Luka 6

Peny kame mako Ceng Sabato

(Matayo 12.1-8; Marako 2.23-28)

1 # Iswilia 23.25 Ceng Sabato moro acel, Yesu kede josiao mege oudo tie ot di kibeo ki poto me engano. Josiao mege oko cako gigito wit engano di kinginginyo i cing gi, di kimwodo. 2Iparisayon mogo oko penye be, “Pinyo komio wun itienu timo gikame Iswil dagi i Ceng Sabato?”

3 # 1 Samuel 21.1-6 Yesu oko dwoko ne gi be, “Benyo, wun likame pwodi isomunu gikame Daudi riki otimo di bin kec oneke, en karacel kede jo kame oudo etie kede? 4#Jolebi 24.9En bin edonyo i ot ka Rubanga, di eko camo mugati kame oudo tie giayala but Rubanga, di eko mino jo mege da, do di Iswil wa likame yei ne ngatamoro camo mugati no, kwanyo kenekene josaseredoti.”

5Di do Yesu oko waco ne gi be, “Wot ka dano en Rwot me Sabato.”

Icuo kame Bade Omito

(Matayo 12.9-14; Marako 3.1-6)

6Ceng Sabato ace, Yesu oko donyo i sinagoga, di eko donyo pwony iye. Icuo moro oudo tie kuno kame bade tetu cam omito. 7Jopwony me Iswil kede Iparisayon oko donyo ngine pi mito neno ka oudo eyaro cango dano Ceng Sabato, tetekeny kiud gikame kiromo pide iye. 8Do Yesu oudo ngeo tam gi, en eko waco ne icuo nono be, “Bia icung kan.” Icuo kame bade omito nono da oko yai di eko ot cungo anyim kuno. 9Yesu oko waco ne gi be, “Ber kong apenyu, Iswil wa yei ne wa timo bero Ceng Sabato arabo timo raco? Marao kuo me dano arabo neke aneka?” 10En eko neno gin dedede rimaro, di eko waco ne icuo nono be, “Riei badi!” Loca da oko timo kamanono, di bade oko doko ber bobo.

11Do gin kiko doko ger adikinicel, di kiko cako poro kop ken gi ken gi pi gikame kipoore timo ne Yesu.

Yesu Oyero Joor Tomon kiwie Are

(Matayo 10.1-4; Marako 3.13-19)

12I kare nono, Yesu oko ot di eko yito malo i wi moru pi lego, en eko bedo lego but Rubanga iwor kiakia. 13Odiko di piny oru, en eko lwongo josiao mege bute, di eko yero jo tomon kiwie are kikom gi, kame en eko lwongo be joor mege: 14Simoni (kame en eko cako ne nyinge be Petero), kede omin mere Anderia, kede Yakobo kede Yokana, kede Pilipo kede Batulumayo, 15kede Matayo kede Tomasi; Yakobo wot ka Alipayo kede Simoni (kame oudo obedo ngat kalikame mito apugan me kare nono), 16kede Yuda wot ka Yakobo, kede do Yuda Isikariot, kame bin oko rupao Yesu.

Yesu Opwonyo kede Ecango Jo

(Matayo 4.23-25)

17Di do bin Yesu otieko wok piny kede joor mege ki wi moru, en karacel kede josiao mege atot ace da, kiko cungo kakame tie bala elet. Ekodet adwong me jo oudo tie kuno kame bin oyai ki piny me Yudea dedede, ki Yerusalem kede ki bomban me Taya kede Sidon, kame gongere kede nam adwong; 18gin oudo kibino pi winyo kop mere kede pi udo cango; di jo dedede kame tipo areco oudo lolo oko cango. 19Jo dedede oko donyo mono epone me mule, pien twer me cango oudo tie wok kibute di cango jo dedede.

Kilel kede Cwercuny

(Matayo 5.1-12)

20Yesu oko tingo wange malo di eko neno josiao mege, en eko waco ne gi be,

“Itienu kede winyo wun jocan;

pien Ajakanut ka Rubanga obedo meru.

21Itienu kede winyo wun jo kame kec oneko wu nan;

pien ibinunu yeng.

Itienu kede winyo wun jo kame nan kok;

pien ibinunu nyero.

22 # 1 Petero 4.14 “Itienu kede winyo ka jo dagi wu, di kipoko wu tenge kikom gi, di kiyeyeto wu, di kidubo nying wu pi Wot ka dano. 23#2 Iyutun 36.16; Tice 7.52Lelunu i ceng nono di isosomunu pi yomcuny, pien giamia wu me pwoc tie dwong i malo. Pien kiton joakwari gi da bin otimo kamanono ne inabin.

24“Do itienu i can wun wegi abar;

pien wun itiekunu udo gikame kweo cunyu.

25Itienu i can wun jo kame nan iyengunu;

pien kec bino neko wu.

Itienu i can wun jo kame nan nyero;

pien ibinunu iturur kede koko.

26“Itienu i can ka jo dedede pwoyo wu be iberunu; pien riki joakwari gi da otimo kamanono ne inabin me angalo.

Opoore Maro Jokwor wa

(Matayo 5.38-48; 7.12a)

27“Do ango awaco ne wun dedede jo kame tie winya be, marunu jokwor wu, di ikounu timo bero but jo kame dagi wu. 28Miunu jo kame lamo wu winyo, di ikounu lego ne jo kame yeyeto wu. 29Ka ngatamoro obapo lemi, loke bobo tetucel da ebapi; ka ngatamoro otero ekoti ni, mie kiton esati da. 30Ngat acelacel kame kwai gimoro mie, doko ka ngatamoro otero gimoro kibuti, kur bobo iburao en. 31#Matayo 7.12Tim ne jo apat da gikame in imito be koto gida kitimo nin.

32“Ka wun imarunu jo kame maro wu kenekene, mano konyo wu kede nyo? Pien kiton jodubo da maro jo kame maro gi. 33Doko da ka wun itimunu bero ne jo kame timo ne wu bero erume, mano konyo wu kede nyo? Pien kiton jodubo da timo kamanono. 34Doko ka imiunu but jo kame wun itienu kede gen me udo kibut gi kenekene, mano konyo wu kede nyo? Pien jodubo da mio but jodubo wad gi, pi mito udo arom kamanono bobo. 35Do marunu jokwor wu, di itimunu ne gi bero, di imiunu da abongo geno be culu. Di do ikounu bino udo giamia me pwoc adwong adikinicel, di ikounu doko idwe ka Ngamalo Twal; piento en etimo bero ne jo kame li kede pwoc kede ne jo areco da. 36Bedunu kede cuny me kisa bala kame Papa wu da tie kede cuny me kisa.

Ngolo Kop ne Jo icegun

(Matayo 7.1-5)

37“Kur ingolunu kop ne jo icegun, me wek kur ngol kop ne wuda. Kur iwacunu ne jo raco, me wek kur wac ne wuda raco; sasirunu jo, tetekeny oko bino sasiro wuda. 38Miunu di oko bino mino wuda; kobino pimo ne wu i gi me pim aber kopong, kame kodio di koyayango, di ony, di oko bino mino wu. Pien epone kame wun ipimunu ne kede jo, en kame kobino pimo ne wuda kede.”

39 # Matayo 15.14 Di do Yesu oko waco ne gi agole be, “Emuduk twero peno emuduk wad gi benyo benyo? Pien ka etimo kamano, mam gin are nogo kibino poto i bur? 40#Matayo 10.24-25; Yokana 13.16; 15.20Likame tie ngasiao moro kame pire dwong kalamo ngapwony mere, do ngasiao acelacel ka ongetakino isoma mere, en kame mio eko doko rom kede apwony mere.

41“Pinyo komio in ineno apoke kame tie i wang ngawoti, do di likame iko twero neno isiki kame tie i wangi? 42Benyo benyo kame in isobolo waco ne kede ngawoti be, ‘Diera, wek akwanyi apoke ki wangi,’ do di in likame itwero neno isiki kame tie i wangi? In ngaecuke, cak ber kwanyo isiki kame orire i wangi, en kame mio di do wangi ko doko bit pi kwanyo apoke kame tie i wang ngawoti da.

Yat kede Anyakini mere

(Matayo 7.16-20; 12.33-35)

43“Yat aber likame nyako anyakini areco, doko yat arac da likame nyako anyakini abeco. 44#Matayo 12.33Yat acelacel ngere kede anyakini mere; pien likame kotwero ngwedo anyakini me epigi kikom okuto, doko likame kotwero ngwedo olok kikom ocokocok. 45#Matayo 12.34Dano aber woto bero kikom gikame beco kame en ekano i cunye. Dano arac da woto raco kikom jame areco kame en ekano i cunye. Pien dog dano yamo gikame opong i cunye.

Jogedo Are

(Matayo 7.24-27)

46“Pinyo bo komio ilwonganu be Rwot, Rwot, do di likame itimunu gikame ango awaco ne wu? 47Ngatamoro kame bino buta di eko winyo kop na, di eko timo gi, ango abino nyuto ne wu gikame dano nono cal kede. 48En ecal kede icuo moro kame bin tie gero ot; en ekunyo bur atut di eko keto acakini me ot nono i wi lela. I kare kame alele oko bino kede, pii oko dipo ot nono, do likame eko yangere, pien oudo kogere kiber. 49Do dano acelacel kame winyo kop nango di likame eko timo, en ecal kede ngagedo moro kame bin ogero ot i lobo abongo kunyo apama mere donyo piny; i kare kame do alele oko bino kede di oko dipere i kom ot nono, en eko atyaikin piny ngidingid.”

Currently Selected:

Luka 6: BILKDC13

Highlight

Copy