Yoanɛ 7

Ayata Yezo akɛ yengɔ lo tɛ lo

1So pɛni ndo ko, Yezo afɔnɔ ka sese ti Galilea. Lo kɛ̃ ndo fɔnɔngɔ ka sese ti Yudea, ta sanga ma, agbia tɛ Ayuda ndogi ndo kɔdɛ ya, ani ho lo. 2Yenga tɛ Ayuda mɛ andoili ya yenga Gofa adoli ndo ti tingɔ. 3La ayata Yezo apa hɛ̃ lo ya: “Lo so ndo mɛ, mɔ gwe ka Yudea, wa awa yengɔ lo tɛ mɔ mɛ kai ahũ nga kwa mɛ mɔ ndoli. 4Se zo aye ya, azi ahĩnga ni ko, ta lo lengbi ti lingɔ ye na gbɛ mbingo ma. Wa nga ma la mɔ ndoli gi tɛrɛ kwa olo ko, li ni, ya azi zu ahũ.” 5(Ta ayata Yezo nvɛni aye ndo lo tɛ lo ma.) 6La Yezo apa hɛ̃ la ya: “Ta ngoi tɛ mbi ade alengbi ma. Kanda tɛ ĩ ko, ngoi zu bo nzɔ̃ ngoi. 7Ta be azi ti le sese alengbi ti kɛ̃ngɔ ĩ ma. Kanda tɛ mbi ko, be la akɛ̃ mbi, na lo mɛ ya, mbi ndopa ya, kwa mɛ ala ndoli adu siɔni. 8Ĩ nvɛni ĩ nɔ yenga ni ko. Ta mbi nɔ tɛ mbi ma, na lo mɛ ya, ta ngoi tɛ mbi ade alengbi ma.” 9Lo ĩ tɛnɛ tɛnɛ ko hɛ̃ la wɛ ko, lo ngba tɛ lo so Galilea.

Yezo agwe Yenga Gofa

10Ngoi mɛ ayata Yezo ĩ gwe yenga wɛ ko, lo hã nɔ na gbe mbingo, lo gwe nga yenga ni, ko ta lo si ndo yango ma. 11Agbia tɛ Ayuda agigi lo na ngoi yenga ni, ko ala so ndohũndangbi ya: “Lo so wa, lo so wa?” 12Azi ko butu butu so ndotɛnɛ tɛnɛ na ili lo sĩ ka gbɛ gɔ̃ la. Ambanga ndopa ya: “Lo nzɔ̃ zo.” Ambanga mɛ ndɛ̃ ya: “Ipɔ, lo wa handangɔ azi.” 13Ko ta zo kɔi atɛnɛ ndo tɛnɛ yango na lo tɛ lo ma, na lo mɛ ya, ala ndokpɛ ndo mbɛtɔ tɛ agbia tɛ Ayuda.

14Ngoi mɛ yenga ĩ ti ndo bɛ ni ko, Yezo aga ali ka ya kota da Nzapa, ato nda hangɔ azi na tɛnɛ tɛ Nzapa. 15Agbia tɛ Ayuda ĩ ma tɛnɛ tɛ lo ko, ala bema, ko ala pa ya: “Ta kɔli olo amanda ndo mbɛti ma, ko kɔdɛ mɛ lo hĩnga na tɛnɛ ti ya Buku tɛ Nzapa so sia?” 16La Yezo agbinya hɛ̃ la ya: “Tɛnɛ mɛ mbi ndoha na azi ko, ta adu tɛnɛ tɛ mbi nvɛni ma, kanda adu tɛnɛ tɛ Nzapa mɛ wa tongɔ mbi, la mbi ndoha na ĩ. 17Zo ko ndosepara lingɔ ye ko la bɛ Nzapa aye ko, lo na hĩngangɔ ya, tɛnɛ mɛ mbi ndoha na azi, adu tɛnɛ tɛ Nzapa, bere lo na hĩngangɔ ya, tɛnɛ mɛ mbi ndotɛnɛ ko, mbi ndotɛnɛ bo na nguru tɛ mbi. 18Zo ko ndotɛnɛ tɛnɛ na nguru tɛ lo nvɛni ko, lo ndogi ya, bo ni nvɛni wa ni lua ndima. Kanda zo ko ndoli kwa ya, wa tongɔ ni alua ndima na lo ni ko, zo mɛ ndotɛnɛ beta tɛnɛ, ta lo ndopa nga nvɛnɛ bɛ gbɔ ma la. 19Biani, Mɔizɛ alu ndo ndia hɛ̃ ĩ. Ko ta zo kɔi so popo tɛ ĩ ndotɔndɔ ndia ni ma. Wa nda mɛ ĩ ndogi bo kɔdɛ ya ĩ ho mbi nɛ?”

20Azi ko butu butu ĩ ma so ko, ala gbinya hɛ̃ lo ya: “Mɔ na siɔ tɔrɔ ya tɛrɛ mɔ! Zo mɛ ndogi kɔdɛ ya, ni ho mɔ na?” 21Yezo agbinya hɛ̃ la ya: “Mbi li ndo ye ti kpɛne bo kɔi ĩ hũ, ko ĩ zu ĩ bema ndo na lo ni! 22Mɔizɛ apa ndo hɛ̃ ĩ ya, se adú nyi kɔli, lo li bi miambe ko, afa lo ganza. (Ko ta Mɔizɛ ndo la ato nda fangɔ azi ganza ma. Akotara ĩ mɛ ndo ka uzu tɛ lo ndo la ato nda ni.) Ko bere se bi ti fangɔ ganza ati na lá ti wɔngɔ tɛrɛ ko, ĩ kɛ̃ kia ĩ fa nyi kɔli na ganza. 23Ĩ ndofa nyi kɔli na lá ti wɔngɔ tɛrɛ so tɔndɔngɔ ndia tɛ Mɔizɛ na seni. Wa se mbi sara ngbonga tɛrɛ zo na lá ti wɔngɔ tɛrɛ ko, tɛ ĩ nda ngɔnzɔ mɛ ĩ ndoli hɛ̃ mbi nɛ? 24Ĩ zia fangɔ ngbanga tɛ zo nga ma se ko ĩ ndohũ na lo, kanda ale ĩ ndofa ngbanga na seni.”

Azi ndohũndangbi tɛrɛ la ya Yezo lo Mɛsia

25Ambanga azi ti Yeruzalɛmɛ apa ya: “Zo mɛ azi ndogi lo ya aho lo ko, ta lo lo ma! 26Wa ĩ ba hĩ, lo ndotɛnɛ tɛnɛ na gbɛlɛ azi, ko ta zo kɔi ndogbinya tɛnɛ hɛ̃ lo ma! Agbia tɛ e ka ahĩnga biani ya, lo Mɛsia? 27Tɛ kɔli olo ko, e hĩnga ndo mɛ lo lo da. Wa ngoi mɛ gbanda Mɛsia ni aga ko, ta zo kɔi ahĩnga gbanda ndo mɛ lo lo da ma.”

28Yezo ndoha ndo azi na tɛnɛ tɛ Nzapa ka ya kota da Nzapa, ko lo tɛnɛ tɛnɛ na kɔngɔ hɛ̃ la ya: “Omɛ ĩ nɛ ya ĩ hĩnga mbi ko, ĩ hĩnga nga ndo mɛ mbi lo da? Ta mbi ga na se bɛ mbi ma, kanda wa tongɔ mbi lo beta Zo, ko ta ĩ hĩnga lo ma. 29Mbi la mbi hĩnga lo, na lo mɛ ya, mbi lo ka tɛ lo la mbi ga, ko lo la wa tongɔ mbi.” 30Ngoi mɛ ala ĩ ma so ko, ala gi kɔdɛ ya ani gbɔ̃ lo, ko ta zo kɔi abɔrɔ tɛrɛ lo ma, na lo mɛ ya, ta ngoi tɛ lo ade alengbi ma.

31So popo tɛ azi ko ndo so ndo ko butu butu ko, azi ma wo ma aye ndo lo tɛ lo. Ala ndopa ndo ya: “Kɔli olo ali aye ti kpɛnɛ ma wo ma. Ko ngoi mɛ gbanda Mɛsia aga ko, lo li gbanda aye ti kpɛnɛ aɔ ndo tɛ kɔli olo mɛ?”

Ato awa batangɔ kota da Nzapa ya ala gbɔ̃ Yezo

32Afarizeo ama ndo tɛnɛ mɛ azi butu butu ndotɛnɛ ka gbe gɔ̃ la na ili Yezo. La ambanga Afarizeo na agbia tɛ awa lungɔ Nzapa na ye ato awa batangɔ kota da Nzapa ya, ala nɔ, agbɔ̃ Yezo. 33Yezo ĩ hũ so ko, lo pa ya: “Mbi dɛ so popo tɛ ĩ ngoi yakere, so pɛni ko, mbi na diringɔ ka tɛ wa tongɔ mbi. 34Ĩ na gigingɔ mbi, kanda ta ĩ na hũngɔ mbi ma, ta sanga ma, ta ĩ lengbi ti gwengɔ ka ndo mɛ mbi na gwengɔ da ma.” 35La Ayuda so ndohũndangbi tɛrɛ la ya: “Tɛ lo ndo mɛ lo na gwengɔ da, ko ta e na hũngɔ lo ma ko, ndo ni ka wa? Lo na gwengɔ tãngɔ ayata e Ayuda mɛ ndo agundu agwe ka tɛ azi ti Grɛsɛ, ko lo na hangɔ la na tɛnɛ tɛ Nzapa? 36Tɛnɛ ko lo tɛnɛ ya: ‘Ĩ na gigingɔ mbi, ko ta ĩ na hũngɔ mbi ma, ta sanga ma, ta ĩ lengbi ti gwengɔ ka ndo mɛ mbi na gwengɔ da ma’ ko, nda tɛnɛ ni ko nɛ?”

Ngu mɛ ndohɛ zo bɛta du

37Ndangba bi ti yenga ni adu ndo bi mɛ ngbondoni. Na la ko ndo ko, Yezo adɔ alo so gbɛlɛ azi butu butu, atɛnɛ tɛnɛ na kɔngɔ ya: “Se gwe ngu agbɔ̃ zo ko, ale lo ga ge tɛ mbi, mbi hɛ̃ lo ngu lo nyɔ. 38Nga ma se mɛ Buku tɛ Nzapa apa ya: ‘Zo ko la aye lo tɛ mbi ko, ngu mɛ ndohɛ̃ zo bɛta du na longɔ ka ya bɛ lo suangɔ.’ ” 39(Yezo ndopa ndo lo tɛ Tɔrɔ Santo mɛ azi mɛ aye lo tɛ lo na luangɔ ni. Na ngoi ko ndo ko, ta Nzapa adɛ ndo ato Tɔrɔ Santo ma, na lo mɛ ya, ta Nzapa adɛ ndo ahɛ̃ Yezo ndima ma.)

Ambanga azi aye lo tɛ Yezo

40Ambanga azi na popo tɛ azi butu butu ĩ ma ndo tɛnɛ mɛ Yezo atɛnɛ ko, ala pa ya: “Biani, kɔli olo bo wa pangɔ nyɔ Nzapa mɛ ndo e ma ya lo na gangɔ!” 41Ambanga apa ya: “Lo Mɛsia.” Ambanga mɛ ndɛ̃ apa ya: “Ta Mɛsia alengbi ti longɔ ka Galilea ma. 42Buku tɛ Nzapa apa ya, Mɛsia adu gbanda tara Davidi, ko lo lo gbanda ka Bɛtlɛmɛ mɛ kɔdɔrɔ tɛ Davidi, wa lo ga.” 43La popo tɛ azi akangbi sɛ na lo tɛ Yezo. 44Ambanga aye ndo gbɔ̃ngɔ lo, ko ta zo kɔi abɔrɔ ndo tɛrɛ lo ma.

Agbia tɛ Ayuda akɛ̃ yengɔ lo tɛ Yezo

45Ngoi mɛ awa batangɔ kota da Nzapa ĩ diri ĩ gwe ko, Afarizeo na agbia tɛ awa lungɔ Nzapa na ye ahũnda la ya: “Ta ĩ ga na lo ma ya nɛ?” 46La awa batangɔ kota da Nzapa agbinya hɛ̃ la ya: “Ta e dɛ e ma zo atɛnɛ tɛnɛ nga ma tɛ kɔli ko bɛ gbɔ ma!” 47Afarizeo ahũnda la ya: “Lo handa nga ĩ, ĩ ye tɛnɛ tɛ lo? 48Ta mbanga gbia tɛ e kɔi bere mbanga Farizeo kɔi aye lo tɛ lo ma! 49Ta azi olo butu butu ahĩnga ndia tɛ Mɔizɛ ma sia! Nzapa la azonga la.” 50Nikodɛmɛ mɛ ndo anɔ ka tɛ Yezo ko, lo nga ndo so popo tɛ Afarizeo mɛ so ndo ko. Lo pa hɛ̃ la ya: 51“Na se ndia tɛ e, uzu ti fangɔ ngbanga bingɔ li zo ko, ale ama lo, ahĩnga ye mɛ lo li, wadila afa ngbanga abi li lo.” 52Afarizeo ĩ ma so ko, ala gbinya hɛ̃ lo ya: “Mɔ nga wa Galilea? Di Buku tɛ Nzapa kpa hĩ, mɔ na hũngɔ ya, ta wa pangɔ nyɔ Nzapa kɔi ndolo ka Galilea ma.” [ 53So pɛni, zo kɔi kɔi adiri agwe ka ndo tɛ lo.

Currently Selected:

Yoanɛ 7: NGB87

Highlight

Copy