Matie 9

Yezo asara wa ngbengule

(Mar. 2.1-12; Luk. 5.17-26)

1Yezo ĩ ko ya ngɔ ko, lo fa ngu, lo diri lo gwe ka kɔdɔrɔ tɛ lo. 2Azi ayɔ wa ngbengule kɔi na ndo tange, aga na lo hɛ̃ Yezo. Yezo ĩ hũ ya, azi ko aye lo tɛ ni ko, lo pa hɛ̃ wa ngbengule ko ya: “Nyi mbi, kpengba na bɛ mɔ! Mbi ka lɛ mbi ndo siɔ ye tɛ mɔ!” 3La ambanga awa hangɔ ndia tɛ Nzapa atɛnɛ ka ya bɛ la ya: “Zo olo ndoguru Nzapa!” 4Yezo ĩ hĩnga dangɔ bɛ tɛ la ko, lo hũnda la ya: “Nda mɛ ĩ ndodu na siɔ dangɔ bɛ so nɛ? 5Na popo ti tɛnɛ olo sɛ: ‘Mbi ka lɛ mbi ndo asiɔ ye tɛ mɔ,’ bere: ‘Lo ndozu, mɔ dɔ nɔ,’ tɛnɛ mɛ woni nɛ? 6Kanda mbi ye ya ĩ hĩnga ya, mbi Nyi Zo mbi na nguru ti kangɔ lɛ mbi ndo asiɔ ye tɛ azi ge lɛ sese.” La lo pa hɛ̃ wa ngbengule ko ya: “Lo ndozu, mɔ̃ mu tange tɛ mɔ, mɔ diri ka ndo tɛ mɔ!”

7Kɔli ko alo, agwe ka tɛ lo. 8Azi butu butu ĩ hũ so ko, mbɛtɔ agbɔ̃ la sĩ, ko ala gonda Nzapa na lo gi tɛrɛ nguru mɛ lo hɛ̃ azi.

Yezo aili Matie

(Mar. 2.13-17; Luk. 5.27-32)

9Yezo alo so ndo ko agwe. Ngoi mɛ lo so ndogwe ko, lo hũ kɔli kɔi mɛ ili lo la Matie, adu so tɛrɛ mɛsa ti futangɔ na lapo. La Yezo apa hɛ̃ lo ya: “Ga e ɔ ndoni kɔi.” Matie ĩ ma so ko, alo ana Yezo aɔ ndoni kɔi.

10Ngoi mɛ Yezo na ava lo so ndotɛ ye ka ya da tɛ Matie ko, awa sɔrɔngɔ lapo sĩni nga na awa lingɔ siɔ ye aga, ana lo adunga, so ndotɛ ye. 11Afarizeo ĩ hũ so ko, ala hũnda ava Yezo ya: “Nda mɛ wa hangɔ ĩ na lo, na awa sɔrɔngɔ lapo, nga na awa lingɔ siɔ ye ndotɛ ye ndoni kɔi nɛ?” 12Yezo ĩ ma la ĩ tɛnɛ so ko, agbinya hɛ̃ la ya: “Azi ko gbɛ tɛrɛ la nzɔ̃ni ko, ta ala ndodu na gwɛ̃ tɛ mɔnganga ma, bo awa nga la ndodu na gwɛ̃ tɛ mɔnganga. 13Wa ĩ nɔ t gi nda tɛnɛ ko la Buku tɛ Nzapa asu hĩ! Tɛnɛ ni lo mɛ: ‘Mbi Nzapa, mbi ye ya zo ama vundu tɛ afɔ̃ lo. Ta mbi ye ya, zo alu mbi na sa ma.’ ” Yezo apa ya: “Ta mbi ga ge so ilingɔ anzɔ̃ azi ma, kanda mbi ga so ilingɔ awa lingɔ siɔ ye.”

Yezo aha azi na alo mɛ ndɛ

(Mar. 2.18-22; Luk. 5.33-39)

14La ava Yoanɛ mɛ wa hɛ̃ngɔ batisimɔ ai tɛrɛ la ka tɔ̃nda Yezo, ahũnda lo ya: “E na Afarizeo e ndokɛ̃ tɛngɔ ye so vɔrɔngɔ Nzapa, ko nda mɛ ta ava mɔ ndokɛ̃ nga tɛngɔ ye bɛ gbɔ na lo ni ma nɛ?” 15La Yezo agbinya hɛ̃ la ya: “Ĩ da bɛ ĩ ya, azi ko la ĩ ili la ya, ala ga atɛ yenga ti mungbingɔ tɛ kɔli na wali ko, vundu alengbi ti gbɔ̃ngɔ la na ngoi ko la kɔ wali adɛ so popo tɛ la? Ipɔ, ta seni la ma! Kanda lá kɔi gbanda ko, azi ahã gbanda kɔ wali so popo tɛ la, aɔ na ni. Ko na lá ni ko gbanda la ala kɛ̃ tɛngɔ ye!”

16Yezo ato nga matɔ hɛ̃ la ya: “Ta zo ndomu fana nyɔ bɔngɔ, abo na mbusu bɔngɔ ma. Se lo li so ko, fana bɔngɔ ni asuru nyɔ mbusu bɔngɔ, ko lɛ kã ni ati kotani. 17Ta zo ndomu fana kana asa na ya ngbina pɔrɔ sa mɛ alɛkɛ nga ma mbenda ma. Se lo li so ko, kana asa tise, ko mbenda ni amumana. Kanda andosa fana kana na ya fana mbenda. Se zo ali so ko, kana na mbenda zu angbã nzɔ̃ni.”

Yezo asara nyi wali kɔi nga na wali mɛ na nga ti mɛnɛ

(Mar. 5.21-43; Luk. 8.40-56)

18Ngoi mɛ Yezo so ndopa tɛnɛ ko hɛ̃ la ko, mbanga gbia tɛ Ayuda aga akuku so gbɛlɛ Yezo, apa hɛ̃ lo ya: “Nyi mbi ti wali akpi bo lo mɛ. Ga mɔ̃ kpã ti mɔ ndo lo, wa lo so.” 19La Yezo ana ava lo, nga na gbia tɛ Ayuda ko, alonga agwe ndoni kɔi.

20-21Mbanga wali kɔi ndo na nga ti mɛnɛ, ko mɛnɛ ni ndosa ndo lo. Lo la ndo na nga ti mɛnɛ ni so tɛrɛ lo buru sui kɔi ndoni sɛ. Lo ĩ hũ Yezo ko, lo tɛnɛ ka ya bɛ lo ya: “Se mbi bɔrɔ bɛ bɔngɔ tɛ lo ko, tɛrɛ mbi ahã.” La lo ga ti pɛko Yezo, lo i tɛrɛ lo ka gunda lo, lo bɔrɔ nyɔ bɔngɔ tɛ lo. 22Yezo ĩ sana tɛrɛ lo ko, ahũ wali ko, apa hɛ̃ lo ya: “Zo wali, kpengba na bɛ mɔ, mɔ ye lo tɛ mbi la mɔ so.” Bo na ngoi ni ko nvɛni la tɛrɛ wali ko ahã wee!

23Yezo ĩ nɔ ĩ si ka da tɛ gbia ni ko, ahũ awa dɛngɔ miziki alɛkɛ tɛrɛ la so nɔngɔ ka ndo sɛndɛ, lo hũ nga azi so ndodɛrɛ kɔngɔ, 24la lo pa hɛ̃ la ya: “Ĩ si ka gegi, ta sanga ma, ta nyi wali olo akpi ma, lo la langɔ.” Ala ĩ ma so ko, ala sa na ngia gwa, ae Yezo. 25Ngoi mɛ ala ĩ si wɛ ko, Yezo ali ka ya da langɔ, agbɔ̃ ti nyi wali, la nyi wali alo. 26Ko pa ni afɔnɔ na lɛ sese ko zu.

Yezo asara lɛ awa ziba sɛ

27Yezo alo so ndo ko, aɔ. Ko ngoi mɛ lo so ndoɔ na mbanga ndo ko, awa ziba sɛ agwe pɛko lo, so ndodɛrɛ kɔngɔ ya: “Tara Davidi, ma vundu tɛ e!” 28Yezo ĩ nɔ ĩ li ka ya da ko, awa ziba ai tɛrɛ la ka tɔ̃nda lo, la lo hũnda la ya: “Ĩ da bɛ ĩ ya, mbi lengbi ti sarangɔ lɛ ĩ?” Ala gbinya hɛ̃ lo ya: “Ĩi ma, Gbia.” 29La Yezo abɔrɔ lɛ la, apa hɛ̃ la ya: “Oko la ĩ ye lo tɛ mbi ko, ĩ hũ bɛ ndo ma ke!” 30Lo ĩ tɛnɛ so ko, ala hũ ndo. Ko Yezo akɛ̃ hɛ̃ la kpengbani ya: “Ĩ ma mbi kpa! Ale ta zo kɔi ahĩnga lo olo ma.” 31Ala ĩ gwe ko, ala pa lo tɛ Yezo ka lɛ sese ni ko zu.

Yezo asara kɔli mɛ wa buburu

32Ngoi mɛ awa ziba so ndogwe ko, azi amu kɔli kɔi aga na lo ka tɛ Yezo. Kɔli ni ko wa buburu, na lo mɛ ya, lo ndo na siɔ tɔrɔ na ya tɛrɛ lo. 33Yezo ĩ toma siɔ tɔrɔ ni na ya tɛrɛ lo wɛ ko, wa buburu ko ato nda tɛnɛngɔ tɛnɛ. Azi butu butu abema sĩ, ala pa ya: “Ta e dɛ e hũ gi tɛrɛ ye nga so ge sese ti Izrayɛlɛ bɛ gbɔ ma!” 34Ko Afarizeo apa ya: “Gbia tɛ asiɔ tɔrɔ la ndohɛ̃ lo nguru ti tomangɔ na asiɔ tɔrɔ!”

Yezo ama vundu tɛ azi butu butu

35Yezo afɔnɔ na ndo akota kɔdɔrɔ zu, nga na ndo akɛtɛ akɔdɔrɔ zu. Lo ha azi na lo tɛ Nzapa ka ya da sambela. Lo pa Nzɔ̃ Pa ti lo Lɛngɔ Gbia tɛ Nzapa hɛ̃ la, lo sara nga awa ngã zu, na awa pɛnɔ zu. 36Lo ĩ hũ azi butu butu ko, vundu tɛ la agbɔ̃ lo sĩ, ta sanga ma, ala nzɛ̃ ndo, ko mi agbɔ̃ ndo nga la, nga ma se tɛ angasã ngbaga mɛ ta wa batangɔ la da ma. 37La lo pa hɛ̃ ava lo ya: “Tɛ ma wo ma ale ka lɛ yaka, kanda awa kwa ti kɔngɔ tɛ ni adu yakere. 38Wa ĩ sambela hɛ̃ nvɛ̃ yaka ni ya, lo to awa kwa gba, ko ala kɔ tɛ tɛ lo mɛ ka yaka ni.”

Currently Selected:

Matie 9: NGB87

Highlight

Copy