Luka 10
10
Yesu watuma alondeshi amakumi saba na yaili
1Nga apa chisila cha ifintu fi, Mwene wasolwile anji amakumi saba na yaili, wayatuma yaili yaili uku nkolelela ukuya chila shi na poshi pano nkola wakasime ukuya. 2Wayanena, wati: “Kuli mboto inkulu, leelo alimi yali yache; ichino pepini Mwene wa mboto atwale alimi uku mboto yaakwe. 3Pitangini, lolini, namutuma wa ana ya nfwele apa miishi. 4Mutachisenda imbeti, nanti kwende, nanti nfwato; mutachilaula antu un-nsila. 5Ni ng'anda yoshi yino mwingila mwenemo, mutangula ukulaula vi: ‘Kuwe chele-chele un-ng'anda yi.’ 6Nga ngi alimo umwana wa uchele-chele, uchele-chele wino ulumwikalila; nga si mo, uchele-chele wino ulumuwelela. 7Ichino wikalangini un-ng'anda iyo kwene, angi mululya nu kungwa kuno yali, chino yamupa, kuno umbofi asipile ukupiwa ichiombelo chakwe. Mutachipitana um-mang'anda. 8Nunsi woshi uno mwaya ndi yamupokelela, lyangini ifyakulya fino yateka pano muli. 9Poshi alwale yano yali mwenemo, muyanena fino uwene-wi-Leesa uupalamila. 10Leelo unsi woshi uno mwaya mwenemo, na muno yatamupokelile, fumini mwenemo, na pano mulupita um-misolo yaakwe, mulande muti: 11‘Ni nkungu ya mu-nsi wuno, ino itilemantila uku mulu yitu, twaikung'utila kuno muli; leelo mumanye fino uwene-wi-Leesa uupalamila.’ 12Namunena fino chilwangupala uku Sodoma uwanda uo, ukuluta un-nsi uo.
13“Akalanda kunali Kolasini, akalanda kunali, Betsaida, kuno ndi ifipesha-mano fino fyaombike uku mwino, fyali viombeke uku Tilo na Sidoni, ngali apano yafipeshile nu kuswala masaka ni itwi nu kwikala fiyo. 14Leelo uwanda wa uputushi chiluwa changupala uku Tilo na Sidoni ukuluta mwemwe. 15Nawe Kapenaumu, Chene! ulukula nu mwiyulu kwene? Ulusumbwa ukushimu.
16“Wino alumpulika mwemwe, alumpulika nene, na wino wamukana mwemwe, alunkana nene; na wino wankana nene, watamkana wino wantumile.”
17Apano yaya amakumi saba na yaili yawela yaluchimba, yaati: “Mwene, ni fiwa kwene vilutupulika ukwishina lyako.” 18Wene wayanena, wati: “Nawine Shetani wapona ukufuma mwiyulu wa lukosho. 19Lolini, namupa amaka ya kulyata insoka ni kalela, na maka yoshi ayi siluembu; kusi nanti chimwi chino chilumuchisa. 20Leelo mutachichimba kuno ifiwa filumupulika, leelo chimbai kuno amashina yino yaandikwa umwiyulu.”
Yesu wachimba
(Mt 11:25-27; 13:16-17)
21Pao kwene wachimba uku Mweso Nswefu, wati: “Nakusamalisha Tata, Mwene wa mwiyulu na pansi, kuno ifintu fi wayafisa ayamano na akumanya, wayulila utunya, Endi, Tata, kuno ifino chikusipile. 22Napiwa ifintu fyoshi na Tata, kushi wino amanyile uMwana uwini shiko Isi, na kushi wino amanyile Isi, shiko Mwana na wensi wino Mwana akasime ukunjulila.”
23Nga wasenuka uku walondeshi, wayanena ukumbali, wati: “Yali ninkata amaso yano yalulola ifintu fino mululola mwemwe. 24Kuno namunena, fino amalau ainji na ene yakasime ukulola ifintu fino mululola mwemwe, yatafiwine; nu kupulika ifintu fino mulupulika mwemwe, yatafipulike.”
Unsamalia nsipe
25Nga lolini, Kamanya-wa-ntambi umwi awimilila ukumwesha, afwanga, wati: “Kasambilisha, nchite uli kuti mpyane upuma wa manda ti?” 26Nawe wannena waati: “Chaandikwe uli un-Ntambi? Ulusoma uli?” 27Nawe waati: “Ukunde uMwene Leesa wako uku mweso wako woshi, nu ku upuma wako woshi, nu ku maka yako yoshi, nu ku mano yako yoshi; nu nnyonko ndi fino wuikunda wenkola.” 28Wannena, waati: “Walanda ningo, kachite fiyo kwene, newe ukuwa nupuma.”
29Leelo wene wakasime ukuumanyisha fino uwa chumi, atondosha Yesu, ati: “Nu wa chane nawe uwini?” 30Nga Yesu wannena, waati: “Untu wenga wapisile ukufuma uku Yelusalemu, wayanga uku Yeliko; aponela apa yakulupoka-fya-antu; yansula imyenda, yamuma uluma, yampita, yansha alusamba. 31Nga kapela umwi wapitanga un-nsila iyo kwene; pano wanndola wapambata uku mbali. 32Nu unLevi ifiyo kwene, walangi wafika penepo anndola, apambata uku mbali. 33Leelo unSamalia wenga undwendo lwakwe, walangi lino wafika pano ali, pano wanndola, wanndolela inkumbu. 34Wapalamila, wanyepela ifilonda fyaakwe, ampaka mafuta na mansi ya mizabibu; amkwesha pa nyama yaakwe, amtwala uku ng'anda ya eni nu kumsunga. 35Uwanda wa uwili afima impia shiili, apa unkola-ng'anda ya eni, wati: ‘Nsungae wi, na choshi chino wasumba ukuluta, pano nawela ndwisa nkulipe.’ 36Walola uli pali yao yatatu, uwini wino wali uwa chakwe pali wiyo wino waponile pali yakulupoka-fya-yantu?” 37Nawe waati: “Uwiyo wino wanndolile inkumbo.” Nga Yesu annena, wati: “Pitanga, newe kachite fiyo kwene.”
Yesu un-ng'anda mwi Malita na Malia
38Nga lino yalupita, awingila umunsi umwi. Umwanachiumwi ishina lyaakwe Malita, amsenda uku ng'anda ukwakwe. 39Nawe wali nunnina, ishina lyaakwe i Malia, wino watesi pali Yesu, angi alupulikisha amaswi yaakwe. 40Leelo Malita wachunchumbikanga ni milimo tupu; waya kunali, wati: “Mwene, utawine fino chaipa uwachane atansha nduomba nenga? Nnene angazwe.” 41Leelo Mwene wannena, waati: “Malita, Malita; ulwamala nu kuchulila ifintu finji. 42Leelo chilusitiwa ichintu chonga sile, na Malia watasolola ichintu chino chasipa, chino chitalutishiwa kunali.”
Currently Selected:
Luka 10: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
