EFETIKILO 29
29
1Yakoba wa enda lungende waye, wa pitila kofeka yomanu vokonano. 2Eci a petula ovaso wa mõla ocisimo vusenge, loviunda vitatu violomeme via vutamapo; momo kocisimo caco oko va nyuisaila oviunda. Komẽla wocisimo kua tuvikiwa ewe linene. 3Eci oviunda viosi vi liongoluilako, oco angombo va tuvula ewe liaco komẽla wocisimo ha va nyuisa olomeme; noke va tuvikako vali ewe komẽla wocisimo.
4Yakoba yu wa popia lavo hati, Akuetu, ene hẽ, wa tunda pi? Ovo vati, Etu tu va Harane. 5Eye wa va pula hati, Wa kũlihi Lavane, omõla a Nahore? Vati, Tuo kuliha. 6Wa va pula hati, O kasi ciwa? Vati, O kasi ciwa; omõlaye Rahele viyo lolomeme. 7Eye hati Ekumbi handi lia lua, halioko ekumbi lioku ongolola ovinyama; nyuisi olomeme, kuendi, ka vi lisi vali. 8Ovo vati, Ka tu ci tẽla toke oviunda viosi vi ongoloka, kuenje tu tuvula ewe komẽla wocisimo loku nyuisa olomeme.
9Osimbu a kala loku vangula lavo Rahele weya lolomeme via isiaye, omo eye o vi lisa lisa. 10Oco eci Yakoba a mõla Rahele, omõla a Lavane nyohonu yaye, kuenda olomeme via Lavane nyohonu yaye, oco Yakoba wa kokela, wa tuvula komẽla wocisimo kuenje wa nyuisa olomeme via Lavane nyohonu yaye. 11Yakoba yu wa sipula Rahele kuenje wa kaluka oku lila. 12Oco Yakoba wa lisitulula ku Rahele okuti eye ocimumba ca isiaye, kuenda okuti eye omõla a Rebeka; kuenje Rahele wa lupuka oku ka sapuila isiaye.
13Eci Lavane a yeva ondaka ya Yakoba, omõla a mũkai waye, oco wa yoloka, wa ñualehela laye; wo kuata, wo sipula, wo tuala konjo yaye. Kuenje Yakoba wa sapuila Lavane ovina evi viosi. 14Lavane yu wa popia laye hati, Ocili, ove vukepa liange, haive vusitu yange. Kuenje Yakoba wa kala laye osãi.
15Oco Lavane wa popia la Yakoba hati, Omo vucimumba cange o mbumba nga ocali? Nukuile ofeto yove. 16Lavane wa kala lomãla vakãi vavali; onduko yukulu Lea, onduko yumãlehe waco Rahele. 17Ovaso a Lea a kasi loluhopio, Rahele puãi wa posoka, haeye ondambi. 18Yakoba wa sola Rahele, kuenje wa linga hati, Ndi vumbila omõlove umãlehe Rahele, anyamo epanduvali. 19Lavane wa kumbulula hati, Ciwa oku weca kokuove, oku weca kulume wiñi hacoko. Kala ño lame. 20Oco Yakoba wa vumbila Rahele anyamo epanduvali, kuenje wa ci sokisa ndoloneke viaño omo wo sola ca lua.
21Yakoba yu wa popia la Lavane hati, Nyihe ukãi wange si litokeka laye, momo oloneke viange via tẽla. 22Lavane wongolola alume vovimbo liaye, kuenje wa lingisa okulia. 23Puãi onõlosi wa katuka lomõlaye Lea, kuenje wo tuala ku Yakoba; oco Yakoba wa litokeka laye. 24Eye Lavane wa eca ufeko waye Silipa komõlaye Lea ha lingi ufeko waye. 25Eci kua ca omẽle, ota, ca kala Lea. Yakoba yu wa popia la Lavane hati, Oco hẽ, wa ci ndingila nye? Ha Rahele ko hẽ nda ku vumbila? Nye wa ñembela? 26Lavane wa kumbulula hati, Hacoko va lingainga kulo okuti va kuẽlisa umãlehe osimbu nuñulu yaco ka kuẽlele handi. 27Tẽlisa ño osimanu yaye, oco tu ku ihavo ukuavo ha ku u vumbila vali epanduvali likuavo lianyamo. 28Yakoba wa ci linga kuenje wa tẽlisa osimanu yaye. Lavane yu wo wiha omõlaye Rahele ha lingi ukãi waye. 29Kuenje Lavane wa eca ufeko waye Biliha komõlaye Rahele ha linga ufeko waye. 30Oco Yakoba wa litokekavo la Rahele, kuenje wa sola ca lua Rahele, Lea ci sule, yu wo vumbila vali epanduvali likuavo lianyomo.
31Eci Yehova a mõla okuti Lea wa suvukiwa, oco wa situlula vimo liaye; Rahele wa kala ño osiũle. 32Lea we mina, wa cita omõla ulume kuenje wo luka Ruvene, hati, Ocili Yehova wa vanja ohali yange, kaliye veyange o sola. 33Yu we mina vali, wa cita omõla ulume, kuenje hati, Omo Yehova a yeva okuti nda suvukiwa oco wa nyiha vali omõla u; yu wo luka Simeone. 34We mina vali, wa cita vali omõla ulume, kuenje wa linga hati, Cilo veyange o namelẽla, momo ndo citila omãla vatatu valume. Oco onduko yaye ya lukiwa Lewi. 35Yu we mina vali, wa cita vali omõla ulume, kuenje wa linga hati, Cilo sivaya Yehova, oco wo luka Yuda; kuenje wa talama oku cita.
Currently Selected:
EFETIKILO 29: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
