Marako 13
13
Yesu a jambu i kulya ti luro na Kadi na Ŋun kak asut
(Köti Matayo 24.1-2; Luka 21.5-6)
1A nagon Yesu aje lupuŋdyö kaŋo i Kadi na Ŋun nu, a lele lo ŋutu kanyit kajujumuk kulyani ko lepeŋ adi, Katodinönit! Meddi kine ŋurupö dumalak parik se ko kadijik nakwekwelen! 2A Yesu pije lepeŋ adi, Do meddya kine kadijik dumalak le? Ŋurupit nene geleŋ molu ti kölöki ni i nene loki nagon mo ti gubaki kak.
Yöyöŋesi se ko sasanyesi
(Köti Matayo 24.3-14; Luka 21.7-19)
3A nagon Yesu gwon i si ’da i Mere lo Jeitun komorga Kadi na Ŋun nu, a Petero, ko Yakobo, ko Yoane se ko Aŋöarea pije lepeŋ na gwoŋdi se ka ’de nu, adi, 4Taki yi diŋit nagon kine ŋo mo kokonari, köti kweyet mo a nyo nagon kine ŋo liŋ mo tetemakiŋdya?
5A Yesu suluje jambu ko lepeŋat adi, Kunyar ta an lele ŋuto togir ta. 6Ŋutu jore mo popo i karin kwe a kulyani adi se a nan, a se mo togiŋe ŋutu jore.
7A na yiŋge ta kulya ti mörö ko lodokon ti mörö nu, an ta ko kujönö ta; kine ŋo agu ködyö kokona, ama ’dutet nyuŋ ’bak. 8Kogwon jur mo mömörö ko lele jur, a tumatyan mo möröni ko nene tumatyan, a rigirigilön mo gwe i piriton ka ’de ka ’de, a dyaŋan mo lo gwe; kine ŋo a ŋoŋesi suluesi.
9 #
Mat 10.17-20; Luk 12.11, 12 Ama kunyar ta ’börik; kogwon kulye ŋutu mo momok ta a joŋgi ta i putet; a ta mo ’bitöni ’bitö i kadijik momoresi, a ta mo gwo ’de i komor na mödirön ko na moran kogwon kulya kwe, anyen tokurukiŋdyö kine kulya kase i komor. 10Ama Loŋe Lo ’but ködyö totokuoŋ i ŋutu liŋ ti jurön a kokwe na ’dutet na ŋo liŋ. 11A nagon lepeŋat aje momorga ta a joŋgi ta i putet nu, an ta ko wiwinya ta a kokwe i ŋo nagon ta mo jajam kine; ama jambi ta ŋo nagon mo titiki ta i ŋinu diŋit, kogwon mo ’bayin a ta lo jambu ama a Mulökötyo Loke lo jambu. 12A luŋaser mo wukiŋdye luŋaser i tatua, monye mo wukiŋdye Ŋuro lonyit, a ŋwajik mo ŋiki i mörö ko monye lose ko ŋote nase, a tiŋdi lepeŋat i tatua;
13 #
Mat 10.22
a ŋutu liŋ mo mane man ta kogwon karin kwe. Ama ŋuto logon a ŋoŋga tojo ko ’dutet lo mo lwölwökö.
Ŋoŋga duma parik
(Köti Matayo 24.15-28; Luka 21.20-24)
14 #
Dan 9.27; 11.31; 12.11 Ama ko ta a met ŋo na mamana parik nagon koŋu keri a togwi ’diki ki i pirit nagon ködyö ’bayin a nanyit na, (ti ŋuto logon kekeŋdya lo kuru kurun), a kirut ti ŋutu lo gwon Yudaya kulo wöki i merya. 15#Luk 17.31Ti ŋuto lo gwon i lo ’dek lo kadi lo gwe ti kiyuŋdya kak anyen lupö kanyit kadi i ’dumaddu na nene ŋo. 16Ti ŋuto lo gwon i melesen lo gwe ti yitwe i ’dumaddu na boŋgo nanyit. 17Ama gwon a delya i ŋutu na gwon ko pelela, ko i se na tutunöggu i kilu perok! 18Momo ’yi ta anyen kine kulya böŋö gwon ti pokin i diŋit na katirut. 19#Dan 12.1; Kwe 7.14Kogwon i kilu perok ŋoŋga duma mo gwon kata gwoso nagon ’beron a ko gwoŋdi na, suluja i diŋit na gweji Ŋun kak nu, tojo ko na diŋit, a molu tine pokin köti kwöŋ. 20a ko ködyö MATAT a ko nyökun perok kak, a ŋuto ködyö gwe ’bayin lo lwölwökö; ama a nye iŋge nyökun perok kak kogwon kulya ti ŋutu lo wulwe logon nye aje nyumun kulo. 21Nyena a ko lele ŋuto kulya ko ta i ŋinu diŋit adi, Meddi ta, Masia malo! kode adi, Meddi ta, nye malu! an ta ko yuŋ ta ŋo na jam lepeŋ kine. 22Masiajin ’burönök ko nebijin ’burönök mo pupukun, a mo kweji kweyesi ko ŋo sörösi, anyen togiŋa ma ’di ŋutu lo wulwe ko bubulö. 23Ama kunyar ta; nan aje tukokin ta ŋo liŋ a kokwe nagon kine ŋo a ko nyuŋ pokin nu.
Po na Ŋuro lo ŋuto
(Köti Matayo 24.29-31; Luka 21.25-28)
24 #
Yis 13.10; Yoe 2.10, 31; 3.15; Kwe 6.12;
Yis 13.10; Ejk 32.7 Nyena i kilu perok, i mukök na ŋinu diŋit ŋoŋet, a kolor mo musöni musö, a yaŋa mo tine pararaju, 25#Yis 34.4; Kwe 6.13; Yoe 2.10a kaser ki yu mo ’do ’done kak, a riŋitön ti ki mo yeyeti yeyeta. 26#Dan 7.13; Kwe 1.7a kirut ŋutu mo meddi nan Ŋuro lo ŋuto popo i ’dikolo ko riŋit a duma parik se ko minyo. 27A kirut nan mo soŋdi malaikajin i momoruŋdya na ŋutu kwe lo wulwe i swötön iŋwan ti kak, suluja i ’dutet na kak tojo ko nene ’dutet.
Todinet i kulya ti ki ’bi
(Koti Matayo 24.32-35; Luka 21.29-33)
28Denuŋdye ta lilim lo ki ’bi adi, ’De ’de nagon kenia kanyit wile wilan a koropo nu, a ta dene den adi kiser gwe nyona. 29Nyena köti na meddi ta kine ŋo i kona nu, a ta deŋdi adi nan gwe nyona ko po, #13.29nan gwe nyona ko po kode bubulo nyonyoko adi ’dutet na ŋo liŋ gwe nyona ’diri nan gwe i kötumit.
30’Diri nan takiŋdya ta adi, ŋutu ti na toberon mo ti ’duddyö a kokwe nagon kine ŋo liŋ mo kokonari nu. 31Ki ko kak mo ’du ’duddyö, ama kulyaesi kwe mo ti ’duddyö kwöŋ.
ŋuto ti den ŋilu lor kode ŋinu diŋit
(Köti Matayo 24.36-42; Luka 17.26-30, 34-36)
32 #
Mat 24.36
Lele ŋuto ti den ŋilu lor kode ŋinu diŋit, ma ’di malaikajin ti ki a ko den, ma ’di nan Ŋuro a ko den, ama ka ’de Baba lo deŋdya. 33Kunyar ta, an ta ko dodoto ta; kogwon ta ti den ko diŋit na kine ŋo mo gwon nanu. 34#Luk 12.36-38Kine kulya gwon gwoso nagon lele ŋuto tu i jölö, a na kö ’yi nye ’baŋ nanyit nu, a nye sarakiŋdye kölipönök kanyit i meddya na ’baŋ, ŋutu liŋ geleŋ geleŋ ko kitajin kase, a nye sarakiŋdye katiyunit lo kötumit adi ti nye gwe ti doto. 35Nyenagon an ta ko dodoto ta, kogwon ta ti den ko monye ’baŋ mo yiyitwe nanu, i sömukö kode i tukwaje kiden, kode i sira na sokoro, kode i waran na kak;
36a ko lepeŋ a ’durökin adi dut an lepeŋ ko ryö ta i doto. 37ŋo nagon nan jamakin ta na a na ŋutu liŋ adi, Ti konyen kasu gwe ŋa.
Currently Selected:
Marako 13: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
