KULOVOKA 6
6
1Yehova ambile kuli Mose ngwenyi, Jino naumonomu nangumulinga Fwalo. Mwomwo mwakavasuwula nalivoko lyangolo, mwakavahanga mulifuci lyenyi nalivoko lyangolo.
2Kalunga ahanjikile kuli Mose, amwambile ngwenyi, Ami yami Yehova.
3Ngwalisolwele kuli Apalahama, nakuli Isaka, nakuli Yakova, ngwami, NguKalunga ngukweci ngolo josena. Oloze kulijina lyami yami Yehova kavangutacikijileko.
4Kaha ngunazamisa navo #Kupu. 12.7; 15.18; 26.3, 4; 28.4, 13.luxiko lwami kuvahana lifuci lyaKanane, lifuci lize vene vazuzumanyinenga.
5Kaha ngunevu nawa kukemena cavana vaIsalele, vaze vaheta kuli vaEjipitu muundungo, kaha ngunanuka luxiko lwami.
6Xikaho Vambulile vana vaIsalele ngwove, Ami yami Yehova, kaha nangukamifumisa muxi yaviteli vyavaEjipitu, nangukamipululula muundungo wavo, nangukamisokola nalivoko lyakwolola, nakuvazangamisa kuzangamisa cacinene.
7Kaha nangukamitavila kupwa muvatu jami. Ami nangupwa nguKalunga kenu, kahenu namukangutacikiza Ami, yami Yehova Kalunga kenu, yami nangukamifumisa muxi yaviteli vyavaEjipitu.
8Nangukamingisa mulifuci lize ngwalixingile kuhana kuli Apalahama nakuli Isaka nakuli Yakova. #Yoxu. 24.13; Samu 136.21, 22.Nangukalihana kuli enu kupwa uswana wenu, Ami yami Yehova.
9Mose ahanjikile ngoco kuli vana vaIsalele. Oloze kavevwililile kuli Moseko hakulwisa micima yavo, haundungo waukalu.
10Yehova ahanjikile kuli Mose ngwenyi,
11Ingila, uhanjike kuli Fwalo mwangana waEjipitu ngwove, asuwule vana vaIsalele mulifuci lyenyi.
12Mose ahanjikile kumeso aYehova ngwenyi, Tala, vana vaIsalele kavevwililile kuli amiko. Kaha Fwalo mwangwivwilila ngacilihi? Ami yami mutu ngukweci mivumbo vazeneka kujihana.
13Yehova ahanjikile kuli Mose nakuli Alone nakuvahana luximbi valwambulule kuli vana vaIsalele nakuli Fwalo mwangana waEjipitu, nakulovola vana vaIsalele mulifuci lyaEjipitu.
14Vamyata jajizuvo javakaka javo ava. Vana vaLuvene mwanalsalele watwatwa vamalunga ava, ou Hanoke, ou Palu, ou Hezelone, ou Kalami, eji jikiko jitanga javaLuvene.
15Kaha vana vaXimeyone vamalunga ava, ou Yemwele, ou Yamine, ou Ohate, ou Yakine, ou Zohale, ou Xaulu, mwanapwevo kaKanane, eji jikiko jitanga javaXimeyone.
16Awa akiko majina avana vaLevi vamalunga, mukusemunwina cavo, ou Ngelexone, ou Kohate, ou Melali. Kaha myaka yize ayoyele Levi yahetele mumyaka likulukaji namakumi atatu namyaka yitanu nayivali.
17Vana vaNgelexone vamalunga ava, ou Livinyi, ou Ximei, nge kujitanga javo.
18Vana vaKohate vamalunga ava, ou Amalame, ou Izahale, ou Hevelone, ou Ujiyele. Myaka yize ayoyele Kohate ahetele mumyaka likulukaji namakumi atatu namyaka yitatu.
19Vana vaMelali vamalunga ava, ou Mali, ou Muxi. Eji jikiko jitanga javaLevi mwaya kusemunwina cavo.
20Amalame ambacile Yokevete ndumbwaise, kaha ikiye asemene nenyi Alone naMose. Myaka yize ayoyele Amalame yahetele mumyaka likulukaji namakumi atatu namyaka yitanu nayivali.
21Vana vaIzahale vamalunga ava, ou Kola, ou Nefwenge, ou Jikili.
22Vana vaUjiyele ava, ou Mixaele, ou Elezafwane, ou Xicili.
23Alone ambacile Elixeva, mwanaAminatave, ndumbwaNaxone, ikiye asemene nenyi Natave, naAvihu, naEleyaza, naItamale.
24Vana vaKola vamalunga ava, ou Axile, ou Elekana, ou Aviyasafwe, eji jikiko jitanga javaKola.
25Eleyaza mwanaAlone ambacile mwanaPuciyele umwe, ikiye asemene nenyi Fwinehase. Ava vakivo vamyata jajizuvo javakaka javaLevi mwaya jitanga javo.
26Ava vakivo vaze vaAlone naMose vaze ambile Yehova ngwenyi, Lovolenu vana vaIsalele mulifuci lyaEjipitu, nge omu mwaya mayongomenavo.
27Ava vakivo vaze vahanjikile kuli Fwalo mwangana waEjipitu vakalovole vana vaIsalele muEjipitu. Ava vakivo vaze vaMose naAlone.
28Kaha casolokele halikumbi lize ahanjikile Yehova kuli Mose mulifuci lyaEjipitu,
29Yehova ahanjikile kuli Mose ngwenyi, Ami yami Yehova. Mwambulile Fwalo mwangana waEjipitu mwose nanguhanjika kuli ove.
30Mose ambile kumeso aYehova ngwenyi, Tala, ngukweci mivumbo vazeneka kujihana, kaha Fwalo mwangwivwilila ngacilihi?
Currently Selected:
KULOVOKA 6: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
