EFETIKILO 30
30
1Eci Rahele a mõla okuti ka kasi oku cita la Yakoba, oco Rahele wa kuatela huvaye Lea esepa, yu wa popia la Yakoba hati, Nyihe omãla, nda hacoko, ndi fa. 2Yakoba wa temela Rahele, wa popia laye hati, Ame nga ñasi komangu ya Suku u wa ku tateka oku cita? 3Oco Rahele hati, Ufeko wange Biliha yu, litokeka laye ha citila kolongolo viange okuti ndaño ame muĩla epata kokuaye. 4Oco wa wiha ufeko waye Biliha ha lingi ukãi waye, kuenje Yakoba wa litokeka laye. 5Leye Biliha we mina, wa citila Yakoba omõla ulume. 6Rahele yu wa linga hati, Suku wa netuluila, kuenje wa yeva ondaka yange, wa nyiha omõla ulume. Oco wo luka Dani. 7Biliha, ufeko wa Rahele, yu we mina vali, wa citila Yakoba omõla ulume wavali. 8Kuenje Rahele wa linga hati, Nda liyaka la huvange uyaki wa lua kuenje nda yula; yu wo luka Nafitali.
9Eci Lea a limbuka okuti ka citi vali, oco wa nyañula Silipa ufeko waye, wo weca ku Yakoba ha lingi ukãi waye. 10Leye Silipa, ufeko wa Lea, wa citila Yakoba omõla ulume. 11Lea yu wa linga hati, Ociluli! kuenje wo luka Gadi. 12Silipa, ufeko wa Lea, wa citila Yakoba omõla ulume wavali. 13Lea yu wa linga hati, Esanju liange! momo akãi va sanjukila, oco wo luka Asiere.
14Koloneke vioku ungula otiliku Ruvene wa enda kepia oku sandiliya ovihemba violucito, kuenje wa vi nena ku inaye Lea. Rahele yu wa popia la Lea hati, Va nyiheko tumue otuvihemba tuolucito tua kopile omõlove. 15Lea wa kumbulula hati, Eci wa nambula ale veyange ci sule, okuti lopo o yongola oku tambula vali ovihemba violucito via kopile omõlange? Rahele yu wa linga hati, Nda oco eye o pekela love uteke ulo mekonda liovihemba violucito via kopile omõlove. 16Koñolosi eci Yakoba a tiuka kepia, oco Lea wo landula, wa linga hati, O lala lame, momo nda ku fetela ovihemba violucito via kopile omõlange. Yu wa pekela laye uteke waco. 17Suku yu wa tava ku Lea, kuenje we mina, wa citila Yakoba omõla ulume watãlo. 18Lea wa linga hati, Suku wa muisa onima yange momo nda eca ufeko wange ku veyange; kuenje wo luka Yisakare. 19Eye Lea we mina vali, wa citila Yakoba omõla ulume wepandu. 20Lea wa linga hati, Suku wa muisa ombanjaile ya posoka, kaliye veyange o tunga lame momo nda citila omãla valume epandu, kuenje wo luka Sevulono. 21Kovaso yaco wa cita omõla ukãi, wo luka onduko hati, Dina. 22Oco Suku wa ivaluka Rahele, kuenje Suku wa tava oku situlula vimo liaye. 23Yu we mina, wa cita omõla ulume, wa linga hati, Suku wa njupa esepu liange. 24Kuenje wo luka Yosefe, hati, Yehova a mbokiyeko omõla ukuavo.
25Kovaso yoku cita Yosefe, Yakoba wa popia la Lavane hati, Ñatule, ngende kolietu, kofeka yetu. 26Va nyihe akãi vange, lomãla vange ava nda ku vumbila, oco ngende. Ocili ove wa kulĩha upange owu nda ku vumbila. 27Lavane wa popia laye hati, Ndinge ohenda oco mbangule love, momo nda taha kuenje nda limbuka okuti Yehova wa sumũluisa omo ove wa kala lame. 28Oco, nukuile ofeto o yongola kuenje hu yiha. 29Yakoba wo kumbulula hati, Ove wa kuliha ndomo nda ku vumbila, lomo ovinyama viove via kala lame. 30Osimbu sieyile, eci wa kaile laco citito; cilo ca linga ca lua, kuenje Yehova wa ku sumũluisila kupange wange. Cilo puãi eteke li pi nalavayela epata liange? 31Lavane hati, Hu iha nye? Yakoba hati, Lacimue o nyiha. Nda o tava oku ndingila eci mopia love cilo, oco niuka vali kupange woku lisa ocunda cove, loku ci lava. 32Nda ku pinga okuti etali mita vocunda cove cosi, njupamo olomeme viosi via mañana, levi vi kuete atumba, kuenda otumeme tuosi tu tekava. Njupamovo olohombo viosi via mañana, levi vi kuete atumba. Kuenje ovio vi linga ofeto yange. 33Noke kovaso, eci wiya oku sokiya lame, oco esunga o sanga kokuange olio li ku tukuila ndeci o feta. Pokati kolohombo ñasi lavio, nda pa sangiwa evi ka vi mañana pamue ka vi kuete atumba, kuenda vali nda pokati kotumeme pa sangiwa tumue ka tu tekava, ca lomboloka okuti via iviwa. 34Lavane yu wa linga hati, Omo muẽle, ci lingiwe ndomo wa popia. 35Eteke liaco eli Lavane wa tepako ovitupi violohombo vi kuete amiongo latumba, lolomange violohombo viosi vi mañana levi vi kuete atumba, cosi ci kuete pamue pa yela, kuenda viosi vi tekava pokati kolomeme, ha vi eci povaka vomãla vaye. 36Yu wa tepisila omãla vaye la Yakoba ocinala ca soka lungende woloneke vitatu; kuenje Yakoba wa lisa ocunda ca Lavane ca sialapo.
37Yakoba yu wa liangiliyila ovisiota vitalala vioviti vialamu levi viavelera levi via platanu, wa suvako ovinondolo vi yela, ha mõlehisa ci yela pokati kovisiota. 38Yu wa kapa ovisiota a suva kovaso yoviunda vakula lovovikulungu viovava omu oviunda vieyaiya oku nyuila. Kuenje momo vie minila eci vieya oku nyua, 39ca lomboloka okuti oviunda vie mina kovaso yovisiota, oco ovindu via cita cita evi vi kuete amiongo levi vi mañana kuenda atumba. 40Otumeme tuaco Yakoba wa tu tepako, ocunda caco wa cimbisa ovaso koviunda viamiongo, kuenda viosi vi tekava vocunda ca Lavane; kuenje wa tepako oviunda viaye, ka vi kapele vocunda ca Lavane. 41Olonjanja viosi eci olomeme vi kuete ongusu vi londiwa, Yakoba wa kapa ovisiota viaco kovaso yolomeme povikulungu, ndokuti vi minila pokati kovisiota. 42Puãi eci olomeme ka via pamele vieya, eye ka kapeleko ovisiota; okuti evi ka via pamele ovio via linga via Lavane, levi via pama ovio via linga via Yakoba. 43Oco Yakoba wamako ca lua cimue, wa fuka oviunda via lua, lafeko lakuenje lolongamelo kuenda ovimbulu.
Currently Selected:
EFETIKILO 30: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
