EFETIKILO 28
28
1Oco Isake wa kovonga Yakoba kuenje poku u sumũluisa wo handeleka hati, Ku ka kuẽle ukãi u Kanana. 2Katuka, kuende ketapi lia Arama, konjo ya Sekulu Betuele, oko o ka kuẽla ukãi komãla va nyohonu Lavane. 3Kuenje Suku Ukuonenewosi a ku sumũluise, a ku ihe ombuto, a ku luise hu lingi ohongele yapata; 4a ku muise ove esumũluho lia Avirahama, lombuto yove, hu lingi kapiñala kofeka yilo yulungi, eyi Suku a eca ku Avirahama. 5Oco Isake wa tuma Yakoba, yu wa enda ketapi lia Arama ku Lavane, omõla a Betuele, u Arama, mume wa Rebeka, ina ya Yakoba le Esau.
6Kuenje Esau wa ci mõla ndomo Isake a sumũluisa Yakoba loku u tuma ketapi lia Arama oku ka kuela ukãi, lomo poku u sumũluisa o handeleka hati, Ku ka kuẽle ukãi u Kanana. 7Wa mõlavo ndomo Yakoba a pokola ku isiaye la inaye, kuenje wa enda ketapi lia Arama. 8Eci Esau a limbuka okuti isiaye Isake ka solele akãi va Kanana, 9oco Esau wa enda ku Isameli, kuenje ukãi Mahalati, omõla a Isameli omõla a Avirahama, haeye mukai wa Nevayoti, wo vokiyako kakãi a kala lavo.
10Yakoba yu wa tunda ko Bereseva oku enda ko Harane. 11Wa pitila vusenge umue kuenje haimo a lala omo ekumbi lia iñila ale. Wa nyañula ewe limue lia kalako, wa li kapa kovitue, wa kunamẽlako, kuenje wa pekela. 12Oco wa lota onjoi yokuti osikata ya tunda posi, utue wayo wa pitila toke kilu, kuenje kua kala olomunga via Suku, evi vi londa, evi vi loka. 13Yehova wa talama kilu liayo, wa linga hati, Ame ndi Yehova, Suku ya sekulu yove Avirahama, haime ndi Suku ya Isake. Osi eyindeti wa pekela ndi yeca kokuove, lombuto yove. 14Ombuto yove yi linga ndeseke lioposi, lovitumbulukila viove vienda kutakelo lokutundilo, ko Norte loko Sul. Apata osi okilu lieve a sumũluhila kokuove lokombuto yove. 15Ocili, ame ñasi kumue love. Hu lava lava kuosi wenda, kuenje hu nena vali vofeka yilo. Si ku yanduluka toke nda linga eci nda likuminya love. 16Yakoba yu wa pasuka kotulo, wa linga hati, Ocili muẽle, Yehova o kasi vusenge ulo, kuenje sia ci kulĩhile. 17Yu wa yokoka hati, Usenge ulo u kola, palo ocili ponjo ya Suku, haipo pombundi yokilu.
18Yakoba yu wa pasuka omẽle, wa nyañula ewe a kunamelele, wa li sembika ndongunji, kuenje wa itilako ulela. 19Yu wa luka onduko yusenge waco hati, Betele, puãi onduko yimbo liaco kefetikilo ya kaile Lusi. 20Yakoba yu wa lisila ocisila hati, Nda Suku o kala lame ha ndava ndava konjila yange ngendela, loku ngavela ombolo yokulia, luwalo woku wala, 21okuti niukila vali lombembua konjo ya tate, oco ndinga siti, Yehova eye Suku yange; 22kuenda vali ewe eli nda sembika ndongunji li linga onjo ya Suku. Cosi o nyiha hu tepelako onepa yekui.
Currently Selected:
EFETIKILO 28: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
