KUPUTUKA 16
16
Hangale naIximele
1Jino Salai pwevo lyaApalama kasemene nenyi vanako. Kaha apwile nandungo yenyi wapwevo, kaEjipitu, lijina lyenyi ikiye Hangale.
2Salai ambile kuli Apalama ngwenyi, Tala jino, Yehova nangukanyisa kusema. Acingile muli ndungo yami wapwevo, kwiji, pamo #16.2:MuuHepeleu ngwenyi, Navakangutungila hali ikiye.nangukawanyina vana hali ikiye. Apalama evwililile mulizu lyaSalai.
3Salai pwevo lyaApalama anehele Hangale kaEjipitu ndungo yenyi wapwevo, omu alingile Apalama natwame lyehi myaka likumi mulifuci lyaKanane, kaha amuhanyine kuli lunga lyenyi Apalama kupwa pwevo lyenyi.
4Engilile muli Hangale, kaha ikiye emicile lijimo. Jino hakulimona ngwenyi, Ngunemita lijimo, alelesele kaka yenyi wapwevo.
5Salai ambile kuli Apalama ngwenyi, Mulonga vananguvulumuna ukutelele ove. Ngwahanyine ndungo yami wapwevo hatulo yove, kaha hakulimona ngwenyi, Ngunemita lijimo, nangulelesami. Yehova ayule mukaci ketu nayove.
6Oloze Apalama ambile kuli Salai ngwenyi, Tala, ndungo yove ali kumavoko ove, mulinge nge omu unamono ngwove, mwamwaza. Kahomu vamuyanjixile kuli Salai, ikiye amucinyine.
7Kangelo kaYehova amuwanyine mupambo kukaselwoke wameya, kukaselwoke uze ali mujila yakuya kuXule.
8Amwambile ngwenyi, Ove Hangale ndungo yaSalai, unafumu kulihi? kahokwo nauya kulihi?
Amwambile ngwenyi, Nguli nakucina kaka yami Salai.
9Kangelo kaYehova amwambile ngwenyi, Hiluka kuli kaka yove, umwononokenga.
10Kangelo kaYehova amwambile ngwenyi, Nangukavulisa vaka-tanga yove cikuma, mangana vakahone kuvalava hakuvula cavo.
11Kangelo kaYehova amwambile ngwenyi, Tala, uli najimo, kaha naukasema mwana walunga. Ukamuluka lijina lyenyi ngwove, #16.11:Nge ngwenyi, Kalunga-nevuko.Iximele, mwomwo Yehova nevu lyehi luyando lwove, xikaho.
12Ikiye mwakamwanga nge cimbulu wamucipapa muli vatu. Mwakapwanga nakole navatu vosena, kaha vatu vosena navakapwanga nakole naikiye. Mwakatwamanga kuze kwakulitalasana navandumbwenyi vosena.
13Hangale amulukile Yehova ahanjikile kuli ikiye ngwenyi, Ove yove Kalunga Muka-kumona. Mwomwo ambile ngwenyi, Kumana, cipwe kuno nawa ngunamutalatala Muka-kungumona numba?
14Xikaho uze kaselwoke vamulukile ngwavo, #16.14:Nge ngwavo, Lixima lyayou ayoya angumona.Mbele-lahai-loi. Ikiye ali mukaci kaKatexe naMbelete.
15Kaha Hangale asemene mwana walunga naApalama. Apalama alukile mwanenyi uze asemene naHangale ngwenyi, Iximele.
16Jino Hangale hakumusema Iximele naApalama, Apalama apwile namyaka makumi atanu naatatu namyaka yitanu naumwe.
Kuvajihana cikiko cinjikizo caluxiko lwaKalunga
Currently Selected:
KUPUTUKA 16: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
