EFETIKILO 31
31
1Noke Yakoba wa yeva olondaka viomãla va Lavane omo va popia vati, Yakoba wa yombolola cosi ca tate, kuenje ulamba waco wosi owu wo limuisila lukuasi wa tate. 2Yakoba layevo wa limbuka ocipala ca Lavane okuti ka ci kasi ciwa laye ndeci ca kaile osimbu. 3Yehova yu wa popia la Yakoba hati, Tiukila kofeka yolosekulu viove lokovangandiove, lame ha kala love. 4Yakoba yu wa tumila Rahele la Lea ha veya kusenge oku kua kala ocunda caye. 5Wa popia lavo hati, Ndete ocipala ca isiene okuti ka ci kasi vali ciwa lame ndeci ca kaile osimbu, puãi Suku ya tate wa kala lame. 6Ene muẽle vu ci okuti nda vumbila isiene longusu yange yosi, 7haimo isiene wa niaña niaña ha pongolola ofeto yange ekui liolonjanja. Puãi Suku ka tavele okuti o ndinga lãvi. 8Omo eci a linga hati, Vi mañana vi linga ofeto yove, oco oviunda viosi via cita cita evi vi mañana. Eci a linga hati, Viamiongo vi linga ofeto yove, oco oviunda viosi via cita viamiongo. 9Ca lomboloka okuti Suku wa nyẽha ovinyama ku isiene ha vi eci kokuange. 10Eteke limue kotembo yoku londiwa nda petula ovaso, kuenje konjoi nda mõla okuti ovitupi via londa londa kolomange vievi viamiongo, levi vi mañana, levi viatumba. 11Kuenje omunga ya Suku ya popia lame vonjoi yiti, A Yakoba! Ame siti, Ame ulo. 12Oyo yiti, Petula handi ovaso ove, vanja ndomo ovitupi viosi via londa londa kolomange vievi viamiongo, levi vi mañana levi viatumba, momo nda mõla cosi ca ku linga Lavane. 13Ame ndi Suku ya Betele kuna wa wavekele ongunji, kuenje wa lisila ocisila lame. Kaliye katuka, tunda vofeka yilo, tiukila vali kofeka va ku citila. 14Rahele la Lea vo tambulula vati, Kuli vali onepa yetu pamue ocipañalo cetu vonjo ya isietu? 15Ka tu kasi ño kokuaye ndovingendeleyi? Momo wa tu landisa kuenje wa lia olombongo viaco viosi. 16Momo ukuasi wosi Suku a sembulola ka isietu, wetu lomãla vetu. Oco, cosi ca ku sapuila Suku linga ño.
17Yakoba yu wa katuka, wa londisa omãla vaye valume lakãi vaye kolongamelo. 18Wambata ovinyama viaye viosi lukuasi wosi a fũla, ocikumba caye lovinyama vina a fũkila kuna ketapi lia Arama, ha endi ku isiaye Isake vofeka ya Kanana. 19Otembo yaco wa enda oku ka pemuisa olomeme viaye, kuenje rahele wa iva oviteka via isiaye. 20Yakoba yu wa yomboloka Lavane u Suria, ko sapuilile hati, Ngenda. 21Oco wa yomboloka lovina viosi a kuete. Wa katuka, wa yoka olui lua Ferati, kuenje wa imba ovaso kofeka yolomunda ya Gileada.
22Keteke liatatu eci va sapuila Lavane vati, Yakoba wa yomboloka, 23Lavane wa konga vakuavo, wo landula oloneke epanduvali, toke wo sanga vofeka yolomunda ya Gileada. 24Puãi Suku weya ku Lavane u Suria konjoi kuteke, wa popia laye hati, Lunguka, ku ka popie cimue la Yakoba, ndaño ciwa ndaño cĩvi.
25Lavane yu wa palavela Yakoba. Yakoba wa tamũlula ombalaka yaye vofeka yolomunda. Lavane layevo la vakuavo va tamũlula vofeka yolomunda ya Gileada. 26Lavane wa pula Yakoba hati, Wa ci lingila nye oku njomboloka ño loku ambata omãla vange vakãi, hoti ño va kuatiwa lovita? 27Nye wa tilila ño uyombeki loku ndimbika? Nye kua sapuilile okuti nda nda ku katula lonjolela lovisungo lolombendo lalimba? 28Nye kua nyihilile evelo lioku liusika lomãla vange valume, lomãla vange vakãi loku va sipula? Wa linga uveke kelinga eli. 29Nẽla muẽle oku ku linga lãvi, puãi Suku ya so wa popia lame uteke wa hẽla hati, Lunguka, ku ka popie cimue la Yakoba, ndaño ciwa ndaño cĩvi. 30Ocili, cilo o kasi vonjila, omo wa kuata ca lua ongeva yokonjo ya so, puãi nye wa ivila oviteka viange? 31Yakoba wa tambulula Lavane hati, Momo nda kuata usumba siti, sanga o nyẽha omãla vove vakãi. 32U o sangiwa loviteka viove ka kala lomuenyo, Kovaso a vakuetu limbuka cosi cove ñasi laco, kuenje ci tambula. Yakoba ka kulihile okuti Rahele wa viva.
33Oco Lavane wa iñila vombalaka ya Yakoba, kuenda vombalaka ya Lea, kuenda vombalaka yafeko vaco vavali, kuenje ka vi sangelemo. Yu wa tunda vombalaka ya Lea, wa iñila vombalaka ya Rahele. 34Rahele puãi wa nyañula ale oviteka viaco, wa vi kapa kovikuata viongamelo, kuenje wa tumãla kilu liavio. Lavane wa vanja vombalaka yosi, ka vi sangelemo. 35Rahele yu wa popia la isiaye hati, Ku ka ci suvuke ño a cime cange omo si ci tẽla oku votoka, momo ñasi kocituwa. Yu wa sandiliya oviteka viaco, puãi ka vi sangelemo.
36Oco Yakoba wa tema, kuenje wa popia Lavane. Yakoba wa pula Lavane hati, Nda lueya ndati? Ekandu liange lie wa ndanduila lonjanga? 37Ndaño wa vanja vovikuata viange viosi wa sangamo nye ci tiama kovikuata viosi vionjo yove? Ci tumbika kulo kovaso avakuetu okuti ovo muẽle va tu tetuluila. 38Akui avali kanyamo nda kala love. Olomange violomeme viove lolohombo viove ka via pulumuile, ovitupi vioviunda viove sia vi lile. 39Ca soyuiwa lovinyama via tema sia ci nenele kokuove, ame muẽle nda condolola, kuenje wa ci vanjela peka liange, nda ca iviwa kuteke, nda ca iviwa kutanya. 40Oco nda kala. Kutanya enyona lia ndia, kuteke ombambi, otulo tua tila kovaso ange. 41Akui avali kanyamo nda kala vonjo yove, nda ku vumbila omãla vove vavali ekui lianyamo kanyamo akuãla, anyamo epandu nda vumbila ocunda cove kuenje wa pongolola ofeto yange olonjanja ekui. 42Nda Suku ya tate, haeye Suku ya papakulu Avirahama, una wa sumbiwa la Isake, ka kaile lame, ove nda wa nundisa upolokoso. Suku wa vanja kohali yange lo kupange wovaka ange, kuenje wa ku lemẽla uteke.
43Lavane wa tambulula Yakoba hati, Omãla vaco vakãi omãla vange, lomãla vavo haivo omãla vange, loviunda viaco oviunda viange, cosi o lete cange. Puãi etali ndinga ndati lomãla vange vakãi, lomãla vavo va va cita? 44Cilo love lame tu lisila ocisila, ha ci lingi nduvangi pokati ketu. 45Oco Yakoba wa nyañula ewe, wa li sembika ndongunji. 46Kuenje Yakoba wa pañinya vakuavo hati, Ongololi ovawe. Oco va nyañula ovawe, va longeka ondunda, kuenje ponele yondunda opo va lila. 47Lavane wa yi tukula hati, Ondunda yuvangi. Yakoba wa yi tukulavo hati, Ondunda yuvangi. 48Lavane yu wa linga hati, Etali ondunda eyi yi linga ombangi pokati kove lame. Oco onduko yayo ya lukiwa Galete, 49kuenda Misipa, momo hati, Yehova a tu lavulule, love lame, osimbu tua litepa omunu lokuavo. 50Nda o linga lãvi omãla vange vakãi, pamue o vokiyako vali akãi vakuavo komãla vange, ivaluka okuti ndaño ka kuli omunu imba uvangi, haimo Suku eye ombangi pokati ketu.
51Lavane wa popia la Yakoba hati, Tala ondunda eyi nda longeka, longunji nda sembika pokati ketu. 52Ondunda eyi ombangi, longunji layovo ombangi okuti ame si pitahãla ondunda eyi loku iya kokuove, love ku pitahãla ondunda eyi longunji eyi hu iya kokuange, ha tu lilingi lãvi. 53Suku ya Avirahama la Nahore, lolosekulu viavo, a linge onganji yetu. Oco Yakoba wa lisinga la Una isiaye Isake a sumba sumba. 54Yakoba yu wa lumbila ocilumba vomunda. Wa laleka vakuavo oku lia ombolo. Va lia ombolo kuenje va lala vomunda.
55Lavane wa pasuka omẽle ociteketeke, wa sipula olonekulu viaye, lomãla vaye vakãi, keunje wa va sumũluisa. Eci a ci linga oco Lavane wa votoka, wa enda koliaye.
Currently Selected:
EFETIKILO 31: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
