Mateo 18
18
Wikolo uwini um-wene-wa-mwiyulu
(Mk 9:42-50; Lk 9:46-48)
1Liyo kweene alondeshi yaya kuli Yesu, yannena, yaati: “Uwikolo uwini fwaandi um-weene-wa-mwiyulu?” 2Awita umwaanche weenga, amwiika apakasi yao. 3Afwaanga, ati: “uMwenemo ndumunena: ngi mutasenwiike nu kuwa wa yaanche, mutalwiingila naanti uche um-weene-wamwiyulu. 4Ichino weeshi uwacha waucheefya unkola wa mwaanche nnono wi, wiyo ali wikolo um-weene-wa-mwiyulu. 5Na weeshi uwacha wapokelela umwaanche weenga, wino akoliine nawi ukwishina lyaane, ampokelile neene. 6Nu wacha waleka umwaanche nnono weenga pali ya yano yantauile wonoona, chilingiine anyepelwe un-ngalo ifiinga ikulu ilya kusyiila nu kusumbilwa muli yeemba apiyeshi.
7“Akalaanda ukuushi uku ifiintu fya konoona; kuno chilungiime ukwiisu ifiintu ifya kononela, leelo akalaanda kaakwe uuntu wiyo, wino aluleta ifya konoona, 8Ichino ikasa lyaako naanti ikulu lyaako ndi liluleka ulonoona, liputule, ukalisuumbe ukutali; chili uche uche ukwingila um-upuma neewe waulilwa ikasa naanti ikulu, kuleka ukuwa na makasa yaili nanti amuulu yaili nu kusumbilwa um-mooto wa maanda ti. 9Ni liiso lyako ngi lyaleka wonoona lifyonkole, ukalisumbe ukutali; chili uche uche ukwingila um-upuma we chitonko, kuleka ukuwa na maaso yaili nu kusumbilwa un-chilinkwe cha mooto.
10Mulole mutasula umwaanche weenga pali ya; kuno ndumunena, fino yamalaika yao umwiyulu manda yoshi yalulola usyu wi Taata alu mwiyulu. [11Kuno Mwaana-ntu wzulilu fyusha chino chalowa.]
Unndumbe wa fweele yino yalowa
(Lk 15:3-7)
12“Mwalola uli? Untu ndali ni fwele umwaanda, yoonga yalowa, Cheene! atakusha shiishi amakumi tisa na tisa uku myaamba, ayu ukushita yiyi yino itilowa? 13Nga pano ndi wayilola, umweneemo ndumunena: aluichimbila nakani yiyo, ukuluta shiisi amakumi tisa na tisa, shino shitalowile. 14Ifino chitashifiile kuli Taata wino alu umwiyulu, ukuti weenga pali ya anoono alowe.
Ifyo lya nnyonko. Kunyepa nu kusapula
15“Nu nnyonko ndi wakuyifya yanga unsuunde, weewe nawe mweenga; ndi wakupulika, ukupata unnyonko. 16Ndi waula ukukupulika, toola untu weenga naanti yayili, ukuti uku ushuta wa antu yayili naanti yatatu chila iswi liwe niingo. 17Ngangi waula ukuyapulika yao, lineene ikongaani; na ngi waula ukulipulika ikongaani kweene, munndeke awe wa aantu yakulukuwa na yakalifya yikodi. 18Umwenemo ndumunena: yooshi yano mwacha mwanyepa kuno ukuushi, yalunyepwa nu mwiyulu. Na yooshi yano mwacha mwasapula kuno ukuushi, yalusapulwa nu mwiyulu. 19“Kayili ndumuneena fino aantu yayili ndi yacha yapulikana kuno ukuushi ukulomba ichiintu chimwi, Taata uwa mwiyulu aluyachitila. 20Kuno pano yali yaili naanti yatatu iyakongana ukwishiina lyaane, neene kweene ndipo.”
Kwelela aanji
21Nga Petlo aya kunli, annena, ati: “Mweene, uwachane anjifye amaila yaanga, neene mwelele? Naanti amaila saba?” 22Yesu wannena, waati: “Ntalukuneena ukuti amaila saba, leelo naanti saba maila sabini.
23“Chaleka uweene-wa-mwiyulu wakolana nu mweene weenga, wino wakasiime ukusolosha na aomfi yaakwe. 24Pano watangula ukusolosha, yanndetela untu weenga wakopa impia, talanta elfu ikumi. 25Nawe pano waula ichakulipa, umweene waakwe waati akalwe, unkola nunchi na aanakwe ni ifiintu fyooshi fino ali nafyo, kuti alipe impa iyo. 26Nga umuofi wiyo apona pa muulu yaakwe amwinamila, afwaanga ukuti: ‘Mweene, untekelele, neene nankulipa yooshi swe.’ 27Umweene wa momfi wiyo wankumbukila, wansapula, wamweleela impa yiyo. 28Ngu momfi wiyo pano wafuma, alola umuofi weenga apa yanina, nawe wakopa kunali impia umwaanda woonga, wanndema wankama ilongomilo, annena, ukuti: ‘Undipe impa yaako.’ 29Nga umuofi nachakwe wiyo apona pa muulu yaakwe, apapata kunalii, ati: ‘Unteekelele, neene nankulipa fyooshi swe.’ 30Leelo wene atakasime, wannyepa uku nyololo, kufika na lino wacha walipa impia yiyo. 31Nga pano aomufi yanina yalola chino wachita, yawa ni chikoonko nkaani, yaya yalandila umweene wao fyooshi fino wachisile. 32Apano umweene waakwe wamwita, wannena ukuti: ‘Uweewe, we momufi njipe, uweewe nalile nkweleela impia yiilye yooshi pano wampapaata. 33Nga weemwi utali ukumbukile umuofi na chaako, ndi fino neemwi nakukumbukile weewe? 34Umweene waakwe walakalika, wantwaala kuli yano yakunyepa, kufika na lino wacha walipia impa yaakwe yooshi. 35Ifino na Taata uwa mwiyulu alumuchita mweemwe, ngi mutalweleela um-myeeso yino, chila ntu nu nnina.”
Currently Selected:
Mateo 18: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
