Luka 11

Isala yi Tata witu

(Mt 6:9-13; 7:7-11)

1Walangi lino wali pamwi alupepa, lino wata, wenga apa alondeshi yaakwe annena, yati: “Mwene, utusambilishe ukupepa, ndi fino Yoane wasambilisha alondeshi yaakwe.” 2Nga wayanena, wati: “Pano mulupepa,

muti: ‘Tata witu

ishina lyako liswepe;

uwene wako wise;

(fino ukasi viombeke pano apansi ndi fino umwiyulu).

3Utupe uwanda nu wanda ifyakulya fitu.

4Utwelele amaifyo yitu,

ndi fino neswe kwene tulwelela yano yali nimipa kano tuli;

utatutwala um-masosho,

(lelo utukulule nu njipe).”

5Wayanena, wati: “Uwini pali mwemwe, ngali na katakwe, ngi waya ushiku apakashi nu kunnena, ati: “Katane, unkopishe imikate itatu, 6kuno katane waatisa ukwane, ali apa lwendo; nene ntakwite chimwi ichakuti ngampa.’ 7Nawe uwa nkashi afwanga, ati: ‘Utankatasha; ntiyala unndyango, neswe utulala apa chitala, nene na anane; ntangi nkatuke nu kukupa?’ 8Namunena fino, nanti atangi akatuke nu kumpa kuno ikatakwe, leelo fino atatile ukunndomba, alukatuka nu kumpa ndi fino alushita.

9“Nene namunena, nati: Lombini nemwe mulupiwa; sitini muluchisana; kong'osyini muluyulilwa. 10Kuno wino alulomba akulupokelela, na wino alushita achisana, na wino alukong'onsha, ayulilwa. 11Kuno iso chi pali mwemwe wino, ngi umwanakwe wanndomba unkate, angampa ifinga? Nanti inswi, apa kumpa inswi angampa insoka. 12Nanti walomba iyi, ampe ikalela? 13Ali ngi mwemwe yaipa mwamanya ukupa ana yino uwila nsipe, Chene? Tata uwa mwiyulu atalulusha nkani ukuyapa Mweso Nswefu yano yalunnomba?”

Yesu na Beelzebuli

(Mt 12:22-30; Mk 3:20-27)

14Nawe wawingaa ifiwa fya chinunu; nga pano ichiwa chafuma, chinunu wiyo chafwanga; amaumba yasunguka. 15Yamwi pali yeneyo yaati: “Aluwinga ifiwa uku maka yi Beelzebuli uwikolo wa viwa.” 16Yamwi yamwesishe, yashita achite ichipesha-mano ukufuma umwiyulu. 17Nawe amanya amelengusi yao, ayanena, wati: “Uwene onsi uno wapalunkana utakwikala, ifino ni ng'anda kwene shilukupona pa ng'anda inina. 18Na Shetani kwene ndi waupalula apa lwakwe, uwene waakwe ungimilila uli? Kuno umwemwe muluti: inene nduwinga ifiwa uku maka yi Beelzebuli. 19Ngi nene nduwinga ifiwa kuli Beelzebuli, nga ana yino yakuluwinga ku maka ini? Ichaleka yao yaluwa aputuzi ya milandu yino. 20Leelo ngi nemwi ndufumya ifiwa uku maka yi Leesa, fwandi uwene-wi-Leesa uumwisila. 21Lino untu wa maka alemile ifyanzo fyaakwe nu kulolela ing'anda yaakwe, ifintu fyaakwe fili ningo. 22Leelo untu wino ali na maka ukunnuta, pano waya nu kumuma, wampoka ifyanso fino watoile, wayankanya yano walema.

23“Untu wino asi ponga nene, i siluembu wane, nuntu wino atalukonganika ponga nene, alusambasha. 24Ichiwa ichiipe pano chafuma uku ntu, chikupitila kuno kusi amasi, angi chilusita apa kupua, ngi chaula ukupalola, chiti: 25‘Namwela uku ng'anda yane kuno nafumile.’ 26Nga pano chafika, chasana impyile na kuno injemfye; chipita, chifisenda ifiwa finina saba, fino fyaupisha ukuluta chikola; fingila nu kwikala mwenemo. Nuntu wiyo ichishila chakwe wakuyipisha nkani ukuluta inkolelo.”

27Walangi achilufwanga amaswi ya, umwanachi umwi umwiumba afumya iswi, ati: “Inkatakwe wino wakusenzile inda, niyele lino wonkile.” 28Leelo wene ati: “Yali ni nkata nu kuluta, yano yalupulika iswi lyi Leesa nu kulilema.”

Yalusita ichilangisho

(Mt 12:38-42)

29Nga maumba pano yakonganaa kunali, atampa kuyanena, ukuti: “Mpanda u waipa ulusita chilangisho, leelo utalupiwa, siku chilangisho chi Yona. 30Kuno ndi fino Yona wali chilangisho uku aNinafe, ifino aluwa uMwana-ntu uku mpanda u. 31Umwene mwanachi uwa ku katutu alukatuka uwanda wa uputuzi wa milandu, ponga na antu ya kasalaka, nawe aluyaputwila imilandu fino ayononi, kuno wene wizile ukufuma ukumbali ya nsi apulikisye amano yi Salomoni; na pa pali wino alusila Salomoni. 32Antu ya ku Nineve yalwimilila uwanda wa uputuzi ponga na antu ya kasalaka, nayo yaluyaputwila imilandu fino ayononi, kuno wene yavipezile uku masunde yi Yona; na pa pali wino alusila Yona.

Ikoshyo lya mwili

(Mt 5:15; 6:22-23)

33“Kushi wino akukosha ikoshyo nu kuwika pano pafisama, nanti apisika ya chiyo, leelo akuwika apa chilemelo, ukuti yano yalwingila yalole umwengelela. 34Ikoshyo lya mwili ilinso; ichino ngi linso lyako lilimbine, umwili wako woshi uli nu mwengelela; leelo ngi litalimbine, nu mwili wako kwene ichanda. 35Ichino ulole umwengelela uno uli munuli, utawa ichanda. 36Ichino ngi umwengelela walimba umwili wako woshi, utakwite pamwi pano pali ichanda, umwili wako onsi wamwa nu mwengelela, ndi fino ikoshyo lilukukosesha ku mwengelela wakwe.”

Yesu wasumbikila aFaliseo na Amanya-ntambi

(Mt 23:1-36; Mk 12:38-40)

37Nga pano achili aluvwanga unFaliseo unwi amwita aye ukuyulya ichakulya ukwakwe; nga awingila, awikala ukulya ichakulya. 38UnFaliseo wiyo pano wannola, wazunguka kuno atafulile apa kulya ichakulya. 39Ngu Mwene annena, ati: “Mwemwe aFaliseo mulufula ingako ni mbale ukunsi, leelo unkasi yino mwashula ukupoka ifya-antu nuipe. 40Mwe fiwelewele, Chene! wino wafichisile ifyakunzi, asuli wino wavichisile ni fya nkasi kwene? 41Leelo fimini wila wa ifintu vya nkasi, nga lolini, ifintu shyoshi fyamwa ningo kuno muli. 42Leelo, akalanda kuli mwemwe aFaliseo, kuno mulufima isempu likumi li nachitumbi na muchicha ni nyenyi zyonsi sha amafwa, na kuno mulusya ifintu vya nchinzi nu lukundo lwi Leesa; leelo chimuile ukuchita ifintu vi inkolelo nanti kuta ukuchita ifintu fiyo ifya uwili. 43Akalanda kuli mwemwe aFaliseo, kuno mwakunda ukwikala uku nkolelo un-ng'anda zyi Leesa nu kulaulwa um-masokoni. 44Akalanda kuli mwemwe, kuno mukoline na malindi yano yataluloleka, yano na antu yakulupita penepo yatamanyile.

45Untu wenga pali yakamanya-ya-ntambi wannena, waati: “Kasambilisha, ukulanda fiyo ulutushenteka neswe kwene.” 46Nga afwanga ukuti: “Akalanda kuli mwemwe kwene, yakamanya-ya-ntambi, kuno mulutwika antu iisendo fino fyanwama; nemwe mwe yakola mutakwemya ifisendo fiyo nanti ukunwe wino onga uwa minwe yino. 47Kalanda kuli mwemwe, kuno mukulukula malindi ya malau, na yaso yino ayano yayumozile. 48Ifino mukulwimikila nu kuzumila imilimo yi yaso yino, kuno wene yayumozile, namwe muyakulila malindi. 49Uku chintu chiyo mano yi Leesa yavwanzile, yaati: ‘Lolini, nanjatumila amalau ni mitume, na yamwi pali yeneyo yaluyumola nu kuyawinga.’ 50Ukuti apa antu ya kasalaka ushitwe uwasi wa malau yoshi uno witike ukufuma ukulengwa kwansi 51Kufuma ku uwasi wi Abeli fika nu wazi wi Zakalia, wino wumosilwe apakasi ya altale ni ng'anda-nkulu-iyi-Leesa. Endi, namunena, fino ulusitwa uku antu ya kasalaka. 52Akalanda kuli mwemwe yakamanya-ya-ntambi, kuno mwati mpoka uluchinji lwa nndyango wa mano: nemwe mwe yakola mutingile, na yano yakasime ukwingila, mwayalesha.”

53Lino wafuma mwenemo, yakaandika na aFaliseo yatampa ukumkatukila chino chaipa, nu kumtondokesha nkani, 54angi yaluntya, kuti yapulike chino wafwanga.

Currently Selected:

Luka 11: FNT1988

Highlight

Copy