Lucas 8

Warmikuna Jesústa yanapayanqan

1Tsaypitanam chunka ishkay discïpulunkunawan markan markan Jesús purir Dios Yayapa mandakuyninpa alli willakuyninta willakurqan. 2Paykunawanmi aywayarqan supayyuq y qeshyaqyasha kayanqanpita kutikätsinqan warmikuna. Jukninmi karqan Magdalena niyanqan María. Paypitam qanchis supaykunata Jesús qarqushqa karqan. 3Tsaynöllam aywayarqan Herodespa mayoralnin Chuzapa warmin Juana, Susana y mas warmikuna. Paykunam Jesústa y discïpulunkunata imaykallawanpis yanapayarqan.

Diospa willakuyninta muruman Jesús iwalatsinqan

Mateo 13.1-9; Marcos 4.1-9

4Maytsay markakunapita atskaq runakuna qorikäyaptinmi Jesús yachatsikur nirqan: 5<<Juk runash trïgu muruq aywanaq. Muruta maqtsiptinshi näniman wakin shikwanaq. Tsaytash jarutakuyänaq y pishqukuna upshaskiyänaq. 6Wakin kaq murunash shallamaman shikwanaq. Tsaychö jeqamurshi allpa mana kaptin tsakiskinaq. 7Wakin murunash kashakuna rurinman shikwanaq. Jeqamurpis kashakuna wiñar qopiptinshi qarwatarnin wañuskinaq. 8Wakin kaq murunash alli allpaman shikwanaq. Tsaykunash jeqarkamur wiñarnin cada espïgachö pachak (100) trïguta wayunaq>>.

Tsaynö yachaskatsirmi Jesús jinchi nirqan: <<¡Rinriyuq kaqkunaqa ninqäkunata wiyakuyätsun!>>

Iwalatsikuywan imanir Jesús yachatsikunqan

Mateo 13.10-15; Marcos 4.10-12

9Tsaynam discïpulunkuna Jesústa tapuyarqan: <<Taytay, ¿ima ninantan tsay iwalatsikuypa yachatsikunqayki?>>

10Jesúsnam nirqan: <<Qamkunatam Dios Yayapa mandakuynin imanö kanqanta shumaq tantiyatsiyäshayki. Peru wakintam sïqa imamanpis iwalatsir tantiyatsï. Tsaymi rikarpis cuentata qokuyantsu y wiyaykarpis tantiyayantsu>>.#Isa. 6.9-10.

Muruman iwalatsir yachatsinqanta Jesús tantiyatsinqan

Mateo 13.18-23; Marcos 4.13-20

11<<Iwalatsiypa yachatsinqäta kanan tantiyatsiyäshayki. Muruqa Dios Yayapa willakuyninmi.

12<<Wakin runakunaqa chukru näninömi kayan. Dios Yayapa willakuyninta wiyayaptinpis diablu shamurmi wiyayanqantapis qonqaskatsin. Tsaymi manana creyikur salvakäyantsu.

13<<Wakin runakunaqa shallama chakranömi kayan. Tsaymi Dios Yayapa willakuyninta wiyar kushishqa chaskirpis mana jinchi jawayuq plantanö kar desgraciakuna päsaptin creyikuyninta dëjaskiyan.

14<<Wakin kaq runakunaqa kasha chakranömi kayan. Tsaymi Dios Yayapa willakuyninta wiyarpis yarpachakuyan waräninkuna imanöpis kawayänanpaq, kapuqyuq kayänanpaq y kushikuyllachö kawayänanpaq. Tsaynö karmi mana wayuq trïgunö kayan.

15<<Peru wakin runakunam sïqa alli allpanö kayan. Tsaymi Dios Yayapa willakuyninta alli shonqunkunawan cäsur Dios Yaya munanqannö kawakuyan. Alli allpachö muru wiñämur alli wayunqannömi imaypis kawakuyan>>.

Willakuyninta aktsiman Jesús iwalatsinqan

Marcos 4.21-25

16<<Manam pipis aktsita tsarirkatsir manka rurinman ni kawitu qopinman churantsu, sinöqa wajiman yaykuqkuna rikäyänanpaqmi alayriman churan.#Mat. 5.15; Mar. 4.21. 17Tsaynömi yachatsikunqäkuna kanan pakaraqnö karpis musyakanqa. Kanan mana tantiyakarpis waraykunam tantiyakanqa.#Mar. 4.22. 18Tsaynö kaykaptinqa shumaq wiyayämay. Yachatsinqäta cäsuqkunaqa masmi tantiyayanqa. Peru mana cäsuqkunam sïqa ichiklla tantiyayanqantapis qonqaskiyanqa>>.#Mat. 13.12; 25.29; Mar. 4.25.

Jesúspa maman y wawqinkuna pikuna kayanqan

Mateo 12.46-50; Marcos 3.31-35

19Tsaypitanam Jesúspa mamanwan wawqinkuna chäyarqan Jesús kaykanqan wajiman. Peru atskaq kayaptinmi yaykuyta puëdiyarqantsu. 20Tsaymi Jesústa juk runa willarqan: <<Mamaykiwan wawqikikunam waqtachö shuyaykäyäshunki>>.

21Jesúsnam nirqan: <<Pipis Dios Yayapa willakuyninta wiyar cäsuq kaqmi mamäqa y wawqïkunaqa kayan>>.

Wayrawan qocha laqchikaqta Jesús päratsinqan

Mateo 8.23-27; Marcos 4.35-41

22Jukpunnam discïpulunkunawan büquiman lätarkur Jesús nirqan: <<Wak tsimpaman päsashun>>.

Tsaymi büquiwan aywayarqan. 23Aywaykäyaptinmi Jesús puñukaskirqan. Tsayyaqmi alläpa wayrawan yaku laqchikar büquita tallpukätsinanpaqna kaykarqan. 24Tsaynam Jesústa rikchatsir niyarqan: <<¡Rabí, rabí! ¡Tallpukaykantsiknam!>>

Jesús sharkurnam wayratawan yakuta piñaparqan. Piñapaskiptinmi wayrawan yakupis patsallanchö päraskiyarqan. 25Discïpulunkunatanam nirqan: <<¿Imanirtan confiakuynikikuna kantsu?>>

Tsaymi kikinkunapura mantsakashqa ninakuyarqan: <<Yakupis wayrapis tsaynö cäsunanpaqqa ¡pitan kay runaqa!>>

Supaykuna löcuyätsiyanqan runata Jesús kutikätsinqan

Mateo 8.28-34; Marcos 5.1-20

26Tsaypitanam Gerasa#8.26 Wakin griego copiakunachömi Gadara niyan. Wakinnam Gergesa niyan. niyanqan partiman chäyarqan. Tsayqa kaykan Galileapa wak tsimpanchömi. 27Büquipita Jesús yarpuskiptinmi supaykuna löcuyätsinqan runa tinkupämurqan. Tsay runam unaypita qarashtulla purikurqan. Wajichöpis manana täkur panteonkunallachömi pärarqan. 28Jesústa rikaykurmi qayaraykachar puntanman pelatakuykur jinchi nirqan: <<¡Poderösu Dios Yayapa Tsurin Jesús! ¡Imatatan noqawan munanki! ¡Ama ñakatsillämaytsu!>>

29(Tsaynö supay nirqan runapita yarqunanpaq Jesús nishqa kaptinmi. Tsay runatam unaypitana munanqanta supay ruratsirqan. Tsaymi cadenakunawan makinta chakinta pankiyaptinpis rachikachaskir tsunyakunapa aywaq.)

30Tsaypitanam Jesús tapurqan: <<¿Imatan shutiki?>>

Paynam nirqan: <<Legión>>.#8.30 Legión ninanqa atska waranqa ninanmi.

(Tsaynö nirqan maytsika supaykuna payman yaykushqa kayaptinmi.)

31Tsay supaykunam Jesústa yapay yapay rugayarqan alläpa tutapayman mana qaykunanpaq. 32Washalänin lömachömi maytsika kuchikunata mitsiykäyarqan. Tsaymi supaykuna Jesústa rugayarqan kuchikunaman yaykuyänanpaq. Rugakuyanqanta Jesús äniptinmi 33supaykuna runapita yarquskir tsay kuchikunaman yaykuyarqan. Tsaymi kuchikuna löcuyar lömapita akataykachar qochaman jeqarpuyarqan. Tsaychömi shinqar wañuyarqan.

34Tsayta rikaykurmi kuchi mitsiqkuna cörrilla aywar markachö täkuq y cercanchö täkuq runakunata willayarqan. 35Willakuyaptinnam runakuna ima päsanqanta rikaq shayämurqan. Jesús kaykanqanman chaykurnam supayyuq runata tariyarqan llatapashqa juiciunchöna Jesúspa lädunchö jamaykaqta. Tsayta rikaykurmi alläpa mantsakäyarqan.

36Jesús kutikätsinqanta rikaq runakunam tsayman chaqkunata willayarqan imanö kutikätsinqanta. 37Tsaynam tsay partichö täkuq runakuna jankat mantsakashqa Jesústa rugayarqan tsaypita aywakunanpaq. Tsaynö rugayaptinmi büquiman lätarkur discïpulukunawan Jesús aywakurqan.

38Manaraq aywakuyaptinmi kutikaq runa Jesústa rugarqan paqtan aywakunanpaq. Peru Jesúsnam nirqan: 39<<Wajikipa kutir Dios Yaya kutikätsishunqaykita willakuy>>.

Tsaynam aywar Jesús kutikätsinqanta pïmaytapis willakurqan.

Jairupa tsurinta kawatsimunqan y warmita kutikätsinqan

Mateo 9.18-26; Marcos 5.21-43

40Qocha wak tsimpanman Jesús kutiptinmi shuyaraykaq atskaq runakuna kushishqa chaskiyarqan. 41Tsaymanmi sinagögachö mandakuq Jairo shutiyuq runa charqan. Paymi Jesúspa puntanman qonqurikuykur rugarqan wamranta kutikätsiq wajinman aywananpaq. 42Tsay wamranqa chunka ishkay watayuqnö japallan warmi tsurinmi karqan. Paymi antsa qeshyar wañuykarqanna.

Jairupa wajinman Jesús aywaptinmi maytsikaq runakuna kichkinakurraq qatiyarqan. 43Tsay runakunawanmi chunka ishkay watana yawar apaywan qeshyaqyasha warmipis aywarqan. [Jampitsikunanpaqmi imaykantapis rantikur usharqan. Peru] manam ni pï jampiptinpis kutikätsirqantsu. 44Tsay warmim Jesúspa qepallanpa witiykur llatapanpa kuchunta yataykuptin jina höra yawar apaynin päraskirqan. 45Jesúsnam nirqan: <<¿Pitan yatamashqa?>>

Llapan runakuna: <<Manam noqatsu>> niyaptinmi Pedro nirqan: <<Ay taytay, kaytsikaq runachöqa juknin jukninmi tanqayäshunki. [¿Imanöraq musyayäman mayqan yatashunqaykitapis?]>>

46Peru Jesúsnam nirqan: <<Pï karpis yatamashqam. Podernï yarqunqantam tantiyarqü>>.

47Yatanqanta tantiyaskiptinmi tsay warmi mantsakaywan karkaryarraq Jesúspa puntanman qonqurikuykurqan. Tsaypitam imanir yatanqanta y jina höra kutikanqanta llapan runakunapa puntanchö willarqan. 48Jesúsnam nirqan: <<Hïja, creyikamunqaykipitam kutikashkanki. Kananqa kushishqana aywakuy>>.

49Jesús tsaynö parlaykaptinmi Jairupa wajinpita willakuq chaykur nirqan: <<Taytay, tsurikiqa wañushqanam. Amana Jesústa pushaynatsu>>.

50Tsaynö niqta wiyaykurmi Jesús nirqan: <<Ama llakikuytsu. Dios Yayaman creyikuy. Wamraykiqa kawamunqam>>.

51Wajiman chaykurmi Pedruta, Juanta, Santiaguta y wamrapa taytanta y mamanta Jesús yaykatsirqan. Wakin kaq yaykuyänantaqa manam munarqantsu. 52Wamra wañushqa kaptinmi waqtachö runakuna alläpa waqaykäyarqan. Tsaymi Jesús nirqan: <<Ama waqayaytsu. Manam wañushqatsu, sinöqa puñukashqallam>>.

53Tsaynö niptinmi wamra wañushqana kanqanta musyar Jesústa asipäyarqan. 54Peru Jesúsnam makinpita achkurkur wamrata nirqan: <<Wamra, shäriy>>.

55Tsaynö niptinmi jina höra kawaskamur sharkamurqan. Jesúsnam nirqan: <<Kay wamrata pachan qarayay>>.

56Wamran kawamunqanta rikaykurmi taytanwan maman mantsakäyarqan. Peru Jesúsnam nirqan wamra kawamunqanta pitapis mana willakuyänanpaq.

Currently Selected:

Lucas 8: qxn

Highlight

Copy