Jɛnɛsis 44
44
1Yosef fá eshĩa lɛ sɔ̃ɔlɔ nukpa lɛ akɛ, “Wo hii lɛ akotokui lɛ amli niyenii obɔ̃bɔ̃, bɔ ni amɛaanyɛ amɛtere, ni okɛ mɔ fɛɛ mɔ shika afɔ̃ ebele lɛ nɔ yɛ ekotoku mli, 2ni okɛ mikpulu ni ji mijwiɛtɛi kpulu lɛ afata abele shika lɛ he okɛfɔ̃ gbekɛ fe fɛɛ lɛ abele lɛ nɔ yɛ ekotoku lɛ mli.” Sɔ̃ɔlɔ lɛ fee bɔ ni Yosef kɛɛ lɛ lɛ. 3Leebi be ni hiɛ gbele pɛ ni awo Yosef nyɛmimɛi lɛ agbɛ kɛ amɛtejii lɛ. 4Be ni amɛshi maŋ lɛ mli lɛ, amɛshɛko shɔŋŋ he ko kɛkɛ ni Yosef kɛɛ eshĩa lɛ mli sɔ̃ɔlɔ nukpa lɛ akɛ, “Tee shi ni otiu gbɔmɛi lɛ ni kɛ oyanina amɛ lɛ, kɛɛmɔ amɛ akɛ ‘Mɛɛ hewɔ nyɛkɛ efɔŋ eto ekpakpa najiaŋ nɛɛ? Mɛɛba nyɛju minuŋtsɔ jwiɛtɛi kpulu lɛ? 5No minuŋtsɔ kɛnuɔ dãa, ni asaŋ no ekɛklaa. Nyɛfee efɔŋ naakpa akɛ nyɛfee enɛ.’ ”
6Be ni eyanina amɛ lɛ, eti nɛkɛ wiemɔi ni Yosef wie nɛɛ mli ehã amɛ. 7Amɛhã hetoo akɛ, “Mɛɛ hewɔ minuŋtsɔ wieɔ nɛkɛ wiemɔi nɛɛ? Kpaoo, otsuji nyɛŋ nɛkɛ nɔ ko afee. 8#Jɛn 43.22 Shika lɛ ni wɔna jwere wɔbele lɛ nɔ yɛ wɔkotokui lɛ amli lɛ, bɛ wɔkɛku sɛɛ kɛjɛ Kanaan shikpɔŋ lɛ nɔ tɔ̃ɔ wɔkɛbahã bo; te aaafee tɛŋŋ mɔ ni wɔɔju jwiɛtɛi loo shika yɛ onuŋtsɔ lɛ shĩa mli hu? 9Otsuji nɛɛ ateŋ mɔ fɛɛ mɔ dɛŋ ni aaana yɛ lɛ, gbo eeegbo; ni wɔ hu wɔtsɔ̃mɔ minuŋtsɔ nyɔji.”
10Ni sɔ̃ɔlɔ nukpa lɛ here nɔ ekɛɛ, “Afee bɔ ni nyɛkɛɛ lɛ; mɔ dɛŋ ni aaana yɛ lɛ eeetsɔ̃ minyɔŋ, shi nyɛ mɛi ni aaashwɛ lɛ sɔ̃ ko ewulaŋ nyɛyi.” 11Kɛkɛ ni amɛhe fee oya, ni amɛtotoo amɛjatsui lɛ amɛmamɔ shi, ni amɛfɛnefɛnee amɛkotokui lɛ anaa. 12Yosef sɔ̃ɔlɔ nukpa lɛ bɔi kpulu lɛ taomɔ kɛjɛ onukpa lɛ nɔ, ni eyagbe naa yɛ gbekɛ fe fɛɛ lɛ nɔ; ni eyana kpulu lɛ yɛ Benyamin kotoku lɛ mli. 13#Jɛn 37.29 Kɛkɛ ni amɛkɛ dɔlɛ gbalagbalaa amɛhe atadei; ni amɛteŋ mɔ fɛɛ mɔ wo ejatsu etere eteji, ni amɛku amɛsɛɛ kɛba maŋ lɛ mli.
14Be ni Yuda kɛ enyɛmimɛi lɛ bashɛ Yosef shĩa lɛ, Yosef yɛ jɛi lolo; ni amɛho amɛgbeegbee shikpɔŋ yɛ ehiɛ. 15Yosef kɛɛ amɛ akɛ, “Mɛni pam nyɛfee nɛɛ? Ani nyɛleee akɛ gbɔmɔ ni tamɔ mi lɛ, ele klamɔ̃ lo?”
16 #
Jɛn 42.21-22
Yuda here nɔ akɛ, “Mɛni wɔbaakɛɛ minuŋtsɔ? Mɛɛ wiemɔ kwraa yɔɔ wɔnaa? Aloo te wɔbaajie wɔnaa wɔhã tɛŋŋ? Nyɔŋmɔ ena otsuji anɔsha lɛ; naa, wɔtsɔ̃mɔ minuŋtsɔ nyɔji, wɔ kɛ mɔ dɛŋ ni ana kpulu lɛ yɛ lɛ fɛɛ.”
17Shi Yosef kɛɛ akɛ, “Kpaoo! Enɛ akagbale mi fɔ̃ŋfɔ̃; mɔ dɛŋ ni ana kpulu lɛ yɛ lɛ, lɛ kɛkɛ eeetsɔ minyɔŋ; shi nyɛ mɛi ni eshwɛ lɛ, nyɛyaa nyɛtsɛ ŋɔɔ yɛ hejɔlɛ mli.”
Yuda kpa Benyamin he fai
18Kɛkɛ ni Yuda tsi ebɛŋkɛ Yosef ni ekɛɛ, “Ofainɛ, minuŋtsɔ, hã otsulɔ awie nɔ kome pɛ, ni minuŋtsɔ abo mi toi ni kaahã omli wo otsulɔ la ejaakɛ otamɔ Farao diɛŋtsɛ nɔŋŋ. 19#Jɛn 42.7, 13; 43.1-5 Minuŋtsɔ bi etsuji akɛ, ‘Ani nyɛyɛ tsɛ loo nyɛmi nuu ko?’ 20Ni wɔkɛɛ minuŋtsɔ akɛ, ‘Wɔyɛ tsɛ nuumo kɛ nyɛmi nuu gbekɛ ni ji wɔtsɛ nakutsoŋbi. Gbekɛ nɛɛ enyɛbi lɛ egbo; ni lɛ ji enyɛbi koome ni eshwɛ; ni etsɛ sumɔɔ lɛ.’ 21Kɛkɛ ni okɛɛ otsuji akɛ, ‘Nyɛyaŋɔa lɛ kɛbaa koni mana lɛ kɛ mihiŋmɛi.’ 22Ni wɔkɛɛ minuŋtsɔ akɛ, ‘Gbekɛ lɛ nyɛŋ etsɛ eshi, ejaakɛ kɛji eshi etsɛ lɛ, etsɛ baagbo.’ 23Kɛkɛ ni okɛɛ otsuji akɛ, ‘Kɛji nyɛkɛ nɛkɛ nyɛnyɛmi gbekɛ nɛɛ baaa lɛ, nyɛnaŋ mihiɛ dɔŋŋ.’
24“Be ni wɔku wɔsɛɛ wɔtee mitsɛ, otsulɔ lɛ ŋɔɔ lɛ, wɔgba lɛ wiemɔi ni minuŋtsɔ wie lɛ fɛɛ. 25No hewɔ lɛ, be ni wɔtsɛ kɛɛ akɛ, ‘Nyɛyaa ekoŋŋ ni nyɛyahea niyenii fioo ko nyɛbahãa wɔ’ lɛ, wɔkɛɛ lɛ akɛ, 26‘Wɔnyɛŋ wɔya, shi kɛji wɔnyɛmi gbekɛ lɛ fata wɔhe lɛ, no lɛ wɔɔtee; shi wɔnyɛŋ nuu lɛ hiɛ wɔna akɛ ja wɔnyɛmi gbekɛ lɛ fata wɔhe dã.’ 27Kɛkɛ ni mitsɛ, otsulɔ lɛ, kɛɛ wɔ akɛ, ‘Nyɛ diɛŋtsɛ nyɛle akɛ miŋa Rahel, lɛ ekɛ mi fɔ bihii enyɔ; 28#Jɛn 37.32-33 mɔ kome eshi mi ni mikɛɛ akɛ, tserɛmɔ nɔŋŋ kɛ̃ kooloo ko etserɛ emli lɛ, ni minako lɛ kɛbashi ŋmɛnɛ. 29#Jɛn 42.38 Kɛji nyɛŋɔ mɔ nɛ hu yɛ mihe kɛtee ni osharã ko yasharã lɛ lɛ, no lɛ he ni migbɔ kɛshɛ kɛ miyiteŋ waŋ nɛɛ, nyɛbaahã magbo kɛ awerɛhoo.’
30“No hewɔ lɛ, agbɛnɛ, kɛji mitee mitsɛ otsulɔ ŋɔɔ, ni gbekɛ lɛ fataaa wɔhe lɛ, akɛni ewala ji gbekɛ lɛ wala lɛ, 31kɛ ena akɛ gbekɛ lɛ bɛ wɔteŋ lɛ, eeetswa shi egbo; ni bɔ ni otsulɔ egbɔ kɛ eyiteŋ waŋ nɛɛ, otsuji aaahã egbo kɛ awerɛhoo. 32#Jɛn 43.9 Ejaakɛ otsulɔ kɛ ewala to mitsɛ awaba yɛ gbekɛ lɛ najiaŋ akɛ, ‘Kɛji mikɛ gbekɛ lɛ ekuuu sɛɛ ebahãaa bo lɛ, no lɛ no sɔ̃ lɛ atere mi yɛ mitsɛ hiɛ miwala bei abɔ fɛɛ.’ 33No hewɔ lɛ, agbɛnɛ, ofainɛ, hã otsulɔ ahi biɛ akɛ minuŋtsɔ nyɔŋ yɛ gbekɛ lɛ najiaŋ koni ohã gbekɛ lɛ kɛ enyɛmimɛi lɛ aku sɛɛ aya. 34Ejaakɛ te mafee tɛŋŋ maku misɛɛ maya mitsɛ ŋɔɔ kɛji gbekɛ lɛ fataaa mihe hu? Nɔ ni baafee mitsɛ lɛ minyɛŋ makwɛ kɛ mihiŋmɛi.”
Currently Selected:
Jɛnɛsis 44: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
