Lucas 11

Dios Yayata mañakunapaq Jesús yachatsikunqan

Mateo 6.9-15; 7.7-11

1Juk kutim Dios Yayata Jesús mañakurqan. Mañakuyta ushaskiptinnam jukaq discïpulun nirqan: <<Taytay, discïpulunkunata Juan#11.1 Juanpaq parlarqa Bautizaq Juanpaqmi nirqan. yachatsinqannö Dios Yayata mañakuyänäpaq yachaykätsiyämay>>.

2Jesúsnam nirqan: <<Dios Yayata mañakur niyanki:

<<[Ciëluchö kaykaq] Taytallä,

shutiki respitashqa katsun.

Kay patsachö mandakuq kanaykipaq shamuykullay.

[Ciëluchö cäsuyäshunqaykinö kay patsachöpis cäsuykuyälläshuy.]

3Waran waran mikuylläkuna qaraykayämay.

4Chikiyämaqkunata perdonayanqänö noqakunatapis perdonaykayällämay.

Ama jutsa rurayman dëjaykayällämaytsu.

[Tsaypa rantinqa mana allikunapita tsapaykayällämay]>>.

5Tsaypitanam Jesús nirqan: <<Juk runash pullan paqas amïgunpa wajinman aywaykur ninaq: <Amïgu, kimsa tantallata prestaykamay. 6Amïgümi karupita chämushqa. Imäpis manam kantsu qaraykunäpaq>. 7Tsaynö niptinshi amïgun ninaq: <¡Ama fastidiamaytsu! Punküpis trancashqanam. Wamräkunawanmi puñukuykäyä. Imata prestanaqpaqpis manam shärimünatsu>.

8<<Noqam niyaq: Amïgun karpis juk takakuyllachöqa prestananpaq manam shärimunqatsu. Peru yapay yapay takakuptinmi sïqa prestananpaq shärimunqa. 9Tsaymi niyaq: Mañakuyaptikiqa Dios Yayam qarayäshunki. Ashirqa tariyankim. Punkuta takakuyaptikiqa kichapuyäshunkim. 10Mañakuq kaqqa chaskinmi. Ashiq kaqqa tarinmi.#Deut. 4.29; 2Crón. 15.2-4; Jer. 29.13. Punkuta takakuq kaqtaqa kichapunmi.

11<<Mayqaykitapis wamraykikuna [tantata mañakuyäshuptiki ¿rumitatsuraq aptarkatsiyankiman?] Pescäduta mañakuyäshuptiki ¿culebratatsuraq qaraykuyankiman? 12<Runtuta qaramay> niyäshuptikipis ¿atuq kurutatsuraq qaraykuyankiman? 13Qamkuna mana alli ruraq kaykarpis wamraykikunata alli kaqllata qaraykäyaptikiqa ¿manatsuraq ciëluchö Taytaykipis mañakuq kaqtaqa Espíritu Santuta qaranqa?>>

Jesúspa contran parlayanqan

Mateo 12.22-30; Marcos 3.20-27

14Juk kutim mana parlaq runapita supayta Jesús qarqurqan. Supay yarquskiptinmi tsay runa parlar qallaykurqan. Tsayta rikaykurmi runakuna mantsakäyarqan. 15Peru wakin runakunanam niyarqan: <<Kay runaqa supaykunapa mandaqnin Beelzebúpa poderninwanmi supaykunata qarqun>>.

16Wakin kaqnam ishkitsiyta munar Jesústa niyarqan: <<Taytay, Dios Yaya rasunpa kachamushunqaykita musyayänäpaq ima milagrullatapis ruramuy>>.

17Paykuna mana allita yarpäyanqanta musyarmi Jesús nirqan: <<Juk nacionchö runakuna kikinkunapura chikinakurqa ¿manatsuraq wañutsinakur ushakäyanman? Tsaynöllam juk wajichö täkuqkuna chikinakurqa ¿manatsuraq wakpa kaypa aywakur ushakäyanman? 18Tsaynöllam kikinpa contran shäriptinqa Satanáspa mandakuyninpis ushakanqa. Tsaynö niyaq <Beelzebúpa poderninwanmi supaykunata qarqun> niyämaptikim.

19<<Beelzebúpa poderninwan supaykunata qarquptïqa ¿pipa poderninwantan qatiräshuqnikikuna supaykunata qarquyan? Diospa poderninwan supaykunata qarquyanqanta tantiyaykarqa ¿imanirtan tantiyayankitsu noqapis Diospa poderninwan qarqunqäta? 20Diospa poderninwan supaykunata qarquptïmi Dios Yayapa mandakuynin qamkunaman chämunqanta musyayanki.

21<<Alli kallpayuq runa armanwan wajinta täpaptinqa manam ni pï imantapis suwanmantsu.#11.21 Alli kallpayuq runatam Satanásman iwalatsin. Wajintanam poderninchö katsinqan runakunaman iwalatsin. 22Peru paypita mas kallpayuq runa chaykurmi sïqa armanman yätsikuykaptinpis venciskir qechunqa. Venciskirmi imaykantapis apaskir rakipunakuyanqa.#11.22 Mas kallpayuq runaqa Jesúsmi kaykan.

23<<Pipis favornï mana karqa conträmi kaykan. Noqata mana qorïsimaq kaqqa qarqunmi.#11.23 Tsaynö Jesús nirqan: Runakuna Diospa mandakuyninchö kawayänanpaq noqawan paqta mana qoriq kaqqa tsapatam churan.

Runaman supay kutinqan

Mateo 12.43-45

24<<Runapita supay yarquskirmi maychöpis täkunanpaq ashir tsunya jirkakunapa purin. Mana tarirnam nin: <Yarqamunqä wajïman kutikushaq>. 25Kutiykurnam pitsapakushqa y churapakushqa jäkuykaqtana tarin. 26Tsaynöta tariykurmi supay majinkunaman aywar paypita mas mana alli qanchis supaykunata pusharkur tsay täkunqanman kutin. Tsaymi ñawpata kanqanpitapis mas peorraq tsay runa tikran>>.

Diosta cäsuqkuna kushishqa kawayänanpaq Jesús ninqan

27Jesús tsaynö yachatsikuykaptinmi runakunapa rurinpita juk warmi nirqan: <<¡Ima kushishqaraq wachashuqniki y chuchushuqniki warmi!>>

28Jesúsnam nirqan: <<Tsaypitapis mas kushishqam kayan Dios Yayapa palabranta wiyar cäsukuqkuna>>.

Milagrutaraq Jesús rurananta munayanqan

Mateo 12.38-42; Marcos 8.12

29Maytsikaq runakuna qorikäyaptinmi Jesús nirqan: <<Kanan witsay runakunaqa mana wiyakuqmi kayan. Milagruta ruranäta munayaptinpis manam ima milagrutapis rurashaqtsu. Tsaypa rantinmi profëta Jonásta salvar milagruta ruranqannö Dios Yaya juk milagruta ruranqa. 30Imanömi Nínive runakuna Jonásta chaskiyänanpaq Dios Yaya milagruta rurarqan, tsaynöllam kanan tiempu runakuna Runapa Tsurinta chaskiyänanpaqpis milagruta ruranqa.

31<<Salomón yachatsinqanta wiyananpaqmi mandakuq reinapis sur kaqlä karu nacionpita shamurqan.#1Rey. 10.1-10; 2Crón. 9.1-12. Peru kananqa Salomónpita mas yachayyuq kaqmi willaykäyäshunki.#11.31 Salomónpita mas yachayyuq kaqpaq parlarqa kikinpaqmi Jesucristo parlarqan. Tsaymi día del juiciuchö tsay reina shärimur kanan tiempu runakunata shimpinqa.

32<<Jonás willakunqanta chaskirmi Nínive runakuna jutsankunapita arrepentikuyarqan.#Jon. 3.5. Peru kananqa Jonáspita mas poderyuq kaqmi willaykäyäshunki.#11.30-32 Runapa Tsurinpaq parlar y Jonáspita mas poderyuq kaqpaq parlarqa kikinpaqmi Jesucristo parlarqan. Tsaymi día del juiciuchö Nínive runakuna shärimur kanan tiempu runakunata shimpiyanqa>>.

Alli yarpayyuq kaqkuna Jesústa chaskiyanqan

Mateo 5.15; 6.22-23

33<<Manam pipis aktsita tsarirkatsir pakapanman ni manka rurinman churantsu, sinöqa wajiman yaykuqkuna rikäyänanpaqmi alayriman churan.#11.33 Aktsita alayriman churanqanta parlarqa runakuna tantiyayänanpaq yachatsikunqantam Jesucristo parlan. 34Ñawikikunam shonquykikunapaq aktsinö. Tsaymi ñawikikuna alli kaptin shonquykikunapis aktsichö kaykan. Peru ñawikikuna mana alli kaptinqa tutapaychömi kayanki.#11.34 Tsaynö parlarqa Jesucristo nirqan: Alli yarpayyuq karqa imayka aktsichönö karmi Dios Yaya kachamanqanta tantiyayankiman. Mana alli yarpayyuq karmi mana tantiyakur imayka tutapaychönö kaykäyanki.

35<<¡Cuidädu kayay! Aktsichö kayanqaykita yarparpis tutapaychötaq kayankiman. 36Ichikllapis shonquykikunachö tutapay ama katsuntsu. Shonquykikunachö atsikyaylla kaptinqa llapan rurayanqaykipis runakunapaq allim kanqa. Aktsi atsikyaqnömi qamkunapis alli kawayanki>>.

Fariseukunata y ley yachatsikuqkunata Jesús piñapanqan

Mateo 23.1-36; Marcos 12.38-40; Lucas 20.45-47

37Jesús yachatsikur ushaskiptinnam juk fariseo wajinpa mikuyänanpaq pusharqan. Jesús yaykuskirnam mësaman jamaykurqan. 38Peru fariseukunapa costumbrinkunamannö mikunanpaq makinta Jesús mana mayllakuqta rikarmi pushaqnin fariseo mantsakarqan.

39Jesúsnam nirqan: <<Fariseukuna, qamkunaqa jananllapa mayllashqa pucillunö y plätunömi kaykäyanki. Tsay plätukuna rurinchö taqra kanqannömi qamkunapis shonquykikunachö suwakuyänaykipaq y mana allikunata rurayänaykipaq yarpaykäyanki. 40¡Ä, upa runakuna! ¿Manaku musyayanki Dios Yayalla cuerpuykikunata kamar shonquykikunatapis kamanqanta? 41Waktsakunata llakipar imaykallatapis qaraykuyay. Tsaynöpam shonquykikunapis limpiu kanqa.

42<<¡Allaw, fariseukuna! Qamkunam mentapita, rüdapita y wakin qorapita diezmuta rakirpis runa majikikunataqa manam llakipäyankitsu ni Dios Yayatapis kuyayankitsu. Diezmupaq rakir cumpliyanqaykinö runa majikikunata y Dios Yayata kuyayankiman.

43<<¡Allaw, fariseukuna! Qamkunaqa sinagögachöpis punta puntachöraqmi jamakuyta munayanki. Pläzakunachöpis saludar respitayäshunaykitam munayanki.

44<<¡Allaw, [allish tukuq fariseukuna y ley yachatsikuqkuna]! Qamkunaqa mana rikakaq sepultüranömi kayanki. Mana rikakaq sepultüra jananpa purir rurinchö melanaypaq kanqanta pipis mana musyanqannömi runakuna musyayantsu shonquykikunachö mana alli yarpaykuna kanqanta>>.

45Jesús tsaynö niptinmi ley yachatsikuq runa nirqan: <<Rabí, tsaynö parlarqa noqakunatam wiyaykätsiyämanki>>.

46Jesúsnam nirqan: <<¡Allaw qamkunapis, ley yachatsikuqkuna! Qamkunaqa mana puëdiyanqanyaq qepita aparitsiqnömi runakuna atska leykunata cumpliyänanpaq mandayanki. Tsaynö kaptinpis cumpliyänanpaq manam ichikllapis yanapayankitsu.

47<<¡Allaw, qamkuna! Unay aylluykikuna wañutsiyanqan profëtakuna pamparäyanqan jananchömi nïchunkuna ruraykäyanki. 48Tsaynö rurarmi <ayparaq wañuyashqa> niqnö kaykäyanki.

49<<Tsaymi Dios Yaya yachayyuq kayninwan nirqan: <Paykunamanmi profëtakunata y apostolkunata kachamushaq. Paykunatam wakinta wañutsiyanqa y wakin kaqkunatanam mana alli ruraqtanö qatikachäyanqa>. 50Kay patsata kamanqan junaqpita profëtakunata wañutsiyanqanpitam kanan tiempu runakunata Dios Yaya juzganqa. 51Abelta#Gén. 4.8. wañutsinqanpita Zacaríasta#2Crón. 24.20-21. templu punkuchö wañutsinqanyaqmi Diospa profëtankunata wañutsiyarqan. Noqam niyaq: Tsay wañutsikuq runakunatanömi kanan tiempu Israel runakunata Dios Yaya juzganqa.

52<<¡Allaw, ley yachatsikuqkuna! Wajiman pipis mana yaykunanpaq llävita tsararaqnömi Dios Yayapa willakuyninta mana cäsuyänanpaq runakunata michaykäyanki. Tsaynöllam kikikikunapis cäsuyankitsu>>.

53Jesús parlar ushaskir yarquskiptinnam ley yachatsikuqkuna y fariseukuna alläpa piñakuyarqan. Tsaymi qatipaykur imaykata tapupäyarqan 54pantaskatsir shimpiyänanpaq.

Currently Selected:

Lucas 11: qxn

Highlight

Copy