KUPUTUKA 18
18
Navaxika kusemuka caIsaka
1Yehova alisolwele kuli ikiye kumitelevinde yaMamele, omu atwamine kucikolo cambalaka yenyi halikumbi lyamulungu.
2Andwile meso enyi nakutala, kaha kumana, kwapwile malunga vatatu vanemana kwakulitalasana nenyi. Haze avamwene, akatukile kucikolo cambalaka alahile nakuvakikilila. Kaha alifukwile nameso enyi hamavu,
3ambile ngwenyi, Ove mwata wami, kaci nge ngunawane likoji kumeso ove, kanda uhambakanako mwane nakungusezami ngamba yoveko.
4Acitavenu vaminehele tumeya musane kumahinji enu, munoke muxi yamutondo.
5Kahami nanguneha kacihanda kambolo, mulikolezeze mumicima yenu, numba muyenga. Mwomwo xikaho muneza kuli ami ngamba yenu. Vamwambile ngwavo, Linga nganomu unambe.
6Apalahama anguhwixile nakwingila mumbalaka muli Sala, amwambile ngwenyi, Anguhwisa unehe vyesekelo vyawunga wamwaza yitatu, uucike, woce jimbolo.
7Apalahama alahilile kuutanga, anehele mwanangombe wakununa wamwaza, amuhanyine kuli mukweze, kaha ikiye anguhwixile kumulongesa.
8Apalahama anehele mateka namavele nanyama yamwanangombe yize alongesele, kaha avahanyine kumeso avo. Emanyine kwakamwihi navo muxi yamutondo, kaha valile.
9Vamwihwile ngwavo, Pwevo lyove Sala ali kulihi? Ambile ngwenyi, Tala, ali mumbalaka.
10Amwambile ngwenyi, #Loma 9.9.Camwenemwene nangukakinduluka ceka kuli ove omu naukeza mwaka, kaha tala, pwevo lyove Sala mwakakwata mwana walunga. Jino Sala evwileko muze apwile mucikolo cambalaka munyima yenyi.
11Kaha Apalahama naSala valingile vanakulu lyehi, vapwile tuxinakaji vene, Sala alitwaminyine lyehi kufumako nge mwamapwevo.
12Xikaho Sala asehele mumucima wenyi ngwenyi, Omu ngunakulu lyehi nangwivwa cipepa numba? #Petu. 1, 3.6.namwata wami nawa nakulu lyehi.
13Yehova amwihwile Apalahama ngwenyi, Sala nasehela ika ngwenyi, Camwenemwene ami nangukasema mwana numba? ami ngwakula lyehi.
14Kuli cuma cimwe mwamona Yehova cacikalu numba? Hakakweji ngunatongola nangukeza ceka kuli ove, hamwaka nawizaho, kaha Sala mwakasema mwana walunga.
15Sala ahamikile ngwenyi, Caseheleko, mwomwo evwile woma, xikaho. Amwambile ngwenyi, Nduma, wasehanga vene.
Apalahama mwahakwila Sotome
16Vaze malunga Vakatukile kuze, vatalile meso avo kuSotome. Apalahama ayile navo nakuvatwala mujila yavo.
17Yehova alyambile ngwenyi, Ngumusweke Apalahama oco nangulinga numba?
18mwomwo Apalahama mwakapwa muyaci wangolo waunene, kaha #Ngale. 3.8.hali ikiye vaka-mafuci ahamavu osena navakamona kutokwa.
19Mwomwo ngunamutacikiza, mangana akononone vana venyi navaze vakuzuvo yenyi navakamukava, mangana vakalamenga jila yaYehova, nakulinga mwakwoloka mwaciyulo, mangana Yehova akanehe hali Apalahama nge omu namuvuluka.
20Yehova amwambile ngwenyi, Mwomwo miteto yakuSotome naNgomola yinahambakana, kaha mwomwo xili yavo yinaleme cikuma,
21xikaho Ami nanguxikumukako jino ngukatale numba nge vanalingi mwosenomu mwaya miteto yavo ngunevu, kaci nge pimbi kaha nangukatacikiza.
22Vaze malunga valumukileko nakutalisa kuSotome, oloze Apalahama hanga emanyine kumeso aYehova.
23Apalahama apandamineko, amwambile ngwenyi, Naukanongesa vaka-kwoloka navaka-kuhuka hamwe tahi?
24Kwiji, pamo munganda yize muli vaka-kwoloka makumi atanu, kaha naukayinongesa nawa, kaute kuyitetela hali vaka-kwoloka makumi atanu valimo tahi?
25Ove kulinga ngoco cijila, nakujiha vaka-kwoloka navaka-kuhuka hamwe, numba vaka-kwoloka vapwenga nge vaka-kuhuka, Ove kulinga ngoco cijila. Muka-kuyula vaka-mavu vosena azeneke kulinga mwaciyulo?
26Yehova amwambile ngwenyi, Kaci nge nangukawana munganda muSotome muli vaka-kwoloka makumi atanu, kaha nangukatetela nganda yosena hali vakivo.
27Apalahama amukumbulwile ngwenyi, Tala jino, ngunomika nakuhanjika kuli Ove Mwata, ami yami lukungu kaha nawuto.
28Kwiji, pamo kuli vaze vaka-kwoloka makumi atanu nakuhona vatanu. Naukanongesa nganda yosena hakuhona vatanu tahi? Amwambile ngwenyi, Kaci nge nanguka-wanamo makumi awana navatanu, kaha kangwexi kukayinongesako.
29Ahanjikile ceka nawa kuli Ikiye, ambile ngwenyi, Kwiji, pamo naukawanamo makumi awana kaha. Amwambile ngwenyi, Kaci nge muli makumi awana, kaha kangwexi kucilingako.
30Amwambile ngwenyi, Ove Mwata, kanda utenukako, kaha nanguhanjika. Kwiji, pamo naukawanamo makumi atatu kaha. Amwambile ngwenyi, Kaci nge nangukawanamo makumi atatu, kaha kangwexi kucilingako.
31Amwambile ngwenyi, Tala jino, nguneseka kuhanjika kuli Ove Mwata. Kwiji, pamo naukawanamo makumi avali kaha. Amwambile ngwenyi, Kaci nge muli makumi avali, kaha kangwexi kuyinongesako.
32Amwambile ngwenyi, Ove Mwata, kanda utenukako, kaha nanguhanjika ceka kamwe kaha. Kwiji, pamo naukawanamo likumi kaha. Amwambile ngwenyi, Kaci nge muli likumi, kaha kangwexi kuyinongesako.
33Kahomu akumixile kuhanjika naApalama, Yehova aliyilile kwenyi, kaha Apalahama akindulukile kumahyenyi.
Currently Selected:
KUPUTUKA 18: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
