Marako 12
12
Lilim lo luköbi na binyo se ko kakuruk
(Koli Matayo 21.33-46; Luka 20.9-19)
1 #
Yis 5.1, 2 A nye suluje jambu ko lepeŋat i lilimön adi, Lele ŋuto a ’yuddu kaden ti binyo i lukobi, a rikije rikija ko mariŋ, a ’boggi dili ryoket na ludweki ti binyo, a tetenakiŋdye taka, a nye sarakiŋdye ko kulye kakuruk i konisi, a nye iti i lele jur. 2A nagon gwe a diŋit na ’butun nu, a nye soŋdi kölipönit ko kakuruk yu i joŋdya na kulye ludweki ti binyo ko lepeŋat yu. 3A kakuruk morgi lepeŋ a ’biddye lepeŋ, a riköddi lepeŋ kaŋo ’bak nene ŋo i könin. 4Köti a nye soŋdi lele kölipönit ko lepeŋat yu, a se iŋge böŋörö lepeŋ i kwe, a sasaŋdi lepeŋ parik. 5A nye soŋdi lele a se iŋge tatu lepeŋ; a se konakiŋdye kulye ŋutu lo son lepeŋ kulo jojo, lepeŋat gwugwut kulye, a tatuje kulye. 6Nye nyuŋ gwon ko ŋuto geleŋ tuŋ logon a pilili lonyit lo Ŋuro lo nyanyara; a i ’dutet a nye soŋdi ŋilo Ŋuro ko lepeŋat yu, kulya adi, Lepeŋat ŋona de twötwö Ŋuro liŋ. 7Ama a kilu kakuruk tokulyaki ko ’börik adi, Malo ŋuto logon mo ruddya lukobi na monye lo. Po ta, ti yi tatune ta tatu lepeŋ, a ŋina lukobi mo gwe a nikaŋ.
8A se morgi lepeŋ, a tatuje lepeŋ, a gubaddi öpu nanyit kaŋo i luköbi na kaden ti binyo. 9Nyena monye luköbi na binyo mo koŋdya nyo? Lepeŋ mo popo i tukaŋu na kulu kakuruk, a mo sarakiŋdye ŋinu lukobi ko kulye ŋutu i könisi.
10 #
Sau 118.22, 23 Ta ŋona a ko ken kulya ti Ŋun na wurö kune le? Adi, Ŋurupit logon ka ’dukök a renya lo aje wora a ŋurupit tutuŋet lo goŋet lo kadi. 11Ŋina ŋo MATAT lo kita; a yi mete a ŋo sorit.,
12A se ga ’yi kiko logon morgi Yesu, ama a se kujono ni lodir lo ŋutu, kogwon se a kurun adi nye jambu ŋilo lilim i kulya kase; nyena a se kö ’yi lepeŋ a se iti tu.
Kaisar bubulö ropaki usur?
(Koti Matayo 22.15-22; Luka 20.20-26)
13A kilo ŋutu temejik soŋdi kulye Parusijin se ko kulye ŋutu lo juŋdyö Erode kulo ko Yesu yu, anyen logga lepeŋ i jamesi kanyit. 14a lepeŋat poŋdi po a kulyani ko lepeŋ adi, Katodinönit, yi deden adi do a ŋuto lo to ’diri, a do tine nyunyumbö ŋutu; kogwon do ti yeyeju todumalan na ŋutu, ama do todiŋdyö kiko lo Ŋun ko to ’diri. Saret ŋona a ruk adi Kaisar bubulö ropaki usur, kode ti bulö ropaki? 15Yi ködyö roröŋ kode ’bayin? Ama a nye iŋge den adi lepeŋat a kamumulukak, a nye pije se adi, Nyo ta möŋu nan? Taki ta nan gurusutöt, #12.15gurusutöta dinario na Roma nagon roparikin kita na lor geleŋ anyen nan memet. 16A se joŋdi joŋdya. A Yesu pije se adi, Ŋina ŋöjinoti se ko kilo wuresi a ti ŋa? A se waddi lepeŋ adi, A ti Kaisar. 17a Yesu kulyani ko se adi, Ropaki ta Kaisar ŋo nagon a ti Kaisar, köti ropaki ta Ŋun ŋo nagon a ti Ŋun. A kulo ŋutu iŋge soŋu parik i kulya ti lepeŋ.
Yesu a piya i kulya ti ŋien i twan
(Köti Matayo 22.23-33; Luka 20.27-40)
18 #
Kon 23.8
A kulye Sadokejin poŋdi ko Yesu ni. (Kilo ŋutu jambu adi ŋutu ti bulö ŋien i twan.) A se pije lepeŋ adi,
19 #
Nyö 25.5
Katodinönit, Mose aje wurökiŋdyo yi ŋilo saret adi, Ko luŋaser lo lele ŋuto a tw ’an a kölökiŋdye nakwan ’bak Ŋuro, a luŋaser lo ŋuto lo twan lo kodyö ruddye ŋina karu ’be, anyen yuŋwekiŋdyo luŋaser lonyit ŋwajik.
20Nyana luŋasirik kata buryo, a kayu lo iŋge yemba nakwan, a ŋilo ŋuto twane twan ’bak ŋwajik. 21a loponi ruddye ŋina karu ’be, a ŋilo ŋuto twane twan ’bak ŋwajik. A ŋuto tomusala köti gwe sona; 22tojo se liŋ buryo a twatwa ’bak ŋwajik. A i ’dutet nase liŋ a ŋina ŋuto köti iŋge twan. 23a i toŋiu na ŋutu lo twatwa a ŋina nakwan mo gwe a niŋa? Kogwon se liŋ buryo aje ’debba lepeŋ a nakwan. 24A Yesu waddi lepeŋat adi, Ta a lyaŋan. Lyaŋan nasu ŋona ti gwon kogwon ta a ko den kulya ti Ŋun na wuwurö kune ma ’di riŋit nanyit le? 25Kogwon i diŋit nagon ŋutu mo aje ŋien i twan nu, a se mo tine yemba kode yema, ama a se mo gwe gwoso malaikajin ki yu.
26 #
Yuö 3.6
Ama i kulya ti toŋiyu na ŋutu lo twatwa, ta kwoŋ a ko ken buk na Mose i ŋo na wurö i kulya ti rudu le? Adi, Ŋun a kulya ko Mose adi, Nan a Ŋun lo Abarayama, ko a Ŋun lo Yisaka, ko a Ŋun lo Yakobo. 27Lepeŋ ti gwon a Ŋun lo ŋutu lo twatwa, ama a Ŋun lo ŋutu lo gwon jörun; ta ’diri a lyaŋan parik.
Saret logon a duma lwölwöŋgu
(Köti Matayo 22.34-40)
28A lele lo katodinök ti Saresi ti Mose gwe kata logon a yiŋ lepeŋat i rerenya ko ’börik. A nye iŋge den adi Yesu a waddu se ’bura, a nye miju nyona, a pije Yesu adi, Lon saret logon a lo kokwe lo saresi liŋ? 29#Nyö 6.4, 5a Yesu waddi adi, Saret lo kokwe adi, Yiŋge ta pon kötumit na Yisaraele; MATAT Ŋun likaŋ a MATAT geleŋ; 30do ködyö nyanyar MATAT Ŋun ilot ko toili ilot liŋ, ko ködudwö inot liŋ, ko yeyeesi kunök liŋ, se ko riŋit inot liŋ. 31#Lew 19.18Saret tomurek malo adi, Do kodyö nyanyar marate ilot gwoso mugun inot. Lele saret ’bayin logon a duma lwölwöŋ kulo. 32#Nyö 4.35A katodinönit lo Saresi lo kulyani ko lepeŋ adi, ’Diri koi Katodinönit; do a jambu ko to ’diri adi Ŋun geleŋ, a lele gwe ’bayin ama nye geleŋ tuŋ. 33#Ose 6.6Nyena ko ŋuto nyanyar Ŋun ko töili lonyit liŋ, ko kuruŋdyö nanyit liŋ, ko riŋit nanyit liŋ, a ko lepeŋ nyanyar marate gwoso mugun nanyit, kweja adi kine kulya lwölwöŋ rubaŋgajin liŋ lo ’yu ’yura se ko ’dokesi liŋ.
34 #
Luk 10.25-28
A nagon Yesu aje den adi ŋilo ŋuto aje nyobba ko tokoŋon nu, a nye kulyani ko lepeŋ adi, Do ’bayin pajo i Tumatyan na Ŋun. A i mukök na ŋina a lele ŋuto gwe ’bayin logon pija lepeŋ ko nene piyet kogwon se kukujönö.
Yesu a pija i kulya ti Masia
(Köti Matayo 22.41-46; Luka 20.41-44)
35A na gwoŋdi Yesu i todiŋdyo i Kadi na Ŋun nu, a nye pije adi, Ada lolor nagon katodinök ti Saresi ti Mose kulya adi Masia a Ŋuro lo Dawidi? 36#Sau 110.1Dawidi lepeŋ lo kulya ko riŋit na Mulokötyo Loke adi, MATAT Ŋun a kulya ko MATAT liŋ adi, Si ’dakine köyö i könin lutaten, tojo ko nan a tin do i ryokakiŋdya na merok kulök kak.
37A ko Dawidi lepeŋ luŋgu Masia a MATAT lonyit, a Masia gwe a Ŋuro lonyit ada?
Yesu a kunyaŋu ŋutu i kulya ti katodinök ti Saresi ti Mose
(Köti Matayo 23.1-36; Luka 11.37-54; 20.45-47)
A lodir duma lo ŋutu lyöŋi lyöŋön i yiŋga na Yesu i jambu. 38a na todiŋdye nye nu, a nye kulyani adi, Kunyar ta i kulya ti katodinök ti Saresi ti Mose logon nyanyar walaŋ a jupu boŋgwat najo a nyare nyar romarikin i piritön gwöriesi. 39Lepeŋat nyanyar si ’da i si ’daesi ti ŋerot i kadijik momoresi, a nyaŋi si ’da i piritön ti ŋutu lo kukwön i rorweki. 40Kilo a ŋutu logon nyesu ŋo ti karu ’bejin, kölumbö a se kwakwaddi diŋit a najo mumulugga. Lepeŋat mo ririŋa bia parik.
’Dogga na karu ’be
(Köti Luka 21.1-4)
41A Yesu si ’dani komorga saŋduk na gwon i Kadi na Ŋun nagon ’dokesi guba kata na, a nye meddi ŋutu i gumba na gurut i saŋduk ŋutu jore logon a kwörinikö ’dogga ko gurut jore. 42A ŋuto nagon a lomeri ko a karu ’be na poŋdi, a gubakiŋdye milin murek nagon momora a taripatat na jur lose. 43A nye lupundye ŋutu kanyit kajujumuk kulo kanyit ni, a kulyani ko se adi, ’Diri nan takiŋdya ta adi, na ŋuto nagon a lomeri ko a karu ’be na aje ’dogga bia parik lwölwöŋ ŋutu liŋ logon aje gumba i saŋduk kata kulo. 44Kogwon lepeŋat liŋ ’dumuŋdya ’dokesi i tukwörienjin kase; ama na ŋuto ’dumuŋdya i tolomerian nanyit, a iŋge ’dogga ko ŋo kanyit liŋ, kweja adi gurut kanyit liŋ nyeesi.
Currently Selected:
Marako 12: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
