KA BUKE MUA A MOSE, I KAPA ʻIA KINOHI 32
32
MOKUNA XXXII.
1 Ko Iakoba hihiʻo ma Mahanaima. 3 Kāna mau ʻelele iā ʻEsau. 6 Kona makaʻu. 9 Kāna pule. 13 Kāna makana no ʻEsau. 24 Ka hākōkō ʻana o kekahi me Iakoba. 28 Kapa ʻia ʻo ia ʻo ʻIseraʻela. 31 Kona kapeke ʻana ma ka ʻūhā.
1¶ Hele akula ʻo Iakoba i kona hele ʻana, a hālāwai maila nā ʻānela o ke Akua me ia.
2A ʻike akula ʻo Iakoba iā lākou, ʻī akula ia, “ʻO ka pūʻali kaua kēia o ke Akua”; a kapa ihola ia i ka inoa o ia wahi, ʻo Mahanaima.
3¶ Hoʻouna akula ʻo Iakoba i nā ʻelele i mua ona i o ʻEsau lā i kona kaikuaʻana, ma ka ʻāina ʻo Seira, ʻo ia ka ʻāina ʻo ʻEdoma.
4Kauoha akula ia iā lākou, ʻī akula, “Penei kā ʻoukou e ʻōlelo aku ai i kuʻu haku, iā ʻEsau; ‘Ke ʻī mai nei ʻo kāu kauā ʻo Iakoba penei, “Ua noho pū au me Labana, ua kali aku nō wau i laila a hiki i nēia manawa.
5“Iaʻu nō nā bipi, nā hoki, nā holoholona, me nā kauā kāne a me nā kauā wahine; a ua hoʻouna aku nō wau e haʻi aku i kuʻu haku, i loaʻa iaʻu ke aloha ʻia i mua o kou maka.”’”
6Hoʻi hou maila nā ʻelele i o Iakoba lā, ʻī maila, “Hele akula mākou i kou kaikuaʻana i o ʻEsau lā; a ke hele mai nei hoʻi ʻo ia e hālāwai me ʻoe, a me ia nā haneri kānaka ʻehā.”
7A laila, makaʻu nui ihola ʻo Iakoba, a ua pilikia loa; mahele aʻela ʻo ia i nā kānaka me ia, i nā holoholona, i nā bipi a me nā kāmelo, ʻelua poʻe.
8ʻĪ akula, “Inā e hele mai ʻo ʻEsau, a pepehi mai i kekahi poʻe, a laila e pakele ka poʻe i koe.”
9ʻĪ akula ʻo Iakoba, “E ke Akua o kuʻu kupuna kāne ʻo ʻAberahama, ke Akua o kuʻu makua kāne ʻo ʻIsaʻaka, e Iēhova, ka mea nāna i ʻōlelo mai iaʻu, ‘E hoʻi hou aku ʻoe i kou ʻāina, a i kou poʻe hoahānau, a e lokomaikaʻi aku nō au iā ʻoe,’
10“ʻAʻole au e pono no nā lokomaikaʻi a pau a me ka ʻoiaʻiʻo a pau āu i hōʻike mai ai, i kāu kauā nei; no ka mea, me kuʻu koʻokoʻo iho i hele mai ai au ma kēia kapa o Ioredane; a ua lilo nō wau ʻānō i ʻelua poʻe.
11“Ke pule aku nei au iā ʻoe, e hoʻopakele aʻe ʻoe iaʻu mai ka lima aku o kuʻu kaikuaʻana, mai ka lima o ʻEsau; no ka mea, ke makaʻu nei au iā ia, o hele mai nei ʻo ia e pepehi mai iaʻu me ka makuahine a me nā kamaliʻi.
12“Ua ʻōlelo mai ʻoe, ʻE lokomaikaʻi ʻiʻo nō wau iā ʻoe, a e hoʻonui au i kāu poʻe mamo e like me ke one o ke kai, ʻaʻole e pau lākou i ka helu ʻia no ka lehulehu.’”
13¶ Moe ihola ia ma laila ia pō; lālau akula ia i nā mea i loaʻa i kona lima, i makana na kona kaikuaʻana, na ʻEsau:
14i ʻelua haneri kao wahine, me nā kao kāne he iwakālua; ʻelua haneri hipa wahine, me nā hipa kāne he iwakālua,
15he kanakolu kāmelo waiū, me kā lākou mau keiki; he kanahā bipi wahine, me nā bipi kāne he ʻumi; he iwakālua hoki wahine a me nā hoki keiki he ʻumi.
16Hāʻawi akula ʻo ia ia mau mea i ka lima o kāna poʻe kauā, a kaʻawale kekahi poʻe me kahi poʻe; ʻī akula ia i kāna poʻe kauā, “E hele ʻē aku ʻoukou ma mua oʻu, a e hoʻokaʻawale i kahi poʻe me kahi poʻe.”
17Kauoha akula ia i ka mea i hele ma mua, ʻī akula, “A hālāwai mai koʻu kaikuaʻana ʻo ʻEsau me ʻoe, a nīnau mai iā ʻoe, i ka ʻī ʻana mai, ‘No wai ʻoe? Ma hea ʻoe e hele nei? Na wai hoʻi kēia poʻe ma mua ou?’
18“A laila, e ʻōlelo aku ʻoe, ‘Na kāu kauā, na Iakoba lākou nei, ua hoʻouna ʻia mai, i makana na koʻu haku na ʻEsau; eia aʻe hoʻi ʻo ia ma hope o mākou.’”
19Pēlā hoʻi ʻo ia i kauoha aku ai i ka lua a me ke kolu, a me ka poʻe a pau i hahai ma hope o nā pūʻā holoholona, i ka ʻī ʻana, “Pēlā hoʻi ʻoukou e ʻōlelo aku ai iā ʻEsau, i ka wā e loaʻa ai iā ʻoukou ia.
20“E ʻī aku hoʻi ʻoukou, ʻEia aʻe kāu kauā ʻo Iakoba ma hope o mākou.’” No ka mea, ʻī ihola ia, “E hoʻolauleʻa aku au iā ia i ka makana e hele lā ma mua oʻu, a ma hope iho e ʻike aku au i kona maka; a e maliu mai paha ia iaʻu.”
21Pēlā i hele aku ai ka makana ma kēlā kapa i mua ona; a moe pū ihola ʻo ia ia pō me ka huakaʻi.
22¶ Ala aʻela ʻo ia ia pō, lālau akula ia i kāna mau wāhine ʻelua, me kāna mau kauā wahine ʻelua, a me kāna mau keiki kāne he ʻumikumamākahi, a hele akula ma kahi pāpaʻu ʻo Iaboka ma kēlā kapa.
23Lālau akula ia iā lākou, hoʻouna akula iā lākou ma kēlā kapa o ke kahawai, a hoʻouka akula hoʻi i kāna mau mea a pau.
24ʻO Iakoba wale nō i koe; a hākōkō maila kekahi kanaka me ia, a wehe aʻela ke alaula o ke ao.
25A ʻike ihola kēlā, ʻaʻole ia i lanakila ma luna ona, papaʻi maila ia i ka hena o kona ʻūhā, a ua kapeke aʻela ka huamoa o ko Iakoba ʻūhā, i kona hākōkō ʻana me ia.
26ʻĪ maila kēlā, “E kuʻu aʻe ʻoe iaʻu; no ka mea, ke wehe maila ke alaula.” ʻĪ akula ʻo ia, “ʻAʻole au e kuʻu aku iā ʻoe, a hoʻomaikaʻi mai ʻoe iaʻu!”
27Nīnau maila kēlā iā ia, “ʻO wai kou inoa?” ʻĪ akula ʻo ia, “ʻO Iakoba.”
28ʻĪ maila kēlā, “ʻAʻole e hea hou ʻia kou inoa, ʻo Iakoba; akā, ʻo ʻIseraʻela; no ka mea, he ikaika kou i mua o ke Akua; a e lanakila hoʻi ʻoe ma luna o nā kānaka.”
29Nīnau akula ʻo Iakoba, ʻī akula, “Ke noi aku nei au iā ʻoe, e haʻi mai ʻoe iaʻu i kou inoa.” ʻĪ maila kēlā, “He aha kāu i nīnau mai ai i koʻu inoa?” A hoʻomaikaʻi maila kēlā iā ia i laila.
30Kapa akula ʻo Iakoba i ka inoa o ia wahi ʻo Peniʻela; “No ka mea, ua ʻike iho nei au i ke Akua, he maka nō he maka, a ua mālama ʻia kuʻu ola.”
31Puka maila ka lā ma luna ona i kona hele ʻana aʻe ma luna o Penuʻela, kapeke aʻela ʻo ia ma luna o kona ʻūhā.
32No ia mea, ʻaʻole e ʻai nā mamo a ʻIseraʻela i ke olonā i ʻeʻeke, ka mea ma ka ʻūhā, a hiki i kēia lā; no ka mea, papaʻi maila kēlā i ka hena o ko Iakoba ʻūhā ma ke olonā i ʻeʻeke.
Currently Selected:
KA BUKE MUA A MOSE, I KAPA ʻIA KINOHI 32: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
