Luka 2

Maria adu Yezo

(Mat. 1.18-25)

1Na ngoi ko ndo ko, Ogustɛ mɛ kota gbia ti Roma ahɛ̃ nyɔ ya, adikɔ azi zu mɛ na lɛ sese tɛ ni. 2Adu kɔzo dikɔngɔ azi mɛ ndo adikɔ na ngoi mɛ Kiriniusi gbia ti sese ti Siria. 3Azi zu anɔ ndo ya, asu ili ani, ko zo kɔi kɔi adiri ndo ka ya kɔdɔrɔ tɛ lo nvɛni, ya asu ili ni.

4Yozɛfu alo ka Nazarɛtɛ, ka sese ti Galilea, agwe ka Bɛtlɛmɛ, kɔdɔrɔ mɛ adú gbia Davidi da, ka sese ti Yudea, na lo mɛ ya, lo Yozɛfu nvɛni ndo nga tara Davidi. 5Yozɛfu ana ya lo Maria anɔ nga ya, asu ili ani. Maria ndo na ngɔ, 6ko ngoi mɛ ala dɛ ka Bɛtlɛmɛ ko, bi tɛ lo ti dúngɔ alengbi. 7Ta ala lua ndo ka ya da tɛ awa fɔnɔ ma, la ala nɔ ka ya da ti batangɔ asa. Ala ĩ si kai ko, Maria adú kɔzo nyi lo ti kɔli. Lo gana lo na bɔngɔ, lo kpa lo so ndo sã, na ya ku ti tɛ tɛ asa.

Angelo asi gbɛlɛ awa batangɔ angasã ngbaga

8Ambanga awa batangɔ angasã ngbaga ndo so sese ni ko, ala ndola ndo ka yaka na bi so batangɔ angasã ngbaga tɛ la. 9Angelo tɛ Gbia asi gbɛlɛ la, ko ndima tɛ Gbia asũ ndo la nga ma la. Mbɛtɔ agbɔ̃ ndo la sĩ. 10Ko angelo apa hɛ̃ la ya: “Ta mbɛtɔ agbɔ̃ ĩ ma, ta sanga ma, mbi ga so pangɔ nzɔ̃ pa hɛ̃ ĩ, ko azi zu na sabangɔ na lo ni sĩ. Ĩ ma nzɔ̃ pa ni lo mɛ: 11na bi olo ko, adú fɛrɛ hɛ̃ ĩ Wa songɔ azi ka kɔdɔrɔ tɛ Davidi. Lo la Mɛsia, lo nga Gbia. 12Wa ĩ ba ye mɛ ĩ na hĩngangɔ na lo lo mɛ: ĩ na tãngɔ pɛsɛ nyi mɛ agana lo na bɔngɔ, akpa lo na ndo sã mɛ na ya ku ti tɛ tɛ asa.”

13So pɛ tɛnɛ ko tɛ angelo ko, vaa, angbunguma aangelo mɛ ndɛ̃ alo ka yayu asi, ata angelo ko fɛrɛ, ko ala gonda Nzapa ya: 14“E gonda Nzapa mɛ ka yayu! Lo li bɛ ya, azi ti lɛ sese mɛ lo ndoye la, adu na bɛ pii ma ke!”

Awa batangɔ angasã ngbaga anɔ ka Bɛtlɛmɛ

15Aangelo ĩ zia la, ĩ diri ka ndozu wɛ ko, awa batangɔ angasã ngbaga atɛnɛ tɛnɛ na popo tɛ la ya: “É nɔ é si ka Bɛtlɛmɛ. Ale e hũ ye mɛ asi kai, ye mɛ Gbia Nzapa afa na e.” 16Ala nɔ hiɔ hiɔ, asi kai, atã Maria na Yozɛfu nga na pɛsɛ nyi mɛ ase na ndo sã na ya ku ti tɛ tɛ asa. 17Ala ĩ hũ pɛsɛ nyi ni wɛ ko, ala pa lo mɛ fɛrɛ angelo apa hɛ̃ la na lo tɛ nyi ni. 18Azi zu mɛ ndo ama lo mɛ awa batangɔ angasã ngbaga apa ko, ala bema. 19Ko Maria abata ndo lo ni kwɛ zu ka ya bɛ lo, ko lo ndobinga bɛ lo ndo ni. 20So pɛni, awa batangɔ angasã ngbaga amu lege adiri. Ala gonda Nzapa, ayakɛ lo na lo ti ye zu mɛ ala ma, nga na lo ti ye zu mɛ ala hũ. Ta sanga ma, lo ni ko kwɛ zu asi ndo nga ma se ko la angelo apa na ni hɛ̃ la.

Adi ili nyingambi ni ya Yezo

21Ngoi mɛ adú Yezo wɛ, ĩ la so pɛni bi miambe ko, bi ti fangɔ lo ganza alengbi. Adi ili lo ya: Yezo. Ili mɛ ndo angelo apia adi, uzu ti Maria mɛngɔ ngɔ la.

Afa Yezo na Gbia Nzapa ka ya kota da Nzapa

22So pɛni, na se nyɔ ndia tɛ Mɔizɛ ko, bi tɛ Yozɛfu na Maria ti lingɔ tɔrɔke ti onzingɔ ló na tɛrɛ la alengbi. La ala mu Yezo, anɔ na lo ka Yeruzalɛmɛ, ka ya kota da Nzapa so fangɔ lo na Gbia Nzapa. 23Ta sanga ma, asu ka ya buku ti ndia tɛ Gbia Nzapa ya: “Nyi ko la adu lo kɔzoni, se lo du nyi kɔli ko, ale alu lo na Gbia Nzapa.” 24Ala lu nga ndo Nzapa na aye mɛ ndɛ̃ ko la ndia tɛ Gbia aha ló ni. “Aye ni lo mɛ: mbua-mbɛngɛ sɛ, bere aya mbipa sɛ.”

25Mbanga kɔli kɔi ndodu ndo ka Yeruzalɛmɛ, ili lo la Simeona. Lo ndo bɛta zo, lo ndotɔndɔ ndo Nzapa sĩ, ko lo ndoku ndo zo mɛ ndo apa lo tɛ lo ya, lo na gangɔ so songɔ awa Izrayɛlɛ. Tɔrɔ Santo ndodu ndo ndoni kɔi na Simeona, 26ko Tɔrɔ Santo apa ndo hɛ̃ lo ya, uzu ti lo kpingɔ ko, lo na hũngɔ Mɛsia mɛ Gbia na tongɔ lo. 27Tɔrɔ Santo ĩ zi kɔdɛ li lo ko, lo hã nɔ, lo nɔ ka ya kota da Nzapa. Ngoi mɛ awa dtĩngɔ Yezo ĩ nɔ na Yezo ya, ani li lo na ye mɛ ndia aha lo ni ko, 28Simeona ayɔ Yezo, ahɛ̃ sia kɔli hɛ̃ Nzapa ya:

29“Gbia, na olo ko, kapa ko ndo mɔ ko ati na seni.

Ko se mɔ ye ko, mɔ zia mbi wa kwa tɛ mɔ,

Mbi kpi na bɛ pii.

30Ta sanga ma, mbi hũ zo tɛ mɔ mɛ Wa songɔ azi wɛ,

31Zo ni adu zo mɛ mɔ lɛkɛ lo tɛ lo na lɛ azi zu.

32Lo la wa vurungɔ na ndo,

Lo fa gbanda azi ti lɛ sese na lege ya, ala hĩnga mɔ,

Ko azi tɛ mɔ awa Izrayɛlɛ na luangɔ ndima na lo tɛ lo.”

Tɛnɛ mɛ Simeona apa na lo tɛ Yezo

33Awa dúngɔ Yezo ĩ ma tɛnɛ mɛ Simeona apa na lo tɛ Yezo ko, ala bema sĩ. 34Simeona asunu la, apa hɛ̃ Maria ta Yezo ya: “Nzapa asara nyingambi olo akpa ya, na lo tɛ lo ko, ngbanga ati na ambanga awa Izrayɛlɛ gba, ko ngbanga tɛ ambanga mɛ ndɛ̃ gba adɛ̃. Nzapa na fangɔ azi na ye mɛ lo na lingɔ ti ndo lo, kanda ala na kɛ̃ngɔ lo. 35Ko dangɔ bɛ mɛ azi gba ndodu na ni ka bɛ la ko, lo na singɔ na ni yango ngbɛ̃. Zo wali, wa tɛ mɔ ko, mɔ na hũngɔ pɛnɔ nga ma zo mɛ amu zabe akoro na bɛ lo.”

Zo wali mɛ wa pangɔ nyɔ Nzapa

36Zo wali kɔi mɛ wa pangɔ nyɔ Nzapa nga ndo so ndo ko, ili lo la Anɛ, lo nyi Fanuɛlɛ mɛ na ale tɛ Asɛrɛ. Anɛ ati ndo tara bange buai. Lo du ndo na kɔli na ngoi mɛ lo dɛ mɔsia, ko lo na kɔ lo ali ndo buru mbara mbara. 37Kɔ lo akpi ti lo, ko lo la so pɛ kwá tɛ kɔ lo ngbĩi lo ti na buru sui miambe ndoni siɔ. Lo ndonɔ ndo lá kwɛ lá kwɛ ka ya kota da Nzapa. Ko lo ndovɔrɔ ndo Nzapa bi na lá, lo ndokɛ̃ ndo tɛ so vɔrɔngɔ Nzapa. 38Lo ga ndo ka ya kota da Nzapa na ngoi mɛ ndo Yozɛfu na Maria so ndo ko. Lo hɛ̃ sia kɔli hɛ̃ Nzapa, lo pa nga lo tɛ Yezo hɛ̃ azi zu mɛ ndoku ya, Nzapa aga atɔ̃ awa Izrayɛlɛ na ya pɛnɔ.

Awa dúngɔ Yezo adiri na lo ka Nazarɛtɛ

39Awa dúngɔ Yezo ĩ kɔ nda lingɔ ye zu na se nyɔ ndia tɛ Gbia ko, ala diri na Yezo ka kɔdɔrɔ tɛ la, ka Nazarɛtɛ mɛ ka sese ti Galilea. 40Yezo ndomai ndo ndoni kɔi na nguru. Lo ndo na ndara sĩ, ko Nzapa ndoli ndo nzɔ̃ bɛ hɛ̃ lo.

Yezo na awa hangɔ ndia atengbi ka ya kota da Nzapa

41Buru kɔi kɔi, awa dúngɔ Yezo ndogwe ndo ka Yeruzalɛmɛ na lo ti yenga ti Lipandasi tɛ Ayuda. 42Ngoi mɛ Yezo ĩ ti na buru sui kɔi ndoni sɛ ko, lo na awa dúngɔ lo agwe yenga ni, nga ma se mɛ ala ndoli na ni buru kɔi kɔi zu. 43Ngoi mɛ yenga ĩ wɛ ko, Yozɛfu na Maria ahã nɔ adiri, kanda Yezo angbã tɛ lo ka Yeruzalɛmɛ, ko ta awa dúngɔ lo ahĩnga ndo ma. 44Ala ndoda ndo bɛ la ya, Yezo ka popo tɛ azi mɛ alo yenga ndodiri. Ala ĩ li so lege bi kɔi ko, ta ala hũ lo ma, la ala to nda gingɔ lo ka popo tɛ asongo la, nga ka popo tɛ afɔ̃ la. 45Ta ala hũ lo ma, la ala diri agwe ka Yeruzalɛmɛ so gingɔ lo. 46Ĩ la so pɛni bi ta ko, ala lua lo ka ya kota da Nzapa. Lo du so popo tɛ awa hangɔ ndia, lo so ndoma la, ko lo so ndohũnda nga la na ndo. 47Azi zu mɛ ndo ama lo abema na lo kɔdɛ tɛ lo, nga na lo tɛnɛ mɛ lo ndogbinya hɛ̃ awa hangɔ ndia. 48Awa dúngɔ lo ĩ hũ lo wɛ ko, ala bema sĩ, ko ta lo Maria apa hɛ̃ lo ya: “Nyi mbi, mɔ li e so ya nɛ? Bɛ mbi na bɛ to mɔ angbã ngbũ nvɛni na gigingɔ mɔ.” 49Yezo ĩ ma so ko, agbinya hɛ̃ la ya: “Ĩ ndogigi mbi ya nɛ? Ta ĩ hĩnga ya, ale mbi du nga ge ya da tɛ To mbi ma?” 50Ko ta awa dúngɔ lo ahĩnga nda tɛnɛ ko lo tɛnɛ hɛ̃ la ma.

51La Yezo na la adiri ka Nazarɛtɛ. Lo ndoma ndo nyɔ la. Ta lo Maria abata ndo lo ni ko kwɛ zu bo ka bɛ lo. 52Yezo ndomai ndo ndoni kɔi na ndara. Ko bɛ Nzapa na bɛ azi ndode ndo na lo tɛ lo.

Currently Selected:

Luka 2: NGB87

Highlight

Copy