Lucas 10

Qanchis chunka ishkay discïpulunkunata Jesús kachanqan

1Tsaypitanam qanchis chunka ishkay#10.1 Wakin qepa kaq griego copiakunachöqa qanchis chunka (70) kanqantam nin. (72) discïpulunkunata akraskir pay chänan markakunaman Señor Jesús ishkay ishkay kacharqan. 2Kacharmi nirqan: <<Cosëcha qoriypaq kanqannömi maytsikaq runakunapis Dios Yayapa willakuyninta chaskiyänanpaq kaykäyan. Peru wallkaqllam willakuqkuna kayan. Willakuqkunata kachamunanpaq Dios Yayata mañakuyay>>.

3<<Kanan willakuq aywayay. Löbukunaman üshakunata qaykuqnömi qamkunata kachayaq. 4Aywar ama apayankitsu qellayta, alporjata ni llanqita. Piwanpis nänichö tinkuskir ama parlakur shäkuyankitsu.

5<<Pipa wajinmanpis charqa niyanki: <Alli kawakuy qamkunachö kaykullätsun>. 6Alli chaskiyäshuptikiqa niyanqaykinömi alli kawakuy kanqa. Peru mana chaskiyäshuptikim sïqa alli kawakuy kanqatsu. 7Ama wajin wajinqa puriyankitsu, sinöqa patsatsiyäshunqayki wajillachö quëdakuyanki. Qarayäshunqaykillata mikuyanki y upyayanki. Arupukuq runa päguta chaskinanpaq derëchun kanqannömi qamkunapapis qarayäshunaykipaq derëchuykikuna kan.

8<<May markaman chäyaptikipis chaskiyäshurniki qarayäshunqaykita mikuyanki. 9Tsay markachö qeshyaqyashakunata kutikätsir niyanki: <¡Dios Yayapa mandakuynin chämushqanam!> 10May markachöpis mana chaskiyäshuptikiqa cällikunapa aywar niyanki: 11<Kikikikuna jutsayuq kayanqaykita musyayänaykipaqmi markaykikunapa polvun chakïkunachö kaykaqtapis tapsikuyä. Peru musyayay Dios Yayapa mandakuynin chämunqanta>.

12<<Noqam niyaq: Sodoma runakunata castiganqanpitapis mas peormi día del juiciuchö tsay runakunata Dios Yaya castiganqa.#Gén. 19.1-29.

13<<¡Allaw, Corazín runakuna! ¡Allaw, Betsaida runakuna! Sïkush markaykikunachö milagrukunata ruranqänö Tiro y Sidón markakunachö#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. ruräman karqan, unaynam jutsankunapita arrepentikur lütu llatapata shukurkur uchpa jananchö jamaräyanman karqan. 14Tsaymi Tiro y Sidón runakunata castiganqanpitapis mas peor día del juiciuchö Dios Yaya castigayäshunki. 15Capernaúm runakuna, ¿ciëluman chäyänaykipaqku yarpäyanki? Qamkunaqa Hadesman jitarpushqam kayanki>>.#Isa. 14.13-15.

16Tsaypitanam discïpulunkunata nirqan: <<Qamkuna willakuyanqaykita chaskirqa noqatam chaskiyäman. Qamkunata mana chaskiyäshurnikiqa noqatapis manam chaskiyämantsu. Noqata mana chaskiyämarqa kachamaqnïtapis manam chaskiyantsu>>.

Willakuq aywaqkuna kutiyanqan

17Qanchis chunka ishkay (72) aywaqkuna kushishqa kutiskirmi Jesústa niyarqan: <<Taytay, shutikichö qarquyaptïmi ¡supaykunapis cäsuyämashqa!>>

18Jesúsnam nirqan: <<Noqa rikarümi imayka illaqunöraq ciëlupita Satanás shikwamuqta.#10.18 Imayka illaqunöraq Satanás shikwamurun ninanqa Satanás poderninnaq tikrashqa ninanmi. 19Noqam podernïta entregayashkaq culebrakunata, atuq kurukunata jarukachäyänaykipaq y Satanás imata ruraptinpis venciyänaykipaq. Satanásta pärapuyaptikipis manam ni ima päsayäshunkitsu. 20Peru supaykuna cäsuyäshunqaykipita kushikurpis ciëluchö shutikikuna apuntashqana kanqanta mas kushikuyay>>.

Dios Yayata Jesús alabanqan

Mateo 11.25-27; 13.16-17

21Tsay höram Espíritu Santupa poderninwan kushikur Dios Yayata mañakur Jesús nirqan: <<Ciëluchö y kay patsachö poderyuq Taytay, qamtam alabaq. Manam yachaq tukuqkunatatsu yarpaynikikunata musyatsishkanki, masbienmi wamranö kaqkunallata. Taytay, tsaynö kanantam munashkanki>>.

22Tsaypitanam tsaychö runakunata nirqan: <<Taytämi llapanta podernïman churamushqa.#Juan 3.35. Tsurin kanqätam paylla musyan. Tsaynöllam noqalla musyä Taytä kanqanta. Tsaymi noqa tantiyatsinqä kaqkunalla Taytä imanö kanqanta musyayan>>.#Juan 1.18; 10.15.

23Tsaypitanam discïpulunkunallata nirqan: <<Kanan päsanqankunata rikarmi kushishqa kaykäyanki. 24Noqam niyaq: Unay profëtakunapis y reykunapis rikäyanqaykita rikayta munarpis manam rikäyarqantsu. Wiyayanqaykita wiyayta munarpis manam wiyayarqantsu>>.#Mat. 13.16-17.

Runa majinta Samaria runa llakipanqan

25Juk kutichönam ley yachatsikuq runa Jesús yachanqanta o mana yachanqanta musyayta munar tapurqan: <<Rabí, ¿imatatan ruräman mana ushakaq kawayta tarinäpaq?>>

26Jesúsnam nirqan: <<¿Ima nintan Dios Yayapa leyninchö? Liyir ¿imatatan tantiyanki?>>

27Tsay runanam nirqan: <<Dios Yayapa leyninchömi nin: <Dios Yayata kuyanki llapan shonquykiwan, llapan voluntänikiwan, llapan kallpaykiwan y llapan yarpaynikiwan. Runa majikitapis kikiki kuyakunqaykinö kuyanki> >>.#Deut. 6.5; Lev. 19.18.

28Jesúsnam nirqan: <<Allitam nishkanki. Tsaykunata cumplirmi mana ushakaq kawayta tarinki>>.

29Peru tsay runanam yachaq tukur tapurqan: <<¿Pitan tsay runa majïqa?>>

30Tsaynö tapuptinmi Jesús nirqan: <<Juk runash Jerusalénpita Jericó markaman aywaykänaq. Aywaykaptinshi suwakuna alli maqaskir llapan apakunqanta y llatapantapis jankat qechuskiyänaq. Tsaypitash wañuykaqtana dëjaskir aywaskiyänaq.

31<<Tsay nänipash juk sacerdöti päsanaq. Tsay runata rikaykarpis mana rikaq tukurllash päsanaq. 32Tsaynöllash levitapis tsay runa jitaraykaqman chänaq. Paypis mana rikaq tukurllash päsanaq.

33<<Paykunapa qepantanash Samaria runapis chänaq. Payshi sïqa jitaraykaqta tariskir alläpa llakipänaq. 34Tsayshi aceitiwan y vïnuwan jampiykur herïdankunata shumaq watarkapunaq. Tsaypitanash ashnunta montarkatsir juk posädaman apaykur cuidanaq. 35Waränin aywakurnash wajiyuq runata ishkay junaq aruypa chaninta pägaykur ninaq: <Kay runata shumaq jampiykullanki. Masta gastaptikipis kutimurmi pägalläshayki> >>.

36Tsaypitanam Jesús tapurqan: <<Tsay kimsan runakunapita ¿mayqantan runa majinta llakiparqan?>>

37Tsaynam nirqan: <<Tsay Samaria runam>>.

Jesúsnam nirqan: <<Kanan qampis tsaynölla runa majikita llakipanki>>.

Martapa y Maríapa wajinman Jesús chanqan

38Tsaypita discïpulunkunawan Jesús aywarmi takshalla markaman charqan. Tsaychömi Marta shutiyuq warmi wajinman patsatsirqan. 39Martapa ñañanmi karqan María. Paymi Jesús yachatsikunqankunata wiyar puntanchö jamaykarqan. 40Peru Martanam imayka ruraykunawan afanädu kar Jesúsman witiykur nirqan: <<Taytay, ¿manaku llakipämanki kaychö ñañä jamaräkunqanyaq japallä llapan imaykata ruraykaptï? ¡Yanapamänanpaq mandaykullay!>>

41Señor Jesúsnam nirqan: <<Ä Marta, Marta, qamqa imayka ruraykunapaq yarpachakurmi tranquïlutsu kanki. 42Peru llapan imaykapitapis jukllayllam mas alliqa. Tsaytam ñañayki Maríaqa akrashqa. Pay yachakunqantaqa manam ni pipis qechunqatsu>>.

Currently Selected:

Lucas 10: qxn

Highlight

Copy