŋ, a kepoddi Yesu.

29A kirut Lewi konakiŋdye lepeŋ nyeŋ duma kanyit kadi, a ŋutu jore logon a kapepenak ti usur se ko kulye ŋutu si ’dani i nyesu ko lepeŋat. 30#Luk 15.1, 2a kulye Parusijin se ko katodinök kase ti Saresi ti Mose gwe i wiwinya ko ŋutu ti Yesu kajujumuk kulo, adi, Ko nyo ta nyesu ko möju i pirit na geleŋ ko kapepenak ti usur se ko katoronyak? 31A Yesu waddi se adi, Ŋutu logon mugunya kase a na ’but ti ’dekan katoruönit, ama ŋutu lo gilö lo ’dekan katoruönit; 32nan a ko po i luŋgu na ŋutu logon ko löti lo rigwo, ama i luŋgu na katoronyak anyen löpuggö töilyet.

Yesu a piya i kulya ti miŋdya

(Köti Matayo 9.14-17; Marako 2.18-22)

33A kulye ŋutu kulyani ko Yesu adi, Ŋutu ti Yoane kajujumuk mimiŋdya daŋin jore ko kokoŋdya kwakwasesi, a kajujumuk ti Parusijin köti koŋdi sona, ama kajujumuk kulök kulo nyenyesu ko mömöju. 34A Yesu waddi pija lepeŋat adi, Ta ŋona bubulö tiŋdu julin ti kayemanit i miŋdya i diŋit nagon kayemanit gwon ko lepeŋat i pirit na geleŋ nu le? 35Ama diŋit mo popo nagon kayemanit mo joŋari kaŋo kase kiden, a kirut i ŋilu lor a lepeŋat mo miŋdye miŋdya. 36a nye köti jamakiŋdye se lele lilim adi, Ŋuto ’bayin logon kerenyuŋdya tupet i boŋgo ludukötyo anyen ripakin i boŋgo na ’beron; a ko nye a koŋdya sona kweja adi nye a kereŋdya boŋgo ludukötyo na, ko köti tupet na boŋgo ludukötyo na mo tine mora ko na ’beron na. 37Lele ŋuto ’bayin logon turakiŋdya binyo ludukö na yuyu i jurakan logon a gobero ŋoroko; ko nye a koŋdya sona, a jurakan gobero mo pu ’döni pu ’dö adi tu, a binyo mo ’buköjine kak a jurakan köti mo kakaŋi kakaŋu.

38Ama binyo ludukö ködyö turaki i jurakan ludukö. 39Ŋuto lele ’bayin logon ko a möju binyo na pötwör, a yöŋöni ludukö, kogwon lepeŋ kulya adi, Binyo na pötwör nagon a na ’but.

Currently Selected:

Luka 5: BBE

Highlight

Copy