KUPUTUKA 50
50
1Yosefwe alimbilile kumeso aise, alililile hali ikiye nakumusweswenya.
2Yosefwe alwezele vangamba jenyi vandotolo valongesele ise hakumufunda. Kaha vandotolo valongeselele Isalele hakumufunda.
3Makumbi makumi awana atelemo hali ikiye, mwomwo ngoco muveji kutesamo makumbi hakulongesela vafu hakuvafunda. Kaha vaEjipitu vamulilile jimbimbi makumbi makumi atanu naavali.
4Omu mwahicile makumbi aze akumulila jimbimbi, Yosefwe ambile kuli vaze vakuzuvo yaFwalo ngwenyi, Kaci nge ngunawane likoji kumeso enu, aci hanjikenu mumatwitwi aFwalo ngwenu,
5Tata anguxingixile ngwenyi, Tala, ami hikufwa. Ukangufunda mucimbumbe cami ngunalilanjila mulifuci lyaKanane. Xikaho jino, acitave nguye kuze ngukafunde tata, kaha nangukinduluka ceka.
6Fwalo amwambile ngwenyi, Yako ukafunde iso nge omu akuxingixile.
7Yosefwe ayile nakufunda ise, ayile navangamba jaFwalo vosena, navakulwane vamuzuvo yenyi, navakulwane jalifuci lyaEjipitu vosena,
8navaze vakuzuvo yaYosefwe vosena, navandumbwenyi, navatu vakuzuvo yaise. Vasezele vana vavo namautangavo avimuna vavandende nawawa avangombe mulifuci Ngoxene.
9Ayile namatemba navaka-tuvalu, vapwile lizavu lyalinene cikuma.
10Vahetele kucizungwilo caAtate, kukiko musali yaYotau muze. Valilile jimbimbi jajivulu cikumakuma. Avalwezele valile ise makumbi atanu naavali.
11Kaha vatu vakutwama kulifuci lize, VaKanane, omu vamwene kulila kana kucizungwilo caAtate, valyambile ngwavo, Eci kulila kana cavaEjipitu cacinene. Xikaho valukile kuze ngwavo, #50.11:Nge ngwavo, Kukulila cavaEjipitu.KuAvele-mizalaime, kukiko musali yaYotau muze.
12Vana venyi vamulingilile nge omu avalwezele.
13Mwomwo vana venyi vamutwalile mulifuci lyaKanane, vamufunjile muwina wakusendeleka wamumavu aze akuMakapela, uze alanjile Apalahama namavu aze hamwe kuli Efwelone kaHete kulutwe lwaMamele, kupwa luheto lwenyi kwakufunda vafu.
14Kahomu alingile hanafundu lyehi ise, Yosefwe ahilukile kuEjipitu, naikiye, navandumbwenyi navosena vaze Vakatukile nenyi nakuya nakufunda ise.
Kufwa caYosefwe
15Omu vamwene vayaya jaYosefwe sevo nafu lyehi, valyambile ngwavo, Kwiji, pamo Yosefwe mwatuhunga, nakutuhilwixila kupihya cosenoco twalingile kuli ikiye.
16Xikaho vatumine mazu kuli Yosefwe ngwavo, Ximbu kanda iso afwe atulwezele ngwenyi,
17Mukambulula ngana kuli Yosefwe ngwenu, Aci konekele jino mulonga wavandumbwove naxili yavo, mwomwo vakulingile mwamupi. Jino, tunasakwila mwane, ijiva kukonekela mulonga wayetu vangamba jaKalunga kaiso.
18Yosefwe alilile omu vahanjikile kuli ikiye. Vandumbwenyi vejile nawa nakulimbila hamavu kumeso enyi, vamwambile ngwavo, Tala, etu tunapu tuvandungo jove.
19Yosefwe avambile ngwenyi, Kanda mwivwa womako. Ami nguli mukahela kaKalunga numba?
20Enu mwajinyine kulinga mwamupi, oloze Kalunga acijinyine kupwa camwaza, mangana cisoloke nge omu cinapu lelo, kuyoyesa vatu vavavulu.
21Xikaho jino, kanda mwivwa womako, nangumilisanga navana venu. Kaha avavendejekele, ahanjikile kuli vakivo nakuvakokweza.
22Yosefwe atwaminenga muEjipitu, naikiye navaze vakuzuvo yaise. Yosefwe ayoyele myaka likulukaji namyaka likumi.
23Yosefwe amwene vana vaEfwalime vahacisemunwino camucitatu. Vana vaMakile mwanaManase nawa Yosefwe avalelele kutungi yenyi.
24Yosefwe ambile kuli vandumbwenyi ngwenyi, Ami hikufwa. #48.21; Hepe. 11.22.Oloze Camwenemwene Kalunga mwakamyalakana, kaha mwakamilovola mulifuci lino nakumitwala kulifuci lize alixingile kuli #13.15, 17; 15.7, 8.Apalahama nakuli #26.3.Isaka nakuli #28.13; 35.12.Yakova.
25Yosefwe avaxingixile vana vaIsalele ngwenyi, Camwenemwene Kalunga mwakamyalakana, kaha mukafumisa vifuhwa vyami muno, mukavitwale kuze.
26Ngoco Yosefwe afwile, omu apwile namyaka likulukaji namyaka likumi. Kaha vamulongeselele hakumufunda, vamuhakile mucikaxa muEjipitu.
Currently Selected:
KUPUTUKA 50: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
