Lucas 9

Chunka ishkay discïpulunkunata Jesús kachanqan

Mateo 10.5-15; Marcos 6.7-13

1Tsaypitanam chunka ishkay discïpulunkunata qayaskir poderninta Jesús qararqan runakunapita supaykunata qarquyänanpaq y qeshyaqyashakunata kutikätsiyänanpaq. 2Tsaypitam paykunata kacharqan Dios Yayapa mandakuynin chämunqanta willakur qeshyaqyashakunata kutikätsiyänanpaq. 3Tsaymi nirqan: <<Aywar ama apayankitsu tukruta, alporjata, millkapata, qellayta ni trukakuyänaykipaq llatapatapis. 4Pipa wajinchö patsakurpis tsay markapita aywakuyanqaykiyaq tsayllachö quëdakuyanki. 5May markachöpis mana chaskiyäshuptikiqa chakikikunachö polvuta tapsikuskir aywakuyanki. Tsaynö rurayanki paykunata Dios Yaya castigananpaq kaqta musyayänanpaq>>.

6Tsaypitanam discïpulunkuna markan markan aywar Dios Yayapa alli willakuyninta willakuyarqan. Qeshyaqyashakunatapis maytsaychömi kutikätsiyarqan.

Jesústa Herodes reqiyta munanqan

Mateo 14.1-12; Marcos 6.14-29

7Jesús ruranqankunata musyaskirmi Galileapa mandakuqnin Herodes ni imanö kayta puëdirqantsu. Wakin kaq runakunam Jesúspaq niyarqan: <<Bautizaq Juanmi kawamushqa>>.

8Wakin kaqnam niyarqan: <<Profëta Elíasmi yurimushqa>>.

Y wakinnam niyarqan: <<Unay tiempu profëtakunach mayqan karpis kawamushqa>>.

9Herodesnam nirqan: <<Juanpa umanta roqutsir wañuykätsiptïqa ¿pitan kanman tsay runa? ¿Pipaqtan kayläya imaykata ruranqanta wiyä?>>

Tsaymi Jesústa alläpa reqiyta munarqan.

Pitsqa waranqa runakuna mikuyänanpaq milagruta Jesús ruranqan

Mateo 14.13-21; Marcos 6.30-44; Juan 6.1-14

10Willakuyanqanpita apostolkuna kutiykurmi llapan rurayanqanta Jesústa willayarqan. Tsaypitam paykunata pusharkur Betsaida markachö tsunyaman Jesús aywarqan. 11Tsaypa aywayanqanta musyaskirmi maytsikaq runakuna qatirnin aywayarqan. Chaykuyaptinnam Dios Yayapa mandakuyninpaq Jesús yachatsirqan y qeshyaqyashakunatapis kutikätsirqan.

12Patsa qoyaykaptinnam#9.12 Wakin runakunaqa patsa tsakaykaptinnam niyan. chunka ishkay discïpulunkuna Jesúsman witiykur niyarqan: <<Runakunata niy tsay uray markakunapa y estanciakunapa aywar mikuyninkuna y posädankuna ashiyänanpaq. Kay tsunyachöqa manam ni imapis kantsu>>.

13Jesúsnam nirqan: <<Qamkuna mikuyninkuna qarayay>>.

Tsaynö niptinmi niyarqan: <<Pitsqa tantawan ishkay pescädullam kayäpaman. Kaytsikaq runakunapaqqa ¡rantimurraqchi paqtätsishwan!>>

14Tsaychömi runakuna pitsqa waranqanö (5,000) kayarqan. Jesúsnam discïpulunkunata nirqan: <<Runakunata pitsqa chunkapa jamatsiyay>>.

15Niptinmi llapanta jamatsiyarqan. 16Tsaypitanam pitsqa tantatawan ishkay pescäduta aptarkur ciëluman rikarkur Dios Yayata Jesús agradëcikurqan. Tantata pakiskirnam discïpulunkunata makyarqan runakunata aypuyänanpaq. 17Pacha junta mikuskiyaptinnam sobraq kaqta chunka ishkay canasta juntata qoriyarqan.

Dios Yaya kachamunqan Cristo kanqanta Pedro ninqan

Mateo 16.13-19; Marcos 8.27-29

18Juk kutinam discïpulunkunallawan kaykar Dios Yayaman Jesús mañakurqan. Mañakuyta ushaskirnam discïpulunkunata tapurqan: <<¿Pï kanqätatan runakuna niyan?>>

19Discïpulunkunanam niyarqan: <<Wakinmi niyan Bautizaq Juan kanqaykita. Wakinnam niyan profëta Elías kanqaykita. Y wakinnam niyan mayqan profëtapis kawamushqa kanqaykita>>.

20Jesúsnam tapurqan: <<Qamkunaqa ¿pï kanqätatan yarpäyanki?>>

Pedrunam nirqan: <<Qamqa Dios Yaya kachamunqan Cristum kanki>>.

Wañutsiyänanpaq kanqanta Jesús willakunqan

Mateo 16.20-28; Marcos 8.30—9.1

21Peru Jesúsnam pitapis mana willayänanpaq discïpulunkunata albertirqan.#9.21 Tsay witsaymi Israel runakuna yarpäyarqan Cristuta Dios Yaya kachamuptin Roma runakunata guërrachö vencinanpaq kanqanta. Tsaynö yarpäyaptinpis Jesucristo manam guërrata ruraqtsu shamurqan, sinöqa noqantsik rayku cruzchö wañunanpaqmi. Tsaymi discïpulunkunata Jesús nirqan pay Cristo kanqanta pitapis mana willakuyänanpaq. Peru wañunqanpita kawaskamurmi sïqa pïmaytapis willakuyänanpaq nirqan (Mat. 17.9; 28.19). 22Tsaypitanam nirqan: <<Runapa Tsurintam alläpa ñakatsiyanqa. Mayor runakuna, mandakuq sacerdötikuna y ley yachatsikuqkunam contran shärir wañutsiyanqa. Tsaypita kimsa junaqtam kawamunqa>>.

23Tsaynö nirmi llapan runakunata nirqan: <<Pipis discïpulü kayta munarqa kikin munanqannö ama kawatsuntsu, sinöqa waran waran cruzninta apaqnö noqata qatimätsun.#9.23 Jesucristo kawanqan witsaymi pipis cruzninta aparqan wañutsishqa kananpaq. Tsaymi cruzninta apaqnö noqata qatimätsun nirqa jutsa ruraypaq wañushqanö kar Jesucristuta qatinanpaq kanqanta nin.#Mat. 10.38; Mar. 8.34; Luc. 14.27; Juan 12.25. 24Kawayninta salvayta munaqkunam kawayninta oqrayanqa. Kawayninta noqa rayku oqraqkunam sïqa kawayninta salvayanqa.#9.24 Tsaynö nirmi Jesucristo nirqan: <<Kikin munanqannö mana alli kawaqkunaqa manam salvakuyanqatsu. Noqa munanqänö kawaqkunam sïqa salvakuyanqa>>.#Mat. 10.39; Mar. 8.35; Juan 12.25.

25<<Infiernuman jitarpushqa kananpaq kaptinqa ¿imapaqtan välin entëru mundupa ämun kanqanpis? 26Pipis noqapita y willakuynïpita penqakuptinqa Runapa Tsurinpis Dios Yayapa, santu angelkunapa y kikinpa chipakyaq poderninwan shamurmi paypita penqakunqa. 27Rasun kaqtam niyaq: Manaraq wañurmi wakiki Dios Yayapa mandakuyninta rikäyanki>>.

Jesús chipakyaqman tikranqan

Mateo 17.1-8; Marcos 9.2-8

28Tsaypita pusaq junaqtanönam Pedruta, Juanta y Santiaguta pusharkur Dios Yayaman mañakuq juk jirkaman Jesús witsarqan. 29Dios Yayaman Jesús mañakuykaptinnam qaqllan chipakyarqan y llatapanpis alläpa yuraqman tikrar ñawitapis chiyätsirqan. 30Tsaychömi Moiséswan Elías Jesúswan parlaykäyarqan. 31Tsayläya chipakyaqchömi Jerusalénchö Jesús wañunanpaq kaqta parlayarqan.

32Pedrunam ishkan discïpulu majinkunawan alläpa puñunaykar Jesús chipakyarraq ishkaq runakunawan kaykaqta rikaskiyarqan. 33Moiséswan Elías aywakuykäyaptinmi mana cuentata qokurnin Jesústa Pedro nirqan: <<Taytay, allipaqmi kaychö kaykäyä. Kimsa tsukllata rurayämushaq: jukta qampaq, jukta Moiséspaq y juktana Elíaspaq>>.

34Peru tsaynö parlaykaptinmi pukutay tsapaskirqan. Tsaymi discïpulunkuna alläpa mantsakäyarqan. 35Pukutaypitanam Dios Yaya nimurqan: <<Paymi akranqä#9.35 Wakin griego copiakunachömi kuyay niyan. Tsurï. Pay niyäshunqaykita cäsuyay>>.

36Tsaynö parlar ushaskiptinnam discïpulunkuna Jesúsllatana rikaykuyarqan. Jirkachö rikäyanqanta manam ni pitapis tsay witsay willakuyarqantsu.

Juk jövinta Jesús kutikätsinqan

Mateo 17.14-21; Marcos 9.14-29

37Waränin junaqnam jirkapita kutiykäyämuptin atskaq runakuna Jesústa tinkupäyarqan. 38Tsay runakunapa chawpinpitam juk runa qayaraypa nirqan: <<¡Rabí, kay tsurïta llakipaykullay! Payqa japallan tsurïmi kaykan. 39Supaymi payta illaqpita qayaykachätsin, qarintätsir tapsitsin, pushuqaytapis kachutsin. Mana päraypam alläpa ñakatsin. 40Tsaymi supayta qarquyänanpaq discïpuluykikunata rugakuptïpis puëdiyashqatsu>>.

41Jesúsnam nirqan: <<¡Mana creyikuq jutsasapa runakuna! ¡Imayyaqraq qamkunawan kaykäshaq! ¡Imayyaqraq qamkunata awantayäshayki! Mä wamraykita apamuy>>.

42Jesúsman chaykatsiptinnam wamrata patsaman supay ishkiskatsirnin tapsitsirqan. Peru Jesúsnam supayta piñapar nirqan: <<Kay wamrapita yarquy>>.

Tsaynö nirmi wamra kutikashqatana taytanta entregarqan. 43Dios Yayapa poderninwan kutikätsinqanta rikaykurnam llapanpis kushikuyarqan.

Wañutsiyänanpaq Jesús yapay willakunqan

Mateo 17.22-23; Marcos 9.30-32

Ruranqankunapita kushikuyaptinmi discïpulunkunata Jesús nirqan: 44<<Kanan willayanqaqta shumaq wiyayämay. Runapa Tsurintam chikiqninkunapa makinman entreganqa>>.

45Tsaynö willaptinpis discïpulunkuna manam ima nikanqantapis tantiyayarqantsu. Peru mana tantiyarpis tapuytam sïqa mantsapäyarqan.

Mayqan mas mandakuq kananpaq discïpulukuna tapuyanqan

Mateo 18.1-5; Marcos 9.33-37

46Tsaypitanam discïpulunkuna mas mandakuq kayta munar kikinkunapura piñanakuyarqan. 47Shonqunkunachö imata yarpäyanqanta musyarmi juk wamrata puntanman ichiykatsir 48Jesús nirqan: <<Pipis kay wamratanö shutïchö chaskirqa noqatam chaskiman. Noqata chaskimarqa kachamaqnïtam chaskin. Qamkunachöpis qollmi shonqu kaqmi mas mandakuq kayanqa>>.

Supayta qarquptin mana amatsayänanpaq Jesús yätsinqan

Marcos 9.38-40

49Juannam nirqan: <<Taytay, noqakunam rikäyashkä juk runa shutikichö supaykunata qarquykaqta. Peru noqantsikwan mana puriptinmi amatsayashkä>>.

50Jesúsnam nirqan: <<Ama amatsayankitsu. Pipis contrantsik mana karqa favornintsikmi kaykan>>.

Santiaguta y Juanta Jesús piñapanqan

51Ciëluman kutikunanpaq ichikllana faltaykaptinmi alli valorakuykur Jerusalénman Jesús aywarqan. 52Aywaykarnam mandarqan Samaria partichö juk markaman posädata ashiq. 53Peru Jerusalénman aywaykanqanta musyaykurmi tsay markachö täkuq runakuna patsatsiyta munayarqantsu. 54Tsaymi discïpulunkuna Santiaguwan Juan niyarqan: <<Taytay, ciëlupita nina shamur kay runakunata jankat rupar ushakätsinanpaq ¿[Elíasnö] Dios Yayaman mañakuyämanku?>>

55Peru Jesúsnam piñapar [nirqan: <<Tsaytaqa manam Dios Yaya munanqannötsu yarpaykäyanki. 56Runapa Tsurinqa manam runakunata ushakätsinanpaqtsu shamushqa, sinöqa runakunata salvananpaqmi>>.]

Tsaynö niskirnam juk markapana aywakuyarqan.

Qatirayta munaqkunata Jesús tantiyatsinqan

Mateo 8.19-22

57Nänipa aywaykäyaptinnam Jesústa juk runa nirqan: <<Taytay, maypa aywaptikipis qatiräshaykim>>.

58Jesúsnam nirqan: <<Atuqkunapapis machayninkuna kanmi. Pishqukunapapis qeshunkuna kanmi. Peru Runapa Tsurinpam sïqa maychö puñuykunanllapaqpis kantsu>>.

59Tsaypitanam juk runata nirqan: <<Qatimay>>.

Tsay runanam nirqan: <<Taytay, qatinaqpaq taytätaraq puntata pampaskamushaq>>.

60Jesúsnam nirqan: <<Wañushqakunataqa wañushqa majinkuna pampakuyätsun. Peru qamqa aywar Dios Yayapa mandakuyninta willakuy>>.

61Tsaypitanam juk runapis nirqan: <<Taytay, qatiräshaykim. Peru wajïchö castäkunataraq despidikaskamushaq>>.

62Jesúsnam nirqan: <<Pipis qepaman rikaraykar yapyakuqnö karqa Dios Yayapa mandakuyninpaq manam servintsu>>.

Currently Selected:

Lucas 9: qxn

Highlight

Copy