EFETIKILO 27
27
1Eteke limue eci Isake a kuka, lovaso aye a vuvala okuti ka lete vali, oco wa pañinya Esau onuñulu yaye, wa popia laye hati, Amolange! eye wo tambulula hati, Ame ulo. 2Isake wa linga hati, Tala, ame nda kuka; eteke liokufa kuange si li. 3Kaliye nyañula ovimãleho viove, ohombe yove yovisongo, lohonji yove, kuende vusenge, ka njevele ositu, 4nelekele ombelela yina sole, yi nena kokuange, ndie, oco hu sumũluise osimbu sia file.
5Rebeka yu wa yeva eci Isake a popia la Esau omõlaye. Oco eci Esau a enda vusenge oku yeva ositu loku yi nena, 6Rebeka wa popia la Yakoba omõlaye, hati, Ocili nda yeva so wa popia la Esau huvove hati, 7Ka njevele ositu, o nelekele ombelela, si li, si ku sumũluisila kovaso a Yehova osimbu sia file. 8Kaliye amõlange, tava kondaka mopia love. 9Kuende kocunda, ka njupileko otumãla tuolohombo tuvali tuwa, oco ndu tu telekele so ombelela a sole, 10hu tuala ku so ha li, oco a ku sumũluise osimbu ka file. 11Puãi Yakoba wa popia la inaye Rebeka hati, Esau hẽ, huvange ukualuvei, ame si kuete oluvei; 12mbi tate o mapata, kuenje ndinga ohembi kokuaye, hã si likokela esiñalo, esumũluho halioko. 13Inaye wa popia laye hati, Esiñalo liaco li mbete ño ame amõlange. Pokola ño kondaka yange, kuende, ka tu njupile. 14Yu wa enda, wa tu upa, wa tu nena ku inaye, kuenje inaye wa teleka ombelela yina isiaye a sole. 15Rebeka yu wa nyañula uwalo wa posoka we Esau nuñulu yaye, a kala lawo vonjo, wa walisa Yakoba. 16Yu wa kapa ovipa viotumãla tuolohombo kovaka aye, kuenda kosingo yaye, omo ka kua kaile oluvei. 17Oco wa eca komõlaye Yakoba ombelela yina a teleka, kuenda ombolo.
18Oco wa enda ku isiaye, wa linga hati, A tate! Eye hati, Ame ulo; ove elie, amõlange? 19Yakoba yu wa popia la isiaye hati, Ame Esau, nuñulu yove. Nda linga ndeci wa sapuila. Pasuka, tumãla vilu, liako kombelela yange, oco o sumũluise. 20Isake yu wa popia lomõlaye hati, Ndopo wa enda yapa, wa ka ipaile ale amõlange? Eye hati Momo Yehova Suku yove wa nyiha ocitulu. 21Isake wa popia la Yakoba hati, Enju kulo, hu papate, amõlange, nda hẽ ove vumõlange Esau ocili nda ndati. 22Yakoba yu wa kokela ku isiaye Isake, kuenje Isake wo papata hati, Ondaka oyo ondaka ya Yakoba, ovaka puãi ovaka a Esau. 23Oco ko limbukile ciwa momo ovaka aye a kala loluvei ndovaka a Esau huvaye, kuenje wo sumũluisa. 24Yu wa linga hati, Ove vumõlange Esau ocili ele? Eye hati, Ame muẽle. 25Yu wa linga hati, Yi nena kulo, ndie kombelela yomõlange, oco hu sumũluise. Oco wo yi nenela kuenje wa lia. Wo nenelavo ovinyu kuenje wa nyua. 26Oco isiaye, Isake, wa popia laye hati, Amõlange, amẽla kulo kokuange, sipule. 27Kuenje wo wama, wo sipula, yu wa yeva elemba liuwalo waye, wo sumũluisa hati,
Tala, elemba liomõlange
lia soka ndelemba liusenge Yehova a sumũluisa!
28Suku a ku ihe owume wokilu,
lelau liongongo,
lolomema via lova, lovinyu vi sosa.
29Apata a ku vumbe.
Olofeka vi petamela kokuove.
Linga ombiali kuvamanjove.
Omãla va nyoho va ku petamele.
Wosi o ku siñala a siñaliwe.
Wosi o ku sumũluisa a sumũluhe.
30Tuli Isake a mãla oku sumũluisa Yakoba, kuenje Yakoba haico a tunda ku isiaye Isake, oco huvaye Esau weya koku yeva. 31Layevo wa teleka ombelela, wa yi nena ku isiaye. Wa popia la isiaye hati, A tate, pasuka, o lie kombelela yomõlove, oco o sumũluise. 32Isiaye Isake wa popia laye hati. Ove elie? Eye hati, Ame ndimõlove, ndinuñulu yove, Esau. 33Isake yu wa luluma ca lua, hati, Oco hẽ, helie wa ka yevele ale ositu, yu wa yi nena kokuange, kuenje nda lia yosi; ndo sumũluisa ale osimbu kueyile? Ocili o sumũluha. 34Eci Esau a yeva olondaka via isiaye, wa liyula ondaka ya lua, haiyo ya linga cimue ohenda, yu wa popia la isiaye hati, Lamevo a tate, sumũluise. 35Eye wa linga hati, Manjove weyile lelimbi, yu wa kondela esumũluho liove. 36Eye hati, Hacoko hẽ vo lukila Yakoba? Wa niaña olonjanja vivali, wa nyeha unuñulu wange, cilo wa kondela esumũluho liange. Yu wa linga hati, Ame hẽ, kua sililepo esumũluho liange? 37Isake yu wa tambulula Esau hati, Ota, ndo lingisa cime cove, lavamanjaye vosi ndo va iha ndakuenje vaye, ndo wiha ociluli colomema lovinyu vi sosa. Oco hẽ, nẽla oku ku lingila vali nye, amõlange? 38Esau yu wa popia la Isiaye hati, Esumuluho limosi lika o kuete, a tate? A tate, lamevo sumũluise. Esau yu wa kaluka oku lila.
39Isiaye Isake wo tambulula hati,
Ocili, o tunga kupãla lelau liongongo.
O kala kupãla lowume wokilu.
40O litekola losipata yove, kuenje o vumba manjove.
Puãi eci cu ku kuma oco o lipua omi yaye kosingo yove.
41Esau yu wa suvuka Yakoba, wo suvukila esumũluho isiaye o sumũluisa lailo, kuenje Esau wa litana lutima hati, Oloneke vioku lila tate ndopo viya, oco Yakoba manjange ndu wipa. 42Puãi va sapuila Rebeka olondaka via nuñulu yaye Esau, yu wa kovonga Yakoba omõlaye umãlehe, wa popia laye hati, Tala, huvove Esau wa ku kusukila, kuenje o kasi oku sokiya oku ku ipa. 43Cilo, amõlange, tava kondaka yange. Katuka, tilila ku mume wange Lavane, ko Harane; 44kala laye oloneke vimue toke onyeño ya huvove ya tulumuha. 45Eci onyeño ya huvove yi liweka, okuti wa ivalako eci wo linga, oco hu tumila vali hu tundiko. Ndu peseli ndati, kavali kene, eteke liongongo?
46Rebeka yu wa popia la Isake hati, Omuenyo wange wa ñuma omo ñasi lakãi vaco va Hiti. Yakoba nda lahevo o kuela ukãi u Hiti okuti ukuafeka yilo ndava, omuenyo wange u sumũluha ndati?
Currently Selected:
EFETIKILO 27: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
