Matie 8
8
Yezo asara wa ndiba
(Mar. 1.40-45; Luk. 5.12-16)
1Ngoi mɛ Yezo ĩ lo ka ndo hɔtɔ ĩ zu wɛ ko, azi butu butu anɔ pɛko lo. 2Ko wa ndiba kɔi anɔ ka tɔ̃nda lo, akuku gbɛlɛ lo, apa hɛ̃ lo ya: “Wa hangɔ lo tɛ Nzapa, rnɔ na nguru ti sarangɔ mbi, wa se bɛ mɔ aye ko, mɔ sara mbi.” 3La Yezo aye ti lo, abɔrɔ tɛrɛ wa ndiba ko, apa hɛ̃ lo ya: “Mbi ye, ndiba tɛ mɔ awɛ!” Bo na ngoi ni ko, ndiba tɛ kɔli ko awɛ, tɛrɛ lo ati nzɔ̃ni. 4La Yezo ahɛ̃ nyɔ hɛ̃ lo ya: “Ta mɔ pa lo ni hɛ̃ zo ma. Wa nɔ ka tɛ wa lungɔ Nzapa na ye, mɔ fa lo na se mɛ tɛrɛ mɔ ati na ni. So pɛni, mɔ lu Nzapa na ye mɛ ndo Mɔizɛ alu ndia ni, so fangɔ na azi zu ya, ndiba tɛ mɔ awɛ.”
Yezo asara wa kwa tɛ mbanga gbia tɛ aturugu ti Roma
(Luk. 7.1-10)
5Ngoi mɛ Yezo so ndoli ka ya kɔdɔrɔ mɛ ili ni la Kapɛrnaumɛ ko, mbanga gbia tɛ aturugu ti Roma anɔ ka tɛ lo, adema tɛrɛ lo hɛ̃ lo ya: 6“Wa hangɔ lo tɛ Nzapa, wa kwa tɛ mbi ati wa ngbengule, lo se tise ka ya da, ko lo ndohũ pɛnɔ sĩ nvɛni.” 7La Yezo apa hɛ̃ lo ya: “Mbi na nɔngɔ sarangɔ lo.” 8Ko gbia tɛ aturugu agbinya hɛ̃ lo ya: “Wa hangɔ lo tɛ Nzapa, ta mbi lengbi ti mɔ lingɔ ka ya da tɛ mbi ma. Tɛnɛ bo tɛnɛ kɔi, wa tɛrɛ wa kwa tɛ mbi ahã. 9Ta sanga ma, agbia mɛ aɔ mbi da, kanda aturugu mɛ mbi ɔ nga la da. Wa se mbi pa hɛ̃ kɔi ya: ‘Nɔ’ ko, lo nɔ, bere se mbi pa hɛ̃ mbanga ya: ‘Ga’ ko, lo ga. Ko se mbi pa nga hɛ̃ wa kwa tɛ mbi ya: ‘Li ye olo’ ko, lo li.” 10Yezo ĩ ma so ko, abema, apa hɛ̃ azi mɛ lo na la ndoɔ ndoni kɔi ya: “Mbi pa hɛ̃ ĩ ti bɛta tɛnɛ ya, ta mbi dɛ mbi hũ zo aye lo tɛ mbi, nga ma se tɛ kɔli olo bɛ gbɔ ma. Bɛ nga ka sese ti Izrayɛlɛ ko, ta mbi hũ zo nga ma lo ma. 11Ko mbi pa hɛ̃ ĩ ya, azi gba alo gbanda ka tɔ, alo ka do, ko ala na Abrahama, na Izaki nga na Yakobo atɛ gbanda ye ndoni kɔi ka Kɔdɔrɔ Gbia tɛ Nzapa. 12Kanda azi mɛ ndo ale Kɔdɔrɔ Gbia ni adu tɛ la ko, aangelo tɛ Nzapa asa gbanda la gegi ka ya mbingo. Kai ko, ala to gbanda to, ala dema nga gbanda tɛrɛ la.” 13So pɛni, Yezo apa hɛ̃ gbia tɛ aturugu ya: “Nga ma la mɔ ye lo tɛ mbi ko, mbi ye sarangɔ wa kwa tɛ mɔ, wa diri ka tɛ mɔ.” Bo na ngoi ni ko la tɛrɛ wa kwa tɛ turugu ko ahã wee!
Yezo asara awa ngã ma wo ma
(Mar. 1.29-34; Luk. 4.38-41)
14Yezo ĩ nɔ ka ya da tɛ Petro ko, lo tã wogara Petro so ndo tange se, na lo mɛ ya, tɛrɛ lo ndogbi. 15Yezo ĩ bɔrɔ ti lo ko, tɛrɛ lo ade lelele. La zo wali ko alo vu, ahɛ̃ tɛ hɛ̃ Yezo.
16Ngoi mɛ ndɔ ĩ de ko, amu azi sĩni mɛ na asiɔ tɔrɔ ya tɛrɛ la, aga na la ka tɛ Yezo. La Yezo atoma asiɔ tɔrɔ mɛ na ya tɛrɛ la, na tɛnɛ ti nyɔ lo, asara nga awa ngã hororo. 17Adu ndo so ya, tɛnɛ mɛ ndo Ezai wa pangɔ nyɔ Nzapa atɛnɛ ati na seni. Tɛnɛ ni lo mɛ: “Lo hã ngã zu mɛ na ya tɛrɛ e lo zi.”
Azi mɛ asepara ɔngɔ ndoni kɔi na Yezo
(Luk. 9.57-62)
18Yezo ĩ hũ azi butu butu ĩ ka lo kɛrɛrɛ ko, lo hɛ̃ nyɔ hɛ̃ ava lo ya, ani gwe ka mbage kpo. 19Ko wa hangɔ ndia kɔi anɔ ka tɛ Yezo, apa hɛ̃ lo ya: “Wa hangɔ lo tɛ Nzapa, ndo zu mɛ mɔ na gwengɔ da ko, mbi na mɔ e nɔ.” 20Yezo agbinya hɛ̃ lo ya: “Aganvana na do tɛ la da, ahũ nga na da tɛ la da. Kanda tɛ mbi Nyi Zo ko, ta mbi na ndo ya, mbi se da, mbi wɔ tɛrɛ mbi ma.” 21Mbanga kɔli kɔi mɛ ndo lo nga va Yezo apa hɛ̃ lo ya: “Wa hangɔ lo tɛ Nzapa, mbi ye ɔngɔ ndoni kɔi na mɔ, wa zia mbi nɔ mbi hɔ kinda tɛ to mbi hĩ.” 22Yezo agbinya hɛ̃ lo ya: “Zia awa kwáni ahɔ kinda tɛ la, ko mɔ̃ ga, e na mɔ e ɔ ndoni kɔi.”
Yezo agbanzi kpengba yá ka lɛ ngu
(Mar. 4.35-41; Luk. 8.22-25)
23Yezo ĩ ko ya ngɔ ko, lo na ava lo aɔ kɔi. 24Bo ngoi kɔi ko, kota yá ato nda yangɔ so lɛ kpo vuku vuku, mɔpo asa ya ngɔ pua pua, asĩ ya ngɔ lɛkɛ lɛkɛ. Ko Yezo so ndola langɔ. 25La ava lo ai tɛrɛ la ka tɔ̃nda lo, azingɔ lo, apa hɛ̃ lo ya: “Gbia, e na kpilingɔ, wa so e!” 26Yezo agbinya hɛ̃ la ya: “Nda mɛ mbɛtɔ agbɔ̃ ĩ so nɛ? Ĩ du azi mɛ ta ĩ ye lo tɛ mbi kpa ma!” La lo lo, lo gbo ndo yá, lo gbo nga ndo ngu, la lɛ ngu ade ngĩi. 27Ava lo zu abema sĩ, ko ala pa ya: “Kɔli olo lo na? Abɛ nga yá na ngu ama nyɔ lo oo!”
Yezo atoma asiɔ tɔrɔ na ya tɛrɛ akɔli sɛ
(Mar. 5.1-20; Luk. 8.26-39)
28Yezo na ava lo ĩ si ka mbage nyɔ kpo ti Galilea, ka sese ti Gadara ko, akɔli sɛ alo ka ndo sɛndɛ, aga atengbi na lo. Ala ndo na asiɔ tɔrɔ na ya tɛrɛ la, ko ala ndotɔmbɔkɔ ndo sĩ. Na lo ni ko, ta zo kɔi ndotara ndo ɔngɔ ti lege mɛ ala da ma. 29Ala ĩ hũ Yezo ko, ala to nda dɛrɛngɔ kɔngɔ ya: “Nyi Nzapa, ye mɛ mɔ ye lingɔ na e nɛ? Mɔ ga ge ya, mɔ gia e uzu, wa ngoi alengbi?” 30Akɔsɔ ma wo ma ndo so ndo ko yɔngɔrɔni na la, so ndotɛ ndo. 31La asiɔ tɔrɔ ko na ya tɛrɛ akɔli ko, avɔrɔ tɛrɛ la hɛ̃ Yezo ya: “Se mɔ ye tomangɔ e na ya tɛrɛ akɔli olo ko, to e, ko e nɔ, e li ya tɛrɛ akɔsɔ ko kai.” 32Yezo apa hɛ̃ la ya: “Wa ĩ nɔ.” La asiɔ tɔrɔ ko alo ka ya tɛrɛ akɔli ko sɛ asi, anɔ ali ya tɛrɛ akɔsɔ ni ko. Bo na ngoi ni ko, akɔsɔ ko zu alo ka bɛ li hɔtɔ, akpɛlɛ, agwe asa ka ya ngu, akpili.
33Awa batangɔ akɔsɔ ĩ hũ so ko, ala kpɛlɛ agwe ka kɔdɔrɔ, apa lo ni zu hɛ̃ azi, ala pa nga hɛ̃ la ye mɛ ali akɔli ko sɛ mɛ fɛrɛ na asiɔ tɔrɔ ya tɛrɛ la. 34La awa kɔdɔrɔ zu alo so ya kɔdɔrɔ tɛ la asi, anɔ so ngorongɔ Yezo. Ala ĩ hũ lo ko, ala lamana tɛrɛ la hɛ̃ lo ya, lo lo so sese tɛ ani lo ɔ. La lo lo ndo ko, lo ɔ.
Currently Selected:
Matie 8: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
