KULOVOKA 7
7
1Yehova ambile kuli Mose ngwenyi, Tala, ngunakulingisa kupwa nge Kalunga kuli Fwalo, kaha yayove Alone mwapwa kapolofweto kove.
2Hanjikove mwosenomu nangukulweza, kaha yayove Alone ahanjike kuli Fwalo ngwenyi, asuwule vaIsalele mulifuci lyenyi.
3Ami nangukaluhwisa mucima waFwalo, nanguvulisa vinjikizo vyami navilinga vyami vyakukomwesa mulifuci lyaEjipitu.
4Oloze Fwalo kexi kumivwililako. Kaha nangunangika livoko lyami haEjipitu, nangukalovola mayongomenami, vatu jami vana vaIsalele, mulifuci lyaEjipitu nakuzangamisa vaEjipitu nakuzangamisa cacinene.
5VaEjipitu navakangutacikiza Ami yami Yehova, omu nangukolola livoko lyami haEjipitu, nakulovola vana vaIsalele muli vakivo.
6VaMose naAlone valingile ngoco, nge omu avalwezele Yehova, mukiko vene muvalingile.
7Mose apwile namyaka makumi atanu naatatu, kaha Alone apwile namyaka makumi atanu naatatu namyaka yitatu omu vahanjikile kuli Fwalo.
Mukombo waAlone
8Yehova ahanjikile kuli Mose nakuli Alone ngwenyi,
9Omu mwahanjika Fwalo kuli enu ngwenyi, Lovolenu cisava, wambe kuli Alone ngwove, Kwata mukombo wove, uumbile hamavu, kumeso aFwalo, mangana walumuke kupwa linoka.
10VaMose naAlone vengilile muli Fwalo, valingile nge omu avalwezele Yehova. Alone ambilile mukombo wenyi hamavu kumeso aFwalo nakumeso avangamba jenyi, kaha walumukile kupwa linoka.
11Jino Fwalo nawa asanyikile vakamangana navaka-kupanda, kaha vakivo nawa, #Cimo. 2, 3.9.vaka-vipupu vakuEjipitu, valingile mwomumwe nawa nakupanda cavo.
12Mwomwo mutu himutu ambilile mukombo wenyi, kaha yalumukile kupwa manoka. Oloze mukombo waAlone waminyine mikombo yavo.
13Kaha mucima waFwalo wakakamine, kavevwililileko, #v. 4.nge omu ahanjikile Yehova.
Manyinga
14Yehova ambile kuli Mose ngwenyi, Mucima waFwalo unapu waulemu, nakane kusuwula vatu.
15Yako kuli Fwalo nacimenemene, tala, mwaya kukalwiji. Wimana kungenge yakalwiji akuwaneko, kaha #4.2, 3.mukombo ou walumukanga kupwa linoka uukwata mulivoko lyove.
16Mwambulile ngwove, Yehova Kalunga kavaHepeleu nangutumu kuli ove, ngwenyi, Suwula vatu jami mangana vayenga mupambo vaka-ngulemese. Kaha tala, ove kanda wivwilile.
17Yehova nambe ngwenyi, Omu vene naungutacikijila Ami yami Yehova. Tala, nanguveta meya amukalwiji namukombo uli mulivoko lyami, kaha nawalumuka kupwa manyinga.
18Vaixi vali mukalwiji navafwa, kalwiji mwanuka nalivumba lyalipi, kaha vaEjipitu navevwa unyengwe kunwa meya amukalwiji.
19Yehova ambile kuli Mose ngwenyi, Amba kuli Alone ngwove, Kwata mukombo wove, olola livoko lyove helu lyameya aEjipitu, helu lyatulwiji twavo, nahelu lyatupila twavo, nahelu lyamyeji yavo, nahelu lyavijiva vyavo vyameya vyosena, mangana alumuke kupwa manyinga, kaha mulifuci lyaEjipitu mwosena namupwa manyinga, namumilondo yamitondo namumilondo yamalolwa.
20VaMose naAlone valingile ngoco, nge muze avalwezele Yehova. Azundwile mukombo wenyi, avetele hameya apwile mukalwiji kumeso aFwalo, nakumeso avangamba jenyi. #v. 4.Meya amukalwiji osena alumukile kupwa manyinga.
21Vaixi vamukalwiji vafwile, kalwiji anukile nalivumba lyalipi, kaha vaEjipitu kavahaxile kunwa meya mukalwijiko. Manyingaze apwile mulifuci lyaEjipitu mwosena.
22Vaka-vipupu vamuEjipitu valingile mwomumwe nawa nakupanda cavo, kaha mucima waFwalo wakakamine, kavevwililileko, nge omu ahanjikile Yehova.
23Fwalo alumukile, engilile muzuvo yenyi, kahakileko mucima wenyi cipwe kucumeciko.
24VaEjipitu vosena vafulile kucikulo cakalwiji kwosena vawane meya akunwa, mwomwo kavahaxile kunwa meya amukalwijiko.
Vimbotwe
25Kaha makumbi atanu naavali ahicilemo kufumisomu avetele Yehova kalwiji.
Currently Selected:
KULOVOKA 7: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
