Matie 10

Ili awa pangɔ kwa tɛ Yezo sui kɔi ndoni sɛ

(Mar. 3.13-19; Luk. 6.12-16)

1Yezo aili ava lo sui kɔi ndoni sɛ, ahɛ̃ la nguru ya, ala toma asiɔ tɔrɔ na ya tɛrɛ azi, ala sara nga ngã zu na tɛrɛ azi. 2Wa ĩ ba ili awa pangɔ kwa ni sui kɔi ndoni sɛ lo mɛ: ti kɔzoni, Simɔ (mɛ andoili lo ya Petro), ana nyita lo Andre, na Zaki ana nyita lo Yoanɛ mɛ aya Zebedeo, 3na Filipo, na Bartelemi, na Toma, na Matie mɛ wa sɔrɔngɔ lapo, na Zaki nyi Alfe, na Tadeo, 4na Simɔ mɛ wa gingɔ lipandasi, nga na Yudasi Iskariɔtɛ mɛ ndo aka Yezo hɛ̃ awa kɛ̃ngɔ Yezo.

Yezo ato ava lo sui kɔi ndoni sɛ na kwa

(Mar. 6.7-13; Luk. 9.1-6)

5Uzu ti Yezo tongɔ ava lo ni ko sui kɔi ndoni sɛ ko, lo hɛ̃ la nyɔ ya: “Azi mɛ ta Ayuda ma ko, ta ĩ gwe ka sese tɛ la ma, ta ĩ si nga ka kɔdɔrɔ mɛ ka sese ti Samaria ma. 6Kanda ĩ gwe ka tɛ azi ti Izrayɛlɛ mɛ adu nga ma angasã ngbaga mɛ agere. 7Ka ta lege ko, í pa tɛnɛ tɛ Nzapa hɛ̃ azi ya, Nzapa adoli so lɛngɔ gbia na ndo la. 8Ĩ sara awa ngã, ĩ so azi mɛ akpili, ĩ sara ndiba tɛrɛ azi, í toma asiɔ tɔrɔ na ya tɛrɛ azi. Nzapa ahɛ̃ ĩ ye gɛgɛrɛ, ko ĩ hɛ̃ nga ye hɛ̃ azi gɛgɛrɛ. 9Na ɔngɔ tɛ ĩ ko, ta ĩ bi faranga, na wɔrɔ, nga na nwa na ya bozo tɛ ĩ, ĩ ɔ na ni ma. 10Ta ĩ mu bozo ti fɔnɔ ma. Ĩ yu bo ndozu bɔngɔ kɔi, ta ĩ mu nga mbanga ndozu bɔngɔ mɛ ndɛ̃ ma. Ta ĩ mu pɔrɔ na ngómbé ma, ta sanga ma, ale wa kwa alua tɛ na lo ti kwa tɛ lo.

11“Kɔdɔrɔ kwɛ ko la ĩ si da ko, ĩ gi zo mɛ aye yambangɔ ĩ, ko ĩ ngbã so tɛ lo, ngbĩi nga ka ĩ lo so ndo ko ĩ ɔ. 12Ngoi mɛ ĩ li ya da tɛ azi ko, í pa hɛ̃ la ya: ‘Bɛ ĩ adu bɛ pii ma ke!’ 13Se azi ti ya da ni ayamba ĩ ko, bɛ la adu pii na lo ti balangɔ mɛ ĩ bala na la! Wa se ta ala yamba ĩ ma ko, ta ĩ ye ya, bɛ pii ni ati na la ma. 14Se azi ti ya da ni, bere azi ti ya kɔdɔrɔ ni akɛ̃ yambangɔ ĩ, bere ala kɛ̃ mangɔ tɛnɛ tɛ ĩ ko, ĩ lo so ndo ko ĩ gwe, ko ĩ goro sese ti pɔrɔ tɛ ĩ so tisangɔ la ya, siɔ ye tɛ la angbã na li la nvɛni. 15Mbi pa hɛ̃ ĩ ti bɛta tɛnɛ ya, na lá ti fangɔ ngbanga gbanda ko, azi ti kɔdɔrɔ ni ko alua gbanda etumbu mɛ aɔ etumbu tɛ azi ti kɔdɔrɔ mɛ ili ni la Sɔdɔmɛ nga na ti Gɔmɔrɔ.”

Apɛnɔ inɛ awa pangɔ kwa tɛ Yezo na hũngɔ

(Mar. 13.9-13; Luk. 21.12-17)

16Yezo apa ya: “Ĩ ma la! Mbi to ĩ nga ma angasã ngbaga ka popo tɛ azɛ̃. Ale ĩ du na kpengba lɛ nga ma angbɔ, ale ĩ du nga dedeni nga ma ambipa. 17Ĩ bata li ĩ nzɔ̃ni, na lo mɛ ya, azi na hɛ̃ngɔ nyɔ ya, agbɔ̃nɔ ĩ, agwe na ĩ ka tɛ awa fangɔ ngbanga. Azi na sɔ̃ngɔ ĩ na fimbo ka ya da sambela tɛ Ayuda. 18Na lo tɛ mbi ko, anɔ na ĩ gbanda ka gbɛlɛ akota azi, nga ka gbɛlɛ agbia, ko adu ngoi mɛ gbanda ĩ du atemwɛ ti pangɔ tɛnɛ tɛ mbi hɛ̃ azi la. 19Ngoi mɛ gbanda azi agbɔ̃nɔ ĩ, anɔ na ĩ ka gbɛlɛ awa fangɔ ngbanga ko, ta bɛ ĩ angbã ngbũ na lo ti se kɔdɛ mɛ ĩ na bɛrɛngɔ na nyɔ ĩ, bere na se mɛ ĩ na tɛnɛngɔ na tɛnɛ ma. Kanda na ngoi ni ko, í tɛnɛ bo tɛnɛ mɛ Nzapa na tongɔ ka bɛ ĩ. 20Ta sanga ma, ta ĩ nvɛni la na tɛnɛngɔ tɛnɛ ma, adu Tɔrɔ Santo tɛ To ĩ la na tɛnɛngɔ tɛnɛ na se lɛ ĩ.

21“Ambanga azi na kangɔ ayata la nvɛni ya, aho la. Ato ayangambi na lingɔ aya la nga so, ayangambi na sabangɔ tɛrɛ awa dúngɔ la, ala nga na kangɔ awa dúngɔ la ya, aho la. 22Azi zu na kɛ̃ngɔ ĩ na lo tɛ mbi. Kanda zo ko la agbe bɛ lo na ya apɛnɔ mɛ azi na hɛ̃ngɔ lo, ngbĩi asi ka nda ni gbɔ ko, tɔ̃rɔ tɛrɛ lo na songɔ. 23Ngoi mɛ gbanda ahɛ̃ ĩ pɛnɔ na ya kɔdɔrɔ kɔi ko, ĩ kpɛ í gwe kɔdɔrɔ mɛ ndɛ̃. Mbi pa hɛ̃ ĩ ti bɛta tɛnɛ ya, uzu gbanda ya mbi Nyi Zo mbi diri mbi ga ge lɛ sese ko, ta ĩ onzi gbanda fɔnɔngɔ so pangɔ tɛnɛ tɛ mbi na ya kɔdɔrɔ ti Izrayɛlɛ zu ma.

24“Ta wa mandangɔ ye ndoɔ wa hangɔ lo na ye ma, ta mbɛ ndoɔ nga to gbia lo ma. 25Adu nzɔ̃ni ya, wa mandangɔ ye ati nga ma wa hangɔ lo na ye. Adu nga nzɔ̃ni ya, wa kwa ati nga ma to gbia lo. Singa na gbia ti nda se wa mɛ aili lo ya Satana, o singa na azi ti nda se wa tɛ lo ma Tɛ azi ti nda se wa tɛ lo ko, ili mɛ na hɛ̃ngɔ la na dungɔ siɔni buai nvɛni!”

Bo Nzapa kɔi la e lengbi ti kpɛngɔ lo

(Luk. 12.2-7)

26Yezo apa ya: “Ta mbɛtɔ tɛ azi agbɔ̃ ĩ ma. Aye zu mɛ azi ndohɔndɛ ko, asi gbanda yango. Alo zu mɛ na gbɛ mbingo ko, azi ahĩnga gbanda ni. 27Tɛnɛ mɛ mbi ndopa hɛ̃ ĩ na gbɛ mbingo ko, ĩ diri ĩ pa ni hɛ̃ azi yango. Tɛnɛ mɛ atɛnɛ hɛ̃ ĩ na papata ko, ĩ lo ka bɛ kɔdɔrɔ ĩ dɛrɛ na kɔngɔ. 28Azi ko la ndoho ngbonga tɛrɛ zo, ko ta ala lengbi ti hongɔ tɔrɔ tɛrɛ zo ma ko, ta ĩ kpɛ mbɛtɔ tɛ la ma. Kanda ĩ kpɛ mbɛtɔ tɛ Nzapa mɛ alengbi ti hongɔ zo, alengbi nga ti hongɔ tɔrɔ tɛrɛ lo, sangɔ ni ka lifɛlo. 29Andomu pata kɔi, avɔ̃ na aya hũ sɛ, wa se ta Nzapa aye ma ko, ta nyi hũ kɔi alengbi ti longɔ ka ndozu, tingɔ tise ma. 30Ko abɛ nga kwa li ĩ ko, Nzapa adikɔ le ni kɔi kɔi. 31Wa ta ĩ du na mbɛtɔ ma, ĩ du ngbondoni ĩ ɔ aya hũ!”

Yengɔ Io tɛ Yezo na gbɛlɛ azi

(Luk. 12.8-9)

32Yezo apa ya: “Zo zu ko gbanda apa na gbɛlɛ azi ya, ni zo tɛ mbi ko, mbi pa nga gbanda na gbɛlɛ To mbi mɛ ka yayu ya, zo ni ko zo tɛ mbi. 33Kanda zo ko gbanda abɛrɛ na gbɛlɛ azi ya, ta ni hĩnga mbi ma ko, mbi bere nga gbanda na gbɛlɛ To mbi mɛ ka yayu ya, ta mbi hĩnga zo ni ko ma.”

Yezo aga so kangbingɔ popo tɛ azi

(Luk. 12.51-53; 14.26-27)

34Yezo apa ya: “Ta ĩ da bɛ ĩ ya, mbi ga ge lɛ sese olo ya, mbi tongbi songo na popo tɛ azi ma, kanda mbi ga so tongbingɔ ĩ ya, ĩ tiri to. 35Mbi ga so tongbingɔ nyi kɔli na to lo, nyi wali na ta lo, ya kɔli na ta kɔli. 36Asongo nvɛni na kɛ̃ngbingɔ.

37“Zo ko la aye to lo, bere ta lo aɔ mbi ko, ta lo lengbi ti dungɔ zo tɛ mbi ma. Zo ko la aye nyi lo ti kɔli, bere ti wali aɔ mbi ko, ta lo lengbi ti dungɔ zo tɛ mbi ma. 38Ale zo zu ayɔ krusi tɛ lo so fangɔ ya, ni ye hũngɔ pɛnɔ, ko lo ga nga ya, e na lo e ɔ ndoni kɔi. Ta so ma ko, ta zo ni ko alengbi nga ti dungɔ zo tɛ mbi ma. 39Zo ko la na yengɔ ya, ni bata du tɛ ni nvɛni ko, tɔrɔ tɛrɛ lo na kpingɔ. Wa zo ko la ndoka tɛrɛ lo na lo tɛ mbi ko, tɔrɔ tɛrɛ lo na songɔ.”

Mbana gɛrɛ mɛ Yezo na hɛngɔ hɛ awa lingɔ ava lo nzɔ̃ni

(Mar. 9.41)

40Yezo apa ya: “Zo ko la ayamba ĩ ko, afa ya, lo yamba nga mbi la. Zo ko la ayamba mbi ko, afa ya, lo yamba nga Zo mɛ ato mbi la. 41Zo ko la ayamba wa pangɔ nyɔ Nzapa, na lo mɛ ya, lo wa pangɔ nyɔ Nzapa ko, zo ni ko na luangɔ nga mbana gɛrɛ mɛ Nzapa na hɛ̃ngɔ hɛ̃ wa pangɔ nyɔ lo. Zo ko la ayamba bɛta zo, na lo mɛ ya, lo bɛta zo ko, zo mɛ ayamba lo na luangɔ nga mbana gɛrɛ mɛ Nzapa na hɛ̃ngɔ hɛ̃ bɛta zo. 42Mbi pa hɛ̃ ĩ ti bɛta tɛnɛ ya, zo ko la ahɛ̃ gɛgɛrɛ dede ngu hɛ̃ mbanga mbumbusɛ zo kɔi na popo tɛ ava mbi, na lo mɛ ya mbumbusɛ zo ni ko adu va mbi ko, Nzapa na hɛ̃ngɔ zo ni ke mbana gɛrɛ lo.”

Currently Selected:

Matie 10: NGB87

Highlight

Copy