KULOVOKA 5
5
1Hakukumisa vyumevi, vaMose naAlone vayile, Vambile kuli Fwalo ngwavo, Yehova Kalunga kavaIsalele nambe ngwenyi, Suwula vatu jami, mangana vaye mupambo vakangulingile ciwanyino.
2Fwalo avambile ngwenyi, Yehova ikiyeya numba ngwivwilile mulizu lyenyi ngusuwule vaIsalele? Kangwatacikiza Yehovako, kaha nawa kangute kusuwula vaIsalele.
3Vamwambile ngwavo, Kalunga kavaHepeleu natuwane. Aci tusuwule mwane, tuye mupambo kutambuka makumbi atatu, tukamuvatwile Yehova Kalunga ketu vimuna, kucina mwakatuzombokela namusongo wacihita, mokomoko najipoko jamikwale.
4Mwangana waEjipitu avambile ngwenyi, Enu vaMose naAlone, ikaze muli nakuhungwila vatu kumilimo yavo? Yenu kuviteli vyenu.
5Fwalo avambile ngwenyi, Talenu, vatu vali mulifuci vanavulu jino, kahenu muli nakuvanokesa kuviteli vyavo.
6Halikumbi lize Fwalo avalwezele vaka-kuzacisa vatu, navafumbelo javo ngwenyi,
7Kanda mukavahana ceka vatu mwila wakutenga tumenga nge hakulivangako. Vayenga vakalitalile vavene mwila.
8Kuvula catumenga nawa, nge omu vanavatungunga, mukiko vene muvatwikenga, kanda mukatepululamoko. Mwomwo vanazezama, xikaho vali nakuteta ngwavo, Twatuyenu tukamuvatwile Kalunga ketu vimuna.
9Milimo yamalunga yilemenga cikuma, mangana vazatengamo, kanda vakatalilila mazu akwongako.
10Vaka-kuzacisa vatu valovokele, navafumbelo javo nawa, Vambile kuli vatu ngwavo, Fwalo nambe ngwenyi, Kangwexi kumihana mwilako.
11Yenungenu vavene, mukande mwila kwexokwo namukahasa kuuwanyina, mwomwo kumilimo yenu kavexi kutepululakoko.
12Ngoco vatu valimwangile kulifuci lyaEjipitu kwosena nakukongola vijinji vyamwila vakavitenge nge mwila.
13Vaka-kuzacisa vavaxinjilile, ngwavo, Manyisenu milimo yenu, mikapa yenu yahakumbi hakumbi, nge omu kwapwilenga mwila.
14Kaha vavetele vafumbelo javana vaIsalele, vaze vahanyine kuvazacisa kuli vaka-kuzacisa jaFwalo, Vavambile ngwavo, Munazenekela ika kumanyisa mikapa yenu nazau nalelo nakutenga tumenga nge hakavanga?
15Jino vafumbelo javana vaIsalele vayile, vatetele kuli Fwalo ngwavo, Ikaze uli nakutulingiletu vangamba jove ngana?
16Kavexi nakuhana mwila kuli etu vangamba joveko, kaha navatwamba ngwavo, Tengenu tumenga. Kaha tala, vanatuvetetu vangamba jove, oloze mulonga uli kuli vatu jove.
17Oloze ikiye avambile ngwenyi, Munazezama, munazezama. Xikaho munambe ngwenu, Twatuyenu tukamuvatwile Yehova vimuna.
18Xikaho, yenu jino muzate, mwomwo kavexi kumihana mwilako, oloze mukatesamo tumenga.
19Kaha vafumbelo javana vaIsalele valimwene ngwavo, Tuli mwamupi, omu Vavambile ngwavo, Kanda mukatepululako kutumenga twenuko, mikapa yenu yahakumbi hakumbi.
20Vawanyine vaMose naAlone, vakivo vemanyine mujila omu valovokele muli Fwalo.
21Kaha Vavambile ngwavo, Yehova amitale, ayule, mwomwo enu munatunukisako nalivumba lyalipi kumeso aFwalo, nakumeso avangamba jenyi, nakuvahana jipoko jamikwale mumavoko avo vatujihe.
Yehova mwavalweza vaMose naAlone mwakulingila
22Mose akindulukile kuli Yehova, amwambile ngwenyi, Ove Mwata, Ikaze unapihixila vatu ava? ikaze unangutumina?
23Mwomwo kufumisomu ngwezanga nakuhanjika kuli Fwalo mulijina lyove, ikiye napihisa vatu ava, kahOve kupululula vatu jove kawavapululwileko.
Currently Selected:
KULOVOKA 5: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.