Marako 11

Yesu a lupö Yerusalema ko todumalan

(Köti Matayo 21.1-11; Luka 19.28-40; Yoane 12.12-19)

1A nagon se gwe nyona ko ’durökin Yerusalema nu, a se ’dure Betepage ko Betania nyona ko Mere lo Jeitun, a Yesu ’deke soŋdu ŋutu kanyit kajujumuk murek ŋerot,

2a yökije se adi, Iti ta i tur lo gwon kasu ŋerot lu, a ’de ’de nagon ta a ’dur nyin nu, a ta de ryeji kaine kolojityo a munuki kak, logon lele ŋuto a ko nyuŋ woro ko lepeŋ; yokone ta lepeŋ ko jo ta lepeŋ ni. 3A ko lele ŋuto a pija ta adi, Ko nyo ta koŋdya sona? ruŋge ta adi, nan MATAT ’de ’dekan lepeŋ a mo nyökorö kase yu ’de ’de. 4A se iti tu, a ryeji kaine kolojityo a munuki i kiko nyona ko kotumit kaŋo. A se yoköji lepeŋ. 5a ŋutu logon gwo ’dan nyu kulu pije se adi, Ta koŋdya nyo sona i yokoju na kaine kolojityo? 6A se nyokokiŋdye ruket gwoso nagon Yesu aje sarakiŋdye se nu; a kulu ŋutu kolöddi se i tu. 7a se joŋdi kaine kolojityo ko Yesu ni, a se peddi boŋgwat kase i loki na ŋina kolojityo, a Yesu si ’dakine kata. 8A ŋutu jore peddi boŋgwat kase i kiko, a kulye peddi koropo na gŋgonyun se i meleseno kune. 9#Sau 118.25, 26A ŋutu logon tu ŋerot se ko se lo kikipuŋdyö kulo woŋe parik adi, Osana! ŋuto lo po i karin ti MATAT lo ti ’boriani ’boria! 10Tumatyan na popo na merenye likaŋ Dawidi na ti ’boriani ’boria! Osana i piriton ti ki yu!

11A Yesu tulöddi Yerusalema, a lupöni i Kadi na Ŋun; a nagon nye wöŋu ŋo liŋ nu, a nye se ko ŋutu kanyit kajujumuk puök wot murek kulo iti Betania kogwon kolor gwe nyona ko ’doro.

Ki ’bi a lömo

(Koti Matayo 21.18-19)

12A kotumalu nagon se aje kö ’yu Betania nu, a Yesu gwe ko magor,

13a nye meddi ki ’bi pajo a koropo, a nye iti i meddya kode nye ŋona ryöryö nene ŋo kata yu, a nagon nye aje ’dur nyin nu, a nye gwe a ko ryeju nene ŋo ama koropo ka ’de kogwon ’bayin a diŋit na radan na ki ’biet. 14A nye kulyani ko ŋilu ki ’bi adi, Ti lele ŋuto gwe ti nyö ludweki kulök kwöŋ. A ŋutu kanyit kajujumuk yiŋge ŋo na jam nye kune.

Yesu a toke ’ya Kadi na Ŋun

(Koti Matayo 21.12-17; Luka 19.45-48; Yoane 2.13-22)

15A se ’dure Yerusalema, a Yesu lupöni i Kadi na Ŋun, a suluje riggö kaŋo ŋutu lo tutugwöŋu ko se lo gwögworö i Kadi na Ŋun lukata. A nye sösöpuŋge misajin ti ŋutu lo löpuggö gurut se ko si ’daesi ti katugwörök ti gureki; 16a nye tine rukun lele ŋuto i ’doggu na tito kanyit lwöŋöddi Kadi na Ŋun. 17#Yis 56.7; Yer 7.11A lepeŋ poki i todiŋdyo na lepeŋat adi, A wurö adi, Kadi nio mo luŋu a kadi kwakwaset a na gweyajin liŋ ti ŋutu. ’Bayin sona le? Ama ta aje kon nye a pirit ’danaet na karyakak.

18A koanejin temejik se ko katodinök ti Satesi ti Mose iŋge yiŋ kine kulya, a se ga ’yi kiko anyen tatuja Yesu; kogwon se kukujönö lepeŋ, kogwon lodir liŋ lo ŋutu aje söŋu ko ŋo na todin nye kune. 19A i sömukö a nye kö ’yi köji.

Yesu a todiŋdyö i kulya ti ki ’bi loteyon

(Köti Matayo 21.20-22)

20A kotumalu ’beron na lwöŋöddi se nu, a se meddi ki ’bi a teteyon tojo ko kokori. 21a Petero iŋge yeyeoro ŋo nagon a pokin na, a nye kulyani ko Yesu adi, Katodinönit, meddi! Ki ’bi logon do aje löm lo aje teteyon. 22a Yesu waddi lepeŋat adi, Ta ködyö yubbö Ŋun. 23#Mat 17.20; 1 Kor 13.2’Diri nan takiŋdya ta adi, Ko ŋa lo kulya ko lo mere adi, Gwunyu mugun kaŋo ko gubara mugun i tör, a ko ŋilo ŋuto gwe ti dyadya ’yu kanyit i töili, ama a yupe yuŋ adi ŋo na jam nye kine mo kokona, nyena a ’diri mo konakine konaki lepeŋ. 24Nyena nan takiŋdya ta adi, Ŋo liŋ nagon ta pipiyun i kwakwaddu nasu na, yupe ta yuŋ adi ta de titiki se, ’diri a de tikine tiki ta.

25 # Mat 6.14, 15 A na gwo ’di ’e ta i kwakwaddu nu, ko ta a ’delakiŋdya kulye ŋutu kasu i toilyet, pitöki ta lepeŋat; nyena köti a Monye losu lo gwon ki lu böŋö pitökiŋdye ta i lyaŋesi kasu. [ 26Ama ko ta ti ’bön pitokiŋdyö ŋutu, a ma ’di Munyi lo gwon ki lu mo tine pitökin lyaŋesi kasu.]

Yesu a piya adi nye koŋdya kine ŋo ko kido niŋa

(Köti Matayo 21.23-27; Luka 20.1-8)

27A se koti ’dure Yerusalema. A na wöröri Yesu i Kadi na Ŋun kata nu, a koanejin temejik ko katodinök ti Saresi ti Mose se ko ŋutu temejik poŋdi ko lepeŋ ni, 28a se pije lepeŋ adi, Do ryö kido ya nagon do koŋdi kine ŋo? Ŋa lo tiŋdu do kido anyen koŋdi se?

29A Yesu waddi lepeŋat adi, Nan köti gwon ko piyet nagon nan pije ta; ko ta a nyoŋ nan, a nan de takiŋdye ta ko nan koŋdya kine ŋo ko nan riŋit.

30Ŋina batisimo nagon Yoane baba tiddye na po ki kode po ko ŋutu? Nyoŋe ta nan. 31Ama a lepeŋat rerenyani ko ’borik adi, Koyi de ruggö adi, Ŋina batisimo po ki, a nye de pije yi adi, Ko sona nyo ta ti yuŋ Yoane?

32Ama koyi de ruggo adi, Ŋina batisimo po ko ŋutu—a se kujono ni ŋutu, kogwon ŋutu liŋ a yuŋ adi Yoane ’diri a nebi. 33A kirut a lepeŋat renyakiŋdye Yesu adi, Yi ti den. A Yesu kulyani ko se adi, A ma ’di nan lo koti tine tukokin ta ko nan koŋdya kine ŋo ko kido niŋa.

Currently Selected:

Marako 11: BBE

Highlight

Copy