Mateo 16
16
Yesu wakaana kuyapa antu chilangisho
(Mk 8:11-13; Lk 12:54-56)
1Nga yiza aFaliseo na aSadukeo yamwesha, yanndomba ayalaange ichilangisho cha kufuma umwiyulu. 2Leelo weene wayaneena, waati: “Pano yawa mangushi, mukuluti: ‘Kwamwa ichaka, kuno mwiyulu mwakasuka.’ 3Nu ntondo muti: ‘Ileelo kwamwa unsa, kuno mwiyulu mwakasuka nu kutimbila.’ Mweemwi mwamanya nu kumanya fino umwiyulu muli ilelo, Cheene! ifilangisho fya makati ya mutangi mumanye? 4Umpaanda uyiifu nu wa upuundu ulushita ifilangisho, leelo mutalulola ifilangisho, siku ichilangisho chi Yona.” Nga ayasha ampita.
Insasyo sha aFaliseo na aSadukeo
(Mk 8:14-21)
5Nga alondeshi pano yaya uku mbalama, yalatila ukuseenda imikaate. 6Yesu wayaneena, waati: “Lolini, muisunge ni nsasho sha aFaliseo na aSadukeo.” 7Yapashanya akola na akola, yaati: “Ukuno tutasensile imikaate.” 8Nga Yesu amanya, ayanena, ati: Nga fino mulupashanya mwe yakola na akola, mwe usumilo uche, kuno mutakwite imikaate? 9Mutamanyile na li kweene, naanti ukwelengula imikaate yiilye yisaano uku yantu yaalye imyaanda amakumi yasaano, ni fiyo finga fino mwasoshile? 10Naanti mikaate yilye saba uku yaantu yaalye imyaanda amakumi yani, ni fiyo finga fino mwasoshile? 11Chawa uli mutamanyile fino asi ku mikaate namuneniile? Leelo isungiini ni isasho sha aFaliseo na aSadukeo.” 12Apano yamanya fino atayaneenile ukuisuunga ni isasho sha nkaate, leelo na masambilisho ya aFaliseo na aSadukeo.
Petlo wataka Yesu fino i Klisto
(Mk 8:27-30; Lk 9:18-21)
13Nga pano Yesu waya uku mbali ya Kaisalia Filipi, atondosha alondeshi yaakwe, ati: “Yakulutaka uMwaana-ntu, yaati: Uwini?” 14Yalaanda, yaati: “Yamwi yakuluuti: We Yoane Kabatisha, na yamwi: We Elia, na yamwi yaati: Yelemia naanti unnina wi yakalausha.” 15Wayanena, waati: “Nemwe mukulutaka, umuti: Neene wiini?” 16Simoni Petlo wannena, waati: “Wewe uli Klisto, umwaana wi Leesa uwa upuma!” 17Yesu wannena, waati: “Inkata yaako, Simoni Bar-Yona, kuno umwili nu waaashi fitakulangilila fi. Leelo Taata uwa mwiyulu. 18Neene nakuneena wewe uli Petlo (alikuti: ifiinga) na pipaampa liyo nankula ikongani lyane, ni milyaango ya kushimu italulipota. 19Neene nankupa wewe ifunguulo sha wene-wa-mwiyulu, na lyooshi lino wacha wayalila kuno ukuushi, liluyalilwa nu mwiyulu kweene, na lyooshi lino wacha wayulila kuno ukuushi, nu mwiyulu kweene liluwa iliyulilwa.” 20Nga ayalesha nkaani alondeshi yaakwe, yataneena untu umwi fino weene ali Klisto.
Yesu wafwaanga pa machuulo yaakwe
(Mk 8:31—9:4; Lk 9:22-27)
21Fuma liyo kweene Yesu ataampa ukuyaneena alondeshi yaakwe, ukuti: Chinndungime ukuya uku Yelusalemu nu kusaanwa na machuulo minji uku yakoombe na yikolo iyakapela na yakaandika, nu kumoolwa, nu waanda wa utatu ukututuluka. 22Nga Petlo anseenda ukumbali, ataampa ukumkanya, ati; “Awe, Mwene! Fiyo fitalukusaana.” 23Nga asenuka, aneena Petlo, ati: “Yaanga uku chisila chaane, Shetani. Ululeka ndukumika, kuno utalwelengula ayi Leesa, leelo aya aantu.” 24Apano Yesu wanenile alondeshi yaakwe, ati: “Untu weeshi wino alushita ukundondela, aukaane unkola, autwiike unsalaba waakwe, andondele. 25Kuno untu wino alushita ukuufyusha upuma waakwe, aluulofya, nu ntu uwacha walofya upuma waakwe ukwishiina lyaane, aluulola. 26Cheene! chingamwaswa chaani untu ndi wapata fyooshi ifya kuno ukuushi, nu kulofya upuma wakwe? Naanti untu angafiima chaani akulule upuma waakwe? 27Kuno uMwana-ntu alwiisa um-ukulu wi isi poonga na yamalaika yaakwe, apano alupa chila untu kulingana ni milimo yaakwe. 28Umwenemo ndumunena, pali antu pali ya yano yimilile pa, yataluufwa naanti uche, kufika na lino yalulola uMwaana-ntu alwiisa um-weene waakwe.
Currently Selected:
Mateo 16: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
