EFETIKILO 24
24
1Avirahama cilo wa kuka, wopopako koloneke. Yehova wa sumũlũisa Avirahama kovina viosi. 2Avirahama yu wa popia lukuenje waye una wa kala ukulu wonjo yaye, haeye wa kala lomoko kovina viaye viosi, hati, Kapa eka liove pemẽhi liocikalo cange, 3kuenje ku lisingisa la Yehova, Suku yokilu loposi, okuti ku noli ukãi womõlange pokati komãla vakãi va va Kanana, ava nda tunga lavo. 4Puãi wenda koluse luange, ku vangandiange, oko o ka vanjela ukãi womõlange Isake. 5Ukulu yu wa popia laye hati, Mbi ukãi ka nava oku ñuama toke kofeka yilo; nda oco ndinga nye? Omõlove niukila laye koluse luove oko wa tundile ale? 6Avirahama wa popia laye hati, Kotoko. Omõlange ka ka tiukile koluse oko nda tundile. 7Yehova Suku yokilu, u wa njupa konjo ya tate, lokofeka va nyitila, haeye wa popia lame kuenda wa lisila lame, hati, Ombuto yove ndi yavela ofeka yilo, eye o tuma omunga yaye kovaso ove, kuenje oko muẽle o ka sanga ukãi womõlange. 8Puãi nda ukãi ka tava oku ka kuama, ove wa yovoka kohuminyo yange eyi. Cinene okuti omõlange ku u tiula vali oko. 9Ukulu yu wa kapa eka liaye pemẽhi liocikalo ca cime caye Avirahama, kuenje wa likuminya ondaka yaco.
10Noke ukulu wambata ekui liolongamelo viocunda ca cime caye, kuenje wa enda; wa ambatavo ovisõsõso via lua via cime caye. Yu wa katuka, wa enda kimbo lia Nahore vo Mesopotamia. 11Wa kekamisa olongamelo konele yimbo kocisimo covava, kekumbi pana pa tunda tunda akãi ha va tapi ovava. 12Yu wa likutilila hati, A Yehova, a Suku ya cime cange Avirahama, nyihe ocitulu etaili. Linga ohenda cime cange Avirahama. 13Amilo, nãi kocisimo covava. Omãla vakãi vakuimbo va kasi loku iya oku tapa ovava. 14Ci kale okuti ufeko wosi minga siti, Ndo lowise ombia yove, nyueko, —leye o linga hati, Va nyueko ño, kuenda ndi nyuisavo olongamelo viove— ufeko waco ndu limbuka okuti eye muẽle ove wa nõla ha lingi ukãi wukuenje wove Isake. Kuenje ndimbuka ocili okuti wa linga cime cange ohenda.
15Osimbu ka mãlele handi oku likutilila oco Rebeka weya; eye omõla a Betule, omõla a Milika ukãi wa Nahore manja a Avirahama. Weya lombia yaye pocitãi. 16Ufeko waco wa posoka cimue oku u vanja, lulume ko wi. Wa lokila kocisimo, wa yukisa ombia yaye kuenje wa tiukila. 17Ukulu yu wo lupukila kuenje wa popia laye hati, Va nyuiseko otuvava kombia yove. 18Leye wa linga hati, Va nyueko ño, a cime cange. Yu wa yayulako ha petamisa ombia yaye peka liaye, kuenje wo nyuisako. 19Eci a mãla oku u nyuisako, wa linga hati, Ha tapelakovo olongamelo viove toke via tẽla oku nyua. 20Yu wa yayulako oku sukumuĩla ombia yaye kocinyuĩlo. Wa lupukila vali kocisimo oku tapa vali, kuenje wa tapela olongamelo viaye viosi. 21Ulume yu wo vanja suĩ, kuenje woha ño ha kũlihisa nda hẽ Yehova wa sumũlũisa ungende waye nda ndati.
22Eci olongamelo via tẽla oku nyua oco ukulu wa yelula onela yulu, opesu yayo ya soka omeyu yosiekele, lovinunga vivali viokovoko aye, opesu yavio ekui liolosiekele viulu, 23yu wa linga hati, Sapuileko, ove hẽ, wumõlelie? Vonjo ya so muli apa tu sikĩla ale? 24Eye wa popia laye hati, Ame ndimõla a Betuele, omõla a Milika, a cita la Nahore. 25Wa popiavo laye hati, Ndaño ovinene viotiliku kuenda owangu tu kuete via lua, kuenda ohondo yoku sikĩla. 26Ukulu yu wa petamisa utue, wa fendela Yehova, 27hati, Pandu pandu ku Yehova, Suku ya cime cange Avirahama, momo ka liwekeleko oku linga cime cange ohenda loku u tẽlisila olohuminyo viaye. Ame, Yehova wa songuila vonjila yokonjo ya manja a cime cange. 28Oco ufeko wa enda lokanyanyu konjo ya inaye ho sapuila olondaka evi. 29Eye Rebeka wa kala la mume waye, onduko yaye Lavane; leye Lavane wa yolokela kulume wa siala kocisimo. 30Eci a mõla onela lovinunga kovoko a mukãi waye, leci a yeva olondaka via Rebeka mukãi waye okuti ulume wa popia ndoco, oco wa enda kulume waco, kuenje wo mõla, yo o tãi lolongamelo kocisimo. 31Yu wa linga hati, Iñila, okuesumũluho lia Yehova. Nye o taĩyĩlĩli posamua? Nda ku pongiyila onjo yove, kuenda ocimanga colongamelo. 32Ukulu yu wa iñila vonjo. Eye Lavane wa pandulula olongamelo kuenje wa eca ovinene viotiliku lowangu kolongamelo, lovava oku sukula olomãi viaye lolomãi vialume va enda laye. 33Kuenje vo tumbikila okulia. Eye puãi wa linga hati, Si li osimbu sia sapuile ondaka yange. Lavane hati, Sapula ño.
34Oco ukulu wa linga hati, Ndukuenje wa Avirahama. 35Yehova wa sumuluisa enene cime cange, kuenje wo wamisa kunene; wa wiha oviunda violomeme, lolongombe, lopalata, lulu, lakuenje, lafeko, lolongamelo, lovimbulu. 36Sara, ukãi wa cime cange, wa cita la cime cange omõla ulume eci a kuka ale, kuenje omõlaco cime cange wo wiha cosi caye. 37Cime cange wa liñuminyisa hati, Ku noli ukãi womõlange komãla vakãi va va Kanana, ava nda tunga lavo, 38puãi wenda koluse luange, ku vangandiange, oko o ka vanjela ukãi womõlange. 39Ame nda popia la cime cange siti, Mbi ukãi ka tava oku ñuama? 40Eye puãi wa popia lame hati, Yehova, una nda sumbila, eye o tuma omunga yaye ha yendi love, haeye o sumuluisa ungende wove; love o nola ukãi womõlange pokati ka vangandiange. 41Oco o yovoka kohuminyo yange eteke o pitila kusitue wange. Nda ovo ka va tava oku weca kokuove, ove o yovoka kohuminyo yange. 42Kuenje etali eci ndeya kocisimo nda likutilila siti, A Yehova, a Suku ya cime cange Avirahama, nda wa tava oku sumũluisa ungende wange ñasi oku endela, 43tala, nãi pocisimo covava, oco ci kale okuti ufeko wosi iya oku tapa ovava, kuenje ame mopia laye siti, Va nyuiseko otuvava kombia yove, 44leye o ñumbulula hati, Va nyueko ño, lolongamelo viove ndi vi tapelakovo, —ufeko waco ndu limbuka okuti eye muẽle Yehova a nola ha lingi ukãi womõla a cime cange.
45Osimbu sia mãlele oku likutilila vutima, oco Rebeka yo, weya lombia yaye pocitãi, yu wa lokila kocisimo, wa tapa ovava. Ame nda popia laye siti, Va nyuiseko tumue otuvava. 46Yu wa yayulako, wopa ombia kocitãi, kuenje wa linga hati, Va nyueko, nyuisavo olongamelo viove. Nda nyua lolongamelo wa vi nyuisakovo. 47Ndo pula siti, Ove vumõlelie? Leye wa linga hati, Ndimõla a Betuele, omõla a Nahore, Milika a cita. Kuenje nda kapa ocingelengele kupolo waye, lovinunga kovoko aye. 48Oco nda petamako, nda fendela Yehova, nda sivaya Suku ya cime cange Avirahama, una wa ndekisa onjila yocili yoku sanga ku vangandi a cime cange ukãi womõlaye. 49Kaliye nda wa tavi oku linga cime cange ohenda yocili, sapuiliko; nda hacoko sapuilikovo; oco niamẽle kondio pamue kepĩli.
50Lavane la Betuele va tambulula vati, Ondaka ya tunda ku Yehova. Etu ka tu tẽla oku popia love ndaño cĩvi ndaño ciwa. 51Ota, Rebeka haiyu, kuende laye, a linge ukãi womõla a cime cove ndeci ca popiwa la Yehova.
52Eci ukuenje wa Avirahama a yeva olondaka viavo, oco wa petamẽla posi, wa fendela Yehova. 53Noke wa nyañula ovikete viopalata lovikete viulu kuenda uwalo, kuenje wa vi eca ku Rebeka. Mume waye la inaye wa va iha ovilombo viaco. 54Kuenje eye lalume va kala laye va lia, va nyua, va lala. Omele eci va pasuka wa linga hati, Ñatuli, oco niukile ku cime cange. 55Mume waco la inaco vati, Ufeko a kale letu oloneke vimue, ndaño ekui, oco a ende noke. 56Eye puãi wa popia lavo hati, Ko ka nateki. Yehova muẽle wa yelisa onjila yange. Ñatuli yapa oco ngende ku cime cange. 57Ovo vati, Tu kovonga ufeko ha tu yevi komẽla waye. 58Oco va kovonga Rebeka, vo pula vati, Wenda lulume u? Eye hati, Ngenda. 59Oco va tuma Rebeka mukãi wavo, lufeko waye, lukuenje wa Avirahama, lovalume vaye. 60Va sumuluisa Rebeka, va popia laye vati, Ove a mukãi wetu, ka linge onjali yolohulukãi violohuluwa. Ombuto yove yi kuate olombundi viovanyali vavo. 61Rebeka yu wa katuka lafeko vaye, va wila kolongamelo kuenje va kuama ukulu, okuti ukulu wa tambula Rebeka kuenje wa enda.
62Isake wa iluka ale ko Bere-lahai-roi, keunje weya oku tunga vofeka yoko Sul. 63Oñolosi yimue Isake wa enda kusenge oku ka likutilila. Poku petula ovaso aye, wa mõla olongamelo viovio, vi li loku iya. 64Rebeka layevo wa petula ovaso aye. Eci a mõla Isake wa loka kongamelo. 65Yu wa pula ukulu hati, Ulume o iyilila ndoto vusenge oku ñualehela letu helie? Ukulu wa linga hati, Eye cime cange. Kuenje Rebeka wa nyañula onanga yaye, wa lisikĩlĩla. 66Ukulu yu wa sapuila Isake ovina viosi a linga. 67Isake wa tuala Rebeka kombalaka, yu wa kuẽla kuenje Rebeka wa linga ukãi waye. Isake wo sola, kuenje wa lembiwa kokufa kua inaye.
Currently Selected:
EFETIKILO 24: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
