Yoanɛ 6

Yezo ahɛ tɛ hɛ azi koto kɔ̃ atɛ

(Mat. 14.13-21; Mar. 6.30-44; Luk. 9.10-17)

1So pɛni ndo ko, Yezo agwe ka mbage kpo ti Galilea. (Andoili nga kpo ni ko ya, kpo ti Tiberiadɛ.) 2Azi butu butu anɔ ndo pɛ lo, na lo mɛ ya, ala hũ ndo aye ti kpɛnɛ mɛ lo ndoli na ngoi mɛ lo ndosara na awa nga. 3Ngoi mɛ Yezo na ava lo ĩ si kai ko, ala ma ka ndo hɔtɔ, adunga tise. 4Na ngoi ni ko, yenga ti Lipandasi tɛ Ayuda adoli ti tingɔ. 5Yezo ĩ ya lɛ lo ko, lo hũ azi butu butu so ndoga ka tɛ lo, la lo hũnda Filipo ya: “Ndo mɛ ndɛ e nɔ, e vɔ̃ tɛ da, ko e hɛ̃ azi olo zu atɛ wa?” 6(Lo pa ndo nga so bo ti mangɔ tɛnɛ mɛ Filipo na gbinyangɔ hɛ̃ lo, ta sanga ma, lo pia ndo lo hĩnga ye mɛ lo na lingɔ ni.) 7La Filipo agbinya hɛ̃ lo ya: “Bɛ se e mu faranga ngbangbo sɛ ya, e vɔ̃ na mapa, e hɛ̃ azi olo mɛ ko, ta na lengbingɔ ya, zo kɔi kɔi alua bɛ pɛnzɛ mapa, atɛ ma.” 8Mbanga va lo mɛ ndɛ̃ mɛ nyita Simɔ Petro, ili lo Andre, apa hɛ̃ lo ya: 9“Mbanga nyi kɔli kɔi so ndo mɛ, lo na mapa okɔ̃ na susu sɛ, ko ta ni na lengbingɔ na azi olo butu butu ma.”

10La Yezo apa hɛ̃ ava lo ya: “Ĩ pa hɛ̃ azi adunga tise.” (Ndiri ako ndo so ndo ko sĩ.) La azi zu adunga tise. Akɔli ndo zu ge tɛ koto kɔ̃. 11Yezo ĩ lɔ mapa ni, ĩ hɛ̃ sia kɔli hɛ̃ Nzapa wɛ ko, lo hɛ̃ ni hɛ̃ ava lo, la ala kangbi na azi mɛ adunga so ndo ko. So pɛni, lo lɔ nga asusu ni, lo ĩ hɛ̃ sia kɔli hɛ̃ Nzapa wɛ ko, lo kangbi na la. Ala tɛ ni nga ma se ko la bɛ la aye. 12Ngoi mɛ azi zu ĩ tɛ ye, ya la ĩ sĩsĩ ko, Yezo apa hɛ̃ ava lo ya: “Ĩ lɔ tanga tɛ mɛ angbã, so agbe gɛgɛrɛ.” 13Ava lo alɔ tanga tɛ mɛ angbã, asĩ gogo sui kɔi ndoni sɛ. Tanga mapa ni alo bo na ndo mapa okɔ̃ mɛ ndo azi atɛ.

14Azi ĩ hũ ye ti kpɛnɛ mɛ ndo Yezo ali ko, ala pa ya: “Biani, kɔli olo bo wa pangɔ nyɔ Nzapa mɛ ndo e ma ya, lo na gangɔ ge lɛ sese!” 15Yezo ahĩnga ya, se ni ngbã so popo tɛ la ko, ala na gbɔ̃ngɔ ni na nguru, kpãngɔ ni gbia. Na lo ni ndo la, lo lo so ndo ko, lo nɔ na kunɛ lo ka ndo hɔtɔ.

Yezo adɔ nɔ ti ndo lɛ ngu

(Mat. 14.22-33; Mar. 6.45-52)

16Ngoi mɛ ndo dɔ ĩ de ko, ava Yezo azu ka nyɔ kpo. 17Ala ko ya ngɔ, ato nda fangɔ ngu, gwengɔ ka Kapɛrnaumɛ. Bi avu ndo wɛ, ko ta Yezo ade ndo anɔ ata la ma. 18Yá ndoya ndo kpengbani, na lo ni la lɛ ngu ada gi mɔpo. 19Ngoi mɛ ala ĩ gbi, ĩ li kilomɛtrɛ ge tɛ kɔ̃ bere mana ko, ala hũ Yezo so lɛ ngu, ndodɔ nɔ, lo doli na ngɔ tɛ la, la mbɛtɔ agbɔ̃ la. 20Ko Yezo apa hɛ̃ la ya: “Mbi la, ĩ zia mbɛtɔ!” 21Ala separa ndo mungɔ lo ya ngɔ, ko bo ngoi kɔi ko, ngɔ ni apia ava ka nyɔ tungu, ka ndo mɛ ndo ala ye gwengɔ da.

Azi butu butu agi Yezo

22Ĩ la bu ndã ĩ de ko, azi butu butu mɛ ndo angbã ka mbage kpo ahĩnga ya, bo ngɔ kɔi biri la angbã so nyɔ tungu. Ala hĩnga ya, ta Yezo ako biri ya ngɔ ndoni kɔi na ava lo ma. Ko ala hĩnga nga ya, bo ava lo biri la aɔ. 23Ngoi mɛ ala so ndotɛnɛ so ko, ala hũ ambanga azi na ya ambanga ngɔ mɛ ndɛ̃ alo ka kɔdɔrɔ ti Tiberiadɛ so ndoga. Azi ni ko aga asi na tɔ̃nda ndo mɛ biri Gbia Yezo ahɛ̃ na sia kɔli hɛ̃ Nzapa, la lo kangbi nga azi na tɛ. 24Azi ko fɛrɛ butu butu so nyɔ tungu ahũ ya, ta Yezo bere ava lo so ndo ko ma. La ala ko ya angɔ mɛ fɛrɛ azi aga na ni ka mbage ngu, agwe ka Kapɛrnaumɛ so gingɔ lo.

Yezo adu tɛ mɛ ndoli? zo bɛta du

25Ngoi mɛ ala ĩ si ka mbage kpo, ĩ tã lo ko, ala hũnda lo ya: “Wa hangɔ lo tɛ Nzapa, rnɔ ga ge lá wa?” 26Yezo agbinya hɛ̃ la ya: “Mbi pa hɛ̃ ĩ ti bɛta tɛnɛ ya, ta ĩ ndogi mbi, na lo mɛ ya, ĩ hũ biri aye ti kpɛne mɛ mbi li ma, kanda ĩ ndogi mbi na lo ti mapa mɛ biri ĩ tɛ, ya ĩ asĩsĩ. 27Ta ĩ li kwa na lo ti tɛ mɛ ndogbɛ̃ ma, kanda ale ĩ li kwa na lo ti tɛ mɛ ndoninga, tɛ mɛ ndohɛ̃ zo du ti kaka. Mbi Nyi Zo mbi na hɛ̃ngɔ ĩ tɛ ni ko, na lo mɛ ya. To mbi Nzapa afa yango ya, ni minya nda tɛ ni ti gbia na tɛrɛ mbi Nyi lo.”

28Ala ĩ ma so ko, ala hũnda lo ya: “Kwa mɛ ale e li, wa bɛ Nzapa ade na lo ni nɛ?” 29Yezo agbinya hɛ̃ la ya: “Ĩ ba kwa mɛ bɛ Nzapa aye ya ĩ li lo mɛ: ale ĩ ye lo tɛ mbi mɛ lo to mbi.” 30Ala ĩ ma so ko, ala hũnda lo ya: “Ye ti kpɛnɛ mɛ mɔ lengbi ti lingɔ, fangɔ na e, wa e ye lo tɛ mɔ nɛ? Kwa mɛ mɔ na lingɔ nɛ? 31Ngoi mɛ ndo akotara e ka bɛ ndo ko, ala ndotɛ ndo tɛ mɛ ili ni la manɛ, nga ma se mɛ Buku tɛ Nzapa apa na ni ya: ‘Lo hɛ̃ ndo la tɛ mɛ alo ka ndozu, ala tɛ.’ ” 32Yezo agbinya hɛ̃ la ya: “Mbi pa hɛ̃ ĩ ti bɛta tɛnɛ ya, tɛ ko ndo alo ka ndozu, asa ge le sese ko, ta Mɔizɛ ndo la ahɛ̃ ni ma. Kanda To mbi la ahɛ̃ ĩ bɛta tɛ mɛ alo ka ndozu. 33Ta sanga ma, tɛ mɛ Nzapa ahɛ̃ azi ko, adu mbi mɛ mbi lo ka ndozu mbi zu, ko mbi ndohɛ̃ azi bɛta du.” 34La ala pa hɛ̃ lo ya: “Gbia, hɛ̃ e tɛ ni ko lá kwe lá kwe é tɛ.”

35Yezo apa hɛ̃ la ya: “Mbi tɛ mɛ ndohɛ̃ zo bɛta du. Zo ko aga ge tɛ mbi ko, ta gwɛ̃ tɛ na gbɔ̃ngɔ lo bɛ gbɔ ma. Zo ko aye lo tɛ mbi ko, ta gwɛ̃ ngu na gbɔ̃ngɔ nga lo bɛ gbɔ ma. 36Kanda mbi pa hɛ̃ ĩ ya, ĩ hũ mbi we, ko ta ĩ ndoye lo tɛ mbi ma. 37Azi ko la To mbi ahɛ̃ la hɛ̃ mbi ko, ala na gangɔ ge tɛ mbi, ko ta mbi na kɛ̃ngɔ zo kɔi ko la na gangɔ ge tɛ mbi bɛ gbɔ ma. 38Ta sanga ma, mbi lo ka ndozu, mbi zu ge le sese ya, mbi li ye mɛ bɛ wa tongɔ mbi aye, kanda ta mbi ga ge le sese so lingɔ ye mɛ bɛ mbi nvɛni aye ma. 39Ĩ ba ye mɛ bɛ wa tongɔ mbi aye lo mɛ: bɛ lo aye ya, na lá ti fangɔ ngbanga gbanda, azi ko ndo ni hɛ̃ la hɛ̃ mbi ko, mbi so la na pɛ kwa, ko ta zo kɔi agere ti mbi ma. 40Ti biani, ĩ ba ye mɛ bɛ To mbi aye lo mɛ: azi zu ko la ahũ mbi Nyi lo, la ala ye lo tɛ mbi ko, ala na luangɔ du ti kaka, ko mbi so gbanda la na pɛ kwá na lá ti fangɔ ngbanga.”

41Ayuda ĩ ma so ko, ala ndunguma Yezo, na lo ko fɛrɛ lo pa ya: “Mbi tɛ mɛ alo ka ndozu.” 42Ala so ndopa ya: “Yezo mɛ nyi Yozɛfu, e hĩnga to lo na ta lo ko, ta lo lo mɛ ma? Kɔdɛ mɛ lo pa na olo mɛ ya, ni lo ka ndozu la ni zu sia?” 43Yezo agbinya hɛ̃ la ya: “Ĩ zia ndungumangɔ mbi ka popo tɛ ĩ. 44Se ta To mbi mɛ ato mbi azi lege hɛ̃ zo ma ko, ta zo ni alengbi ti gangɔ na se bɛ lo ge tɛ mbi ma. To mbi la azi lege hɛ̃ lo, lo ga ge tɛ mbi, ko gbanda na lá ti fangɔ ngbanga ko, mbi so lo na pɛ kwa. 45Awa pangɔ nyɔ Nzapa asu ndo tɛnɛ ya: ‘Nzapa aha gbanda la zu na tɛnɛ tɛ lo.’ Zo zu ko la ama tɛnɛ tɛ To mbi, aye nga lo ni ko, lo ga ge tɛ mbi. 46Ko ta oko afa ya, zo kɔi ahũ To mbi wɛ la ma. Bo mbi mɛ mbi lo ka tɛ To mbi Nzapa mbi ga, la mbi hũ lo.

47“Mbi pa hɛ̃ ĩ ti beta tɛnɛ ya, zo ko la aye lo tɛ mbi ko, zo mɛ alua du ti kaka wɛ la. 48Mbi tɛ mɛ ndohɛ̃ zo beta du. 49Ngoi mɛ ndo akotara ĩ ka bɛ ndo ko, ala tɛ ndo tɛ mɛ ili ni la manɛ, kanda ta tɛ ni ko ahɛ̃ ndo la du ti kaka ma. Ko ngoi mɛ ndo bi tɛ la ĩ lengbi ko, ala kpili ndo. 50Kanda tɛ mɛ alo ka ndozu la azu ko, adu tɛ mɛ se zo atɛ ni ko, ta lo kpi gbanda ma. 51Mbi tɛ mɛ alo ka ndozu la azu, ko tɛ ni ndohɛ̃ azi beta du. Se zo atɛ ni ko, lo lua du ti kaka. Tɛ mɛ mbi na hɛ̃ngɔ hɛ̃ azi ko, adu mi tɛrɛ mbi. Mbi hɛ̃ ni hɛ̃ azi ya, ala tɛ, wa ala lua beta du.”

52Ayuda ĩ ma so ko, ala to nda bimbingɔ tɛnɛ kpengbani ka popo tɛ la. Ala so ndohũndangbi ya: “Kɔdɛ mɛ kɔli olo alengbi ti hɛ̃ngɔ e mi tɛrɛ lo, ya e tɛ ni sia?” 53Yezo apa hɛ̃ la ya: “Mbi pa hɛ̃ ĩ ti beta tɛnɛ ya, se ta ĩ tɛ mi tɛrɛ mbi Nyi Zo, ĩ nyɔ nga mɛnɛ tɛrɛ mbi ma ko, ta ĩ na luangɔ bɛta du ma. 54Kanda zo ko la atɛ mi tɛrɛ mbi, anyɔ nga mɛnɛ tɛrɛ mbi ko, zo mɛ alua du ti kaka wɛ la. Ko mbi so gbanda lo na pɛ kwá na lá ti fangɔ ngbanga. 55Ta sanga ma, mi tɛrɛ mbi adu beta tɛ, mɛnɛ tɛrɛ mbi adu bɛta ye ti nyɔngɔ. 56Zo ko atɛ mi tɛrɛ mbi, anyɔ nga mɛnɛ tɛrɛ mbi ko, zo mɛ mbi na lo, e ndodu ndoni kɔi la. 57To mbi mɛ wa tongɔ mbi ndohɛ̃ azi bɛta du, ko mbi lua bɛta du na lo tɛ lo. Se mɛ nga se zo atɛ mi tɛrɛ mbi ko, alua bɛta du na lo tɛ mbi la. 58Tɛ mɛ alo ka ndozu ko, adu mi tɛrɛ mbi. Ta tɛ ni nga ma tɛ ko ndo akotara ĩ atɛ ka bɛ ndo, ko ngoi mɛ ndo bi tɛ la ĩ lengbi, la ala kpili ma. Zo ko atɛ tɛ mɛ mbi na hɛ̃ngɔ lo ko, lo na luangɔ du ti kaka buai.” 59Yezo atɛnɛ ndo tɛnɛ olo na ngoi mɛ ndo lo ndoha azi na tɛnɛ tɛ Nzapa ka ya da sambela ka Kapernaumɛ.

Tɛnɛ mɛ ndoli? zo du ti kaka

60Ambanga ava lo ĩ ma tɛnɛ ko lo ĩ tɛnɛ ko, ala pa ya: “Tɛnɛ ni akpengba sĩ. Ta zo alengbi ti yengɔ ni ma.” 61Yezo ahĩnga ya, ava ni ndondunguma na lo tɛnɛ ni ko, la lo hũnda la ya: “Tɛnɛ ni asɔ bɛ ĩ? 62Wa na ngoi mɛ gbanda ĩ hũ mbi Nyi Zo, mbi ma ka ndo mɛ mbi lo da mbi ga ko, ĩ nɛ gbanda ya nɛ? 63Tɔrɔ Santo la ndohɛ̃ zo beta du, kanda ta zo alengbi ti luangɔ beta du na lo nguru tɛ lo nvɛni ma. Tɛnɛ mɛ ndo mbi tɛnɛ hɛ̃ ĩ ko, adu tɛnɛ tɛ Tɔrɔ Santo, ko tɛnɛ ni ndohɛ̃ zo beta du. 64Kanda ta ambanga azi na popo tɛ ĩ ndoye lo ni ma.” (Yezo atɛnɛ ndo nga so, ta sanga ma, lo pia ndo lo hĩnga azi mɛ na kɛ̃ngɔ lo tɛ lo, nga na zo mɛ na tɛngɔ gbɛ kuni lo.) 65Yezo apa nga ya: “I ba nda mɛ fɛrɛ mbi pa hɛ̃ ĩ ya, se ta To mbi azi lege hɛ̃ zo ya, lo ga ge tɛ mbi ma ko, ta zo ni alengbi ti gangɔ ge tɛ mbi ma la.”

66Ato bo na ngoi ko ndo la, ambanga ava Yezo ma wo ma adɔ lo azia, ko ta ala na lo ti ɔ ndoni kɔi ma. 67Ngoi mɛ ala ĩ gwe wɛ ko, Yezo ahũnda ava lo ko sui kɔi ndoni sɛ ya: “Wa ĩ, ĩ ye nga dɔngɔ mbi ziangɔ?” 68Simɔ Petro agbinya hɛ̃ lo ya: “Gbia, se e dɔ mɔ e zia ko, tɛ e zo mɛ e gwe ka tɛ lo na? Mɔ la mɔ ndotɛnɛ tɛnɛ mɛ ndohɛ̃ zo du ti kaka. 69Na olo ko, e ye lo tɛ mɔ, ko e hĩnga nga ya, mɔ Zo mɛ Santo, mɔ lo ka tɛ Nzapa.” 70La Yezo agbinya hɛ̃ la ya: “Mbi ndo la mbi sara ĩ zu sui kɔi ndoni sɛ mbi kpa ya, ĩ ti ava mbi! Kanda mbanga fɔ̃ ĩ kɔi lo zo tɛ Satana!” 71Yezo ndohá ndo Yudasi mɛ nyi Iskariɔtɛ. Ta sanga ma, abɛ Yudasi ndo nga mbanga va Yezo ko, lo ndo la na kangɔ Yezo.

Currently Selected:

Yoanɛ 6: NGB87

Highlight

Copy