Luka 14
14
Uwa safula waposhiwa uwanda wa Sabato
1Nga pano wingila un-ng'anda ya wikolo umwi apa aFaliseo uwanda wa Sabato, kuti alye ichakulya, yannolekeshaa. 2Nga lolini, untu umwi wali panali wino wali unwale wa safula. 3Yesu afwanga, anena yakamanya-ya-ntambi na aFaliseo, ati: “Chene! umwiko ukupozya untu uwanda wa Sabato nanti awe?” 4Wene yatusha. Nga annema, wamposha, anneka ampita. 5Ayanena, ati: “Uwini pali mwemwe ngu mwana waakwe nanti ng'ombe yaakwe itiponela un-chifula, atangaifumye liyo kwene uwanda wa Sabato?” 6Nga yatachili yalande chimwi apa ifintu fi.
Kuchefya
7Yano yalalikwe, pano wawine yalusolola ifisumbi fya ku nkolelo, ayanena unnumbe, wati: 8“Ngulalikwe na umwi uku winga, utachikala uku chisumbi cha nkolelo, kuno palimwi atalalikwa untu wino akulusile. 9Nga awisa wino amulalike mwaili nu kukunena, ati: Silu untu wi, pa awikale.’ Apano ululola insoni ukutampa ukusita ichisumbi uku chisila. 10Leelo ngi walalikwa, yanga ukikale apa chisumbi uku chisila, ukuti ndi pano wisa wino akulalike akunena, wati: ‘Katane, nguna ku, uku nkolelo nkani.’ Apano ululola ukulu pali yoshi yano yateshi ponga newe. 11Kuno weshi wino waikuzya, yalumchefya, na wino wauchefya, yalumkusha.”
12Nga wanena wino wannalike, waati: “Pano wachita ichakulya cha nsanya nanti icha mangusi, utita yakatako na anyonko nanti aluko lwako nanti antu yanji aya safi, kuti yatachi yakulalike newe angi yakulipa. 13Leelo pano wachita ichakulya, uwite apina, alemala, aya matenda, napofula. 14Newe uluwa ni nkata, kuno yatakwite ichakukupa; kuno ululipwa apa kututuluka kwa antu ya chumi.
Uwalalike antu uku chakulya
(Mt 22:1-10)
15Nga wenga pali yano yatesi apa chakulya, pano wapulika ifintu fi, annena, wati: “Ali ni nkata wino alulya unkate um-wene-wi-Leesa.” 16Leelo wene annena, wati: “Untu umwi wachisile ivyakulya tupu, alalika ainji. 17Atuma umuofi waakwe pano chafika ukulya ichakulya, ayanena yano yalalikwe, wati: ‘Nguni, kuno ifintu fyoshi ifipya.’ 18Yatampa yoshi uku mweso onga ukuleoka-leoka. Uwantangulo wannenile, waati: ‘Nemwi ntikala ichalo; ndusita nkachilole. Ndukulomba ungelele.’ 19Nunji waati: ‘Ntikala ing'ombe pea shisano; napita nkasheshe. Ndukulomba ungelele.’ 20Nunji waati: ‘Ntifumalila, ichino fiyo ntangi ngise.’ 21Ngu momfi wiyo wampita, waya wanena umwene waakwe amaswi yao. Nga unkola-ng'anda wiyo alakalika, annena umuofi wakwe, ati: ‘Pita suwa, uye un-nsila inkulu nu tuzila twa m-misi, ulete apina pa, na yano yalemala, napofula na ya matenda.’ 22Umuofi wati: ‘Mwene, chino wanena ichiombeka, leelo umweko uli kweneko na li kwene.’ 23Umwene wannena, waati: ‘Yanga apashi um-mbalawala nu mbali mbali, uyachitile amaka, yingile unkasi, ing'anda yane ishule. 24Kuno namunena, nati: Pali yano nalalike, pasi nanti wenga wino alulya uche apa chakulya chane.’ ”
Ukuwa unndondeshi
(Mt 10:37-38)
25Nga maumba tupu pano yalondekine nawe, waselewike, ayanena, ati: 26“Nguntu wiza kuli nene, nawe atatuwile isi na nyina, nunchi na anakwe, nanina ayonsi nanachi, endita, nupuma waakwe unkola kwene, atangi awe unndondeshi wane. 27Untu wensi wino atalusenda unsalaba waakwe nu kundondela, atangi awe unndondeshi wane.
28“Kuno uwini pali mwemwe, ndakasi ukukula ichipanda, atatana wikale nu kusolosha, alole ngali ni vya ku umalila? 29Atiza apotwe pano waukatusha undufula, na antu yoshi yano yalulola, yatampa ukumsoweka. 30Yaati: ‘Untu wi watangwile ukukula, leelo asi na maka ya kumalila.’
31“Nanti umwene chi, ndalusita ukutwala isumo ukulwa nu mwene unji, atatangula awikale nu kwelengula, fino unkola ponga na antu yaakwe elfu ikumi, angawesha ukukomana na wiwi alwisa kunali na antu ielfu amakumi yaili? 32Na ngi walola ataweshishe, atuma antu asita ukupulikana, pano untu wilye achili ukutali. 33Ifino na chila ntu pali mwemwe, nga tasile fyoshi fino ali navyo, atangi awe unndondeshi wane.
34“Unsilya wazipa, leelo unsilya ngi utakalipe ungatelwa chani ukalipe? 35Utasipile apa fyalo nanti apitumba; antu yausumba apashi.
Uwa makutwi ya kupulika, apulike.”
Currently Selected:
Luka 14: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
