EFETIKILO 23
23
1Sara wa kala lomuenyo ocita lakui avali kanyamo kanyamo epanduvali; ovo ovanyamo omuenyo wa Sara. 2Kuenje Sara wa fila vimbo lia Aramba, hailio Hevirone, vofeka ya Kanana. Avirahama weya oku lila Sara loku litetela. 3Avirahama yu wa votoka kuna a lilila ukuluwiya, wa popia la va Hiti, hati, 4Ame ndulungi, haime ndukombe pokati kene; nyihi aleva ovilangu pokati kovilangu viene, ñendemo wange nda fisa. 5Va Hiti va tambulula Avirahama vati, 6A cime cetu, tu yevelele ño. Ove vumbuale yinene pokati ketu. Eyambo liosi lia velapo kayambo etu omo o kenda wove wa fisa; lomue pokati ketu o ku limĩla eyambo liaye hu kendimo wove wa fisa. 7Avirahama wa votoka, wa petamẽla ku va Hiti, 8wa vangula lavo hati, Nda vu kasi lutima okuti ñenda wange nda fisa, njeveleli ño. Ka mingili ku Efirone, omõla a Soyara, 9okuti o nyiha eleva lia Makapela, lia tiama kokuaye; li kasi kulilo wusenge waye. A li ndandisile kovaso ene londando ya sunguluka ha li lingi ovilangu viange. 10Eye Efirone wa tumãla pamosi lomãla va Hiti, kuenje Efirone u Hiti wa tamulula Avirahama, okuti va Hiti la vosi va iñaila vombundi yimbo liaye va ci yeva, hati, 11Kotoko, a cime cange, njevelele ño. Usenge hu iha, leleva li kasimo, laliovo hu liha, hu wihila kovaso omãla vepata liange. Kendamo wove wa fisa. 12Avirahama yu wa petamẽla komanu vakuafeka, 13wa popia la Efirone lomanu vakuafeka va ci yeva hati, Omo muẽle, puãi ndinge ohenda, njevelele. Feta olombongo viusenge. Va vi tambule ño, oco ñendamo wange nda fisa. 14Efirone yu wa tambulula Avirahama hati, 15A cime cange njevelele ño. Usenge wovita vikuãla violosiekele viopalata u linga hẽ nye pokati kange love? Kenda ño wove wa fisa. 16Avirahama yu wa tava kondaka ya Efirone, kuenje Avirahama wa pesalela Efirone olombongo vina a tukuila ku va Hiti, Okuti ovita vikuãla violosiekele viopalata, evi va fũla fũla lavio.
17Oco usenge wa Efirone u kasi ko Makapela, kuna kutundilo wa Mamire okuti usenge, kuenda eleva lia kalamo, loviti viosi via kala vusenge wosi, cosi ca landisiwa 18ku Avirahama. Ca landisiwila kovaso a va Hiti, la vosi va iñaila kombundi yimbo liaye. 19Kovaso yovina viaco Avirahama wa kenda ukãi waye Sara veleva liovusenge wo ko Makapela kutundilo wa Mamire, halio Hevirone, vofeka ya Kanana. 20Usenge leleva lia kalamo, via landisiwa ku Avirahama la va Hiti, ha vi lingi ovilangu viaye.
Currently Selected:
EFETIKILO 23: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
